Adorable comme toujours <3 Ta lueur mon cher ... ta flamme jaillissante...

حبيت so go ahead and break my heart again ♡

نحب نرجع مللول
خدي أحمر و ماعنديش ظوافر 
شعري أرطب و يديا صغار ما يشدوش لكورة 
نرجع لركايب المزلوعة مالطياح و اللعب في البطحة مع الذكورة 
نحب نرجع للصفحة البيضاء الي كانت في مخي
الي فيسع تتفسخ منها طريحة أمي 
و نبزة بابا 
و يتفسخ منها أول نحبك و أول محلاك
أول حل شعرك
و البس روبة ، تي هات بوسه شبيك مزروبة 
نرجع للنسخة لولة 
تحت لمطر مبلولة ، 
جابلي سحابة تغطيني ، قتلو يعيشك خلي لمطر ترويني 
نروح على سقاي و نغني الحيا حلوة بس نفهمها 
و يا ريتني ما فهمتك 
حبارك ما يتفسخش كي الوشام 
أكحل مدرغم ظلام 
كل حرف باش يعيش معايا و يموت فيا 
كل بوسة طبعتها فيا 
كل حلم دفنتو في جواجيا 
كل غنايا دندناها 
و كل ثنية بدلناها 
و قطعة نحيناها 
كل عركة و كل كلمة دونية 
و كل ما ترضيني و تقلي لا ينحيك عليا 
عبيتها تصاور و زرزقتها بدموعي 
حرقتها لهبتها بشموعي و نار كي تمسها تحرق لحمي من داخل و
تخلي أمارة 
لا لعمر يحب يرجع و لا الصفحة تحب تنضاف 
و لا حب لحمي يبرا و الحمل يخفاف 
لحيوط ضياقت و ما نجمش ندور راسي و نشوف ورايا 
و كان درت و شفت 
باش نشوف تصويرتي ... في مرايا *
ياسمين الماجري
Music : Gladiator - Now We Are Free (Piano Version)

Miroir

made at 3 A.M
Lyrics and Vocalization : Wassim Amor
Music : Disturbed - Sound of Silence mixed by Mohamed Achref Bouazizi
Wallpaper : Baha Hzami
Lyrics :
قبل ما ننساك..
و نولي ماعاش نتهز كي نتعدا حذاك 
و لا نرا خيالك بين النجوم
و لا نرا شموس مزروعة فيك كاينك كون..
و قبل ما نرميك للي ما منو رجعة..
و نمشي في طريقي من غير لا تلفيتة لا حسرة..
قبل ما نوفى منك و نوفاك.. 
كان لازم نكتبلك عزاك..

سماك لي ماحسها حد خلافي 
و كتبتك فيها للات الدنيا و للاتي
وكي عملت منك شمس و وردة  
و ليل و سيل و بحر و قمرة.. 
الوقت لي سرقتو من حزني بش تفرح.. 
و الشجرة لي عطيتها كلي و استنيتها تطرح.. 
كل حاجة صغيرة عنات دنيا كي عملتهالك.. 
و كل كلمة دافية ماكانش لازم نقولها و قلتهالك.. 
كل حاجة قعدت فيا كي انت مشيت.. 
و كل ليلة رقدت و انا حالف ننساك 
و نفيق الصباح على ريحتك مالية البيت..
كاينك مهما غلطت انت مريم.. ام المسيح..
و كاينو الليل لي لمنا سرق حلمنا..
و كلامك كلو هزو الريح..

كذاب يا ليل.. 
و كذابة وعودك.. 
و أنا كذاب لي قلت ما نحبكش و كل ليلة نرقد على صوتك
و نفيق على صوتك
و نعيش على صوتك 
انت لي تحكي بالسكات و الا أنا لي نتخيل.. 
والا عينيك رجعتني وليد صغير.. 

بارشا وقت تعدي و انا نستنى.. 
 و مالقيت كان برد فايح منك.. 
و قلبي اللي مازال امنيني بالجنة

حبيتك.. عطيتك كلي و استنيتك
كنت النور لي رجع قلبي يدق كي شافو
لحن الليل لي ما يسمعو كان عبد غارق في حلماتو
كنت الشمعة لي كي نظلام تضويني..
و الهمسة لي كي تخبى عينيا تدفيني..
أما خسارة، الشمعة ذابت و الداخل مني رجع ظلام..
الهمسة تلاشت.. و بقى كان السكات يعدي الأيام..

خسرت بارشا و ماندمتش..
فرحان لي تعديت في حياتي حتى كان مادمتش..
بردك كسرني.. و بالوقت ولا يقويني
أما اللي خسرتو يكفيني.. 
لا عاد الشمس تذكرني فيك  و لا عينيك تداويني
 لا نقراك بين ثنايا السطور و لا نكتبك و لانسمعك و انت ساكتة تناديني..

خليك ببردك..
هذايا عزاك.. 
الليلة وفات خيالاتي معاك..
لازم ننساك..

Wassim Amor - قبل ما ننساك

Lyrics and Vocalization : Wassim Amor 
Musique : Nothing Else Matters - Metallica - William Joseph cover
Lyrics : 
وقعك في خيالي وردة..
مسك الليل كي تغدرك الوحشة..
و انت فارغ من كل هربة..
*
انت هربتي..
خيالي و احلامي..
ادفى همسة على لساني..
تواحشتك.. و تواحشتني فيك..
و تواحشت تعنيقتك لي تسرقني مالدنيا
و تخبيني في شونك..
تواحشت لون عيونك..
كي كان يحكيلي الكون شمخبي..
و قداش يحبني ربي 
**
كي ريتك..
كل حاجة روحها تبدلت..
الشتا ولا دافي..
و القوة ولت حطة يدك على كتافي..
و الورد ولا في كل بلاصة يهمس للريح..
راقصيني رقصة حياة ابدية..
محلا روحك فيا..
و محلا الغناية في عينيك..
و صوت فركان خدي على خديك..
و محلا يديا كي تخبيهم في يديك..
كاينك تقلي انت متاعي..
دفيا و فرحتي و شاني..
الشمس لي بعثت فيا الروح..
الما الي يجري في جبالي..
و الكلمة لي ماتخرجش من بالي..
هربتي كي تضيق بيا الدنيا..
و ظهري كي يغدرني الوقت و تحرقني عينيا..
*
كاينك تقلي.. قلي..
و نعطيك كلي..
نبوسك من كفك و جبينك..
و نخبيك فيا ملي حاسدينك..
**
مازلت نتذكر الغزرة لي بدات بيها حكايتنا..
كي الوقت وقف و الضو خفاف..
و خرجت منا نفس الموزيكة البنينة
و في نفس اللحظة ترسمت على شفايفنا تبسيمة..
أول كلمة تقالت..
و الشجرة لي كي شافتنا مالت.. 
كل شي كان معاك معبي..
صافي و محلاه كي كان عالناس مخبي..
***
و أنا اليوم جيتك هازز قلبي في يديا..
محلفك بكل ضحكة رسمتها يوم على شفافك..
و بكل تعنيقة خبيتك فيها من احزانك..
بكل لحظة سرقنا فيها اللحن و هز ارواحنا لعالم اخر..
و بقات اجسادنا هنا تتناسق..
بكل كلمة تقالت مغير صوت..
و بكل نهار فقنا فيه حابين نعيشو و كارهين الموت..
ايجا تغفرلي و نغفرلك..
ننساو الوجيعة لي ردت قلوبنا ثقيلة..
نوفاو الوقت لي ضاع من قبيلة.. 
نبداو وقت جديد.. 
و نلقاو طريق ما يحيد..
نلقاو ثنية حلمتنا..
و نتعلمو كيفاه نقويو خطوتنا.. 
**
انا وليد صغير ضاع في دنيا اصغر من احلامو..
كي ريتك بانلي دليل..
انا سفينة كلاها الليل..
ايست و بقات تستنى في الموج يبلعها..
بيدك انت تصلحها..
*
نعرف لي تاريخي مش هو..
بنات و حكايات
اثام محصودة..
و حكاوي ممدودة..
و جحيم موعود..
أما أنا اليوم جيتك متطهر..
حالف عليك بلي لقيتو في عينيك..
تغسلني بما شرب من صوتك..
و تخلل روحي بصفا روحك..
تسمّعني أدفى غناية عندك..
و تخليك مخبيتلي يديا..
انت احلى حاجة فيا..
جيتك زاير المقام، و منيش متزحزح..
حالفلك بلي عشتو في سماك..
نكونلك دفى و ظهر..
كتف تركز عليه كي تعثر ويد تلقفك كي تطيح..
اللي بيناتنا مش شوية بش يهزو الريح..
خليك ليا دفى و عيشة..
و خليني ليك سما و سند..
كي شفت عينيك الشيطان لي فيا سجد..
رجع لربي و كفر على ذنوبو..
لقينا رواحنا في دنيا كل واحد فيها عايش لروحو..
و أنا عايش ليك..
لوج مليح تو تلقاني فيك..
كيما انا لقيتك فيا..
عنقني تعنيقة قوية..
و خليني نهمسلك..
الليل الدافئ في عينيك..
يحمل كل ماقد ينقص هذا العالم يوما..
و هالة النور التي تحيطك.. تنير داخلي المقفر..

Wassim Amor - وقعك في خيالي

مش ديمة نجم نقرى نص مش نصي 
أما النص هذا عانق الروعة وهو لصديقتي روعة العبيدي 

هذا النص إهداء لكل من يصارع مرض السرطان
نقاوم دوما لنعيش وسنعيش لننتصر

--------------------------------------------------
كتابة : روعة العبيدي 

[Amine.G] إلقاء : أمين ڨلّح

كلام لمراية صحيح (نص لروعة العبيدي)

Lyrics and vocalization : Wassim amor
Music : some  sand - ibi 

Lyrics :
حمى ديسمبر.. ميعاد الرحيل..
في ديسمبر يشتد تيار الحنين..
اجبد الدفاتر و راجع الحسابات..
الذكريات لي تنسات
العباد لي مشات
والأحلام لي تدفنت
من غير لا غسل لا كفن
ساح الدم
سقى السما وجيعة
الرواري ذابو في تنهيدة
و نفخة وحدة هيجت السحاب 
و الغزرة لي هازة الوقت و الدنيا
طفات و اندثرت
ولت تغزر في العدم
القلب ذبل
و الموزيكا معاش تداوي
هي هي متعاودة الحكاوي
و العادي كالعادة ربح
الوقت جمد
و العباد حبست
حمى ديسمبر
وحدك في الكون انت و الليل
لا قمرة توَنس لا تهدي السبيل
قاعد تغرق في بحر دافي
و حياتك كلها دايرة بيك
العباد الكلام البلايص و الغناوي
كلها تحب تدزك لفوق
أما انت مكبش في الموت
الحجات تبدى تذوب
و العنين تظلام
و مع ضربة ظهرك عالقاع يتعاود نفس الكلام
و تلقى روحك في نفس البلاصة و نفس العيشة
نفس العباد و التخمام حلقات سيناريو رخيسة

الكلام ما يحسو كان لي يقولو
خاطر العبد ضعيف و ماينجمش يقبل عيوبو
حتى بش يقبل عيوب الناس
و يشوف المتخبي و يفهم المعاني
بطبيعتو الانسان أناني
و انت و حدك غارق في الدنيا
لا عرفت تغادر لا تعاند لين تلقى ثنية
كل شي نسبي
حتى لي قال يحبك
حبك بش تحبو
و تحسسو لي يحب يحسو
كل شي نسبي
المحبة بأنواعها
بنة الريحة لي كنت تذوب قدامها
بنة التعنيقة
النبرة الحنينة
السهر في الليل و انت تفكر في الدنيا و الموت
في معاني السكوت
في ناس عمرها ما فكرت فيك
في الصوت الفاكس لي فيك
لي كل مرة يقلك و ماتصدقوش
و كل مرة كنت تعرف لي عندو الحق
و باقي ما تمنوش

حمى ديسمبر
كلام طايش و تصاور مضببة
أصوات مخلطة مدغدشة
بارشا أسئلة و أفكار مشغشبة
احساس النهايات الموؤودة
و البدايات المحسوبة
و الحنين العارم
موسم الحج في أرض الموجودين
الواعيين ببنة الكلمة و دفى الحلمة
و عبثية الحياة
و انو الانسان عايش أما مات

عزيزي ديسمبر
فداش بطيت
استنيتك بارشا.. لين عييت
لين فكرت نجيك
أما مانجمتش نكسر قلب أمي
و لتوة مش منجم نحدد
جيانك خير
والا كان لازم نوقف السير
و نجيك أنا
مازلت نذكر آخر مرة جيت
كانت الدنيا مطر و الوردة بردانة
و كانت الحلمة مشارفة عالفنا
كان تشوف قداش ولت اتعب العيشة هنا..
مش عارف كيفاه بعد لي حكيتهولك اخر مرة
نجمت نلملم طروفي
و نخرج للناس بكامل حروفي
و أنا واقف عالحرف تحكم فيا كلمة
و هو ما فيبالهم لي ميزاني راكح
و كلي رزانة و حكمة
ديسمبر..
كل ما تطل تلقى نقصت شوية
نتلاشى كي حلمة منسية
نجمة ملوحة في السما
قلي.. علاش ما تبقاش هنا ؟

قليل أنت جدا على سنة كاملة يا ديسمبر
ايجا نحكيلك بعدك شعمل فيا
ردني قاسي و جاف و مش مهتم
كاينو طرف النور لي كان يتمخض فيا
غلبو الظلام وكفر بالفن
و الوردة لي خارجة من بين الأسفلت تعافر
استسلمت للعفس و الجهد الغابر
و لخيبتها في الناس
مات الاحساس
و طفات و الشعلة في العينين
لكنك ديسمبر كنت دائما ميعاد الحنين
و القلوب لي تلين بلفحة برد
وقت الجرد
و الربح و الخسارة
مقبرة الأحلام و ميلاد النوارة
وقت توقف الدنيا في فجر ليلة حزينة
و تطل على حياتك من فوق غيمة
يش تفهم و تتعلم و تقيس
بش تعرف اذا كان مازال منو فايدة انك تعيش
و تكتشف اللون الحقاني لأحلامك الوردية
بش تلقى الثنية
خاطر لي مشيت فيه قبل
ينجم توة يخليك تتضر
و خاطر الفايدة مش كان في النية
فلازم تعرف انت شكنت و شوليت و شنية تحب تكون
و تنجم تكون
و تسخر الكون كلو ليك
و الا مقص يحكم فيك
و من بعد أول كف ما تقومش..
وقتاه بش تصدق لي العباد ما تدومش
و لي انت زادة مالازمكش تدوم
لي آخر كل عام لازم تلقاك خيرمن روحك
مالعبد لي كنتو قبل..
مهما رماوك الناس بكلام حجر
يهد لي عييت و انت تبني فيه
يغرس خناجر مسمومة في الظهر
يحبو يلزوك تعيش عيشتهم
اوقف قدام الوجايع  و عاندهم
تعلم تسامح و تحب روحك
ماتخلي حد يريض جموحك
و كي يجي ديسمبر 
استسلم للحمى و للحنين
إنك يا صديقي 
عجينة أحلام حضرت من غبار النجوم و اليقين
بكل مالا تجيده الفيزياء
و إنهم و لو أنكروا، مجرد عجين من طين و ماء

Wassim Amor - حمّى ديسمبر

Credits : 
Lyrics and Vocalization: Wassim Amor 
Music: Coldplay - The Scientist - Cover by GnuS Cello

Lyrics: 

أغسل غيومك  السود  بدموعك، 
و خلي الشمس تشق ضلوعك، 
الهموم مكتوبلها تشيح، 
تتشقق، فتفات يهزو الريح، 
و انت مكتوب عليك تعيش 
و تاخو من الشمس خيط تبدا من طرفو الحلمة، 
مكتوب عليك تملى كتابك وحدك، بالكلمة بالكلمة، 
بالنفس بالنفس، 
سلاسلك كذبة، و دنيتهم قفص.
كلام،   ممكن محروق تحسو 
لكن تو يجي نهار و تفهمو
 في ليلة شتا بالك 
و النوم هارب عليك و انت سارح في خيالك 
و وجيعة قلبك تنخر فيك 
و انت غارق في سوادك
ممن إنو الفرحة حرمت عليك
و إنو الدنيا وقفت و وفات 
لكن مباعد، تو تعرف لي وقتها بركا وين الحكاية بدات
خاطر الوجيعة هي أول طريق الحكمة 
و إنك تولي تفهم الكلام 
اللي يتقال و اللي يتحس 
و تشوف في وسط الظلام 
لي ماتنجمش تشوفو و انت غارق في الحس 
إنك تتعلم تلوج عالي مخبي ورى الضلوع 
خاطر الوجيعة كلام ما يتقالش أما مسموع

صدى ليل بوابتو حلمة 
وقت اللي الأنفاس تهدى 
و العباد تتهد
البلاصة توساع 
و الوقت يتمد 
و تبدى أفكارك تسري 
و روحك تسافر بين النجوم
اذاكا اسمو وقت فرزان الحكاوي و الهموم.

يجي على غفلة 
عقاب ليل و ريحة ياسمين و موزيكا بنينة
و الندى يصب عليك من كل تركينة في الكون 
ستتعالى  في رأسك حينها أصوات السكون
 و ستصاب بمتلازمة التأمل و التأويل
و بش توهب روحك لليل 
خاطر لليل جوارح و عشاق
طيور العتمة و أسياد الفتنة
نجوم منسية و أحلام مطفية و دموع تحرق
لليل ناس أرواحها قاعدة تغرق..
في مساحة اسمها الحنين
خاطر الظلام بركا يخلي قلوبها تلين 
و أرواحهم توساع لين تحوي السما 

في الليل كل الي نخافو منو يتلم هنا 
في المثلث الخاص بينا 
الروح و الكون و الرغبة
و يا نستسلمو للخوف و الحسرة 
و نموتو مستنيين الدفينة
 يا نبطلو نخافو من الي تدفن فينا  
و نتعلمو ناقفو على ساقينا 
من غير مزية حد 
من غير مانضيعو حياتنا نستناو في سند

 كي نداويو الجروح لي عندها سنين محلولة ، ماندملتش
و نصفيو الحسابات الي صارلها وقت طويل مركونة، ماتسكرتش

وقتها بركا نجمو نلقاو الثنية لبوابة الكون 
و نفهمو إنو نجوم 
مش مجرد نور واصل امخر
و انو الطبيعة عندها صوت 
مانجمناش نسمعوه كي كان قلبنا مخدر
و إنو الحجات لي تصير كلها دروس و  علامات 
و إنو الحكمة أغلبها سكات
 
 فمن سكات، قوم خوذ نفس و امشي ما تستناش 
و كي الدنيا تجي عليك ما تنساش 
إنو ما بش تدوم كان انت لروحك، 
فإنت لي لازم تكون طبيب روحك. 
خلي تجاربك القديمة غربال 
و السلاسل لي قيداتك حبال 
تتعلق فيها لين توصل للنجوم
خلي كلامك معبي ، أما مفهوم 
و مد يدك للناس 
خاطر ثنيتك بدات بيد تمدتلك 
بسرة من السما ترمتلك
فيها أول الخيط
بصوت مونسك ملي بديت 
خاطر فما سر رباني فيك
لازم تفهمو بش تحس قداه محلاك 
و  إنك مكتوبلك تزرع حلاك 
في كل طيف مهدود
خاطرك نجمت تنبت من تحت الأسفلت ورود
تداوي و تزين السما 
و تدفي القلوب لي طفات و كلاها الصدى


اذاكا اسمو وقت فرزان الحكاوي و الهموم.
يجي على غفلة ، عقاب ليل و ريحة ياسمين و موزيكا بنينة
و الندى يصب عليك من كل تركينة في الكون ..

اللِيلْ

Wassim Amor - اللِيلْ

لا همّي تسأل آش بيني
ولا همّني نعرف آش بيكْ
آش همني أنا في ضياعكْ
في طريق ضيّعتو بيديكْ
في قلبي وجيعه تكفيني
و يكفيني نكذب ناسيكْ
وحدي مع وحدي معلّيني
يا حسره كنت معلّيكْ

في سكاتك كنت تناديني
ومن غزره نعرف إلي بيكْ
ومن ضحكك نفرز دمعاتكْ
و في ضعفك كنت نقوّيكْ

و الغصه إذا تلبك لحظه
تكويني إذا تكويك
و كلامي ببحورو صحرا
و حضني سكات يداويك

و نطبطب ديما على أكتافكْ
على أكتافي تتعدّى نعدّيكْ
و نفرح كي تحكي هبلاتكْ
وكي تغلط كنت نرضّيك

و نزيّن ديما حلماتكْ
من بدني نخرج ونجيكْ
و نلاغي شعرك في نعاسكْ
وكي تبرد بروحي نغطيكْ

وفي الفكره في مثيل هلالكْ
مع ناسك قمره نضوّيكْ
و نخيّط روحي على قياسكْ
مش ضعف كان همّي نُرضّيكْ

و اليوم أنسى آش بيني
و خلّيني ناسي آش بيكْ
وينو إلي عجبك في هبالكْ
كي شمّك إستخسر يسقيكْ

في بالك ترجع تلقاني
ما عادش نلقاني فيكْ
خلّيك مع الرّيح تغنّي
و جناحك ما يرد عليك
---------------------- #سيف

اش همني فلي ضاع
واش همك في عمر تباع بالصاع
واش همك فلي شرى
واش همني فلي باع

انا ديما شاريك
وقد ماقلبي حب يضياق عليك
روحي ديما ليك توساع

لاهمّي نصون خيالاتك
ولا ندحي همومي الي فيك
وفي سكاتي نسمع ضحكاتك
ونفصّل غزراتي فعينيك

يا ريتو الزمان الي صانك
عايرني وانا بلا بيك
نتلمّح الوردة في اغصانك
ونتحسّس يدّي ذبلانة
خانتها سخانة يديك

كي ظلّم ليلي في نهارك
حبيتو يرميني ليك
وصيّت الدقّة الي خطاتك
اتدلني وتهديني ليك

من حسّك كانت بسماتي
نتكّى نحس جواجيك
وفي شونك روايح مماتي
وعروش جاشي هوما اماليك

ليك انت نسبّح ونصلّي
نهبّطلك نجمة وتولّي
كي الشامة المنقوشة على حجرك
وتزيدك في حر شهاويك
توريك لمفرّت ومخبّي
على حسّك ماني متربّي
ومفطوم على نفس رواريك

في بالك تقعد تلقاني
وفي بالي سرّك كي حكاني
وكتم وماحب يعاديك
وفيت ...
وفيت ومعادش نلقاني
مصمّر عينيا فيك
خلّيه البعد يرتّحنا ويبرّي
مكتوبي ومكتوب عليك
---------------------- #أمين

نص مشترك : Saief Ezzine & [Amine.G]
إلقاء : Amine Gallah

لا همّني (Amine.G & سيف الزّين)

Lyrics and Vocalization: Wassim Amor
Music: Ed Sheeran- Perfect instrumental cover – Joel Miranda
Wallpaper: 2tango.gr

Lyrics:
راقصيني..
ربما ينهار الكون فجأة و يصمد إيقاعنا..
قد تتبعثر الكواكب و تعصي النجوم رتابة قوانينها..

فراقصيني..
حتى نصير جسدا واحدا.. كاملا..
حتى نصير كتلة مشعة
تعيد المهجرين إلى أوطانهم و الأيتام إلى آبائهم و الأوطان إلى أصحابها

أنت أرض الله الأوسع
خصبة بما يكفي لتنبت منك شمس و كون جديد..
أنهارك تصب في السماء مايكفي من الحب ليضل الفجر عائما في المكان 
كرومك متشعلقة في النجوم و الورود فيك تطفو ببطء في مسارات مبعثرة

أنت نور الله في المكان..
خيط نور خفيف مسلط علي.. يعزلني عن تلك الضوضاء المتعبة
رائحتك تسكنني و تتعبني و تحييني.. 
و تجعلني أتقن خطوات الرقصة جدا بعفوية كاملة

تشبهين الليل..
و السماء ربما..
فيك شبه ما من الغابات أيضا..
و من أنثى العنب..

أحب لونك الهادئ ..
و تدفق الطيور في عينيك..
كل شيء يبدو سعيدا في انعكاسهما
الآلهة الإغريقية..
العشاق المكابرون..
و العقاب و الوحيد أعلى التلة..
وأنا.. أزداد جمالا في انعكاس عينيك

راقصيني في ملهى على القمر..
سيكون كل شيء خفيفا هناك..
و ستشتد قوة الجذب بيننا..
و ستبدو الأرض أجمل عن بعد..
كل شيء يبدو أجمل عن بعد
أنت فقط من تزدادين جمالا
كل ما اقتربت..

الوقت بطيء على القمر..
مناسب جدا لعمر أطول قربك..
لذا سأراقصك على القمر.. 
و سأسترق حفنة منك..
و أنفثها على الأرض لتعود خصبة..
كي  تسترجع ألوانها و يعود الهواء خفيفا
ويعم الحب

فراقصيني

أنت هدية الله لهذا الوجود 
آلهة الرقص في عصر الإغريق الجديد
سيدة سهرة لا تنتهي
و أنا عرش لا يناسب غيرك
أنا نبي الله الذي بعث لك.. 
و أنت معجزتي و الحضن الذي أعرج فيه بأمان

Wassim Amor - راقِصيني

Lyrics and Vocalization: Wassim Amor
Background Music: Schindler's list - Main Theme
Wallpaper: Denis Forkas - Children Praying in the Dark
____________
Lyrics:
اللي الداخل مني مدفون
مردوم بسنين و عباد
سر من أسرار الكون
نفخة روح هبات
*
المخ ولى ينسى
و العينين ولت ترا معاش تشوف
فرغت حتى م الحروف
مالكلمات
لي كنت نهز بيها العروشات
نحرك القلوب
و نعنق الموجوعين

مساطت الحكيات
فناجن قهوة بايتين 
اعقاب دخان.. 
غطيان مفرتين
نوم مكسر
و جفون محوقين.. 
و الحجات الصغيرة..
لي كانت تصبيرة
بين الخنقة و الوجيعة
معاش لا تتحس لا تصبر..
*
الألوان بهتت
الأنفاس همدت
و الشعلة ولت رماد مطفية
الأيامات هي هي
نهار واحد
 مهما تبدلت فيه حجات
هو نفسو يتعاود
محسوب عالعمر شهور و سنين

فمّا حاجة في العينين..
رمشتهم فيها خريف
غزرتهم فيها برود 
النبرة غلبها السكوت
و الكلام فرغ مالمحبة و الدفا
فما حاجة غالطة هنا.. 
في صدري.. 
في بدني
ديما تاعب
يوجع و غالبو النوم

فما عُقد و هموم
خانقة الطموح
مكتفة الجموح
حابسة الروح
في أطراف البدن
*
كلامهم السم
يخثر الفن و يقتل الرغبة

اغزر لحالتك
متكور في حفرة
ميت بالحيا
تتنفس 
أما النور في صدرك طفى

محصور في تركينة
أصواتهم السكينة 
كل مرة تقص منك شوية
تحير الندوب المنسية
و الجروح لي ماتسكرتش
محبوس من وقت الحلمة لي ماكملتش

الباب محلول 
 اما انت مشلول بصوتهم يرن في وذنيك 
بنفس المشاهد لي تتعاود
كل ما تسرح والا تغمض عينيك

غارق في الظلام
تسمع في صوت ألوان البرة
تتخلق و تتشكل
أما بدنك مشكل و متكتف بيك
روحك مخدرة
صدى صوت غارق ينادي فيك
و انت تتخبط وحدك و تلاجي
لسانك معقود روحك تناجي
انا مش هكا هذا مش أنا
أنا أحلامي كبار
و عينيا مليانة
بمحبة و دفى و بتبسيمة
كنت ديما نغلب الحكايات القديمة
و كل مانطيح نقوم خير 
كنت ناخو بيد الموجوعين 
و نوصفلهم الدوا
تخنقت مالقعدة هنا 
نحب نخرج للنور 
نتحرر
 نشق سماوات و بحور

تتخبط و تفارع و تصيح
و صياحك صدى
يضرب في حيوط صدرك الباردة و يطيح

صياحك سكات 
معبي حكايات 
يعرفها كان الليل
حد مايعرف وين تسرح في شرودك
و لا سكات الليل شيعمل في حدودك
وصوت البحر و نسمة الفجر
الوجوه تتبدل عالعتبات.
و انت على كل عتبة بوجه..

*** 

اليدين لي تتمد سراب ليهم و ليك
حد ما بش ينجم يخرجك والا يحميك
حد ما بالحق بش يحس بيك 
و يفهم العقد المدفونة
 و الحكايات المخبية
  و الروح المسكونة
 بخيالات و رؤى
 بحجات عباتك 
ملي كنت نجمة شاردة في السما
 بسناريوات تكتبت و ماتعاشتش
و بوجيعة نصوص تبدات و ماكملتش.. 
*
فماتتمناش حد يجي ينجيك
اوعاك تتخيل انو الدنيا واقفة عليك 
اللي تعدا وفات مش بش يرجع
و اللي جاي مش معلوم، 
خليك في اليوم
قوم افرد بدنك
انفض خوفك
واغزر في قلب الشمس
اخرج مالحبس 
خلي قلبك يملا نور
و عروقك تنبت ورد
واجه مخاوفك و اعمل جرد
و كون انت بكلك 
بعيوبك و ظلك
بخايبك و بلي محلّيك
بالسر المدفون فيك
 حد ما عندو حاجة عندك
و حد ماو شادد السما لا تطيح عليك 
ارسخ جبل في أرضك
يا جبل خنارهم مايحوك فيك

Wassim Amor - السر

Lyrics and vocalization: Wassim Amor 
Background Music: Linkin Park - In the End - cover by GnuS Cello
Wallpaper: On stage blog
_____________
Lyrics:

قالّك اللي لينا لينا واللي خاطينا خاطينا 
و اللي حسبناه لينا خطا بعيد ومشا، 
وجيعة قلب ما ليها دوا 
غير دور مثلتو لين تصدق
أنسى و ارمي لتالي 
ماكثرش منها الحكاوي 
ماحسبتش شيجي نهار و  قلبك يغفلق
و اللي نسيتو الكل يطلع ماتنساش 
الكانون ما هباش و النار مدكنة تحت الرماد.. 
تستنى في حاجة تلهبها
فكرة شاردة تربشها
  غناية سمعتها مش بالعاني
نص خانتو المعاني و فصلتو على قياسك،
نفس الريحة أما ماتعرش منين غزاتك 
أي قطرة تفيض الكاس 
و ترجع تتخبى من الناس ورى تبسيمة ملفقة.. 
ضلوع صدرك مالشققة 
مالكذب و الهروب 
كسرت القلوب مش كان بالوجيعة والبكا 
ممكن بانك تزلي ما تحسش روحك هنا.. 
بانك تولي عايش خاطر ما متش
من داخل مدشدش أما ماقلتش
خفت تواجه روحك 
 تغزر لجروحك 
وتشوف فيها قداكش ضعيف.. 
فخرجت للدنيا كاينك صحيح 
ولي يشوفك يقول جبل مايتحناش
كاسح نار تضوي سعات تحرق 
و ماتخباش..

أما الحقيقة انك معطوب
 لا فرحتك كالفرحة
ولا وجيعتك تتحس
مخدر.. 
الداخل  منك بايت الحس
والبرة مش مهتم

في اللخر بش تلقى روحك
مدغور بقلم 
حاولت تكتب بيه و مانجمتش 
خاطر وقت لي كان لازم تقول لا
ماتكلمتش.. 
و على قد ما توجعت ما تعلمتش
خفت تاقف عريان قدام عيوبك
مانجمتش تقبل ندوبك
و تحبك كيما انت 

أما في اللخر تو تعرف إنك انت
لي كان لازم تحمي ظهرك
ماتستنى حد
انو عيوبك مش ذنوبك 
ذنوب الناس لي خافت انك تكسر قيودك
و تغلب الخوف مالتغيير لي حابسهم
تحطملهم آلهتهم
و تكفر بالي،وجدوا عليه آباءهم الأولين
والا تجيبلهم دين يقول حبوا بعضكم
و اقبلو المختلفين
رغم إنو كل الأديان تقول
أما اللي تحطت فيه يد الإنسان 
منقول و كل واحد يزيد كلمة
فاعتزلهم و ما يعبدون
تو تلقى أول الطريق و طرف الحلمة

 اغطس في روحك.. 
واعرف بالحق انت شكون
بطل تلوم 
و تحرر مالقيود لي كبلوك بيها
اقبل عيوبك مهما ذموك عليها
و عرّي صدرك للريح.. 
قبل ما عروقك تشيح

Wassim Amor - اللي لينا

Credits: 
Lyrics and vocalization: Wassim Amor
Background music: Finneas, Break my heart again, Karaoke
Wallpaper: Gustave Courbet, Sunset on Lake Leman, 1874
___________
Lyrics:

سكات..  
ظلام تولد منو النور.. 
آخر جمرة هبات.. 
ظوات بعدها بحور.. 
ورد حنين نبت في الصدور 
و مطرة دقت عالشباك
 طاقة سرات في العروق
طرشقت بذرة تنسات.. 
العينين تحلت.. 
صوابع تحركت 
و الحكاية عاودت بدات..

فصل جديد.
رغم إنو اللي فات كان صعيب
واللي جاي أصعب.. 
أما مهما كبرت.. 
مازلت بش تكبر
و تفهم
و تتعلم
و تطيح و تقوم
مهما كبرت الهموم.. 
مهما تعبات الحفرة سموم


الحفرة غارقة
 الظلمة دامسة 
و انت مش عارف روحك
 لا وين 
لا شكون 

غرقت بين الخدمة والنوم
في الخدمة راقد
و كي ترقد مخك يقوم

ديما تاعب 
لكن تخاف لا يقولو مغبون 
فتخرجلهم عادي 
فرحان، متماسك وهادي 
و الداخل منك بركان مكتوم


أيها المفتون بالدنيا 
خابت مساعي العاجلين 
أتدفن في حياة غير حياتك
أم تجوب الأبعاد مع أرواح الزاهدين


ارمي روحك في روحك
تحرر من كل قيد كبل جموحك

لوج وحدك و اسمع و شوف
خاطر الحقيقة تتبدل حسب الظروف

ماتخلي حد يحفظك الحروف
ولا يخليك تشك إنهم خير منك
انت انسان كامل بمخاوفك و همك
و بكل تفصيلة فيك
فماتخليش غرورهم يأثر عليك

اعمل لي تشوفو صحيح 
حتى كان غالط.. 
و آمن بالحاجة..
تو تلقاها صارت


الطريق بش يكون طويل
و مع أول خطوة بش تاكل أول كف 
ماتسلمش.. 
قاوم و تو تلقى الحمل خف
و تو تلقى يديوة حنينة
تمسح عليك غبرة الزمان
كبش فيها 
و اجبدو بعضكم لقدام

الحب الحقاني
مايهزوش الطوفان
الحب الحقاني
يهون لي جاي و يصبر علي فات
تعنيقة و كليمة حلوة
يردو الروح في القلب المات


لكن   حياتك مش المفروض تكون ديما فرحانة
الدنيا وجايع و عينين مليانة 
طاقة و دفا 
المهم تعرف كيفاش تعيش هنا

فحب روحك بش تنجم تسمع السكات
و تشوف النور المولود من ظلمة الأيامات 

كتابك محلول
و المحبة.. سر الكون 

فاكتب.. 
اقلب الصفحة و ابدى من جديد.. 

حارب..
ما تخليش أحلامك تخيب

Wassim Amor - سكات

Feeling the universe inside of u allows you to project it to the world in the shape of texts, called slam.
Feel, Dream, CREATE

Wassim Amor - سكات

A.mor

Recent comments

HOUWAYDA JERBI

Areej Korkad

Naw Rass

Nesrine Kanzari

Related tracks