مدونة تراثنا للفن الأصيل
www.Torasna.blogspot.com

كلمات: حسين السيد | الحان: محمد عبد الوهاب
من اغانى فيلم "عنبر" عام 1948
اشترك فى الغناء: اسماعيل ياسين / محمود شكوكو / عزيز عثمان / الياس مؤدب

الكلمات
اللى يقدر على قلبى يخطفه وانا اجرى وراه
و اللى يقدر على حبى يخطبه وانا اعيش وياه
وساعة إيدى ما تيجى فى إيديه احس بقلبه واشوف بعنيه
اسماعيل ياسين
اهو انا .. اهو انا .. ولا حد ينفع الا انا
شكلى صحيح ملوش دوا لكن اختصاصى فى الهوا
ماما فاتت لى فى البلد .. اطيان كتير ملهاش عدد
كان عندها اتناشر ولد مفضلش منهم الا انا
والعزبه دى فى شبرا اليمن وهابيعها بكره مقدمنا
وهاشترى بيها موقتا دبلة خطوبة حبنا
بس ارحمى .. بس اقبلى .. بس ارحمى
بس اقبلى متضيعيش مستقبلى
ليلى مراد
كلام جميل .. و كلام معقول .. مقدرش أقول حاجة عنه
لكن خيال حبيبى المجهول مش لاقيه فيك حاجه منه
محمود شكوكو
من ناحية قلبى ونار قلبى واد حبيب موت
وحبيبى لو غاب يوم عنى أرقع ميت صوت
بلدى و مدردح وإدارجى واكسب جنيهات
وبنيت م الفول و الطعميه اربع عمارات
ندرٍن عليا لو قلتى أيوه لأخلّى روحى ف إيديكى شمعة
وافرش عينيا فى كل خطوه تمشى عليهم والشمعه والعة
ليلى مراد
كلام جميل .. و كلام معقول .. مقدرش أقول حاجة عنه
لكن خيال حبيبى المجهول مش لاقيه فيك حاجه منه
عزيز عثمان
سيبك منهم دا مفيش غيرى
قيمه و مركز ووظيفه ميرى
مربوط ع الدرجه التامنه و الناس درجات
ومرشح آخد التاسعه غير العلاوات
معرفش لا كدا ولا كدا م الباب للباب
لا ليا دعوه لا بده ولا بده ولا ليا اصحاب
يعنى المهيه من الصرّاف مع العلاوه ع الانصاف
ها يكونوا ملك إيديكى نضاف
وإنشالله آكل انا عيش آكل انا عيش
ليلى مراد
كلام جميل .. و كلام معقول .. مقدرش أقول حاجة عنه
لكن خيال حبيبى المجهول مش لاقيه فيك حاجه منه
الياس مؤدب
جيتك من اخر لبنان .. مسلوب الفكر و طمعان
احظى بعيون الغزلان و اشرب من نهر الخلان
بحياة ها الورد المبدور فى خدود تحاكى البنور
بحياة من صوّرها النور ما تخلينى ارجع عطشان
نظره واحده تشبك قلبى بيها العينتين
كلمه واحده تصير معاهدة بين قلبين
نكتبها بغزل وجنون .. نبصمها بحبات عيون
وتصيرى ليلى وانا المجنون
ليلى مراد
كلام جميل .. و كلام معقول .. مقدرش أقول حاجة عنه
لكن خيال حبيبى المجهول مش لاقيه فيك حاجه منه
حبيبى عماله ادور عليك
واتاريك هنا جنبى
مفضلش غير نظرة واحدة
أفتح ليها قلبى
كلمنى ..يا شاغلنى..طمنى.. يا شاغلنى

اللى يقدر على قلبى - ليلى مراد واسماعيل ياسين وشكوكو وعزيز عثمان والياس مؤدب

مدونة تراثنا للفن الأصيل هى معنية بجمع التراث المصرى الموسيقى، نقدم اغانى زمن الفن الجميل مصحوبة بمعلومات توثيقية دقيقة
جميع الاغانى التى يتم نشرها تم تسجيلها ومعالجة الصوت بواسطة فريق عمل المدونة