“Not a lot of people have the courage to say what they’re actually thinking.” And, you are doing that well.. 💜

نص : سيف الزّين  
  إلقاء : أمين ڨلّح

نسج خيال (نص سيف الزّين)

نخاف منّك عليّ ، نخاف منّي عليك ، نخاف عليك ، نخاف تغيب عليّ تضيع ...
نخاف نقدّم، نخمّم نجيك تدزّني بيديك ، ترميني تخلّيني وحدي نلوّج عليك
نخاف نبعد كلملح نذوب من قدّام عينيك ترميني بسهامك تنساني و تحرمني من سلامك
نخاف نقلّك توحٌشتك ما نسمع كان صوتي و أنفاسي و تجاوبني بسكاتك
نخاف نسكت يجرحني ملامك و تذبحني بشوك كلامك
نخاف نكتبلك تحرقلي أوراقي تنشرلي أسراري
تحكيلهم على خنّاري و قدّاش خنقتك و من حبّي تعاني
نخاف نصوّرلك  ذاتك تسكّر عليّ بابك و شبابك حياتك
تبلّها التّصويره و تبزّع ماها عل عتبه و ترمي وراي ألف حجره و حجره
نخاف نبكي تقول عليّ ممثّله و نحبّ نسخّف الغير و نوّلّي كيفي كيف الطّفل الصّغير
نخاف نضحك نولّي حجره في عينيك ، نولّي ثلجه و لعبت بيك ، لا خمّمت فيك لا نهار حبّيت
نخاف نرقد و غدوه نلقاك عليّ مشيت
نخاف نسهر و حياتي عليّ تضيع
نخاف نكبّش نخنقك نقتلك نفدّدك و بيدي نكتب إخرّ كلمه في الحكايه و تولّي غريب
نخاف نسلّم نأيّس نعدّي ندوّر الصّفحه يتحرق لكتاب يولّي رماد يهزّو الرّيح
نخاف نخاف و نهدّ الّي بنيتو سنين
نخاف ما نخافش و حقيقتك تقتلني و برودك يحرق لكنين
نخاف منّك ، نخاف منّي ،  نخاف من النّسمه إلّي تمسّح على شوافر عينيك
مالغنايه إلّي تدغدغ وذنيك ،
مالدّنيا إلّي عاكستني و خلّاتني بعيده عليك
نخاف من قلبك ،من دقّاتو نخاف لا نهار ما يعقلينش
نخاف لا تطلع ما تحبّنيش ...

نخاف

نحب نهجّي ونقرى كي الغشّير
ضحكة ولا تبسيمة على شفايفك
دبغت عقاب الحمير
ضحكة
عاشقة وردات خديك
ومنهم تفرك وتغير

نحب نسبّح بشفرك
ونكفر بنار بعدك
ونتصفح ورقات عمرك
ونكون الصدفة الي في زهرك

ونتدفى في شونك
ونتوضى بعرقك
كي تعرقني معاك وأنا فيك
وانا مدفون في كل سر خبيتو في صندوق جواجيك
ومرشوق في كل نفس طالع يحكي عليك هابط يهتري بيك

نحب نصوم عالبعد والوحش الي معاديني
نتصحّر شربة ماء من كفوفك ترويني
ونتبنن بوسة من رقبتك بريحتك في عمري تنسيني
وتفكني من روحي وبغرامك تزيد تعديني

خلينا نرجعو كيف ماكنا ملول صحاب
نعاودو نتعلمو بالومية لحساب
ونحسبو الوقت الي تعدى بصوابعنا
نغلطو ونعاودو ملول
وحد ما يسالنا وحد ما يسمعنا
ومفما كان هبالنا ينفعنا

ايجا أضحكلي
ونحملك
ونهزك
ولصدري نلزّك
وفي توشويشة نتعلمو
لغرام الي يقشعرنا
في سكاتنا بلاش كلام

نمسك
نحسك
نرصك

وبحرارة روحي نودك
وبيد قشعرها دفاك نشدّك

اغزرلي
بالك نتعلم نسكت
وانت على لساني تعس
وصبعك على شفايفي
يعلمني نعشق بغزرة وحدة تسمات غرام

لغرام الي على نهودك يتقرى
وما توالموش الدوّة ولا يواتيه الحس

طفي الضو ... وأس 

[Amine.G]

100 غرام

Lyrics and Vocalization : Wassim Amor 
Musique : Nothing Else Matters - Metallica - William Joseph cover
Lyrics : 
وقعك في خيالي وردة..
مسك الليل كي تغدرك الوحشة..
و انت فارغ من كل هربة..
*
انت هربتي..
خيالي و احلامي..
ادفى همسة على لساني..
تواحشتك.. و تواحشتني فيك..
و تواحشت تعنيقتك لي تسرقني مالدنيا
و تخبيني في شونك..
تواحشت لون عيونك..
كي كان يحكيلي الكون شمخبي..
و قداش يحبني ربي 
**
كي ريتك..
كل حاجة روحها تبدلت..
الشتا ولا دافي..
و القوة ولت حطة يدك على كتافي..
و الورد ولا في كل بلاصة يهمس للريح..
راقصيني رقصة حياة ابدية..
محلا روحك فيا..
و محلا الغناية في عينيك..
و صوت فركان خدي على خديك..
و محلا يديا كي تخبيهم في يديك..
كاينك تقلي انت متاعي..
دفيا و فرحتي و شاني..
الشمس لي بعثت فيا الروح..
الما الي يجري في جبالي..
و الكلمة لي ماتخرجش من بالي..
هربتي كي تضيق بيا الدنيا..
و ظهري كي يغدرني الوقت و تحرقني عينيا..
*
كاينك تقلي.. قلي..
و نعطيك كلي..
نبوسك من كفك و جبينك..
و نخبيك فيا ملي حاسدينك..
**
مازلت نتذكر الغزرة لي بدات بيها حكايتنا..
كي الوقت وقف و الضو خفاف..
و خرجت منا نفس الموزيكة البنينة
و في نفس اللحظة ترسمت على شفايفنا تبسيمة..
أول كلمة تقالت..
و الشجرة لي كي شافتنا مالت.. 
كل شي كان معاك معبي..
صافي و محلاه كي كان عالناس مخبي..
***
و أنا اليوم جيتك هازز قلبي في يديا..
محلفك بكل ضحكة رسمتها يوم على شفافك..
و بكل تعنيقة خبيتك فيها من احزانك..
بكل لحظة سرقنا فيها اللحن و هز ارواحنا لعالم اخر..
و بقات اجسادنا هنا تتناسق..
بكل كلمة تقالت مغير صوت..
و بكل نهار فقنا فيه حابين نعيشو و كارهين الموت..
ايجا تغفرلي و نغفرلك..
ننساو الوجيعة لي ردت قلوبنا ثقيلة..
نوفاو الوقت لي ضاع من قبيلة.. 
نبداو وقت جديد.. 
و نلقاو طريق ما يحيد..
نلقاو ثنية حلمتنا..
و نتعلمو كيفاه نقويو خطوتنا.. 
**
انا وليد صغير ضاع في دنيا اصغر من احلامو..
كي ريتك بانلي دليل..
انا سفينة كلاها الليل..
ايست و بقات تستنى في الموج يبلعها..
بيدك انت تصلحها..
*
نعرف لي تاريخي مش هو..
بنات و حكايات
اثام محصودة..
و حكاوي ممدودة..
و جحيم موعود..
أما أنا اليوم جيتك متطهر..
حالف عليك بلي لقيتو في عينيك..
تغسلني بما شرب من صوتك..
و تخلل روحي بصفا روحك..
تسمّعني أدفى غناية عندك..
و تخليك مخبيتلي يديا..
انت احلى حاجة فيا..
جيتك زاير المقام، و منيش متزحزح..
حالفلك بلي عشتو في سماك..
نكونلك دفى و ظهر..
كتف تركز عليه كي تعثر ويد تلقفك كي تطيح..
اللي بيناتنا مش شوية بش يهزو الريح..
خليك ليا دفى و عيشة..
و خليني ليك سما و سند..
كي شفت عينيك الشيطان لي فيا سجد..
رجع لربي و كفر على ذنوبو..
لقينا رواحنا في دنيا كل واحد فيها عايش لروحو..
و أنا عايش ليك..
لوج مليح تو تلقاني فيك..
كيما انا لقيتك فيا..
عنقني تعنيقة قوية..
و خليني نهمسلك..
الليل الدافئ في عينيك..
يحمل كل ماقد ينقص هذا العالم يوما..
و هالة النور التي تحيطك.. تنير داخلي المقفر..

Wassim Amor - وقعك في خيالي

Lyrics and Vocalization : Wassim Amor
Music : Hans Zimmer - Interstellar by Eiro Nareth
Wallpaper choice : Nermine Chihy

Lyrics :

بوسة خال
و الخال بليد يعرف منين يبوس
اعطيني ظهرك خليني نحوس
و نضيع و نغرق
نسافر فيك
في كل تفصيلة
كل ليلة ما نفدش
نحيا فيك و نموت
يضوى الفجر و أحنا نحكيو
كلام شطرو سكوت
في بيت  الضو فيها خفيف
خارج من شاماتك
تقول سما ليل طايشة بالنجوم
بريحتك ساكنتني و مسكنتني
بشعرك قاتلني
و شِعرك فاتني
و بقلبك يدق فيا
بهواك معبيلي رواريا
بيك بكلك.
بلي تحبو في روحك و بلي تحشم بيه و تخبيه
بأنفاسك المعتقة
و عينيك المحوقة
وندوبك لي تخبي فيهم
بمخاوفك لي ما تحب حد يفيق بيهم
و الدم لي تفد منو و يحييك
بخايبك قبل باهيك

حبني و خليني نحبك
كايني أول واخر مرة
يعني السما لي تحبست فيها كالمرة
تتكسر و تولي كون معبي بيك
يعني تمن بيا و نمن بيك
تعطيني كلك و كلي يولي ليك
نفس واحد و قلب واحد يكفينا
روح وحدة ساكنة فينا
ايد تقوم ظهر يسند حضن يدفي
لا عينين ترقد مذبالة لا قلب يشد ويخبي
كي الدنيا تمشي بالغالط
وقت ما الحكاية صارت
تتفض و تصفى القلوب
و كي عينينا تتقابل
كل شي ياقف و يذوب
البرق لي هابط في البحر
حجرة ترشم عالشجر
بنية خارجة مالرحام
الأرض الوقت
الملايكة الشيطان
كل شي ياقف
كان دقة قلبنا و عينينا
و المياتن حاجة لي فينا

نحبك و نخليك تحبني
يعني كل شي بالنص
يعني التبسيمة شطار
الدمعة والخنار
الكلام المعسول الضحك و الوجايع
يعني لعنة القمرة عالبايع
و الماشي في برد ليالي 
مخلي عينين تحب تدفيه
و الغازر غزرة ميتة للي ساكن فيه
والكاره
واللي بدنو هنا و مخو سارح
و اللي يتغشش ماينجمش يسامح
و الناسي واللي ماينساش
كلهم ملعونين عند القمرة
و رب القلب اللي ما يصفاش

نحبك و تحبني
مش كلمة تتقال
ولا فرحة الأيامات الأولى
ولا حاجة توفى في ساعة شيطان

أما انت شيطانك واكل نهارك
و مكسح قلبك و ومغميلك عينيك 
مغرقك في دنيا أنا نعرف لي هي غريبة عليك
لا مخليلك جهد بش تمن بيا
لا وقت بش تفهم و تغزر شوية
لا بلاصة منك 
تنجم تحملني بلي فيا

و مش ملامة
إنت كنت خيال متعدي في منامة
و أنا سامري لمحتك و تفتنت
إيماني بيك كفر بيا و بالي تعلمت
وبالي عرفت مالاول لي الطريق مسدود
كذبت روحي و الصوت لي فيا
كفرت و جا الوقت بش نتوب
منك و من بنة الحلمة معاك
مالوقت لي مازال حابس من وانا حذاك

قتلك لي الليل كذاب و وعودو كذابة
ريح  نفخت و هزت السحابة

أما أنا عن نفسي مازلت مقدر ممنون
مازلت نتبسم كي نسرح
و حتى وانت هاربة بعينيك
كي نشوفك مازلت نتبسملك و نفرح
لي انت بخير
ماك تعرف لي غزرتي تفضح
و لي قلبي دليل

أما يزي منك
و مالسما لي حبستني فيك
وليت نحس لي الدنيا أرتح بعيد عليك
وأنا كيما تعرف بحر ما نوفاش
مانموتش كي نبقى وحدي
و كي يمشي عليا حد ما نضناش
نتعلم مالحكاية لي تخيب
النفس نفسي وانا الطبيب

انت و خالك و بوساتو
و قت بنين تعدى عليا
أما تعدى وفات
سأنفضك عني 
غبار حلم مات
و سأمضي ممشوقا
صانعا لنفسي حياة أفضل من هذه الحياة

Wassim Amor - بوسة خالْ

Credits : 
Lyrics and Vocalization: Wassim Amor 
Music: Coldplay - The Scientist - Cover by GnuS Cello

Lyrics: 

أغسل غيومك  السود  بدموعك، 
و خلي الشمس تشق ضلوعك، 
الهموم مكتوبلها تشيح، 
تتشقق، فتفات يهزو الريح، 
و انت مكتوب عليك تعيش 
و تاخو من الشمس خيط تبدا من طرفو الحلمة، 
مكتوب عليك تملى كتابك وحدك، بالكلمة بالكلمة، 
بالنفس بالنفس، 
سلاسلك كذبة، و دنيتهم قفص.
كلام،   ممكن محروق تحسو 
لكن تو يجي نهار و تفهمو
 في ليلة شتا بالك 
و النوم هارب عليك و انت سارح في خيالك 
و وجيعة قلبك تنخر فيك 
و انت غارق في سوادك
ممن إنو الفرحة حرمت عليك
و إنو الدنيا وقفت و وفات 
لكن مباعد، تو تعرف لي وقتها بركا وين الحكاية بدات
خاطر الوجيعة هي أول طريق الحكمة 
و إنك تولي تفهم الكلام 
اللي يتقال و اللي يتحس 
و تشوف في وسط الظلام 
لي ماتنجمش تشوفو و انت غارق في الحس 
إنك تتعلم تلوج عالي مخبي ورى الضلوع 
خاطر الوجيعة كلام ما يتقالش أما مسموع

صدى ليل بوابتو حلمة 
وقت اللي الأنفاس تهدى 
و العباد تتهد
البلاصة توساع 
و الوقت يتمد 
و تبدى أفكارك تسري 
و روحك تسافر بين النجوم
اذاكا اسمو وقت فرزان الحكاوي و الهموم.

يجي على غفلة 
عقاب ليل و ريحة ياسمين و موزيكا بنينة
و الندى يصب عليك من كل تركينة في الكون 
ستتعالى  في رأسك حينها أصوات السكون
 و ستصاب بمتلازمة التأمل و التأويل
و بش توهب روحك لليل 
خاطر لليل جوارح و عشاق
طيور العتمة و أسياد الفتنة
نجوم منسية و أحلام مطفية و دموع تحرق
لليل ناس أرواحها قاعدة تغرق..
في مساحة اسمها الحنين
خاطر الظلام بركا يخلي قلوبها تلين 
و أرواحهم توساع لين تحوي السما 

في الليل كل الي نخافو منو يتلم هنا 
في المثلث الخاص بينا 
الروح و الكون و الرغبة
و يا نستسلمو للخوف و الحسرة 
و نموتو مستنيين الدفينة
 يا نبطلو نخافو من الي تدفن فينا  
و نتعلمو ناقفو على ساقينا 
من غير مزية حد 
من غير مانضيعو حياتنا نستناو في سند

 كي نداويو الجروح لي عندها سنين محلولة ، ماندملتش
و نصفيو الحسابات الي صارلها وقت طويل مركونة، ماتسكرتش

وقتها بركا نجمو نلقاو الثنية لبوابة الكون 
و نفهمو إنو نجوم 
مش مجرد نور واصل امخر
و انو الطبيعة عندها صوت 
مانجمناش نسمعوه كي كان قلبنا مخدر
و إنو الحجات لي تصير كلها دروس و  علامات 
و إنو الحكمة أغلبها سكات
 
 فمن سكات، قوم خوذ نفس و امشي ما تستناش 
و كي الدنيا تجي عليك ما تنساش 
إنو ما بش تدوم كان انت لروحك، 
فإنت لي لازم تكون طبيب روحك. 
خلي تجاربك القديمة غربال 
و السلاسل لي قيداتك حبال 
تتعلق فيها لين توصل للنجوم
خلي كلامك معبي ، أما مفهوم 
و مد يدك للناس 
خاطر ثنيتك بدات بيد تمدتلك 
بسرة من السما ترمتلك
فيها أول الخيط
بصوت مونسك ملي بديت 
خاطر فما سر رباني فيك
لازم تفهمو بش تحس قداه محلاك 
و  إنك مكتوبلك تزرع حلاك 
في كل طيف مهدود
خاطرك نجمت تنبت من تحت الأسفلت ورود
تداوي و تزين السما 
و تدفي القلوب لي طفات و كلاها الصدى


اذاكا اسمو وقت فرزان الحكاوي و الهموم.
يجي على غفلة ، عقاب ليل و ريحة ياسمين و موزيكا بنينة
و الندى يصب عليك من كل تركينة في الكون ..

اللِيلْ

Wassim Amor - اللِيلْ

Lyrics and Vocalization: Wassim Amor
Background Music: Schindler's list - Main Theme
Wallpaper: Denis Forkas - Children Praying in the Dark
____________
Lyrics:
اللي الداخل مني مدفون
مردوم بسنين و عباد
سر من أسرار الكون
نفخة روح هبات
*
المخ ولى ينسى
و العينين ولت ترا معاش تشوف
فرغت حتى م الحروف
مالكلمات
لي كنت نهز بيها العروشات
نحرك القلوب
و نعنق الموجوعين

مساطت الحكيات
فناجن قهوة بايتين 
اعقاب دخان.. 
غطيان مفرتين
نوم مكسر
و جفون محوقين.. 
و الحجات الصغيرة..
لي كانت تصبيرة
بين الخنقة و الوجيعة
معاش لا تتحس لا تصبر..
*
الألوان بهتت
الأنفاس همدت
و الشعلة ولت رماد مطفية
الأيامات هي هي
نهار واحد
 مهما تبدلت فيه حجات
هو نفسو يتعاود
محسوب عالعمر شهور و سنين

فمّا حاجة في العينين..
رمشتهم فيها خريف
غزرتهم فيها برود 
النبرة غلبها السكوت
و الكلام فرغ مالمحبة و الدفا
فما حاجة غالطة هنا.. 
في صدري.. 
في بدني
ديما تاعب
يوجع و غالبو النوم

فما عُقد و هموم
خانقة الطموح
مكتفة الجموح
حابسة الروح
في أطراف البدن
*
كلامهم السم
يخثر الفن و يقتل الرغبة

اغزر لحالتك
متكور في حفرة
ميت بالحيا
تتنفس 
أما النور في صدرك طفى

محصور في تركينة
أصواتهم السكينة 
كل مرة تقص منك شوية
تحير الندوب المنسية
و الجروح لي ماتسكرتش
محبوس من وقت الحلمة لي ماكملتش

الباب محلول 
 اما انت مشلول بصوتهم يرن في وذنيك 
بنفس المشاهد لي تتعاود
كل ما تسرح والا تغمض عينيك

غارق في الظلام
تسمع في صوت ألوان البرة
تتخلق و تتشكل
أما بدنك مشكل و متكتف بيك
روحك مخدرة
صدى صوت غارق ينادي فيك
و انت تتخبط وحدك و تلاجي
لسانك معقود روحك تناجي
انا مش هكا هذا مش أنا
أنا أحلامي كبار
و عينيا مليانة
بمحبة و دفى و بتبسيمة
كنت ديما نغلب الحكايات القديمة
و كل مانطيح نقوم خير 
كنت ناخو بيد الموجوعين 
و نوصفلهم الدوا
تخنقت مالقعدة هنا 
نحب نخرج للنور 
نتحرر
 نشق سماوات و بحور

تتخبط و تفارع و تصيح
و صياحك صدى
يضرب في حيوط صدرك الباردة و يطيح

صياحك سكات 
معبي حكايات 
يعرفها كان الليل
حد مايعرف وين تسرح في شرودك
و لا سكات الليل شيعمل في حدودك
وصوت البحر و نسمة الفجر
الوجوه تتبدل عالعتبات.
و انت على كل عتبة بوجه..

*** 

اليدين لي تتمد سراب ليهم و ليك
حد ما بش ينجم يخرجك والا يحميك
حد ما بالحق بش يحس بيك 
و يفهم العقد المدفونة
 و الحكايات المخبية
  و الروح المسكونة
 بخيالات و رؤى
 بحجات عباتك 
ملي كنت نجمة شاردة في السما
 بسناريوات تكتبت و ماتعاشتش
و بوجيعة نصوص تبدات و ماكملتش.. 
*
فماتتمناش حد يجي ينجيك
اوعاك تتخيل انو الدنيا واقفة عليك 
اللي تعدا وفات مش بش يرجع
و اللي جاي مش معلوم، 
خليك في اليوم
قوم افرد بدنك
انفض خوفك
واغزر في قلب الشمس
اخرج مالحبس 
خلي قلبك يملا نور
و عروقك تنبت ورد
واجه مخاوفك و اعمل جرد
و كون انت بكلك 
بعيوبك و ظلك
بخايبك و بلي محلّيك
بالسر المدفون فيك
 حد ما عندو حاجة عندك
و حد ماو شادد السما لا تطيح عليك 
ارسخ جبل في أرضك
يا جبل خنارهم مايحوك فيك

Wassim Amor - السر

Lyrics and vocalization: Wassim Amor 
Background Music: Linkin Park - In the End - cover by GnuS Cello
Wallpaper: On stage blog
_____________
Lyrics:

قالّك اللي لينا لينا واللي خاطينا خاطينا 
و اللي حسبناه لينا خطا بعيد ومشا، 
وجيعة قلب ما ليها دوا 
غير دور مثلتو لين تصدق
أنسى و ارمي لتالي 
ماكثرش منها الحكاوي 
ماحسبتش شيجي نهار و  قلبك يغفلق
و اللي نسيتو الكل يطلع ماتنساش 
الكانون ما هباش و النار مدكنة تحت الرماد.. 
تستنى في حاجة تلهبها
فكرة شاردة تربشها
  غناية سمعتها مش بالعاني
نص خانتو المعاني و فصلتو على قياسك،
نفس الريحة أما ماتعرش منين غزاتك 
أي قطرة تفيض الكاس 
و ترجع تتخبى من الناس ورى تبسيمة ملفقة.. 
ضلوع صدرك مالشققة 
مالكذب و الهروب 
كسرت القلوب مش كان بالوجيعة والبكا 
ممكن بانك تزلي ما تحسش روحك هنا.. 
بانك تولي عايش خاطر ما متش
من داخل مدشدش أما ماقلتش
خفت تواجه روحك 
 تغزر لجروحك 
وتشوف فيها قداكش ضعيف.. 
فخرجت للدنيا كاينك صحيح 
ولي يشوفك يقول جبل مايتحناش
كاسح نار تضوي سعات تحرق 
و ماتخباش..

أما الحقيقة انك معطوب
 لا فرحتك كالفرحة
ولا وجيعتك تتحس
مخدر.. 
الداخل  منك بايت الحس
والبرة مش مهتم

في اللخر بش تلقى روحك
مدغور بقلم 
حاولت تكتب بيه و مانجمتش 
خاطر وقت لي كان لازم تقول لا
ماتكلمتش.. 
و على قد ما توجعت ما تعلمتش
خفت تاقف عريان قدام عيوبك
مانجمتش تقبل ندوبك
و تحبك كيما انت 

أما في اللخر تو تعرف إنك انت
لي كان لازم تحمي ظهرك
ماتستنى حد
انو عيوبك مش ذنوبك 
ذنوب الناس لي خافت انك تكسر قيودك
و تغلب الخوف مالتغيير لي حابسهم
تحطملهم آلهتهم
و تكفر بالي،وجدوا عليه آباءهم الأولين
والا تجيبلهم دين يقول حبوا بعضكم
و اقبلو المختلفين
رغم إنو كل الأديان تقول
أما اللي تحطت فيه يد الإنسان 
منقول و كل واحد يزيد كلمة
فاعتزلهم و ما يعبدون
تو تلقى أول الطريق و طرف الحلمة

 اغطس في روحك.. 
واعرف بالحق انت شكون
بطل تلوم 
و تحرر مالقيود لي كبلوك بيها
اقبل عيوبك مهما ذموك عليها
و عرّي صدرك للريح.. 
قبل ما عروقك تشيح

Wassim Amor - اللي لينا

Credits: 
Lyrics and vocalization: Wassim Amor
Background music: Finneas, Break my heart again, Karaoke
Wallpaper: Gustave Courbet, Sunset on Lake Leman, 1874
___________
Lyrics:

سكات..  
ظلام تولد منو النور.. 
آخر جمرة هبات.. 
ظوات بعدها بحور.. 
ورد حنين نبت في الصدور 
و مطرة دقت عالشباك
 طاقة سرات في العروق
طرشقت بذرة تنسات.. 
العينين تحلت.. 
صوابع تحركت 
و الحكاية عاودت بدات..

فصل جديد.
رغم إنو اللي فات كان صعيب
واللي جاي أصعب.. 
أما مهما كبرت.. 
مازلت بش تكبر
و تفهم
و تتعلم
و تطيح و تقوم
مهما كبرت الهموم.. 
مهما تعبات الحفرة سموم


الحفرة غارقة
 الظلمة دامسة 
و انت مش عارف روحك
 لا وين 
لا شكون 

غرقت بين الخدمة والنوم
في الخدمة راقد
و كي ترقد مخك يقوم

ديما تاعب 
لكن تخاف لا يقولو مغبون 
فتخرجلهم عادي 
فرحان، متماسك وهادي 
و الداخل منك بركان مكتوم


أيها المفتون بالدنيا 
خابت مساعي العاجلين 
أتدفن في حياة غير حياتك
أم تجوب الأبعاد مع أرواح الزاهدين


ارمي روحك في روحك
تحرر من كل قيد كبل جموحك

لوج وحدك و اسمع و شوف
خاطر الحقيقة تتبدل حسب الظروف

ماتخلي حد يحفظك الحروف
ولا يخليك تشك إنهم خير منك
انت انسان كامل بمخاوفك و همك
و بكل تفصيلة فيك
فماتخليش غرورهم يأثر عليك

اعمل لي تشوفو صحيح 
حتى كان غالط.. 
و آمن بالحاجة..
تو تلقاها صارت


الطريق بش يكون طويل
و مع أول خطوة بش تاكل أول كف 
ماتسلمش.. 
قاوم و تو تلقى الحمل خف
و تو تلقى يديوة حنينة
تمسح عليك غبرة الزمان
كبش فيها 
و اجبدو بعضكم لقدام

الحب الحقاني
مايهزوش الطوفان
الحب الحقاني
يهون لي جاي و يصبر علي فات
تعنيقة و كليمة حلوة
يردو الروح في القلب المات


لكن   حياتك مش المفروض تكون ديما فرحانة
الدنيا وجايع و عينين مليانة 
طاقة و دفا 
المهم تعرف كيفاش تعيش هنا

فحب روحك بش تنجم تسمع السكات
و تشوف النور المولود من ظلمة الأيامات 

كتابك محلول
و المحبة.. سر الكون 

فاكتب.. 
اقلب الصفحة و ابدى من جديد.. 

حارب..
ما تخليش أحلامك تخيب

Wassim Amor - سكات

نغير عليك 
اي والله نغير عليك 
من نسمة الليل
من تعب النهار 
من التخلويض والخنّار 
ومن تخمام يهد الحيل

نغير عليك
من ليّام ولعوام 
من الدوام الي فك منام 
مالوحش الي قعد روّام 
ملي نحبّو فيك وقالولي حرام 

ونغير عليك 
ونزيد نكتبلك 
ونكتب عليك برشة كلام 
تحسّو عقاب منام 
تحسّو كي تعنيقة بعد ملام 

ونرجعلك من شطر الثنيّة 
ونغنيلك غناية مشتهيّة
معاها غزرة تحبّك عالغفلة مرميّة 
وتوشويشة بنفس فيها وصيّة  
تي يعطك كيّة ... يا بيّة 

قدّاش نحبّك 
وقدّاش حبيتك وهويتك 
وقدّاش واتيتني وواتيتك 
وقدّاش على حيوطك قريتك 
وقدّاش نحّيت من روحي وعطيتك 
وقدّاش في بردك انا إلي غطّيتك 

تي اي نغير عليك 
ومانحملش كلمة فيك 
حتى كي ماعندكش كلمة 
حتى بعد ما ذبالت الحلمة
وهربت منّك ... وملاّ عملة 

غدوة الي حكيتلي عليه ستنّيتو 
ووجعي منّك مزلت ما نسيتو 
وهاني باقي نكتبلك بروحي 
بلاش ستيلو
وبول عليه لعمر 
إلي تعدّى وكليتو 

فمّاش ما تفيق وتفهم 
الّي جرحي منّك محبّة وهبال 
وانا باقي مكبّش 
نحب فيك ولمحبة مزالت تسال 

بلاهي سامحني عندي سؤال : 
كيفاش تحبني مانحكيش عليك ؟ 
وأنا قد ما كفرت بيك 
نقعد نرجعلك ونلحلح بيك 
بش تخلّيني نبكي عندك 
وتسيّبني نغير عيك 

ايه ... نغير عليك 
وغيرك ما يهنالي 
وغيري ما يواتيك 

وبرّه طير ڨرنك منّي
توة ترجّعلك شاهد لعقل جواجيك 

وديما نغير عليك ... 
وقد ماتطلبش ... ديما نعطيك 
ونقعد نحس في حس خطاويك 
ونقعد ديما نغير عليك ...

[Amine.G]

نغير عليك

خوذ منّي وأعطيني 
أعطيني من غزرتك غمزة 
تفيّقني ... ترجّعني نفارع الوقت 
نفكلو درج وقت زمانو حضر
ويعطيني دقيقة ماتحرّرش مالعمر 
وزيد اعطيني منك شوية من كلّك 
الي كي تاخو منّي ماتشاورش 
وكي تعطيني ماتحسبش

تي اعطيني تبسيمة ولاضحكة 
ترد الروح 
تعطي بلا حساب 
تفكّرنا في الأحباب
وتبرّي الجروح 
فماش ماينطق سكات
ماحب يحكي ولا حب يبوح

وزيد اعطيني كلمة 
نبني عليها بقيّة كلامي 
الي نحب نكتبهولك 
كلامي الساكت الي انت فكّيتو 
تي هات ... اعطيني منّو شوية نفس 
نفكّو وناخذو وندور ندور ونرجع بش نقلك :

أعطيني منّك 
العين الي حتى كي تدمع تفرّح 
والتنهيدة إلي حتى كي تطوّل ترتّح

وزيد أعطيني من قلبك 
الروح الي في روحي تسرح
وماتشاورش 
الروح الي ماحبيتش تسمعها 
وخوذ كل شي يحلالك 
خوذ الي يواتي زينك ودلالك 
وخليلي قلبك يونّسني
ويعطيني دقة انت مانجمت اتبّعها

تي خوذ السماء بسحابها 
والأرض بترابها 
والناس بأحبابها 
والغربة بعذابها
وزيد خوذ دمعتي شيّحها
وزيد فيّا مالدنيا شوية 
والشدّة كيّة مني أطرحها 

وخليني وحدي نستنّى 
في غناية تفكّرني فيك 
وبلاصة تحكيلي عليك 
تي خوذ كل شي 
وأعطيني مالظلمة طرف ضي
وخليك انت ليا للاّ وانا ليك البي 

أعطيني برك ... حويجة من محبتك 
نشتهاها كي في منامة تجيني
وكل ما نستنهاها تطل فيسع وترجع تواتيني 

تي فلخر : 
أعطيني حتى بوسة
 تصبّرني على وحشك 
وفي غيابك تهنّيني 
يهديك ... تي هات أعطيني
يلعن بلوتك في كنيني 

#أعطيني_منك_حتى_شويّة_تززّيني 

[Amine.G]

أعطيني

Feeling the universe inside of u allows you to project it to the world in the shape of texts, called slam.
Feel, Dream, CREATE

Wassim Amor - وقعك في خيالي

A.mor

Recent comments

Fair amount of melanin

ded ibr

Related tracks