- شهادة من العالم الثالث

التاريخ هيكرر نفسه بإستمرار
والأزمة لقرون جاية مرهونة بسعر الدولار
والدول كل مدى تكبر عن الحدود
والحرب دلوقتي عادي تبقى من غير جنود.

العالم بيتطور 
وكل حاجة فيه بتزيد أهمية
العالم بيكبر
وكل ما يكبر تقل الإنسانية
العالم متقسم رأسمالية ورأسمالية
الشركاوية صُحاب الفلوس صُناع الأوهام
الشركاوية دعايا وإعلام
والمواطن متغمي عنيه
يمد رجله في المعركة لكن ميمدش للنظام إيديه

الشركات مش بتنجح براس المال
الشركات بتنجح بعرق ودم العمال
الدولة تتوسع تفقد ملكيتك
الدولة تستعمر تفقد آدميتك
كُل شئ لازم يصب نحيتك
وأنت أملك إنك تعيش
وإن مت برده مش هتظهر ع الآفيش

الحرب على دين الجينرالات
والعساكر مش هترجع الثكنات
العساكر رهن الأوامر رهن القرار
والمواطن نفس المواطن هيشيل الدمار.
العالم كل يوم بيزيد ضحايا 
باسم الإستعمار
وكل يوم بيزيد شهيد 
بإسم النضال 
كُل شئ في الدنيا أصبح عادي
وعجل الديمقراطية بيلف على الفاضي.

النهاردة كل شئ ليه معالم
والميديا بتوجه 
وبتشوه
وبتسوق
الميديا فيها حق لجوء
لكل واحد أنهزم أو أنتصر
مكان تقدر تداري فيه خوفك
تقدر تشوف فيه العالم 
لكن العالم مش هيشوفك.

كل شئ حوالينا بيتصدر حتى الأمل
إعلانات العمل في كُل مكان 
مشروطة بالخبرة 
الحل مش بره 
متبقاش غبي 
مفيش مسئول مهما كان كويس نبي 
ولا كُل أحلامك هتلاقيها في بلد أجنبي.

الأزمات ممكن تصنع دمار
وممكن تصنع فن
الأزمة مش أزمة حروب
الأزمة مش أزمة هروب
الأزمة مش أزمة شعوب
الأزمة أزمة خلق
فيه ناس بتاكل في بعض
ودول بتعيش على وعد
والحق كل ليلة يبات مغلوب
كلمة الحق مش عايزة قوالة
والحلم بات مهزوم في قلوب العِمالة
وأخاف يبقى الزمان الجاي زمان الآلة.

راس المال جبان
والخوف متحكم في السجان
والحقيقة مدهونة بالشكوك
تقدر تقف قدام الحُراس
لكن صعب تقف قدام البنوك
الهوية بتشكل السلوك العام
والماركات النهاردة أشهر من الأعلام
والحماية مرهونة بكونك ثري
الخوف أسهل وأقوى سلاح عسكري.

الدم على الخرائط
وفي الشرائط
وفي النشرة
الخوف على الصادق
وفي البنادق
وفي الخنادق
وف بكرة
كل شئ جايز يموت
إلا الفكرة
كل شئ يقبل الإستغلال
حتى الهوا والمية
حتى النَفس محسوب عليك
ومقدمكش غير المقاومة والعزيمة
والحق لابد ينتصر بعد الهزيمة

الكوكب بيتوحش 
وكل شئ النهاردة مُباح
من تجارة السلاح
لحد التجارة بالدين 
وباللائجين 
كل تصريح النهاردة يحمل معنيين
كل شئ النهاردة سهل يتفبرك
كُل حاجة النهاردة سهل تتأمرك 
ومفيش أسهل من الكلام
نوبل وحدها لا تصنع سلام! 

الجوع النهاردة بيموت بلاد 
وبيمحي معالم الوطن بأستيكات
الجوع عمره ما بيشبع 
الجوع بيضل
والعالم الغربي النهاردة بيستغل
وجود مجاعات بتنهش فيه
خط الفقر أداس عليه
النهاردة..
براءة إختراع الدوا بيتم إحتكاره
الفقر يموتنا سوا..
أو نسرق عشانه
الحُر من الحرية
والعمر فداه وطنية 
والمعاني النهاردة غشاشة 
مش كل شئ بيكون حقيقي على الشاشة.

موازين القوة بتختلف 
من مكان ل مكان
من زمان ل زمان
ويفضل الإنسان مش قادر يستوعب الحاصل
كأن الدنيا ملهاش فاصل
وكأن الدم ملوش بديل
العقل البشري بيقاوم التغيير
والدول مش مطالبة بأي تفسير
بس الشعب لازم يعدي المستحيل!
غريبة حسبة الدنيا والخرايط
غريبة عيون العساكر في التسجيلات
وفي عيون البلاد..
مهما بان فيها إنهزام 
يموت اللي يموت من أجل النظام!

هذا العالم..
 بيخلق لنفسه قوانينه
والأمل لسه محاصرينه 
هذا العالم 
يصعب وصفه 
ويصعب إقراره
عالم جنته تشبه لناره
وإحِتلاله يشبه داره
والقاتل هو المقتول
واللي باقي النهاردة 
بكرة يزول 
عالم أمله بؤس
وحَله كأنه لغز 
كل يوم..
بتتولد 
خريطة جديدة
جيوش ملايين الأعداد
بتزود تعداد الموتى
ومفيش في إيدين الشعب حلول
الحَلب بيوصل أقصاه علشان براميل البترول
إحنا في حسبة صعب نوزنها 
بس على الأقل نقاوم 
ونحاول بخيالنا وبالأحلام 
أعمارنا من عُمر الأيام.. 
معنيين لا يمكن يفترقوا
الحرب والسلام.

شهادة من العالم الثالث

جورج وسوف يغني مع أم كلثوم عوّدت عيني

 قلبك ليه مبيتكلمش 
زي عينيكي وزي الرمش 
ياما عيون ندهت على قلبي 
بس لغيرك مستسلمش 
وحياة شوقي وخوفي عليكي 
قولي لقلبك.. قولي لقلبك ميطولش
 شايف حبك جوه عيونك 
شوقها تملي يبان ويخونك
كل منايا ف بحر جنونك
إن عيونك مبتكدبش
 انا حبيتك واتمنيتك
 وأما نداني الشوق غنيتك 
قولت بحبك بس ياريتك 
حبك ليا ميتغيرش 
وحياة شوقي وخوفي عليكي 
قولي لقلبك قولي لقلبك 
قولي لقلبك ميطولش.
- علاء عبد الخالق

علاء عبد الخالق - قلبك ليه

مدمن اللحظات الأخيرة 
والذكريات النادرة 
وصديق دايم للنوبات
وصياد لريحة الكولنيات ف المواصلة
وصاحب اخر نفس دخان قبل ركوب الباص 
كاشف الايام والناس 
وبكتب اسمي بالمطر ع الشيش
تبقي انتي اللي غايبة عايشة
وانا اللي عايش ما بعيش
صديق عربيات الفول ف الصباح الباكر
وصديق الكواكب والنجوم ف الليل الساهر
وأشجع فريقي منتصر ومهزوم
أنت اللي كلك طيبة وكلك هموم
بوزع ابتسامات على بياعين الدرة ف الطريق
وأهاب البحر وشطه يبقى ليا غريق
وأبيع العمر ف الهوا لو كان حقيق
وأرضي بالدنيا وبقسمتي 
شاعر ودي صنعتي
برص الكلمة جنب الكلمة تصيب القلب رجة
وارص المعنى جنب المعنى تصيب القلب رهبة
وانت اللي مستحيلة ف الحياة ف الشعر مش صعبة
أبني بالكلام أوثان وأهدها 
وأبني قوافي فيها المعاني متعتقة 
وأكتب قصيدة بدون موسيقى 
أو بموسيقى سيئة 
شاعر ودي صنعتي 
م قبل ما أنثر كلام 
ف الدنيا يكون علام 
ويكون مصدر إلهام 
تقراه تكتب قوام
وتدعي لي بالأمان 
دعوة حنينة..
أقزز لب ف طريق السفر الطويل 
وأدعي بصدق النية والتساهيل
وأقول العمر فايت واقول العمر جميل 
واكتفي وأنا بثبت موقفي 
إني مهما الدنيا كبرت ف عنيا 
حفضل بوزع الضحكات على المارة 
وأحبك ف الزمان الجاي مية مرة
وحاكل قطط الشوارع كل ما تجي فرصة 
وحبقى ملاذ لكل طير مش لاقي مسكن 
ومش حزهد كل مرة بعد الخيبة أحاول 
وأبدا بداية جديدة 
وانا اللي ف جيبي المعنى والمغنى والقصيدة.

الشفرة

شعاع النور المتسرسب بين الشباك، واخر فلوس  ف الجيب كانت معاك، واخر حبيب اترجيته وما اترجاك، وحلمك الشقي وعمرك البقي بيطل م الشباك. الثلج الدايب ف اخر الكاس، والوش الغايب ف وشوش الناس، والصدفة الجارية ف الأحداث بتطل م الشباك. راكب قطر الأحزان بدون تذكرة، بتحاول تفك شفرة الدنيا والآخرة، يعجز المخ عن فهم المسألة وعن الحساب. دايرة المعركة بين الجيوش في الزمان الصعب، حرب أقوى من جرأة القلب، فيها كل واحد على وش مذبحته، تحت حصار الضرب تحت حصار الغارة، نضحك جمعًا ضحك سكارى، ضحك يخلي القلب يدوب. في كل طلعة نهار ومع ظهور الشمس، بيضيع مني الكلام ف صورة مجردة، تهرب مني المعاني مُفردة مُفردة، وكأني بقتل بإيدي ميلاد قصيدة حالفة ما تكتمل. لكنها وغصب عني بتسرد نفسها، وكأنها بتخرج من ضِلها بدون مساعدة، تتم المعنى دون رغبتي. فتحت عيني ف الصباح، وضحكت من كتر الجراح، سَّقيت جراحي الشمعدان، ف كوباية شاي الإنهزام وابتسمت لما عرفت إني داريت الدمع ف قصيدة.

جراحي الشمعدان

ال آه اللي في قلبي تدك حصون

- إلى روح جدتي رتيبة محمد مجاهد رحمة الله عليها.

”كانت تشبه الوردة في الجمال 
والقمر في نوره 
والشمس في وضوحها 
كانت تحمل قلبًا أطيب من كل قلوب العالم
كانت تحمل نص جمال العالم 
بل كل جمال العالم 
كُل طيابة العالم
تشبه الفراشة في خفتها رغم السن 
كانت تُشبه كل جميل 
لا تَجرح وإن جُرحت 
ولا تهدأ في قول الحق 
ولا تغيب مهما غابت 
يداها تنسج الطعام بحُب لا متناهي
وعيناها تعرف الود وإن غطتها المياه البيضاء
كانت تشبه نقاء الماء وحدة السكين 
لا تخاف
 دعائها سلاحها الدائم
وقوتها في الصلاة على النبي
لم تعرف منها الدنيا سوى الإنسانية
ولم تشهد الأرض منها إلا حُسنها 
يعرفها كل من في الأرض 
بائع الخضروات وبائع الفول وبائع الكولا
تعرفها الطيور والدجاجات  
يعرفها المطر وشهر الصيام 
لم ينل منها أحد 
لم ينتصر عليها أحد 
لم يغلبها إلا المرض.

كل زهور العالم تبكي 
تركوا في قلبي جَرح مرير 
كل شموع العالم طُفأت 
إلا ضياء القبر يُنير 
يشتاق إليها العكاز 
وكيس دوائها المكتظ 
يشتاق إليها الأحفاد والأولاد والجارات
يشتاق الطعام إلى يديها 
وماء الوضوء لخديها 
تمتمة القرآن 
وسلامتها في الطريق.
 
لم أعرف معنى الموت إلا بعدها
لكنكِ ستصبحين في عالم أجمل 
وبثياب أجمل 
وبوجه أكثر نضارة 
أحبك بكل لغات العالم 
وأبعث سلامي بقصيدة رديئة لكنها مليئة بالحب
إني حين أُعرف الجمال أُعرفك 
وحين أُعرف الصبر أُعرفك 
ما أجمل الدنيا حين كانت بين يديك 
ستظلين أسطورتي 
 ومركبتي التي أعبر بها كل شتات الخذلان 
 ستعلقين في الأذهان إلى الأبد 
 سأتذكرك دائمًا 
 وسأراكي في كل مكان 
 في شجرة وحيدة في الصحراء 
 وفي عيون الجدات الكِبار
 سأراكي في دعوات تشبه دعواتك
 سأتذكرك كلما يُلقي أحدهم مثلًا شعبيًا
 سأتذكرك كلما رأيت الكيكة وصنية البطاطس
 وكلما رأيت البرطمان الملئ بأزرة القمصان
 وكلما أشتريت اللبان الدَكر 
 وكلما وطأت قدامي مكانك 
 وكلما عانى الناس أمامي من آلام الفتاء والرقبة والغضروف 
إني في إنتظارك
 أعلم أنك ستأتين في حلم قريب
تسامحيني على رداءة القصيدة 
وتغمريني بعينيكِ
 تهمسين لي
  أحبك.

وداعية جدتي قصيدة نثرية - بصوت صديقي اسلام عادل

وإن قال الآه أنا أقوله يا روح القلب آهين⁦..

سعيد صالح يغني - قصيدة الليل ملاح لأحمد فؤاد نجم

حبيبي مهما كان.. بيقول كلام حنين 
وف عينه اللي يبان.. حبي الأصيل يجنن
وان غبت انا مهما كان.. قلبك ميكونش هين 
ويا عيني لو تزورني.. ويا عيني لو تميل

حبيبي يا فايتني.. لكحل الليل بطوله 
وتقول كلام وترجع.. تقول مقدرش اقوله
وان كان ع الحب يعني.. ف الحب له اصوله
ويا عيني لو تزورني.. ويا عيني لو تميل

كل ده كان فين يا قلبي..  كل ده كان فينه
مش اتعاهدنا يا قلبي.. ع الحب دفنينه
وان زارنا نوره يا قلبي .. حنقوله شوف غيره
ايه حصل دلوقتي خلاك يا قلبي تميل 
ويا عيني لو تزورني برمش عين كحيل

والدنيا م تصبح هي.. لما تطل ف عينيا
والكون يبقى له مطرح.. والشوق ف قلبي يطرح
وتقول كلام يا سيدي.. وما ترجعش فيه
الحب ان بان ف قلبي ماقدرش اخبيه 
وان كان ع الحب يعني.. ف الحب له اصوله
ويا عيني لو تزورني.. ويا عيني لو تميل

أغنية حبيبي مهما كان.. كلماتي دندنة بصوتي

صحيت..
 وحلفت أواجه الخوف والموت 
قولت النهاردة حنشيد بيوت
قولت النهاردة حنعيش للقوت
قولت وكان الموت نبوت 
يضرب ما يلاقي..

”يا ليل طويل ع المسافرين بالقطر
يا ليل قصير على المُحبين ف الفجر
يتولد نهار مطلي بالعرق والأجر
يتولد أبكي زي الطفل ولا اهدا
البكا في عيني مش دهب ولا فضة
البكا ف عيني بكا.. يوصف معاني التهلكة
ويثير ف قلبي الشجن“

قلبك عليا أحن ولا..
شعرك الأسود اتغر واتحنى
عودك الاخضر أصّفر واتمنى
قلب لا يغيب ولا يِمِيل
قلب لا يدمع ولا يِسِيل
عمر لا يضيع ولا يجري
عمري لا بايدك ولا بيدي
الحياة بينك.. وبين ردي
زي الجيوش واقفة بتصدي
ايد فَران بتخبزي ب ودي
طاب العجين وصبح خمران
زي الدنيا بتعلمي الانسان!

فين الزمان اللي كنا فيه؟
 احباب على طول الخط
 اَبني بحروف الاماني ألف شط
 قلبي كان طفل نط.. المشكلات
 أعمى بشوف الدنيا بعيونك
 صوتي صوتك فيكِ حسه
قلبي قلبك لما أجسه
الزمان كان هو نفسه
يقف يتباهى بينا
لما ابتدينا.. نغزل المواويل

القلب كان ف الحب قتيل
ونار الشوق تقيد ف فتيل
بس انت.. بتموتي ف التمثيل

ب تحبيني وأنا بكتب قصيدة
قلبي لسه عيالي ف الروضة
تنور لي الشمس لما تضحكي
تنور وتخش لي الأوضة 
أحس بدفا العايد م السفر
تضحكي ف الليل يتبَسم القمر
انهزم.. وارجع في محبتك منتصر.



  












 


انهزم وانتصر

أبكي ف ليلي ع السجادة
أشنق خوفي بكل برادة
أصبح خايف مش قلقان
زي زمان مش زي زمان

معايا الحق معايا لسان
معايا الإنس معايا الجان
ف ايدي رصاص
 و ف ايدي لبان
زي زمان مش زي زمان

احكي واغني واقول مواويل
ارقص ابكي بدمعي يسيل
انعي تملي الصبح بليل
زي زمان مش زي زمان

يجري ويلعب خوفي امامي
يجري ينط يبان ف كلامي
زي الدنيا وزي علامي
زي زمان مش زي زمان

اكتب شعر طويل شقيان
حرف ف كلمة ف شوق ف حنان
بوسة ف بوسة ف خمسة كمان
زي زمان مش زي زمان

باصص عمري م الشباك
زي المطرة انا بستناك
زي القمرة بتضوي سماك
زي زمان مش زي زمان

حجرة وشيشة ودنيا ترص
كلمة بكلمة وكلمة نص
حبك معنى وحبك برص
زي زمان مش زي زمان

شوقي يطل وكله فداك 
احبك اكتر وارتجاك
حالي معايا ده حالي معاك
زي زمان مش زي زمان

حب يعلم ف الوجدان 
مرة انا اسهر مرة أنام
مرة يبات الشوق ولهان
والله زمان مش والله زمان

الحلوة بتمشي ف قلبي الحي
الحلوة تغني شوي شوي
الحلوة جميلة ب تشبه ضي
زي زمان مش زي زمان

ف قلبي كلام وصبايا بنوت
ف قلبي كلام وحكاوي بيوت 
القطر يعدي توت حتفوت
زي زمان مش زي زمان

عشت ف ضلي وعشتي هنية
ست الحسن تطل عليَّه
غضمي لي وفتحي لي عينيَّه
زي زمان مش زي زمان

مرة تجلي ومرة بتمشي 
مرة تبوسني ف خدي ورمشي
مرة تغني اسهر مانمشي
زي زمان مش زي زمان

أغنية زي زمان مش زي زمان.. كلماتي دندنة بصوتي

- الصورة من تصويري شارع النبي دانيال الاسكندرية ٣٠-١-٢٠٢٢

سالوني فوقت؟ قولت مافوقتش
سالوني مت؟ قولت ماموتش
عشت؟ ماعشتش
عطشت ماشربتش 
قولت الآه كاني مقولتش
بقول للحياة وبانفاسي الحيَّة
سلام عليكم سلام التحية
فالمبتدأ معنى ف الشعر غيَّة
أكتب كلامي بلغة مرئية 
تسمع تحب الاغاني عربية
تسمع تقولي قول تاني
أقول فالتاني يبان اولاني
أقول الحق فايها دار
واخاف الحق ف قلبي يجور
نقص عمري م الاعمار
بس الظلم ما يقزح سور
يعيش الكلام لما 
يضيف ع المعني معنى
مرة يخفف آلام الناس
مرة يحييها
مرة تبكيه الليالي 
مرة يبكيها
يوم ما تحبه البنَّية
يومها.. يموت فيها


ترتجف ضلوعي ف ليل بارد
افرد دراعي جناح مارد
اطلب محبتك طلب زاهد
أكتب ما أكتب لجل ما ينزاح همي
أكتب ما أكتب كلام ساكت أمي
أمي أنس الليالي اللي ملهاش عيون
وابويا حضن الليالي التقال الظنون
واختي الجميلة ابتسامات وجنون
وانا اللي شاعر مش مضمون
يولد ابيات من بين ايديه بالدم
طلق كان ناري ولا طلق لأم
أبات على صدري الاغنيات تتلم
يترقصوا حواليا رقصة مجنونة 
بيحدفوني الناس ع الحيطة زي المونة
يتلقفوني الناس بمحبة مأمولة
يضرب العمال بمحبة محمولة
أتم العمل وأبات الليل فرحان

جندي راجع مبسوط بانتصاره وجريح
معاكِ أبقى أضعف م ورقة يهزها الريح
في وجودك أقلب فراشة ف الربيع
وخدي يبقى مين قده
اذا بوستيه
وقلبي يبقى مين قده
اذا زورتيه
عطش الليالي بكلمة 
راح ترويه
جميلة زي العيش
لما يتقسم
رقيقة زي القمر 
لما يتبسم
خجولة زي الجو
لما يتنسم
يحلو بيكِ شِعري 
لما تسكنيه
يحلو بيك أكتر
اذا قولتيه..

 تصبحي نسمة ف خيالي
ناوي ع العذاب؟ لأ مش ناوي 
غنوة جميلة بلحن مِكاوي
حبيبي حياني وصوتي حياني
قولت ايه اكتب 
أكتب ايه تاني 
نتصافى يا دنيا؟  
يا دنيا جنية 
سيب لي أغنية 
وسيب ليا حبيب
سيبي ليا أمل 
وسيبي ليا ايد 
سيب ليا أهل 
وسيبي ليا عيد
سيب ليا صحبة 
وسيبي لينا معاد
سيبي لينا ثورة 
وسيبي لينا جهاد

وسيبي فيا خيال 
ازرعه موال.. اكتبه لولدي
من قبلي مش بعدي
يلهمني مرة إجابة 
يلهمني مرة سؤال 

يسوق لي مرة ف أمله
يسوق لي مرة ف هبله
ياريتني أطلع شبهه 
رقيق وقلبي نضيف
والحق ليا نصير
انطلق يومها..
 عصفورة من العصافير.

 






عصفورة م العصافير

في رحاب الايام.. 
وعلى باب الانهزام.. قابلت الضعف
الضعف اللي اقوى كتير من اسمه
يصيب بن آدم يسم جسمه
أعجوبة في قدرته
بيخلي ليل الناس مهزوم
كأن السما بدون نجوم
وكان الفجر بقاله يومين غايب
مطلش حتى من شيش مكسور
الضعف بيعرفنا حبايب
زي ما بيحرقنا ف النور.

قولت له غيب على قد ماتقدر
سيب للناس متسع م الحياة
خلي قولة آه تطلع ساعة غنا
وساعة فرح..
خلي الناس تداوي الجرح
بدون ما يصيبها هوان
وانت اللي قادر تهدم الإنسان.

رد قال: بين الحيرة والتوهة والشك
انا بظهر واقف ع المحك
قابل انهزم وقابل
اتهرس تحت الفك
بس انتم صنف البشر 
بتحبوا الاستسلام 
كأنكم ابطال ورا القضبان
والحقيقة أنكم 
رافضين تواجهوا ضعفكم 
رافضين تواجهوني
قصة غزل بينكم 
وبين دور الضحية
مع إن موتي ملوش ديَّة.

فكرت 
واتاثرت
وبكيت
قولت.. ياريتك ما طليت
ياريتك ف الليالي التقال 
تبطل تجيني
أو بُص عليا ومر خفيف
مع إن دموعي ف منديلي
بكرمك إكرام الضيف
وتبقى العِلة إني ضعيف
أضعف من ورقة شجر ف فصل خريف
وأخف من ورقة توت
لما تصيبني يصيبني الموت.

سكت الضعف.. بصيت له وودعته
عدى الوقت بطئ ك عادته..
سلمت عليه..خدعني خدعته
والأسطورة أنه شنقني 
وإني شنقته..


الضعف

مع أصدقائي العصافير قررت أطل عليكم بالقصيدة دي.

”على باب الأحزان، قابلت الموت، ابتسم ابتسامته المعتادة ثم قال:
” الدنيا ترحال ومكتوب
 لقا وفراق وهروب
ولابد م تدوق صعوبة الفراق
 ف اختبار الصبر 
 كل ابن آدم مصيره القبر
بص على قلبك أطَّلع وشوف 
كام شوكة وكام علامة حزن متسابة
مع تلوتميت ألف سؤال ملوش إجابة
أنت اللي مشكلتك
أنك بترفض تصدق وتتعلم
أني بقوم بدوري
وأنت بدورك بتحزن وبتسَّلم.

ياريت كانت سهلة زي ما بتقول
على قد م المحبة تِطُول 
على قد ما بزعل 
وده حقي 
جايز أنا كمان مفضلش متبقي 
لحد ما نتم الكلام 
بس دي حكمة الدنيا ودي الأيام 
والمفاجأة هي غاية الأحزان
وانت كمان للأسف 
بتخطف بدون استئذان 
بدون ما نشبع م الإنسان
وبدون حتى ما نلحق نودعه
أو نحضنه حضن الفراق
أنت اللي قاسي قسوة العشاق!

أنا كل ما بعمل له بنفذ حكمته ف الأرض
ومسيرنا حنقابل بعض
بس أنت مش مذنب ولا لك حيلة
هي دي الدنيا وهو ده المعتاد 
اللقا والفراق بمعاد.

والله أنا خايف على حظي 
أعيش آخر واحد ف الأحباب
أحزن وأبكي وأفارق 
وأنت اللي سارق العمر والايام
بتخطف وبتسيب ف القلب حتة مجروحة
آلم ملوش آخر وملوش صوت 
أكيد مش حنلغي الموت 
بس عالأقل خليك رحيم 
نبهنا قبل الآوان بسنين.

ابتسم الموت ابتسامته المعتادة
ولع سيجارته بدم بارد
وعزم عليا وقالي: خد لك نفس 
الحياة بكل ما فيها من آسف 
يلزم لها نهاية 
وعشان كده أنا موجود 
وعشان كده الاحزان متواصلة

ابتسمت لأن ده آخر ما أملكه من حديث 
سلمت عليه بسلامة نية وطيب خاطر
” أبقى عدى عليا من وقت للتاني
أتأكد أني مش وحداني 
وأني لسه مموتش قبل معادي.“  














الموت

وانا وانا ماشية ماشية ف ريحك
مانبني غيرك وغير تجريحك
وانا قولت يا عيني 
يا سيدي وماله
ربي يكتر من عزاله
وانا حبي يطرح 
وانا حبي يفرح وابقى حلاله 

قالي يبنتي إن بنتي 
وقولتي
على الحب كلمة وفجأة سكتي
مرة اغني ومرة لشوشتي 
مرة احبك مرة اقولك 
عيني وعيني وعيني تحبك

قولت مانبش القلب الراحة 
قولت حقولك بقى بصراحة 
لما تبعد اتعب واتعب 
يدوب قلبي وقلبي يدوب
مرة يبكي ومرة يتوب

قولت بقى بصي وشوفي 
حطي ف قلبك بطيخة صيفي 
وانا كان يعني على تخاريفي 
الجو شتا يقلب صيفي 
وانا ما تبدل 
وانا ما اتهرب 
حبي بيكبر حبي يقرب 

يا سيدي يعني ماقولتش حاجة 
نعيش عمرنا هنا ورواقة 
ونعيش للحب نقول الله
ونعيش محلاها حلاوة آه 
قلبك يعني أنا بترجاه
ولا كمني بلبي نداه 
طب ندا ورا ندا 
بقى ينفع كده 
ما ينفع كده 

شوف يا سيدي وشوفي حقولك 
من غير حبك انا مابعيش 
من غير قربك انتهي ومفيش 
حد معايا الا هواكي 

وادينا بنغني نقول مواويل 
وادينا بنعيش ونعيش ونعيش 
باملنا وعرقنا الاثنين
يوم ما تحبها ما تخبيش
الدنيا أو بنت السلاطين

أغنية ماشية بنت السلطان.. كلماتي دندنة بصوتي

كان وداعك اصعب وداع 
ضاقت عليا عينيا الوساع
زاد ف القلب حيرة وضياع
بجاهد ف حزني قدر المستطاع 
وأنت النسمة والراحة ودفا الامنيات
كنت تمشي توزع الضحكات
الضحكة اللي كانت أجمل وأرق
كنت صاحب كلمة وصاحب حق
وكنت طيب طيبة خلصت م الدنيا..

بنعيك ازاي وامتى وفين 
دمعي بيجري ع الجنبين
دمعي مغرق عيوني الاثنين 
ثلثين صحابك جم 
ثلثين صحابنا اهم
والكل بيدعيلك.. 
بقيت جرحنا الصادق
وقلبنا النابض 
وماضينا الحلو 
بقولك ايه حلاوة 
استسمحك حبطل كلامي المقفى
وحستاذن دموعي اكلمك 
بدون ما تقطاعني.. 
يعم وايه يعني 
كلنا لها!

صحيح ولا مرة جيبنا سيرة الموت
ويمكن ولا مرة حكينا بالساعات 
بس كنا دايما بنضحك
وأنا مدين ليك بالمناسة 
أولا:
 لأنك رغم التواصل البسيط 
علمتني اضحك.. اضحك كتير
ع اللي يستاهل 
واللي ميستاهلش
خالد متستهبلش ده دورك ف الصد 
كنت بتلبسنا اجوان وتخسرنا الحجز 
بس كنا نداوي الهزيمة بعصير القصب 
وللأمانة رغم أن عمري ما اتساهلت 
مع انهزامي إلا إن ضحكتك 
كانت بتقلبها انتصار..

تعرف أنا حتى دلوقتي 
بكتب بدون وقار
بكتب عنك ف المواصلات عادي
أظنك كنت بتحب البساطة..
اكملك يا سيدي ليه أنا مدين ليك

لأني كنت بجاهد نفسي ابطل كتابة 
وعايز انفد بجلدي من الكار
وانت جيت هزتني هزة 
ما يعلم إلا بيها الا ربنا 
ف قررت اتفادى الموت 
والاوعه ورجعت اكتب عنك 
ثانيا:
شوف يا سيدي.. 
رغم فرق العيشة والناس والهوا 
إحنا فوق برضه بنكلم اموات 
وانت بالذات عارف وفاهمني 
سيبك انت.. الناس هنا كلها بتدعيلك 
وبيقولوا عنك كلام جميل 
بنبكي ولا بيبكينا الليل 
بس ادينا بنجاهد فراقك 
بالحزن مرة ومرة بالضحكة 
على فكرة صحيح 
أنا كمان كنت بغلط وبيقطعوا مني الكورة 
لتكون مفكر يعني اني بستقوى عليك 
بس مين قال انك مش موجود؟
بالعكس موجود اكتر مننا إحنا العايشين..

معرفش كلامي موديني لفين 
أو حتى هتقبل اقول عنها قصيدة
 واسميها باسمك ولا هترفض
  متحبكهاش بقى وعديهالي 
وانت اللي عارف 
 إن الوسع في القلوب 
 والشهادة لله كنت واضح وصريح 
 ورمز للصحاب الاوفيا والأمانة 
 قلبك ف البدلة 
 هو قلبك ف البيجامة
 هو قلبك في اللبس الميري 
 زمانك دلوقتي مستغرب 
 اشمعنا انا اللي بكتب عنك 
 واحنا اللي بينا مش كتير؟ 
 يمكن عشان انا الوحيد اللي شاعر
 ويمكن انت كمان مكنتش تعرف 
 وبعدين ترجع تسالني وليك الحق تمامًا
 مش في ناس أولى بالحزن منك؟ 
 والله برضه معقول
  زياد اخوك وصاحبي ف الإعدادية أحق
  وصحابك احمد ومحمد وعبد الرحمن برضه كذلك
  تفتكر انا يعني اللي غاوي محزنة 
  بس لأ.. الصدق والياسمين اللي ف قلبك
  انت وزعته علينا بالتساوي من غير ما تحس
  اقولك حاجة ومتضحكش عليا
  واحنا بنودعك جسد مش روح وسيرة
  قالوا العزا بليل ف البيطاش
  وافتكرت للحظة إني واقف بودع حد تاني 
  مع انك كنت قايلي انك عزلت.

من شوية كنت لسه معدي ع المقابر 
ابتسمت ودعيت لك 
اومل انا كنت بعمل ايه الايام اللي فاتت! 
أكيد كلامي بيوصلك مش كده
انت الوحيد اللي تقدر تجاوب
أصلي مجربتش لسه حد يكتب عني قصيدة 
تفتكر حتبقى صادقة ولا هيعملوها اصحابي الشعراء
صنعة وواجب؟ 
ايه دخلك انت بالحكاية دي صحيح؟
عمال ارغي عشان ازود كلامي معاك 
يا موزعين الضحكة حلاوة كان أصلها 
يا زارعين الشجرة حلاوة كان ضِلها
يا مُتعَبين م الرحلة حلاوة كان وصلَها 
يا مؤمنين بالجنة حلاوة أكيد راحلها 

ماشي سيدي.. مطولش عليك 
قولي طول الله يخليك 
الدنيا بتكبر وأنا عمال افارقكم واحد واحد 
لا.. مهو مش معقول أشيلك همي 
زمانك يعم متنهي 
وحتاكل خص وجرير وجبنة قديمة 
مش بالذمة احسن م اللحمة 
واحسن من اكل الشارع 
ودلوقتي كده كده بقى فيه وباء 
هنا كل الاحباب بيسلموا عليك 
كل الاحباب اللي معرفهمش ويعرفوك
موصيني ابعت لك سلامهم 
انت أملهم وإمامهم 
والصديق الغايب الحاضر..
 
سلامي لكل اللي عندك 
طمني عليهم أخبارهم 
منا صحيح مودع قبلك 
محمد ويحيي وعبدالله 
كلهم كان حلوين اسم الله عليهم 
قبل ما انسى 
الوالد والوالدة راضيين عليك
فمتقلقش.. أنا عارف أنك مش قلقان 
بكرة أكيد حنتلاقي.. وناخد بعض بالاحضان 
مش هي دي سُنته ف الأرض؟ 
آخر كلامي يا عم حلاوة 
أوصيك مش عارف ازاي بس هوصيك
أبقى طُل عليا من حينا لآخر ف المنام 
عشان أنا احلامي مش ولابد اليومين دول 
كلها جرايم وعربيات وضياع 
معرفش أنا الجماعة دول عايزين مني ايه 
المرادي يا استاذ حلاوة التواصل مش حيبقى بالتليفونات
حيبقى ف المنامات 
....
....
.....
أسمحلي اقولك كلمتين آخَّر

السلام ليك
والسلام أمانة.. لكل اللي كانوا معانا 
وودعونا بدون خبر سابق أو جواب
السلام عليك وع باقي الصحاب 
السلام على قلوب كل الاحباب
ارتاحوا من هم الدنيا 
ارتاحوا واستريحوا 
الكل هتهب ريحه
ولحد ما يجي دورنا
إحنا الشقيانين بعدكم.. 
كنا ومازلنا وحيلازمنا حُبكم.

إلى صديقي الغايب الحاضر- محمد خالد حلاوة..

بقول وأنا بنعي الحياة
يارتني كنت خفيف الظل
ابن من ابناء الضل
ضايع بس مش ضايع 
عارف بس مش عارف
كنت يوم آمن 
كنت يوم خايف
بكتب كلامي برعشة ايدين
وينطق سلامي يبان فالعينين
واقولك وكلي أحزان وحنين
الحمول اسهل على الكتفين
السلام اجمل بين كفين
الحياة أصعب الحياة أسهل
ف الحياة نخسر ف الحياة مكسب..

كل شىء ف الدنيا يجوز
تبقى أو اراجوز 
أو تبقى الجوز
تبقى يمامة أو حتى حمامة
أو واد غطاس
ف يغوص المعنى ويقب وجعنا
دماء ورصاص
العالم دبابة وأنت الدب
ف ايدك الحق ف الثانية الحب
وعشان تتشاف لازم ما تشب
ملعونة الحرب ملعونة الحرب
كان رأسمالي كان رقص ماله
كان قلبه خالي 
كان رأس جاله
كان ألعوباني 
كان لعبه عالي 
ضرب المواني مش زي قلبي..
وليه نخبي يا نخل طولني
إن كنت أعمى
وإن كنت قولي
حوشلي قلبي
حوش لي المناب
فتش ف قلبي ع الأحباب

أميل فالدنيا فلا استغراب
أميل فالثانية يقولوا تاب
أميل فالثالثة يقولوا كداب
أميل فالرابعة يقفلوا الابواب
أبصلك بعنيا 
يرد عني عذاب!

استسمحك والسماح مقبول
أفتح لقلبي كل باب مقفول
دخل ل قلبي شعاع النور
أجعل ف شعري الحياة أوضح
أبعد عن سطوري الموت
أنسج كلامي بيوت فوق بيوت
بالحق اسمنتهم بالطوب مربوط
بالبسمة أثمنتهم شجر زيتون
ضحكة تشبه خدود اللمون
حاجة فالدنيا ريحتها غصون
حاجة فيها الطهر والمضمون

ناجيتك يارب م الالم نجتني
رويت ب أحزاني الارض لما نادتني
طرحت أغاني وأماني وأيام بالآه
وما بل ريقى إلا أما قولت الله

خدود اللمون

سألت صديقي الفيسلوف
بعد التحية ورد الكسوف
بتعمل ايه ف الأيام؟
قالي: بترجم الدنيا 
وببص للشمس وهي بتبدا ف الصباح
كأنها بتكوي بنورها باقي الجراح
وأنعي بالآسى رحيلها وقت الغروب
وابتدي أمارس خطتي ف الهروب!
جايز كلمتي مش ده زمانها
بسيط زي أُمي ف أحلامها 
بتجيني ف الحلم شابة وأنا بَشِب
عشان اطول النور ف قلب المُحب
راسي لابسة إشرب
وقلبي ناقص قلب
اصحى أبص لسعد
أقول مفيش فايدة!

حِملك عليا يا أفندينا
منتاش حاتغلب ف المدينة
الضلام والضياع والموت 
وأنت ف ايدك قصيدة 
وف الثانية توت!

بزرع جنايني مش لجل شىء
غير بس أغني وألاقي طوق
غير بس كلمة تبل شوق
غير بس حِكمة تنصفنا
وأمل يترد فيّه!

سألته: دي صوفيّة؟
رد بالجملة اللي هي
أنا مش تابع غير للحق
لا نُخبة ولا شعارات تندق
بدور على قلب انطفا
بالأمل والعمل والوفا!

زاد ف سؤالي غُربتي
وقُلت يا بلوة تك يا بلوتي
مع استنكار حِموريتي
أنا مش حِمل الفلسفة!

الصدق مش محتاج اكتر من لسان
والثورة مش محتاجة اكتر من ميدان
والصُحبة مش محتاجة أكتر من الجدعان
والكلمة مش محتاجة أكتر من الوجدان
والفن مش محتاج غير بس تكون إنسان

قُلت والدهشة فوق عيني
والبسمة فوق جبيني
وقلبي بيطُب
حماري غلب!

قال مش بتفلسف ولا متعسف
ولا هوائي 
ولا بقول كلام إنشا
أقولك على حاجة.. انسى

قولت له لأ.. نورني 
عرفني حتى لو بالآه 
معنى الحياة
وأنا حسمع بدون كِبر

قال: أنا مش الخِضر 
أنا بس بحاول أعيش 
والدنيا متكسرنيش 
ولا أمشي على كيفها
مش لازم تفهمها أو تعرفها
الأهم تعيش وتعيشها
بالمفيد المُختصر
قاوم.. بعين عيل غَنى ورَقص
ومتقولش أنك طير لو كنت ف قفص!

قُلت فهمت 
وابتسمت..
 لما مدت أُمي إيديها على كتافي
 بتسألني مالك عمال تخترف بكلام يِسم
 قلت لها أبدًا ده كان ف الحِلم.











صديقي الفيلسوف

وغلبت أحايل واحايله
وغلبت اتمايل وألجا له 
حبيبي بيمشي على مهله
وبيمشي معايا خِلف خلاف 
يفتح شيشه فيستهوى 
أعمل شاي يطلب قهوة 
أعشق وأعشق ما أهوى 
برضه معايا خِلف خلاف 
آن أوانك أي أوان 
نقضي الليلة بلا مرستان 
كفاية مُري ومر زمان
وكفاية بالمرة خِلاف
أعمل لي إعلان بالفرحة 
فرحانة مش زيها فرحة 
وإن كنت مش لابسة الطرحة
أشد ف العمر الأحزان..
مخفش من انس كان
مخجلش من حب زمان
الحق يقول أنت الغلطان 
وانت ماشي خِلف خلاف..

تحب تبدي القول عكسي
وقت الخصام بتقول نفسي
وقت العتاب بيزيد اسفي
وقت العتاب مليش حيلة

يا حبيبي وغُلبت أصالح
وعاتبني الليل وقت م اسامح 
رمش عينك جارح جارح 
والقلب مش ناقص حيرة 

يا حبيبي ف العمر الفايت
ف الحب لا أخجل ولا أزايد
يا حبيبي ف العمر الجاي 
يا حبيبي وتغني ازاي 
والجرح صابح مش بايت
والجرح صابح مش بايت











أغنية حبيبي ف العمر الفايت.. كلماتي دندنة بصوتي

ابني

بلاد الزيتون

حدوتة زمان جاي

غضبان كأني عمري ما غضبت 
عطشان كأني عمري ما شربت
وحزين كأني عمري ما حزنت
وشيرين ماتت وسط الصمت
ماتت وسط عالم أعور 
بيبص بعين وعين لأ
صوت شيرين يا صوت الحق
صوت شيرين يا قلب المداين
صوت شيرين يا صوت ألوف
صوت الإنسانية من غير خوف
مكتوب على كل الأبطال الجهاد
مولودين بطعم المُر يحلى بالاستشهاد
في قلوبهم دفا وحُسن البلاد
بنتفارق من غير معاد
صوت شيرين 
يا صوت الاستشهاد
متربي على الصوت وأنا طفل
ملعون رصاص الغدر ملعون 
ملعون حكومات صهيونية وأبناء صهيون
ملعون الظلم والقناص
ملعون الدم محفوف برصاص
ملعونة الشعارات الكدابة...
صوت شيرين يا صوت القضية
صوت شيرين يا صوت فلسطين
صوت شيرين يا صوت جنين
في كل مكان و ف كل المطارح
صوت شيرين راح 
لأ مش رايح..
هلت روايحك في الدراع الواقي
هلت روايحك في العلم الفلسطيني
عيني باكية وقلبي كمان باكي
وحاسس بالعجز وبالقهر مسجون
شيرين موجودة في كل النواحي
ماشي زي اللي قلبه مطعون
حنخلق الأصوات ونرعبهم
صوت الحقيقة رعد ف ودانهم
مضحوك عليك يبني لو مرة صدقت
كدبهم متغلف باجتياح وذخيرة
كدبهم حيلتهم الاخيرة
كدب الغزاة عمره ما استمر
كدب الغزاة ولو أنتصر مهزوم
التاريخ باقي مهما زورا الأمس
لو فوقنا يا عربي حنسد عين الشمس
كدب الغزاة عمره ما عَّمر
مهما طالت الايام وجار الزمن
الأرض حقك وحقي يا ولداه
ندفعه لو عمرنا الثمن.
#شيرين_أبو_عاقلة

شيرين أبو عاقلة

المشي أطول طريق في الحياة
وأسهل طريق للتوهة


المشي

الصورة دي صورها لي صديقي شادي على غفلة مني، كنت حاطط إيدي فوق رأسي، لسه مش مصدق إني بغني مع منير وإني في الحفلة بجد!

منير غنى علموني عنيكي مع فرقة بلاك تيما ولما قال ولا أنت كان يقصد أمير أحد أعضاء بلاك تيما.

أنا ممتن جداً لليوم ده، صوتي من يوم الحفلة لسه مرجعش من كثر الغنا وراه.

اللي عارفني كويس، عارف مدى تعلقي بمحمد منير، قضيت نص عمري ويمكن أكثر في سماعه ومحبته، وحفلات كتير مقدرتش أروحها عشان كانت بعيدة وكنت صغير مش حينفع أسافر، وكنت متخيل إني عمري ما هحضر لمنير حفلة، بس الزمن لعب دوره، ومنير جه بنفسه إسكندرية، بقالي شهر ونص مستني اللحظة دي من وقت الإعلان عن الحفلة، ومخيبتش ظني أبداً، منير كان وسيظل جميل واستثنائي، صحته مختلفة تماماً عن زمان والتنطيط على المسرح، لكنه مازال وقت الغنا شاب وصوته قوي، أنا لحد دلوقتي بستوعب إني حضرت فعلاً، وغنيت معاه علموني عنيكي ويونس ويا اسكندرية وأنا كنت بغنيهم لوحدي ف ستوري، يوم من أسعد أيام حياتي، ويارب كل الناس اللي عندها أمنيات بسيطة زي دي الزمن والقدر يسمح لها إنها تحصل⁦❤️⁩


علموني عنيكي لايف مع الملك محمد منير حفلة إسكندرية

شجر الليمون لايف مع الملك محمد منير حفلة إسكندرية

أنا طول الوقت بفكر
على سكة تكون أفضل لي 
على حلم يكون أوفر لي
على أملي الضايع مني
على حلم بلاد بالمللي
 ضاعت من قلب شبابها
 ضاقت وبكل براحها
 ودقت ع القلب حنين 
 زرعت على كل جبين
 الخوف والعمر النازف 
 ف الزنانين
 قلبك يا مصر حزين
 ولا قلبي الساقي
 صوت الحر باقي
يهتف يناضل ويقيد
 شمعة عمرها ما تحيد
 النور مخلوق علشانا
 والسور لو طال وامتد
 يتهد على السبعين
 الوهم أكبر لو مدد
 فوق العقل وشاخ
 والظلم اللي بيرعاه 
 أشباه تشبه أوباخ
 وإننا باقيين وهنكتر
 والجاي بتاعنا وأكثر
 وإيدينا تقال وخفاف.

الحرية لكل المعتقلين، الحرية لكل صاحب كلمة حرة مستقلة، مبروك لهيثم وعقبال علاء والكل أجمعين.

قد يكون ده الظهور الأخير ليا فالشعر هنا لأنه مابقاش في مساحة على الساوند.. شكراً للكل.

الأحرار

طول عمري بشوف الفن دنيا والدنيا فن ومن هنا قررت يكون الحديث عن كل ما يخص الفن والحياة.
لو حبتوه ممكن تتابعوه على يوتيوب / سبوتفاي / وجوجل بودكاست بس لما ينزلوه لانه انا استخدت 96% من المساحة على الساوند :D
ديزاين أدهم محمد حبيبي

بودكاست فن ودنيا الحلقة الأولى الشعر أصل كل الفنون

بكتبلك اخر كلمتين قبل الوداع .. 
بكتبلك اخر كلمتين متحاوطين بالاوجاع 
بكتبلك من بعد لعنى للظروف 
وبعترفلك ان كلى خوف من اللى جاى 
انا خايف جدا من بعدك مشفش الضى 
انا خايف جدا من بعدك مشفش الضى. 
يا اول بنت قدرت فعلا تسكنى 
يا اول بنت احسها منى . يا اول بنت قدرت فعلا تملكنى , تاسرنى 
بنت صافية زى الطير .. بنت بدون مبالغة قمر تانى لليل
حضنها متفصلى بالمللى .. حضنها بيسعنى تملى 
ولانها بنت من سكر فكان طبيعى يكون بيحلى 
ديه الامكنة بقت حاسة بغيابك 
وانا لسه بعمل فى القهوة حسابك 
انا لسه بدق على بابك ومستنى فى يوم رد 
انا لسه كعادتى والله بجبلك كل يوم ورد 
انا اسف اسف بجد 
لانى قابلتك فى هذا الوقت بالتحديد 
انا بعتذرلك لانى فجاة سكنت الوريد 
وبعتذرلى كمنى انى بقيت بيكى مريض 
وبحاول انسى واكمل .. ولكنى اكيد هتحمل 
ولقتنى فجاة بدون اسباب .. بحس قربك فى الغياب 
وحشتينى , وحشتينى جدا يا اجمل صورة فى الذكرى 
انا بحلم لو نتقابل بكرة 
وعلشان متموتيش هعتبرك فكرة ^^ 
انا لسه بشوفك فى الايام 
وبحس طيفك فى الزحام 
انا بلمس ايدك فى السلام .. انا نفسى انام 
علشان محسش بمرار الفراق 
وعلشان  ابطل اشتياق 
ولانى انا مدمن ليكى , لقتنى بحلم بيكى 
كانك بيت وانا ساكن فيكى 
انا عارف انه مش بأيدنا 
لا فراقنا ولا جودنا 
لسه بنداوى جروحنا 
لسه مكملين الرحلة , يجوز يا حبيبتى منتكلمش 
ويجوز اكثر منتقبلش 
لكن اكيد روحنا هتتقابل , ما هو مش بالساهل 
تطلع روحين من بعض .. 
انا بسمع منير يا حبيبتى وانا نايم وحدى الان على الارض, ❤ 
الوضع الحالى لحالتنا ملوش تفسير 
ويمكن ملوش تغير 
ده شئ يا حبيبتى اسمه المصير 
وده رب كبير , قادر يجمعنا ولو صدفة 
قادر يرجع شمسك من بكرة 
انا عمرى ما حسيتك بشر منا 
تقريبا بنت بتختصر الجنة , ❤ 
والان ولوحدى  انا ماشى تحت المطر 
وانا راضى جدا بالقدر 
ومتفهم جدا الظروف .. وبقاوم قلبى الملهوف 
والان هقولك قاعدة يا بنتى .. تنطبق على الدنيا الا انت 
الفراق ملوش علاقة بقسمة ونصيب 
انت سبت , فكان طبيعى انى اسيب :")
............................... 
روحنا اتبهدلت بسبب اننا دايما بنلاقى الشخص الصح فى  الوقت الغلط واحيانا بنقابل الشخص الصح فى الوقت الصح والظروف تبقى غلط عموما كل اللى بادينا اننا نحمد ربنا , الحمد لله ^^ 

اخر رسالة ,, خالد سليمان

ايوة اشتقت ولمين غيرك هشتاق 
ايوة اشتقت , برغم الاتفاق .. انا موجعنيش الفراق 
على قد وجعى من التفاصيل .. موجودة ليه فى كل شى جميل ؟ 
وانا بحلم انى حاضنك ليه بليل ؟ 
انا ليه وافقت على الميعاد الاخير ؟ 
وليه رغم البعاد لسأأنى اسير 
انا كما طير سافر ويمكن ميرجعش 
حاولت كثير انساكى ولكن منفعش .. 
حاولت كثير انساكى ولكن منفعش 
وليه عشتى فالركن البعيد قبل القريب ؟ 
 :") ليه كنت كما شمس ما تغيب
 ! ليه كل حاجة بعدك بتقل حلاوة بالترتيب
انا بدات احس انى غريب 
وليه الحاجات الحلوة مكتوب علينا نسبها ؟ 
رغم اننا منها .. وبنشبهلها 
وفى غالب حياتنا بنحتجلها 
(......... , من ( بشر , واماكن , وحاجات
ليه دايما بنلقى الوقت فات 
وليه بتبعدنا المسافات ؟ 
وان فارقتوا الناس اللى تشبهلها وتشبهلكم 
فافتكروا " عسى ان تكرهوا شيئا وهو خير لكم " 
وانا لسه بحلم برجعوك .. انا سايب قلبى بين ضلوعك
ولحد لحظة كنت قادر اكتم دموعك :") 
فلما بكيت بكيتى , وده لان روحك من روحى 
انا لما جيت اكتب عنى طلع الكلام عنك    
انا اقصد اقول ان انا منك , <3 
انا اصلا بشوف بعيونك . وجنونى يشبه جدا جنونك 
انا بشوفك طفلة لكن بعيونك :") 
ازاى اقول اننا اتنين 
 ! واحنا ساكنين فى بعض 
 كنا بنلمس السما 
واحنا اساسا على الارض 
ازاى اقول اننا بعاد 
! وانت قصادى فى مكان  
ازاى اقول اننا بعاد 
وانا لما بفتكرك بحس بامان ؟ 
 ^_^ وانا اصلا منستكيش علشان افتكرك
انا رايح جاى جايب سيرتك 
اكلمنى ,, وافهمنى ,, واشتمنى 
والله انت اجمل حبيبة عرفتها 
ديه الساعة لسه 5 من ساعة ما سبتك وقتها  
انا منستكيش ومش هنساكى 
 :") انا هفضل برده اتمناكى 
ولو فى الاحلام .. انا كل يوم بتمنى اشوفك فى المنام 
بخاف عليكى لتخافى ,, بخاف عليكى تتشافى , من الربيع 
علشان يا حبيبتى هيخطفك , <3 
انا حابب بس اعرفك ..
ان انت دنيا فى قلب الدنيا . بنت بتقدر تمحى وجع السنة فى ثانية  
انت حاجة يصعب على شعرى يوصفها 
ده وجودك يا حبيبتى فى الدنيا شئ يشرفها 
وأستنشاقك للوردة بيضفها ,, جمال 
ديه روحك لوحدها موال 
انا دايما بحسك بنتى .. كل الحاجات بشوفها انت 
انا زى بحر اتملى دموع .. انا ناى موجوع 
وصراخ مش مسموع .. انا بيقتلنى النسيان وتحينى فكرة الرجوع .. 
انا زى كمنجة معتش لاوترها صوت 
انا واقف وحدى الان فى الشارع مش سامع صوت 
بعد الفراق كل حاجة بتصبح باهتة 
(........... , من ( هموم , وناس , وهدوم
وتحس احيانا انك مش سامع 
 ! وتشوف الشمس نورها مش ساطع  
ساعات بتشوف الحاجة سودة .. وتحس بروحك مش موجودة 
وتشوف الواقع غير الناس .. وتحس حاجات كده وخلاص 
بتبقى مختلف عنهم .. مبتبقاش منهم 
كل الاوقات الصعبة عقلك مبيرضاش يلغيهم 
وكل اللى انت مفارقهم 
! بتهرب منهم .. تسكن فيهم 
! وكأن فيه قوة جذب ليهم  
ولذلك يا حبيبتى انا فاكرك 
وهفضل برده بتنفسك كأنك اكسجين 
كأنك مخلوقة من نور مش من طين 
هفضل بضحك على ضحكك 
وأفرح على فرحك 
هراقبك من بعيد لبعيد 
علشان محسش انى وحيد 
ولأننا مبقاش من حقنا ,, ندى ميعاد للقا 
" فبنتواعد نتقابل صدفة " 
أنا هفضل برده بهواكى 
انا عارف اننا مش هنرجع لكنى برده هستناكى , <3 
واخيرا , انا هأمن بالفراق .. أيوة هأمن بيه 
ومعتش هسال تانى ليه ؟ 
اللهم انى لا أسالك رد القضاء 
ولكنى أسالك اللطف فيه 
.........................
انتظرك كالأمس واعلم انك لن تعود ^^ 

هستناكى ,, خالد سليمان

وأنا عيل كنت بحبنى جدا 
والقانى وقت الضيق جرئ 
ده لو كنت بزعل ساعتها 
الا عشان لعبة مكسورة 
هدومى اللى شوفتها فى الكام صورة القدام 
أيه اللى فاضل م الزحام 
غير بواقى طفل برئ 
أحيانا بكون غريق 
فى تلك الدنيا الخداعة 
سيبك م الجاى وتعاله 
احكيلك على الماضى وجنونه 
فى البداية كنت نونو 
كنت بتكلم بالاشارة 
ثم ودونى الحضانة 
كنت ساعتها واد مكلبظ 
كنت بحب اكل كلبظ 
واتفرج دايما على الكرتون 
تخيل ,, لو أن الكون لاطعم له او لون ؟ 
أو أن التليفزيون , من غير سبيستون 
كنت مغرم ومازلت مغرم بالبطاطا 
وبأغنية هاكونا ماطاطا
كان أجمل ما فينا البساطة 
فرحتك عيونك بشوكلاته جايبها والدك 
كنت مدمن برنامج سفارى 
يا جيل الاتارى
 أيه اللى فاضل من مشاعرك ؟
أيه اللى فاضل مننا ؟ 
 ! برائتنا عدت من هنا  
من سهرنا من أول الليل لاخره 
عمرى اللى عدى وفضلت أندهله 
! لكن مسمعش  
كثير أترجيته يقف 
لكن موقفش 
وفرحتى بلبس العيد
وبكرة اللى جايب نهار جديد 
 ! بعدية منتظرة 
فرحتك فى كل عيد ميلاد 
ونفختك اللى طفت الشمعة 
عيونك مبقاش فيها اللمعة 
 ! بتاعة زمان 
روحك صلبة كما المانيكان 
فينا حاجة تشبه الانسان 
ولسه بنضحك لما نكون مع بعضنا 
جسمك اتهرى ذكريات م الامكنة 
أيه اللى فاضل مننا ؟
! برائتنا عدت من هنا 
وأشتياقك لنظرك اللى كان سليم 
حبك القديم فى ابتدائى 
أيه اللى باقى م البراءة والكسوف
احراجك الدايم م  الضيوف  
قلبك اللى اتملى بالخوف
ساعة م كسرت الكوباية 
بص لنفسك فى المراية 
 ! . انت اتغيرت 
وكبرت بفعل الايام 
أيامك كلها أحلام 
أحلامك نصها أوهام 
أوهامك أصلا خيالات 
باينة عليك علامات الرجولة 
! رغم سنك والرجولة  
وظنك اللى دايما كان فى محله 
وحلو يا حلو وأيام رمضان 
علبة الالوان وكراسة الرسم 
القلب أبو سهم وحرفين على الجنب 
! ملكش ذنب 
فى أنك تعاصر كل تلك الحروب 
تزهد عن شكل الغروب 
مغلوب على امرك 
هربان من واقعك بالنوم 
! وتقوم علشان تهرب تانى  
مكتوب عليك انك تعانى 
 ... وأنتظارك 
للاجازة علشان الفسح 
أنبهارك بقوس قزح 
لما شوفته لاول مرة على الارض 
زمان كنت مجرد فرد 
يحب ما يحب 
ويكره فيبان فى عنيه 
طفل حلمه بين ايديه 
بيشوف الشارع يجرى عليه 
بكرة الوردى اللى مستنيه 
! وبكرة مبقاش وردى  
بكتب وانا بندب حظى 
من الالم والفراق 
! كبرنا بدون اتفاق  
زمان كنت بصدق كل شئ يتقال 
كان لسه فيا جمال 
ومكنتش بخون حد 
عقلى كان مرتاح بجد 
كانت سذاجة الدنيا فينا 
قال , هو ليه القمر بيمشى معانا ؟ 
وسهرك بليل ساعة ما كنت بتعد النجوم 
فرحتك بجرس أخر حصة فى اليوم
سعادتك فى نجمة أترسمتلك فى الكراسة 
أشتياقك لاكل المصاصة 
كشكولك اللى معداش النص 
 . والشنطة اللى مكنش فيها كتاب الدين 
! كنا لسه بنى ادمين   
ذكريات لمبة الثلاجة 
وغناك قدام المروحة 
كانت مليانة السذاجة 
ولا كانت تجمعنا مصلحة 
ياما عضيت دراعك علشان تعمل ساعة 
! وشربت سجاير بالقلم 
جبل الرملة اللى أتهدم م البحر 
كفوفك اللى أتملت دموع 
وظهرك اللى أتملى رطوبة 
! كل شئ بيزيد صعوبة  
ياما نفخت فى البرد رغبة فى دخان السجاير 
مشاكلك كل يوم بتزيد دواير 
زمان كنت طير 
قاصد سمايا بطير 
ساعتها , كان معايا شئ من الحرية 
طفل بلا مسئولية أو هموم 
أحلام وردية بلا غموم 
أمالك بتكبر كل يوم 
! حتى كبرت 
وبقيت تتمنى راحة البال 
دوام الحال من المحال 
ارتباطى بطيارتى الورق 
وزعلى لما فرقعت الكورة 
نور الابجورة اللى ياما طمنى 
ايه اللى باقى منى ؟ 
! حتى ملامحى اتغيرت 
زمان العالم كان نقى وهادى 
! والان العالم بقى كله معادى 
ولكنى أشهد 
أنى من جوايا طفل 
وأنى لحد الان بنسى وأشرب سهوا التفل
وبشهد 
أنى لسه فيا خوف 
ولسه بيحمر وشى من الكسوف  
وبشهد 
أنى خفت من الكلاب ومخفتش من القطة 
ولحد الان بيجيلى زغطة فشرب ماية 
طفولتنا مش منتهية 
بشهد 
أنى قادر احب رغم عفن الناس 
وان لسه شايل فى القلب شوية اخلاص 
بشهد 
أن طفولتى وبرائتى مش هتموت 
وأن لكل شئ نهاية 
بشهد أن المشهد 
كان كالاتى 
انا عشت طول عمرى " 
أحلم أكبر 
 : ولما كبرت قولت 
يارتنى ما كنت حلمت 
ولشئ أعوز 
انا نفسى جدا أرجع عيل 
 " ! لو كان يجوز

لو كان يجوز ,, خالد سليمان

1- بخاف اخاف م الخوف لخوفى يقتلنى
كثير بحس انى زاهد فى الاشياء 
بقضى العمر ما بين لقا وفراق 
ساعات كثير بشتاق 
لحاجات كانت منى 
لحاجات عاشت فيا 
بتعب كثير كمنى 
قلبى مهوش ليا ! 
ويعدى العمر ساعات
يقتلنى الليل أوقات
تطلع منى أهااات 
تسجنى بالوحدة .
أنا صوفى بالفطرة 
واجتماعى وحيد ،
 لسه الطرق قادرة
تحضن المواعيد
لسه العيال واقفة بتردد الاناشيد 
لسه الحياة باهتة ومايلة للتجديد !

2- هو انت ليه بتميل للحلم والاوهام
للبعد والنسيان
للخوف وللحرمان 
لطريق ملوش عنوان 
هو أيه يعنى ؟ غير أفلام ، أشعار وكلام 
كتب وأغانى ، تكوينك الجسمانى 
كشكل أو كديكور 
كان نفسى أكون مخبول 
معرفش شئ فيها ، ولكنى مش ندمان
بقيت كده لأنى : 
معرفش أعيش مأسور 
أو أسكن بيت مهجور 
يا قلبى يا عصفور 
كمل طريفك ثور 
الدنيا دايمة تدور 
زى ماهى عايزة 
كل الحاجات جايزة 
ومفيش دروس ببلاش 
لسه الحياة حلوة فيها حاجات تتعاش  !

3- أوقات بحس إنى على الهامش بلا معنى ،، تكوينا أوجعنا 
فطريق ملوش أخر 
بقضى العمر فى بواخر
بيروحوا لنفس الشط 
نفس الحاجات بالظبط 
بتقتلنا 100 مرة 
هى الحياة حلوة ؟ ولا الحياة مرة ! 
وبنمشى ليه فطرق وقلوبنا مضطرة !
أنا أكبر هزلى جاد 
وكلام كثير مكتوم 
دايرة الحياة تتعاد 
وأنا برضى بالمقسوم :') 

4- هو أنا ليه بتحول وأكره حاجات حبتها !
وليه بحب حاجات منيش ف قسمتها 
داير بدور ف دواير 
زاهد عن دنيا وجاه 
فهل يجوز أتبرع 
بعمرى لوجه الله ؟

5: ما بين طول العمر والشغف علاقة عكسية ، أو يمكن أنا اللى بمل بسرعة 
عمرك بيتسرسب جرعة ف جرعة 
وفى يوم هتبقى ضريح 
كل البشر مجاريح 
مكتوب عليك البكا ولو جى ليها بتضحك ( أثناء الولادة ) 
وبرغم ده مجنون 
ورافض تكون فى الكون 
زى البشر عادى 
متحبش التقليد 
ولا تبقى م المطاريد 
عايز تكون غيرهم 
تعيش برا تفكيرهم 
عايز تكون أنت 
راجل جدع وصبور 
احزانه واقفة طابور 
وتلاقى ف الاخر أغلب اللى جايله قرف
ولكنه بيعافر احتراما للشغف

6- معرفش أكون سطحى ومدبش ف التفاصيل 
 أو أكون عبيط ساذج عايش حياته عويل 
أنا بس يعنى بميل لطريق جديد ف الشوف
وأحب كثير أنى أخرج عن المألوف
عايش حياتى بطوف 
على شئ مهوش ف الارض
كل الحكاية أنى 
جتها بدون قصد ! 

7- بتمشى ف شارع فؤاد بصحبة صوت فيروز - الله كبير - 
فيها أيه يعنى لو يوم قدرنا نطير !
ونصاحب العصافير 
والحلم يكون مشروع 
وغنانا يكون مسموع 
والأمانى تصبح حقيقة 
يتحول العالم ف دقيقة 
لجانين ورد 
" تشعر عيونك بالدفا م البرد " 
هذا العالم عالم أفتراضى 
لو ينفع أنى أقاضى 
كل صناع الدمار 
وقاتلى البسمة ، لسه فى القسمة كل ماهو جدير بالذكر 
هذا العالم يحول كل ما فبنا من بكر وطفولة ! 
كل السكك أغلبها مقفولة 
كاسات سكرك بتتمثل ف كوكاكولا 
آلام القولون أصبحت أشد من ألام الحب 
هذا العالم أتنشى بالكدب 
وبيخلص الشارع وتنتهى الأغنية 
واحس ف لحظة أن الرؤية مش هى 
سامع يدوب كلكسات وصدى صوت بشر
العالم نفسه ف خطر 
وأنا بس يعنى حلمت 
أن العالم يبقى أسلم من دلوقت 
كل الحاجات فى الدنيا مجرد وقت

8: محتاج لشوية وقت أدارى فيه عن عيون العالم 
وأدقق فى العالم الفعلى 
وأنتشلنى من القاع 
أرقص على غير الايقاع 
وأعيد النظر فى حاجات 
انسحب بسكات وأقفل بابى ميشغلنيش
كل اللى اتسجن بالوحدة 
ميت أصلا مهما يعيش 
إنى احتجنى بشدة 
وأتخذنى رفيق 
مرمى البصر بيضيق 
وأرواحنا وخدنها البشر شركة 
لا داعى من تقسيم التركة 
راح أعيش يومين وحدى 
وأعيش وحدى الحنين 
وأصاحب الكافين بالأخص فى القهوة
وأحاول أخلق معنى م اللا معنى 
ونصاحب بشر علشان بس تسمعنا
يا أيها التارك روحك ف الفضا 
عمرك بينقضى مع كل دقيقة بتقضيها فى العتمة ! 
مبحبش الكتمة من بشر أو دخان 
لا شك أن الماضى لا يقبل النسيان 
لا شك إنى الأن - محتاج أعيد تفكير - 
ومخفش من بكرة 
حياتك كلها أصلا هتبقى عبارة عن ذكرى .
 
9- إنى بستسلم وأشعر بحالة خوف 
لم يحبنا العالم ولم تساعدنا الظروف 
أشعر بحالة سكر 
رغم إنى لم أدوق الخمر 
بحاول أعوط إلى الطريق المستقيم
وأضحك ولو لابس فى سنانى تقويم 
وأتصالح مع نفسى 
وأعزمها على بيبسى 
وأدفع  تكاليف الصيانة 
طفل عاش بدايته فى حضانة 
خوفا من الحياة 
الوحدة هتزيدك
كل يوم ماساة .

10: بواجه وحدى دقات الساعات 
بواجه حزنى بشوية أفيهات 
يقتلنى معرفتى بأن الوقت فات ، وهيفوت
إن حاول ينتحر سرعله وقت الموت 
ولكن واقى الفرح صد رصاص الحزن 
وأداله فرصة يعيش ، يا أيها الدرويش 
أدينى ولو حكمة قال : 
الوقت راح هيمر 
مهما كانت أحوالك 
يسرق سنين العمر 
ويندمك على حالك 
فإن ضاع منك وقت مضيعش غيره 
فإنك تندم عليه
 مش شرط تبقى البطل 
عشان تاخد السوكسبه :') .

"المحطات العشرين ،، "خالد سليمان

كان نفسى أكون فعلآ 
شخص عادى بتفاصيل عادية 
كان نفسى متهوش فيا 
وأبقى الحبيب والصاحب والونس 
أبقى الحظوظ وقت الفلس 
وأبقى أكسجينى 
 ! بكتب كلام أهرب بيه فلاقيه بيأذينى 
أنا عمرى ما فكرت أبقى شاعر أو أديب 
ده النصيب 
والعيب على الدنيا ولا علينا ؟
. الدنيا حقيقى بتلعب بينا 
كان نفسى فى حاجات ياما 
لكن ممشتش 
طرق كثير بانت سالكة لكن مكنتش 
وتتعلق بحبال دايبة 
وأمال خايبة 
وبتجرى تتوه 
قلبك سلعة بيشتروها 
 ! ثم يجوا يرجعوه 
وأنا قلبى أتشرخ من كل بقى يخسره 
 . فأوعوا طوبكم يكسره 
والدنيا مليانة زحام
وكلام ف كلام
والناس بلالين 
أحجام و أحجام 
والعيشة مش زى زمان 
 ! شاشة الدنيا بدون ألوان 
 وأهرب منى أروح على فين ؟
ولمين وأمتى ألقانى
العالم أصبح سجانى 
والناس بتعيش وسارقها الوقت 
. الناس محتاجة إعادة ضبط
والمشاعر صعبة جدآ 
والقلوب دايمآ معاندة 
ليه يا قلبى تكون لكندة ؟
للى جاى وللى رايح 
وتتعلق ف تستنى 
وتحلم ف تتمنى 
وتعشق تطول 
قضيت حياتك ما بين راسب 
! وبين مقبول 
والسكة تطول على الأعمى 
وانا أعمى برغم إنى بشوف 
! الغلطة باين فالحروف 
وقولت أشوف ,حل عند القاضى 
وأشكيله من الناس 
شاف ملفى وقال 
. تم رفض الإلتماس 
الدنيا بتألف , وأنت دورك فالمسرحية "
شخص بيأدى وردية توزيع إبتسامات 
" ما أصعب المسافات
جوايا كلام ياما 
كان نفسى أقوله 
ما يساعه البحر عرضه وطوله
كان نفسى مشاعرى متخنيش 
كان نفسى أعيش 
وأقدر أواجه 
وأرسم خطوط سيرى
! بدور فيا على غيرى 
- كان نفسى أقول للى بحبه - بحبك " 
وأعتذر عن حدوتة فاشلة 
كان نفسى أحكيلك ومقلش ماشية
كان نفسى أقولك ليه مش مهتم ؟
كان نفسى أقولك صاحبنى 
نفسى الناس تفهم إنى 
معنديش الجرأة الكافية 
ومشاعرى مهيش خافية 
أنا بس ضعيف فالتعبير 
لو أكذب أبان أنتيكا 
فكلامى ساعات بيكون مزيكا 
أو أغنية أو هدية أو فيلم 
أو صوت نايات 
وساعات بيكون ف شكل سكات
فكان ضرورى أعتذر وبصورة رسمية 
" هذا الجواب يرسل ليا 
..
الدنيا دواير ف دواير 
وبتطلع من دايرة لغيرها 
مبقتش بتيجى ف تفكيرها
كلامك خنقه وشتته 
- غيابك وحده - موته 
كنت كما كنت
 بنته وحبيبته 
زاد همه فأصبح 
بيبكى على خيبته 
كنت سيبتى ليه سفينته ؟
وإن قرر ينساكى بغيرك "
غيرك هتعيش مأساة 
" راح ياكل قلبها  بسم الله 
فياعم المفارق "
الحب مبيتنساش بالحب 
ولإن مشاعرك بعد الفراق هشة 
. " أى قصة هتطلع فاشلة 
والله كان نفسى ساعات أكون مانيكان 
أو وردة أو أى شى جميل 
كان نفسى أكون بعرف أطير 
وأسافر والعالم قصادى براح 
أتعب فرتاح 
وأزقق أطير 
! كان نفسى أصاحب العصافير 
وأفتح مكتب تبادل محبة "
أديك إهتمام تدينى حضن غياب 
إضافة لتوزيع محبة بدون حساب 
تقولى جملة تعبر عن المودة 
فأبعتلك أغنية لوردة 
ونبادل بعض حب بدون تسعيرة 
نقلل حدة الغيرة 
وإحتاجك تكونلى تكافؤ 
أبعد ساعات فتوافق 
ونغلى كل رخيص 
تم تشميع المكتب 
! " علشان بدون ترخيص 
..
جوايا صراع وخناق دايم -
ما بينى وبين شخصى 
ونتخالف فقوم نايم 
! - أنام أفقى ينام رأسى 
ومازلت تايه جوايا 
بخاف يشوفنى ف مراية 
ويخاف نتكلم 
. يدوبك نتقابل فنسلم 
ياعم الشخص اللى قاتلنى 
 وساكنى كفاية تخبط 
حكم عليا بالإعدام 
! تهمة تردد  
.. 
فيارب بحق كل إحباطى وسكاتى " 
" تحققلى أكتفاء ذاتى 
وترضينى بما جبته -
من أصحاب وحبايب 
ومتحوجنيش 
لضحكة أو بشر 
وأفضل أفرح بالمطر 
وأفلام محمد خان 
والشعر لو بدون أوزان 
وأتبسطت وأدوب فالتفاصيل 
وأعدلها لو هتميل 
ومقولش كلام مش من قلبى 
ولا أتمنى ناس مش توبى 
- وأعشقنى برغم عيوبى 
ونحب ونتبادل الرقص 
أكتبها شعر تكونلى نص 
ونشوف الدنيا من الزواية المبهجة
نكون كوردة ف الباستين 
, نكون لبعض أكسجين 
فيا كل الشوارع والبيوت "
وخيوط العنكبوت على الجدران 
لصالات السينما فالعيد 
للصدفة اللى بدون مواعيد
- للذكرى بالتحديد -
للوقت اللى فاتنا 
للمناطق اللى شهدت على صوتنا 
للقهاوى اللى شهدت موتنا 
ولكبايات القهوة 
" ! هوارب بابكم لفترة علشان بستهوى 
وأدينى بتعايش "
وراضى وبشكل كلى 
. " على أخر ما تبقى منى

أخر ما تبقى منى ,, خالد سليمان

كبرنا يا صاحبى , والدُنيا زادت علينا إتساع
العالم أصبح متقسم قادة وأتباع 
ودمار دايم م الحرب
العالم كله بيجرى من نفس الضرب 
وأنا وأنت بنتابع بكل هدوء 
وبنبدأ يومنا مع كُل شروق 
بنظارتى العالم أوضح مكشوف
 بيها من غيرها هشوف اللى وصلناله
والنجم اللى محدش طاله 
وإن محدش فينا عاجبه حاله 
مصاحب كلاب منطقتى وطيبتى 
وبدارى خيبتى ف عيونى 
بحاول أوصل دلونى 
صاحب خبرة سنين فى تضيع الوقت 
وفى إلغاء كُل مُقابلات السبت 
وواعى بأوجاعى ومُلم بالموضوع 
العالم يوميًا بيموت م الجوع 
عداد العمر بيمر بدون أذنك " 
والأيام تشبه حزنك 
وأنا وأنت روحنا بتجلى 
" تعاله نجرب نقوم نصلى 
بدور على حل مُجدى وسريع للجاى 
وطريقة تضمن لعنيا يدخُلها الضى 
شبابيك أروحنا وكُل البشر بتتحرك 
وأنا وأنت واقفين مطرحنا 
بتسألنى ليه دايمًا بتذكرنى معاك ؟
فجاوب بإنى محتاج تأيد 
وسعيد بكونك بتسمعنى 
وبتساعدنى علطول
وبتوهمنى بإنى هفتح كُل باب مقفول 
أنا عايز كُل ما حُزنى يطول
تطبطب على كتفى وتقولى بإن الجاى خير 
وإن العالم بيا غير 
كلانا مش مأساوى 
ولا ذنبنا إننا قبلناه ف الوقت الغلط 
وإننا هنختاره ألف مرة 
وإن لو خانا الإختيار 
هيكون العيب م الذاكرة 
أنا كُل ما أتقدم خطوة 
ذكراه ترجعنى لورا 
مع كُل يوم زيادة ف عُمرى 
بعرف معلومة جديدة
وأوصف حاجات بأدق تفاصيلها 
وأناجى روحى ومن غيرها 
بسمع يوماتى بإنى كبرت 
وإنى مسئول 
وإن أنا زمان كُنت يدوب بحبى 
ودلوقتى مُجبر أجرى حتى لو رجلى 
فيها إزاز 
- أنا فيه حاجات كثير خانتنى حتى - أدويتى 
وسكوتى أحلامى وألعابى 
وحاجات مفيش داعى لذكرها 
كُل البشر محتاجة حد جنبها 
أنا وأنت بُسطاء 
بنحلم بعالم سوى "  
وخلق مش فوضوى 
وأمن وحب ووفاء 
بنحلم بعيشة هادية
ووقت نبدع فيه 
وإفيه يجرى الدم ف عروقنا 
وصديق يساع 
ونبدل حضن الوداع بحضن لُقا 
بحلم بسلام بلا معارك جوايا 
وسلام للعالم 
وإنسانة صديقة وأم 
يكفيها بكونها بتسمعنى 
وأبطل كُل شئ يوجعنى 
أتمنى أفضل بتمنى دايمًا 
وأعيش بحلم إنى أوصل للأخر 
وأعيش ببال صافى وأكون أنا 
وأسمع كُل الأغانى المُمكنة 
نُرقص ونملى الدُنيا غُنا 
ولا يُفوتنا أى لحظة جنون 
. كُلنا رغم إختلافنا نُسخة بالكربون

عداد العمر

- You can tell a lot about a person by what's on their playlist .

Popular tracks by Khaled Soliman