يعطيكم الصحة.. كلام وأداء وموسيقى وميكساج متناغم وكل شي.. برافوو.  فقط لو تشوفو تعاودوها كيف هي بعد، ولكن تنقصوا من صوت الموسيقى خاصة لما يرتفع مستواها وإيقاعها داخل المقطع، حتى يتوضح الإلقاء. بالله كيف لهذا العمل الرائع لم يأخذ حقه من المشاركة والتفضيل؟

ومن وقتاش 
ماكنتش لقلبك صغيرو 
وهو ناسي الدقة ومضيع غيرو 
ومن وقتاش
القلب يمّن انو فات الفوت 
وقت الروح قبل ماترجع لمولاها 
لازمها تعيش لمحبة قبل ما تشوف الموت
ومن وقتاش 
لبحر معادش يواتي الحوت 
وترجع حليمة لعادتها لقديمة بشروط 

تي من قتاش الوقت لازم يستنّى وصاية 
بش يقدّم لغدوة ويخلّي حكاوي لبارح ورايا 

ومزال في غدوة ما يتحس ومايتشاف 
وغدوة خميس وليوم خميس تعاش 
ببرشة صبر وكليمات خفاف 
ومزالت الشمس والنو بش يطلوا بالخلاف 

الدنيا راهي تمشي وتدور 
والأرض قد مانشحت مالماء 
بالمحبة عمرها ماتولّي بور 

العين بش تقعد تعشق 
والقلب ديما حي 
وذراعك يا علاّف
غلبت التالي والوالي
وتبعت منامة حسّيتها في خيالي 
وسرحت لفوووووق 
وصار خيالي عالي 

وكل شي نحسو في روحي 
موش كيما الي تخيّلتو وتعدّى في بالي

وفيبالي ...
فيبالي إلّي الذهب مهما رخص ديما غالي 
وفيبالي الي حتى كي تضربك لحيوط 
لازم بش ياقفلك العالي 
وفيبالي بحالي وموّالي 
اما ديما في بالي زادة 
الي الروح راي عزيزة 
ماتتكالش بياقوت وحوالي 

ومزال في بالي 
شنوة مخبي 
وشنوة رمشي حكالي 
وشنوة وصاو التوالي والأمالي 

لبارح قدّو مقدود 
زندو يعشّق 
غرامو ماعندو حدود 

اما ليوم هو الصحيح 
وهو الي يعمل لمليح 
وهو الي يقرّينا
 ويعلمنا لكلام لفصيح 

وبش نعيش مليح ...
ونبدى نحب نوفاك 
وكي نقول صحيح وما يخفاك 
الي مزلت نكيّل النجمات 
الي تعلمت نشوفهم 
في ظلام سماك 
والنجوم بعدك ما وفاو 
والظلام دحسة نحسها 
كي شمعة شعلت بهواك 
قعدت والعة بحر مبسم ضحّاك 

حب روحك قبل روحي ...
وأعطي لقلبك وأنسى جروحي 

غزرتي بش تقعد تعقلك وتحب صفاك 
وعمرها الفرحة ماتخطاك
ولا تنجم تبسيمة بهناسة ماتنساك 

ورد بالك ، تقول عالمحبة غناء 
بالوقت يتنسى 
كل شي يتعاش ويتحس 
اما موش كل شي يتحكى 
--------------------------------------#أمين

قلت ننسى 
و شمّرت على ذراعي 
و كفّنت هل قلب 
بين أضلاعي
و الذهب مهما رخص
 باقي غالي
وقد ما وطيّت راسي
ديما عالي

ومصيري نفوت
و الماضي نكفنو في لحود
و مهما تعذّبت تي محسوب
شكون قادر يغيّر المكتوب
و حسبة ربّي
تعب التّعب من تعبي
والباين مل هم شطرو مخبّي

و لقيتني كفّنت روحي
وندا صوتي ليك
مازال في بلحوحي
و دموعي السّاكبه
 تفحّمت بسوادها 
دابغه في حروفي

ومازلت نترجّى رجاك
و نعادي ناصحي ننساك
وباقي نقول طريقي طريقك
و مصير دعوات لمّيمه تجيبك
مهما كان كنت نهار حبيبك
ومهما لمعو في سماك نجمات
غير ضي هلالي يعيبك

يا لندرى توّه وينك
ومازلت على بالك
حتى كان تحل 
عقادي في حبالك
ساولتك بالله 
كان قلبك صافى غيري
ما تقلّو أنا بنتك و إنت صغيري
وما تودّو بالسّر في ضحكاتك
و نحبّك الناطقه في سكاتك
وما تودّو بحضن يدّك
و تسلّها كي تنز بعرقك
وبكلمة معزّك و مبنّك
خلّيلي حتّى كان كل شي وفى
و خبّيت شطر إلّى تحكى
شويّه للحلمه منّك
------------------------------------- #سيف

[Amine.G] & Saief Ezzine: نص مشترك

من وقتاش ؟ (سيف الزّين & Amine.G)

نحبّك و إنت ما تعرش

تفكّرتك

أحيّت منّك كي تلبس الtalon
والjupe لقصيرة مع الcollant
العين تتشهّى ... لا لا تعشق pardon
وأنا مبلي بيك de toute façon

انت إلي تتغرم وماتحكيش
كيف قلبي إلي يدق ومايورّيش
كيف روحي الي تتنفّس وتحب تعيش

شوية عليك محلاك
وانت تتبختر عاملة بلعاني
بش نقعد مبلي بيك ومانبراش
ونزيد نهزّك ونحطّك
تي إي ... مانحياش !

تي كيفاش ؟
تحبني نحيا بلا بيك
وانا النفس نسرقو من رواريك
ادبغ الكاس بحمّيرك اش عليك
واحقرني ... واعمل مافيبالكش
بالك ننساك ونرجع نجيك ...

تي انت دوزة لهبال
وكمالة غناية jacques brel

"Ne me quitte pas"
يا سخطة يا صفى
يا كمالة نفس وهوى
تي ايجا لهنا ...

نقرّيك ...
الي تكتب وماتقالش
نورّيك ...
إلي حلمت بيه وماتعاشش
نغطّيك ...
من برد Paris
تي أنطق ... vas y
بش نقعد ديما ... ravi
إلي قابلتك تلوج في taxi

وأنا إلي شيّعتك
تي أنا إلي شبّعتك
بغزرة
لاهي محبّة
ولا هي معزّة

غزرة
ماحبّتش تتربّى
كي شافتك
ويدين ترعش كي وردة حمرة مدّتلك
وعينين قبل ماتشوفك حفظتك
علاش تمشي وعلاش تجي

وعلاش عليك حكيت ومزلت نحكي
وعلاش خلّيتك تمشي
وخليت روحي تبكي

منّك ... وعليك
وكان يرجع الوقت بالتوالي
لا نسيبك لا نسلم فيك ..

C'est bon
وفات التخلويضة
ونجم نحّيلك الtalon
ومانستحقش نقلّك
تعرفني نحبّك absolument

[Amine.G]

نحبك Absolument

نحب نرجع مللول
خدي أحمر و ماعنديش ظوافر 
شعري أرطب و يديا صغار ما يشدوش لكورة 
نرجع لركايب المزلوعة مالطياح و اللعب في البطحة مع الذكورة 
نحب نرجع للصفحة البيضاء الي كانت في مخي
الي فيسع تتفسخ منها طريحة أمي 
و نبزة بابا 
و يتفسخ منها أول نحبك و أول محلاك
أول حل شعرك
و البس روبة ، تي هات بوسه شبيك مزروبة 
نرجع للنسخة لولة 
تحت لمطر مبلولة ، 
جابلي سحابة تغطيني ، قتلو يعيشك خلي لمطر ترويني 
نروح على سقاي و نغني الحيا حلوة بس نفهمها 
و يا ريتني ما فهمتك 
حبارك ما يتفسخش كي الوشام 
أكحل مدرغم ظلام 
كل حرف باش يعيش معايا و يموت فيا 
كل بوسة طبعتها فيا 
كل حلم دفنتو في جواجيا 
كل غنايا دندناها 
و كل ثنية بدلناها 
و قطعة نحيناها 
كل عركة و كل كلمة دونية 
و كل ما ترضيني و تقلي لا ينحيك عليا 
عبيتها تصاور و زرزقتها بدموعي 
حرقتها لهبتها بشموعي و نار كي تمسها تحرق لحمي من داخل و
تخلي أمارة 
لا لعمر يحب يرجع و لا الصفحة تحب تنضاف 
و لا حب لحمي يبرا و الحمل يخفاف 
لحيوط ضياقت و ما نجمش ندور راسي و نشوف ورايا 
و كان درت و شفت 
باش نشوف تصويرتي ... في مرايا *
ياسمين الماجري
Music : Gladiator - Now We Are Free (Piano Version)

Miroir

made at 3 A.M
Lyrics and Vocalization : Wassim Amor
Music : Disturbed - Sound of Silence mixed by Mohamed Achref Bouazizi
Wallpaper : Baha Hzami
Lyrics :
قبل ما ننساك..
و نولي ماعاش نتهز كي نتعدا حذاك 
و لا نرا خيالك بين النجوم
و لا نرا شموس مزروعة فيك كاينك كون..
و قبل ما نرميك للي ما منو رجعة..
و نمشي في طريقي من غير لا تلفيتة لا حسرة..
قبل ما نوفى منك و نوفاك.. 
كان لازم نكتبلك عزاك..

سماك لي ماحسها حد خلافي 
و كتبتك فيها للات الدنيا و للاتي
وكي عملت منك شمس و وردة  
و ليل و سيل و بحر و قمرة.. 
الوقت لي سرقتو من حزني بش تفرح.. 
و الشجرة لي عطيتها كلي و استنيتها تطرح.. 
كل حاجة صغيرة عنات دنيا كي عملتهالك.. 
و كل كلمة دافية ماكانش لازم نقولها و قلتهالك.. 
كل حاجة قعدت فيا كي انت مشيت.. 
و كل ليلة رقدت و انا حالف ننساك 
و نفيق الصباح على ريحتك مالية البيت..
كاينك مهما غلطت انت مريم.. ام المسيح..
و كاينو الليل لي لمنا سرق حلمنا..
و كلامك كلو هزو الريح..

كذاب يا ليل.. 
و كذابة وعودك.. 
و أنا كذاب لي قلت ما نحبكش و كل ليلة نرقد على صوتك
و نفيق على صوتك
و نعيش على صوتك 
انت لي تحكي بالسكات و الا أنا لي نتخيل.. 
والا عينيك رجعتني وليد صغير.. 

بارشا وقت تعدي و انا نستنى.. 
 و مالقيت كان برد فايح منك.. 
و قلبي اللي مازال امنيني بالجنة

حبيتك.. عطيتك كلي و استنيتك
كنت النور لي رجع قلبي يدق كي شافو
لحن الليل لي ما يسمعو كان عبد غارق في حلماتو
كنت الشمعة لي كي نظلام تضويني..
و الهمسة لي كي تخبى عينيا تدفيني..
أما خسارة، الشمعة ذابت و الداخل مني رجع ظلام..
الهمسة تلاشت.. و بقى كان السكات يعدي الأيام..

خسرت بارشا و ماندمتش..
فرحان لي تعديت في حياتي حتى كان مادمتش..
بردك كسرني.. و بالوقت ولا يقويني
أما اللي خسرتو يكفيني.. 
لا عاد الشمس تذكرني فيك  و لا عينيك تداويني
 لا نقراك بين ثنايا السطور و لا نكتبك و لانسمعك و انت ساكتة تناديني..

خليك ببردك..
هذايا عزاك.. 
الليلة وفات خيالاتي معاك..
لازم ننساك..

Wassim Amor - قبل ما ننساك

Lyrics and Vocalization : Wassim Amor 
Musique : Nothing Else Matters - Metallica - William Joseph cover
Lyrics : 
وقعك في خيالي وردة..
مسك الليل كي تغدرك الوحشة..
و انت فارغ من كل هربة..
*
انت هربتي..
خيالي و احلامي..
ادفى همسة على لساني..
تواحشتك.. و تواحشتني فيك..
و تواحشت تعنيقتك لي تسرقني مالدنيا
و تخبيني في شونك..
تواحشت لون عيونك..
كي كان يحكيلي الكون شمخبي..
و قداش يحبني ربي 
**
كي ريتك..
كل حاجة روحها تبدلت..
الشتا ولا دافي..
و القوة ولت حطة يدك على كتافي..
و الورد ولا في كل بلاصة يهمس للريح..
راقصيني رقصة حياة ابدية..
محلا روحك فيا..
و محلا الغناية في عينيك..
و صوت فركان خدي على خديك..
و محلا يديا كي تخبيهم في يديك..
كاينك تقلي انت متاعي..
دفيا و فرحتي و شاني..
الشمس لي بعثت فيا الروح..
الما الي يجري في جبالي..
و الكلمة لي ماتخرجش من بالي..
هربتي كي تضيق بيا الدنيا..
و ظهري كي يغدرني الوقت و تحرقني عينيا..
*
كاينك تقلي.. قلي..
و نعطيك كلي..
نبوسك من كفك و جبينك..
و نخبيك فيا ملي حاسدينك..
**
مازلت نتذكر الغزرة لي بدات بيها حكايتنا..
كي الوقت وقف و الضو خفاف..
و خرجت منا نفس الموزيكة البنينة
و في نفس اللحظة ترسمت على شفايفنا تبسيمة..
أول كلمة تقالت..
و الشجرة لي كي شافتنا مالت.. 
كل شي كان معاك معبي..
صافي و محلاه كي كان عالناس مخبي..
***
و أنا اليوم جيتك هازز قلبي في يديا..
محلفك بكل ضحكة رسمتها يوم على شفافك..
و بكل تعنيقة خبيتك فيها من احزانك..
بكل لحظة سرقنا فيها اللحن و هز ارواحنا لعالم اخر..
و بقات اجسادنا هنا تتناسق..
بكل كلمة تقالت مغير صوت..
و بكل نهار فقنا فيه حابين نعيشو و كارهين الموت..
ايجا تغفرلي و نغفرلك..
ننساو الوجيعة لي ردت قلوبنا ثقيلة..
نوفاو الوقت لي ضاع من قبيلة.. 
نبداو وقت جديد.. 
و نلقاو طريق ما يحيد..
نلقاو ثنية حلمتنا..
و نتعلمو كيفاه نقويو خطوتنا.. 
**
انا وليد صغير ضاع في دنيا اصغر من احلامو..
كي ريتك بانلي دليل..
انا سفينة كلاها الليل..
ايست و بقات تستنى في الموج يبلعها..
بيدك انت تصلحها..
*
نعرف لي تاريخي مش هو..
بنات و حكايات
اثام محصودة..
و حكاوي ممدودة..
و جحيم موعود..
أما أنا اليوم جيتك متطهر..
حالف عليك بلي لقيتو في عينيك..
تغسلني بما شرب من صوتك..
و تخلل روحي بصفا روحك..
تسمّعني أدفى غناية عندك..
و تخليك مخبيتلي يديا..
انت احلى حاجة فيا..
جيتك زاير المقام، و منيش متزحزح..
حالفلك بلي عشتو في سماك..
نكونلك دفى و ظهر..
كتف تركز عليه كي تعثر ويد تلقفك كي تطيح..
اللي بيناتنا مش شوية بش يهزو الريح..
خليك ليا دفى و عيشة..
و خليني ليك سما و سند..
كي شفت عينيك الشيطان لي فيا سجد..
رجع لربي و كفر على ذنوبو..
لقينا رواحنا في دنيا كل واحد فيها عايش لروحو..
و أنا عايش ليك..
لوج مليح تو تلقاني فيك..
كيما انا لقيتك فيا..
عنقني تعنيقة قوية..
و خليني نهمسلك..
الليل الدافئ في عينيك..
يحمل كل ماقد ينقص هذا العالم يوما..
و هالة النور التي تحيطك.. تنير داخلي المقفر..

Wassim Amor - وقعك في خيالي

Lyrics and Vocalization : Wassim Amor
Music : You and I - Montie
wallpaper choice : Fares Malleh

Lyrics : 
نصف نبضة و ورد
عرقك حير عليا
و زادت رعشت يديا.. 
و الحنين ملاني..
سرحت و نسيت العباد لي دايرين بيا.. 
قداش كنت محلاني.. 

كنت صافي و خفيف.. 
تكفيني تبسيمتك و ضحكت عيونك..
و دقت قلبك لي نسمعها..
و الحاجة لي دوب ما تجي على بالك نطلعها.. 
كان اني نفرحك الحاجة الوحيدة لي تعنيني.. 
و الحب في عينيك بركا يدفيني.. 
و البركة..
لي حوطتني ملي عرفتك.. 
كاينك نجمة و انا لقفتك..

دعوة الفجر و الناس راقدين.. 
و شطر تبسيمة و احنا غاطسين
فننسو كل شي و نتذكرو

قداه الدنيا كانت مزيانة.. 
و الحصيرة لي فرشناها تحت رمانة.. 
في جنان سيدي 
تذكر ؟ 
كي زرعت فيك الورد بيدي ؟ 
و عنقتك لين فتح
تذكر وقت الليل حلف ما يبات كان فيك  ؟ 
ياخذ نفس من عينيك
و يطوف فيك مرة و يموت
و أنا غرت و ماحملتش
و خبيتك فيا لين مشا

تذكر كي كنت عايشة هنا ؟
فصدري 
أرضك و أهلك و زمانك
حلمتك لي عييت ترد في بالك عليها
و كلمتك لي مازالت نسمع فيها
في خيالي.. 
كيما خيالك لي مازلت نشوف فيه
و وجهك كي يلين كي كنت نغنيلك 
شم الياسمين و ما تتركني هيك.. 
تركتني فكرهت الياسمين 
و جنان سيدي و الرمانة 


 و في اللخر الدنيا غلبت
النسمة ولت وريح و فلحظة سكتت
شكون لي سيب الخيط الاول..
و شكون لي البرد ملا عينيه.. 
و شكون لي الكلام و الا رزين عليه.. 
معاش تفرق.. 
مادام صباحي ما يبداش بصوتك.. 
و مادام معاش يوجعني سكوتك.. 
و مادام مازلت عايش و مش انت السبب
معاش  تفرق و معاش يوجع
انك بطلت تحب.. 

أنا زادة بطلت.. 
ركزت على روحي و على كيفاه نولي خير.. 
لقيت حجات أهم من إني نتوحش و نغير.. 
لقيت اني انجم و نعمل أهداف و نحققها
نكذب كذبات و نصدقها
لقيت اني انجم نكتب كلمة 
يجري وراها القلم و تولي حكاية
نمكن معبية بيك
و ممكن  معبية بطيفك والا بلون عينيك
والا بواحدة حبيتها.. لقيتها ضايعة فيك. 

أما نكتب.. 
و نلقاك تايهة بين حروفي.. 
و نلقى بنة الحلمة والهروب..
و نلقاني.. 
بعد ما ضعت بين السما وحرفها..
و فيبالي الدنيا وفات و معاش فما حاجة بعدها.. 
عرفت انو الدنيا مازالت تكمل.. 
و جهدك يا علاف.. 
و مش أنا لي نطيح و نسلم.. 
أنا نطيح و نقوم..
و نرجع خير من قبل.. 
قداش من ندبة سكينة في الظهر.. 
و مازلت مكمل.. 

خاطرني قررت نعيش
بالسيف على قلبي لي معبي بصوتك
و بالسيف عالغزرة الباردة في عيونك
بالسيف عالدنيا و بالسيف عالموت
قررت اني نكسر السكوت 
نحط موزيكا قوية
خطوتين و نغمض عينيا
و نذوب
سأرقص حتى أبلغ بوابة الهروب
و لن أهرب

Wassim Amor -  تذّكر ؟

Lyrics and Vocalization: Wassim Amor 
Music: على كمان الألم تعزف دموعنا - extended 

Lyrics:

كنت صغير
نحب نكبر 
 و كنت ما نصدقهمش كي يقولولي تو كي تكبر تندم
كنت نحب نتحرر من سلاسلهم 
نعمل الحجات لي كان الكبير يعملهم..
كنت صغير، و الدنيا كانت محلاها.. 
لكني كنت مزروب و من زربتي وانا نكبر ضيعت معناها
-
كنت نحب نكبر خاطرهم كانو محسينني لي أنا صغير..
لي هوما خير
دايرين و لافين 
كبار فاهمين 
و لي أنا مازلت ما نفهمش و ما انجمش 
صغير و توة يجي وقتي..
فعاندت و جبت وقتي وحدي 
كبرت
و  عرفت انو  هوما لي مافهموش
رباو، كبرو،  خدمو و تعبو  شراو
لكن ما عرفوش 
ما عرفوش يحبو 
يعنقو،  يحتويو،  ياخذو بالخاطر 
و انا كنت وليد صغير 
و كان كل اللي علموهولي اني نقول حاضر 
نسمع الكلام و مانعليش حسي 
ما نبينش غشي 
نروح مالمدرسة نخدم دروسي
نقعد شوية مباعد نغسل سنيا 
و نرقد بكري بش نفيق ناشط 
و كي يصير و نخمم البرة من هالصندوق الفارغ
مايلزمش نسئل سؤال ما يعرفوش يجاوبو عليه
و مايلزمش نحكي فلي ما لياش فيه 
و أنا صغير و ما ليا في شي 
فقعدت ما نحكيش
-
ما حكيتلهمش علي كان يصير في نهاري
لعبي غشي عركي و صحابي
ماهو هوما أساسا ديما يا لاهيين يا تاعبين 
وأنا حكاياتي فارغين
و هو لي يعملو فيه لشكون 
ماو ليا 
 بش طريقي متكونش آخرتو لحن حزين
لكن الحزن كان له وجه ثان، لم يدركوه بكل خبرتهم في الحياة
أدركته أنا ذو السنوات القليلة المعدودات.
-
علموني زادة إنو لي ما يصليش يدخل للنار 
و اللي يكذب يدخل للنار 
و اللي ما يسمعش الكلام يدخل للنار 
و نار و نار و نار 
و أنا الصغير، اللي كان دخلو لصدرو راهم شافو النار
خوفوني مالشيطان 
علموني بش نبعدو عليا 
لازم نسمع الكلام نصلي و نقرا القرآن 
وقتها حرقو أول حبل بيني و بين الرحمان  
--- 
علموني بارشا حجات، منها الباهي و منها الخايب
فضلهم عظيم مانيش جاحد 
و الحنين لي ديما يرجعني ليهم شاهد 
لكن ماعلمونيش نحلم ، نخمم 
نكبش و نلقى طريق آخر كي تتسكر الثنية 
و لا آمنو بيا بش نكون حاجة أهم من الحلمة العادية
ما علمونيش نغزر لأبعد ملي يشوفو فيه 
و لا صدقوني كي قلتلهم فما بعد آخر للحكاية ماهمش فايقين بيه 
حبو يخنقو روحي قربانا لإلاه المجتمع العاكش 
حبو الكون لي فيا يتلاشى بش الناس ماتقولش فاسد
فماكانش عندي حل خلاف إني نهرب
إني نمن وحدي بروحي 
نكبش في طرف الحلمة و نفارع و نفارع لين نرسى 
لين نلقى طرف نور يطمني، يدلني 
يحسسني لي فراعي مش في الفارغ
و لي الصوت في صدري ماكانش خادع 
لي إحساسي أصدق حاجة انجم نتبعها 
و إنو مش بيجي نهار و نندم على حاجة عملتها
---
تعرف، لو كان بيدي نرجع نبدل
 راني ما بدلتش 
راني عاودت نفس اللي صار
و راني بنيت روحي بنفس الفجوات لي لتوة مش منجم نعبيهم 
بنفس الندوب لي مانجمتش نداويهم
خاطرني كي كبرت عرفت إنو الإيمان يخلق الحجات 
و إنو الخايب يصبر و الوجيعة تكبر 
و إني كان عندي الحق كي سمعت صوت الكون و تبعت العلامات 
إني ماستسلمتش و ما سمحتش لروحي نموت كيما حبوني نعيش
آمنت، سألت، لوجت و لقيت 
 و مازلت نتبع ونلوج عليا، 
و مازلت كل ما نجي نلوج نضيّع مني شوية 
و نتعلم شوية و نمشي في طريق غالط شوية 
و بالشوية بالشوية 
فما جروح مش حابة تبرا حتى شوية
لكن مايضرش، 
خاطر الأهم، إني كبرت ماندمتش.
---
الوجايع المنسية تتحير من وقت لوقت 
لكن وقعها فينا باين متخبي 
لوج في صدرك تو تلقاك مازلت تبكي 
و مالبرة جلمود حجر
ذاك الطفل الذي كبر فجأة، دون أن تعلموا عنه شيئا 
سيعود ليستكمل طفولته المتلاشية بعد أن يشفى مما مضى 
سيكبر بعدها و لن ينسى 
سيضل طيف الطفل في صدره وردا يانعا
يمنعه من أن يصير مثلكم
من أن يختنق بشكليات مقرفة 
و يتزوج قريبته المكلفة 
و ينجب أطفالا فقط لأنها سنة الحياة
هذا الطفل في صدري 
سيهديني إلى ما يستحق الحياة

Wassim Amor - كبِرْتْ

Lyrics and Vocalization: Wassim Amor
Background Music: Schindler's list - Main Theme
Wallpaper: Denis Forkas - Children Praying in the Dark
____________
Lyrics:
اللي الداخل مني مدفون
مردوم بسنين و عباد
سر من أسرار الكون
نفخة روح هبات
*
المخ ولى ينسى
و العينين ولت ترا معاش تشوف
فرغت حتى م الحروف
مالكلمات
لي كنت نهز بيها العروشات
نحرك القلوب
و نعنق الموجوعين

مساطت الحكيات
فناجن قهوة بايتين 
اعقاب دخان.. 
غطيان مفرتين
نوم مكسر
و جفون محوقين.. 
و الحجات الصغيرة..
لي كانت تصبيرة
بين الخنقة و الوجيعة
معاش لا تتحس لا تصبر..
*
الألوان بهتت
الأنفاس همدت
و الشعلة ولت رماد مطفية
الأيامات هي هي
نهار واحد
 مهما تبدلت فيه حجات
هو نفسو يتعاود
محسوب عالعمر شهور و سنين

فمّا حاجة في العينين..
رمشتهم فيها خريف
غزرتهم فيها برود 
النبرة غلبها السكوت
و الكلام فرغ مالمحبة و الدفا
فما حاجة غالطة هنا.. 
في صدري.. 
في بدني
ديما تاعب
يوجع و غالبو النوم

فما عُقد و هموم
خانقة الطموح
مكتفة الجموح
حابسة الروح
في أطراف البدن
*
كلامهم السم
يخثر الفن و يقتل الرغبة

اغزر لحالتك
متكور في حفرة
ميت بالحيا
تتنفس 
أما النور في صدرك طفى

محصور في تركينة
أصواتهم السكينة 
كل مرة تقص منك شوية
تحير الندوب المنسية
و الجروح لي ماتسكرتش
محبوس من وقت الحلمة لي ماكملتش

الباب محلول 
 اما انت مشلول بصوتهم يرن في وذنيك 
بنفس المشاهد لي تتعاود
كل ما تسرح والا تغمض عينيك

غارق في الظلام
تسمع في صوت ألوان البرة
تتخلق و تتشكل
أما بدنك مشكل و متكتف بيك
روحك مخدرة
صدى صوت غارق ينادي فيك
و انت تتخبط وحدك و تلاجي
لسانك معقود روحك تناجي
انا مش هكا هذا مش أنا
أنا أحلامي كبار
و عينيا مليانة
بمحبة و دفى و بتبسيمة
كنت ديما نغلب الحكايات القديمة
و كل مانطيح نقوم خير 
كنت ناخو بيد الموجوعين 
و نوصفلهم الدوا
تخنقت مالقعدة هنا 
نحب نخرج للنور 
نتحرر
 نشق سماوات و بحور

تتخبط و تفارع و تصيح
و صياحك صدى
يضرب في حيوط صدرك الباردة و يطيح

صياحك سكات 
معبي حكايات 
يعرفها كان الليل
حد مايعرف وين تسرح في شرودك
و لا سكات الليل شيعمل في حدودك
وصوت البحر و نسمة الفجر
الوجوه تتبدل عالعتبات.
و انت على كل عتبة بوجه..

*** 

اليدين لي تتمد سراب ليهم و ليك
حد ما بش ينجم يخرجك والا يحميك
حد ما بالحق بش يحس بيك 
و يفهم العقد المدفونة
 و الحكايات المخبية
  و الروح المسكونة
 بخيالات و رؤى
 بحجات عباتك 
ملي كنت نجمة شاردة في السما
 بسناريوات تكتبت و ماتعاشتش
و بوجيعة نصوص تبدات و ماكملتش.. 
*
فماتتمناش حد يجي ينجيك
اوعاك تتخيل انو الدنيا واقفة عليك 
اللي تعدا وفات مش بش يرجع
و اللي جاي مش معلوم، 
خليك في اليوم
قوم افرد بدنك
انفض خوفك
واغزر في قلب الشمس
اخرج مالحبس 
خلي قلبك يملا نور
و عروقك تنبت ورد
واجه مخاوفك و اعمل جرد
و كون انت بكلك 
بعيوبك و ظلك
بخايبك و بلي محلّيك
بالسر المدفون فيك
 حد ما عندو حاجة عندك
و حد ماو شادد السما لا تطيح عليك 
ارسخ جبل في أرضك
يا جبل خنارهم مايحوك فيك

Wassim Amor - السر

Credits: 
Lyrics and vocalization: Wassim Amor
Background music: Finneas, Break my heart again, Karaoke
Wallpaper: Gustave Courbet, Sunset on Lake Leman, 1874
___________
Lyrics:

سكات..  
ظلام تولد منو النور.. 
آخر جمرة هبات.. 
ظوات بعدها بحور.. 
ورد حنين نبت في الصدور 
و مطرة دقت عالشباك
 طاقة سرات في العروق
طرشقت بذرة تنسات.. 
العينين تحلت.. 
صوابع تحركت 
و الحكاية عاودت بدات..

فصل جديد.
رغم إنو اللي فات كان صعيب
واللي جاي أصعب.. 
أما مهما كبرت.. 
مازلت بش تكبر
و تفهم
و تتعلم
و تطيح و تقوم
مهما كبرت الهموم.. 
مهما تعبات الحفرة سموم


الحفرة غارقة
 الظلمة دامسة 
و انت مش عارف روحك
 لا وين 
لا شكون 

غرقت بين الخدمة والنوم
في الخدمة راقد
و كي ترقد مخك يقوم

ديما تاعب 
لكن تخاف لا يقولو مغبون 
فتخرجلهم عادي 
فرحان، متماسك وهادي 
و الداخل منك بركان مكتوم


أيها المفتون بالدنيا 
خابت مساعي العاجلين 
أتدفن في حياة غير حياتك
أم تجوب الأبعاد مع أرواح الزاهدين


ارمي روحك في روحك
تحرر من كل قيد كبل جموحك

لوج وحدك و اسمع و شوف
خاطر الحقيقة تتبدل حسب الظروف

ماتخلي حد يحفظك الحروف
ولا يخليك تشك إنهم خير منك
انت انسان كامل بمخاوفك و همك
و بكل تفصيلة فيك
فماتخليش غرورهم يأثر عليك

اعمل لي تشوفو صحيح 
حتى كان غالط.. 
و آمن بالحاجة..
تو تلقاها صارت


الطريق بش يكون طويل
و مع أول خطوة بش تاكل أول كف 
ماتسلمش.. 
قاوم و تو تلقى الحمل خف
و تو تلقى يديوة حنينة
تمسح عليك غبرة الزمان
كبش فيها 
و اجبدو بعضكم لقدام

الحب الحقاني
مايهزوش الطوفان
الحب الحقاني
يهون لي جاي و يصبر علي فات
تعنيقة و كليمة حلوة
يردو الروح في القلب المات


لكن   حياتك مش المفروض تكون ديما فرحانة
الدنيا وجايع و عينين مليانة 
طاقة و دفا 
المهم تعرف كيفاش تعيش هنا

فحب روحك بش تنجم تسمع السكات
و تشوف النور المولود من ظلمة الأيامات 

كتابك محلول
و المحبة.. سر الكون 

فاكتب.. 
اقلب الصفحة و ابدى من جديد.. 

حارب..
ما تخليش أحلامك تخيب

Wassim Amor - سكات

Feeling the universe inside of u allows you to project it to the world in the shape of texts, called slam.
Feel, Dream, CREATE

Wassim Amor - قبل ما ننساك

A.mor

Recent comments

nermine

Hadil Tej

azza

Abir Rezgui

Related tracks