وحشتيني 
بس ده ، مش بفعل الشوق
مثلك كـ مثل الغائبين و الغائبات
و كل اللي مات و اللي سافر فوق
أكيد فاكراني حتي الآن
والله من يوم ما ودعتك 
ونا قلقان ..
يا بنت الناس
دعاكي عليا بيجيني
فـ قولت أبعت ، و أقص عليكي مظلمتي
يجوز يمكن تسامحيني

أما بعد /
زمان شوفتك
ضفيره و ضحكه مغسوله بـ ماية ورد
زمان شوفتك بـ عين عيّل في إعدادي
رسمتك قلب ع الحيطه
و سهم و فيه فُلانه و شادي
رسمتك فيه
مكنش الحب ينفع يومها إني أخفيه
رعشة إيديا
و ربكة عنيا
بتعمل صوت
جواب مكتوب بخط الإيد ( أنا والله حابك موت )
و قلبِك ليه ماهوش سامِع
بَذاكرِك حتي قطع الحيل
و ذاكرِك
كل يوم لـ الليل
و للسجاده في الجامع
تعدي سنين و تيجي إنتي
تقولي إن إنتي حباني
رميت الخلق حواليا و جيت دوغري
يا أجمل ضحكه في العالم
يا حلم حياتي من صُغري
سمايا
سنين غايمه ، أخيراً جات و هتمطّر
فاجئتيني
و جئتيني ، عشان تتحبي مش اكتر
تقولي الشك أقول إحكي
تقولي الخوف أقول إبكي
أطّمن فيكي بعنيا ، يطولني الخوف فـ ترتِبكي
تقولي كلام مابيطمّنش بيخوّف
مريض نفسي ، و أحسنلّك تعيش وحدك
بدون الناس و تتصوّف
أسيبك ، تشكتي مني
 أجيكي ، تقولي إن أنا حابسِك
مريض نفسي
بعالجِك من مرض نَفسِك

أحسّك إيد هتسندني فـ وقت الضعف و القومه
أشوفك ريح يعرّيني فـ ليلة برد مشئومه
أحسّك أم بتغطّي العيوب عني و تداري
أشوفك تافهه مكسوفه و بتحاولي تتداري
في نص السكه تتمايعي و تقولي زهقت
أحايل فيكي و أترجّي عشان المولي خلّيكي
أفكر في اللي جاي لينا
تفكرّي في اللي جاي ليكي
يا وش برئ و لكن قلب كان جاحد
و أنا حاضنك لقيت نفسي
بحبك
من طرف واحد

بدور فيكي علي نفسي و ملقتنيش
فـ قولت البُعد يحييني
وجعتك آه
لكن علشان وجعتيني
خلاصة القول
يا بنت الناس
انا مسامحِك 
فـ سامحيني
___
لحساب الفيس بوك يرجي البحث بهذا الرقم 
0109 825 4228

من طرف واحد | شادي محمد

إن العالم هذا يُشبه طفلًا صغيرًا، يُحطم كل ماهو أمامه غاضبًا، يحتاج الكثير من الموسيقى والجمال حتى يهدأ وتصفو سماءه، لذا كلما تسنت لك الفرصة، إزرع وردة، غَنِ أغنية، إعزف لحنًا، أو إربت على كتف أحدهم، ليزهر من تُربتنا الطينية نباتًا يغزو العالم.

مشيوا وسابوا لنا الشوق 
مشبوك في أوكر الباب.
_علاء أشرف 

من طرف واحد | شادي محمد

shady mhmd