"shadow"

بنبعد اوي 
وتفضل عنيا في كُل مطرة بتلمحِك 
وفي كُل دعوة في السماوات 
بعد الخطوة دي بالذات .. بستَسمحِك 
" تضُميني وتكملي ضلوعي اللي ناقصة الروح فا تحيٌها " 
الليل وكُل المُصابين بلعنة الحنين 
وعلاقتنا بأخر زاوية في الأوضة 
بنهرب تملي اليها 
ونزيد الدموع فيها 
وروحنا تِتسلَب بالذكريات 
ونعمل من الوجع دُخان 
فا يشربنا 
ونوزع شوقنا علي المسافات 
فاتألمنا 
كُل اللي حبناه قد خانٌا 
كُل اللي حبنا وقرر الكتمان صانٌا 
كان يجوز في عنيا حياة بتندهلِك 
وفي عنيكي آهات بتندهلي 
بلكونتي اللي طاله عليكي هتشهدلِك 
بأني فاتح شبابيك الروح ومستني 
طيفِك المُحتال يزورني 
وكالعاده يخلف بميعاده ليا 
كان فاضل ايه فيا 
غير " أسكندرية " 
وحُضن شريط التِرام لدموعي وخطاويا 
" وشارع فؤاد" بيراقب 
كُل البنات لكن انتي مش فيهم 
ومطرة بتنزل تغسل جروحِك 
وتحيِِّ ملامحِك في عنيهم 
بتوحشيني ومش بوحشِك 
بوحشهم فألاقيهم 
" وبتبعدي وتقربي وتستهلِكي ضعف حُضني / بحبِك .. تستاهل احسن كتير مني / جوابِك ده بيقتلني وكُنت اضعف من اني اخلقني بعد البُعد ده بالذات / هنحذف المشهد المُعتاد / وهقولك كنتي اشبه للفراشات فأخاف اضُمك احرِم السماوات من برائتها / كنتي اشبه للكمنجة في قسوتها / وللوردة اللي لسه محتفظة بريحتها / ورغم اني شاريكي ماملُكش لعنيكي ونظرتها ولا لروحك وضمتها / ماملُكش غير اني بحبِك وبحب نهاري يبتدي بطلتها " 
فا يتخلقلي منِك بيت 
وماكنتش آدم ولا يوسف
ولا روميو الذي ضحي عشان چولييت 
كُنت يادوب بملُك 
"عين بتكِف عن نورها لو من بنات غيرِك "
" وروح الوجع بيكسرها بدون ليلِك " 
" وكَسرِة نِفس بملُكها في كُل ما اصارحِك تجافيني "
" وقلب طفل بيتشعبط في ضمة ايدين منك " 
وكلام بطبطب بيه علي المجاريح 
بشوفِك ريح 
تعري الوجع جواي ولا تغطيه .. وأشتاقلِك 
ازاي قدرتي تكون أحن ما فيه .. فآمنلِك 
ازاي قدرتي للجرح تواسيه .. فأرجعلِك 
الليل والغُنا ومحطة الرمل والكورنيش 
بنقسم بينا البُكا 
نصيبك يساوي مافيش 
نصيبي ليٌل مابيقويش 
بنبعد أوي 
وتفضل جراحنا بتنطوي 
وتعمل مننا كون من العياط بيضلنا 
فألاقيكي فيا حياة معا اننا 
زي السما والأرض 
عُمر اللُقا ما يضُمنا
‫#‏طارق_مبارك‬

طيف - طارق مبارك l Tarek Moubarek - Shadow

TarekMoubarekPoems