Dépression , Quand Tu Nous Tiens

http://bochrawrites.blogspot.com/2016/04/blog-post.html

فيبالك ؟

و انت تسمع في الموزيكة، اتخيل،
عالبحر قاعدة تتفرج و الليل مليل، 
اسرح بخيالك مع كل نسمة، و مع كل هبة ريح، 
شعرك طاير و طيرك معاه، 
و انت طايرة طيشت كل شي تحب تنساه، 
و عشت لحضة مع روحك و قعدت معاها، 
روحك اللي كي تغلط تلومها ،
و تفكرها في مشومها، 
الي تلونها على خاطرهم و قريب تنسى لونها، 
انت الي عمرك ما تسامح الخاين و انت ديما تخونها، 
اما توا هاك قاعدة مع روحك و لروحك ترضي فاها، 
تحكي معاها، 
و بقطرات البحر الباردين تغسل في ذنوبك معاها، 
زعما تغفرلك، 
نفسك عزيزة اما اكيد تغفرلك، 
متوحشتك عندها برشا من آخر مرة شافتك، 
ياسر توحشتها و تحب تعنقها، 
و تقلها في وذنها نحب نعنقني، 
الدنيا باردة و انا وحدي مانيش خايفة، 
اما باش نقلك انا خايفة، باش انت تفهم وحدك و عنقني، 
وانت اكاكا يدين تعنقك،
انا الي عنقتك و الي سمعتك، 
سمعتك تناديلي كي شفت عينيك تاعبين، 
قداش بكات و قداش مبكاتش، 
قداش تغمضت و قداش من مرة شافت، 
تاعبة عينيك ناداتلي و قتلي اجريلي، 
ايجا شوف في في سواد عيني طول ليلي، 
ضلامو الموحش، عندك برشا عايشتو وحدك، 
سمعتك و كي سمعتك حطيت الموزيكا و سمعتك، 
خليتك تسرح و تتخيل سيناريوات، 
و عيشتك حكاية من الحكايات، 
و عنقتك، 
بكلامي عنقتك و في سكاتي بستك، 
من خدك البارد و مبلول بهواء البحر، 
بستك، ولبستك، 
موش انت تحب شكون يخطفك بتعنيقة، 
و يحسسك الي سما لا ارض، لا و طول و لا عرض ينجمو يرفعوك، 
و على غفلة و انت سارحة يسرق بوسة، 
خفيفة تدغدغ و ساعات مرصوصة، 
و يقلك سامحني كان زربت، 
شفت شفايفك بردو من قطرات البحر، 
ياخي قلت نشبربهم انا و نذوق المر، 
ياخي نلقى الملح بنين و احلى من العسل، 
و تو باش نقعد نعس و نذوق كل ما تعاود تتبل، 
نعرفك ماتحبش اللي يسرق من غير مبرر و هاني لقيتلك الحل، 
كل حاجة خايبة نزينوها بحروف و كلمات و جمل، 
تعجبك فكرتي و تضحك و تحشم و تسكتني،
نسكت خاطر عينيك لمعت و غمزتني، 
و انا فهمتها،
 و في سكات حكيت معاها و كلمتها، 
نسمعو في الموزيكة، انا و انت،
و بالموزيكة سافرت بيك،
شبيك لبيك  خيالي بين يديك، 
الي تطلب تلقى، 
كل مرة باش تتفرج معايا في حلقة، 
و الليلة حلقة في مدينة جميلة، 
مدينة  قديمة، كل شي فاها عندو قيمة،
و بجنب المدينة غابة كبيرة و بعد الغابة بحر، 
و انت قاعدة عالبحر اذاكا و انا معاك، 
نتفرجو في القمرة كي الذيوبة، 
و القمرة تتفرج فينا، 
القمرة تحب الذيب،
خاطر مايخونش،
ماكش ذيب كان ما تصونش،
القمرة من غير ما تجهرنا و من غير ما تحيرنا، 
نورها نورنا،
طيرنا،
كبرنا و صغرنا،
و من عالم خايب و حررنا، 
و فجأة نكتشف لي انا ماعادش يكفيني قطرات البحر، 
ماعادش يكفي حتى تحت المطر، 
جريت انت للبحر تحب تررمي روحك و تبل بدنك، 
في البحر البدن حر،
و بدنك تاعب و شاحب، 
جريت جريت و بين امواج البحر عريانة و في احضانو ترميت،
سيبت بدنك و اتكيت، 
و انا نتفرج فيك، 
بعد ما تكمل مع روحك و نجيك،
نقرب منك و بدني يتعرف على بدنك،
و نحبو بعضنا،
و انا نحب فيك نسافر بيك 
و انت تسمع و في صوتي الي خلقو كلامي،
نخليك مسافرة في بحر خيالي و احلامي...

اتخيل © البورجوازي الفقير

نحب نرجع مللول
خدي أحمر و ماعنديش ظوافر 
شعري أرطب و يديا صغار ما يشدوش لكورة 
نرجع لركايب المزلوعة مالطياح و اللعب في البطحة مع الذكورة 
نحب نرجع للصفحة البيضاء الي كانت في مخي
الي فيسع تتفسخ منها طريحة أمي 
و نبزة بابا 
و يتفسخ منها أول نحبك و أول محلاك
أول حل شعرك
و البس روبة ، تي هات بوسه شبيك مزروبة 
نرجع للنسخة لولة 
تحت لمطر مبلولة ، 
جابلي سحابة تغطيني ، قتلو يعيشك خلي لمطر ترويني 
نروح على سقاي و نغني الحيا حلوة بس نفهمها 
و يا ريتني ما فهمتك 
حبارك ما يتفسخش كي الوشام 
أكحل مدرغم ظلام 
كل حرف باش يعيش معايا و يموت فيا 
كل بوسة طبعتها فيا 
كل حلم دفنتو في جواجيا 
كل غنايا دندناها 
و كل ثنية بدلناها 
و قطعة نحيناها 
كل عركة و كل كلمة دونية 
و كل ما ترضيني و تقلي لا ينحيك عليا 
عبيتها تصاور و زرزقتها بدموعي 
حرقتها لهبتها بشموعي و نار كي تمسها تحرق لحمي من داخل و
تخلي أمارة 
لا لعمر يحب يرجع و لا الصفحة تحب تنضاف 
و لا حب لحمي يبرا و الحمل يخفاف 
لحيوط ضياقت و ما نجمش ندور راسي و نشوف ورايا 
و كان درت و شفت 
باش نشوف تصويرتي ... في مرايا *
ياسمين الماجري
Music : Gladiator - Now We Are Free (Piano Version)

Miroir

Lyrics and Vocalization : Wassim Amor 
Musique : Nothing Else Matters - Metallica - William Joseph cover
Lyrics : 
وقعك في خيالي وردة..
مسك الليل كي تغدرك الوحشة..
و انت فارغ من كل هربة..
*
انت هربتي..
خيالي و احلامي..
ادفى همسة على لساني..
تواحشتك.. و تواحشتني فيك..
و تواحشت تعنيقتك لي تسرقني مالدنيا
و تخبيني في شونك..
تواحشت لون عيونك..
كي كان يحكيلي الكون شمخبي..
و قداش يحبني ربي 
**
كي ريتك..
كل حاجة روحها تبدلت..
الشتا ولا دافي..
و القوة ولت حطة يدك على كتافي..
و الورد ولا في كل بلاصة يهمس للريح..
راقصيني رقصة حياة ابدية..
محلا روحك فيا..
و محلا الغناية في عينيك..
و صوت فركان خدي على خديك..
و محلا يديا كي تخبيهم في يديك..
كاينك تقلي انت متاعي..
دفيا و فرحتي و شاني..
الشمس لي بعثت فيا الروح..
الما الي يجري في جبالي..
و الكلمة لي ماتخرجش من بالي..
هربتي كي تضيق بيا الدنيا..
و ظهري كي يغدرني الوقت و تحرقني عينيا..
*
كاينك تقلي.. قلي..
و نعطيك كلي..
نبوسك من كفك و جبينك..
و نخبيك فيا ملي حاسدينك..
**
مازلت نتذكر الغزرة لي بدات بيها حكايتنا..
كي الوقت وقف و الضو خفاف..
و خرجت منا نفس الموزيكة البنينة
و في نفس اللحظة ترسمت على شفايفنا تبسيمة..
أول كلمة تقالت..
و الشجرة لي كي شافتنا مالت.. 
كل شي كان معاك معبي..
صافي و محلاه كي كان عالناس مخبي..
***
و أنا اليوم جيتك هازز قلبي في يديا..
محلفك بكل ضحكة رسمتها يوم على شفافك..
و بكل تعنيقة خبيتك فيها من احزانك..
بكل لحظة سرقنا فيها اللحن و هز ارواحنا لعالم اخر..
و بقات اجسادنا هنا تتناسق..
بكل كلمة تقالت مغير صوت..
و بكل نهار فقنا فيه حابين نعيشو و كارهين الموت..
ايجا تغفرلي و نغفرلك..
ننساو الوجيعة لي ردت قلوبنا ثقيلة..
نوفاو الوقت لي ضاع من قبيلة.. 
نبداو وقت جديد.. 
و نلقاو طريق ما يحيد..
نلقاو ثنية حلمتنا..
و نتعلمو كيفاه نقويو خطوتنا.. 
**
انا وليد صغير ضاع في دنيا اصغر من احلامو..
كي ريتك بانلي دليل..
انا سفينة كلاها الليل..
ايست و بقات تستنى في الموج يبلعها..
بيدك انت تصلحها..
*
نعرف لي تاريخي مش هو..
بنات و حكايات
اثام محصودة..
و حكاوي ممدودة..
و جحيم موعود..
أما أنا اليوم جيتك متطهر..
حالف عليك بلي لقيتو في عينيك..
تغسلني بما شرب من صوتك..
و تخلل روحي بصفا روحك..
تسمّعني أدفى غناية عندك..
و تخليك مخبيتلي يديا..
انت احلى حاجة فيا..
جيتك زاير المقام، و منيش متزحزح..
حالفلك بلي عشتو في سماك..
نكونلك دفى و ظهر..
كتف تركز عليه كي تعثر ويد تلقفك كي تطيح..
اللي بيناتنا مش شوية بش يهزو الريح..
خليك ليا دفى و عيشة..
و خليني ليك سما و سند..
كي شفت عينيك الشيطان لي فيا سجد..
رجع لربي و كفر على ذنوبو..
لقينا رواحنا في دنيا كل واحد فيها عايش لروحو..
و أنا عايش ليك..
لوج مليح تو تلقاني فيك..
كيما انا لقيتك فيا..
عنقني تعنيقة قوية..
و خليني نهمسلك..
الليل الدافئ في عينيك..
يحمل كل ماقد ينقص هذا العالم يوما..
و هالة النور التي تحيطك.. تنير داخلي المقفر..

Wassim Amor - وقعك في خيالي

لا همّي تسأل آش بيني
ولا همّني نعرف آش بيكْ
آش همني أنا في ضياعكْ
في طريق ضيّعتو بيديكْ
في قلبي وجيعه تكفيني
و يكفيني نكذب ناسيكْ
وحدي مع وحدي معلّيني
يا حسره كنت معلّيكْ

في سكاتك كنت تناديني
ومن غزره نعرف إلي بيكْ
ومن ضحكك نفرز دمعاتكْ
و في ضعفك كنت نقوّيكْ

و الغصه إذا تلبك لحظه
تكويني إذا تكويك
و كلامي ببحورو صحرا
و حضني سكات يداويك

و نطبطب ديما على أكتافكْ
على أكتافي تتعدّى نعدّيكْ
و نفرح كي تحكي هبلاتكْ
وكي تغلط كنت نرضّيك

و نزيّن ديما حلماتكْ
من بدني نخرج ونجيكْ
و نلاغي شعرك في نعاسكْ
وكي تبرد بروحي نغطيكْ

وفي الفكره في مثيل هلالكْ
مع ناسك قمره نضوّيكْ
و نخيّط روحي على قياسكْ
مش ضعف كان همّي نُرضّيكْ

و اليوم أنسى آش بيني
و خلّيني ناسي آش بيكْ
وينو إلي عجبك في هبالكْ
كي شمّك إستخسر يسقيكْ

في بالك ترجع تلقاني
ما عادش نلقاني فيكْ
خلّيك مع الرّيح تغنّي
و جناحك ما يرد عليك
---------------------- #سيف

اش همني فلي ضاع
واش همك في عمر تباع بالصاع
واش همك فلي شرى
واش همني فلي باع

انا ديما شاريك
وقد ماقلبي حب يضياق عليك
روحي ديما ليك توساع

لاهمّي نصون خيالاتك
ولا ندحي همومي الي فيك
وفي سكاتي نسمع ضحكاتك
ونفصّل غزراتي فعينيك

يا ريتو الزمان الي صانك
عايرني وانا بلا بيك
نتلمّح الوردة في اغصانك
ونتحسّس يدّي ذبلانة
خانتها سخانة يديك

كي ظلّم ليلي في نهارك
حبيتو يرميني ليك
وصيّت الدقّة الي خطاتك
اتدلني وتهديني ليك

من حسّك كانت بسماتي
نتكّى نحس جواجيك
وفي شونك روايح مماتي
وعروش جاشي هوما اماليك

ليك انت نسبّح ونصلّي
نهبّطلك نجمة وتولّي
كي الشامة المنقوشة على حجرك
وتزيدك في حر شهاويك
توريك لمفرّت ومخبّي
على حسّك ماني متربّي
ومفطوم على نفس رواريك

في بالك تقعد تلقاني
وفي بالي سرّك كي حكاني
وكتم وماحب يعاديك
وفيت ...
وفيت ومعادش نلقاني
مصمّر عينيا فيك
خلّيه البعد يرتّحنا ويبرّي
مكتوبي ومكتوب عليك
---------------------- #أمين

نص مشترك : Saief Ezzine & [Amine.G]
إلقاء : Amine Gallah

لا همّني (Amine.G & سيف الزّين)

هكّا يا قلبي
تخلّيني نحب
وتعلّمني الي ورا كل روح صافية
فما عزقة تحكي حتّى وهي غافية

يصيح سكاتها
وماتتحكاش حكاياتها
حتى كي تتكوى وتزيد تتعطب

وهكّا ... تحبنا ننطقوا
بش نقولوا... ونقعدو نعاودوها :
ايه .... مزلنا عايشين
بش نضحكوا ونحكيوا
وحلفنا معادش بش نبكيوا
وديما شادين في بعضنا
بش نحبّنا كي نزيدو نعشقو تبسيمة حيّة
تبسيمة تفرفط في الجواجي
وتجي على غرادة
وتبهنيسة تحكي علينا
حتّى ببلادة

تي هذيكا هي صنيعتنا
كيف ماكانت ديما العادة

هكّا يا قلبي
سرّيتك على سرّي
وفضحتهم انت عينيّا
وعرّيتهم وحدك شهاويّا

خاطر وحدك الي تفيق بيّا
حتى كي نقلّك اخطاني راك بليّة

وقد ما ترعش عليّا وتسترني
نلقاك زادة تفضح فيّا

أما انا مزلت نحب نحب
ونحبّك معايا تقعد تتلب
خاطرك بدقّاتك
رشقت فيّا
العشقة واسرارها
وزرعت جاشي
بالحشمة وخنّارها
وعلّمتني الغيرة وعزارها

هكّا يا قلبي
بعد هذا الكل
تخلّيها بيّا

وقت الروح
لقات وين تتنفّس لهوا
ولقات كاس منّو
تترشّف غرام وتتروى
ولقات شكون سقاها
وشكون غطّاها
وخذا منها خزرة حشّامة
وقوّة في الشدّة عطاها

هكّا يا قلبي
وقت الي لازمك تدق دقّة
دقّيت مرتين
وفضحتني بلمعة عالشفرين :
لمعة لا تتشرى ولا تتباع
لا تتعطى لا تتفك
ولا تتكال بالغرام
ولا حتى بالصاع

تي هكّا يا قلبي
تفكني من دنيتهم
وتدّيني لدنيا احلى
وتسلطنّي بغناية تشبهلي
وماتشبهش لحكايتهم

وهكّا ماتقلّيش ؟
ماتورّينيش ؟... وماتوصّينيش ؟

قدّاش مزالت طويلة الثنية
وقدّاش منها النيّة
وقدّاش بش نقعد نتكّى عليك
ونقيّدها على منامة مشتهيّة
وموش مالعدم مكريّة

هكّا يا قلبي
كي نشدتك خلّيتني وما لبّيتني
وزدت دزّيتني
ولحضن الدنيا رميتني
وقتلي برّه فارع
فك ليك وخوذ بايك

وأقعد أسمعني وكلّمني
وعمرك ماتخلّيه ينشح حبارك

تي هكّا يا قلبي
ماتقلّيش وماتسرليش
الي العيشة فيها
ديما كيّة ووجيعة

كيف مافيها انت وانا
ستانسنا نزهاو
ولسابع سماء نطيروا
ونخليو شيختنا احلى صنيعة

وفما انا نمّن بيك
يلعن مذهبك
قبل السنّة والشيعة

هكّا يا قلبي
تغدرني
وتخبّي عليّا
وتقلي برّة جرّب وحدك

واصبر ميسالش ...
وتعلّم من غير علاش
وتفكّر ديما وماتنساش :

الي جاية الراحة بعد التعب
وحتى كي تفركس وما تلقاش
ماتسلّمش ! وارجع فركس ...
لازمك تتليّع بش تفهم وتتفهم
وانا راني مانحيركش من عدم

ولازم توة تلقى فيّا فيّة
وهذيكا هي لهديّة
وممكن هذيكا هي الديّة

هكّا يا قلبي
تزرع فيّا نوار عشيّة
وتوصّيني نبكي
كي نرخ بش نرتاح
ونحسب كسوحيتك
ديما في حضني طريّة

تي الحسبة ما تقابلش :
انت مزلت شادد صحيح
تضربني وتضرب عليّا
وتجافيني وماتحملش فيّا
وديما تقلّي ديما هذيكا هيّ

هكّا يا قلبي
ساعات تقوّيني وتعّلمني
وتقرّيني والطريق تورّيني
وساعات تعاندني وتوصّيني :

وتقلّي مزالت تستنّى فيك
ولازم بش تلقاها
الي بش تخطفك بغزرتها
وفي اسمك بش تنسّيك
وتلهّيك حتى عليّا

تو وقتها نرجع نفكّرك ونقلّك :

ايه ... هكّا يا قلبك الي دق ووصّاك :

ماتمسحش ندوة سقات عروش لحبق
وماتنساش الي ديما عندي عليك حق
حتى في كمشة حروف تفرتهم عالورق

وهكّاكا قلبك
اش بغى
وهاكي روحك كي تحب
كيفاش تتبلى
وهاكا جاشك الي اشتهى
كيفاش يتعمى
ولا تشيلو لا أرض ولا وطا

وهكّاكا ... لازمك تحب
وماتسألنيش كيفاش
يصبح شبعان وهو عالخواء

هكّاكا القلب فاش يتلهى
هكّاكا هو ...
ما يعشق كان كي نوا
ومزال ما صحى ...

وهكّا يا قلبي
قد ماتفرغ
ديما بالمعزّة تقعد معبّي
وانا في وسطك متخبّي
نشهدلك ونشهد بيك
ويشهد علينا ربّي

[Amine.G]
-------------------------------------
نص وإلقاء : أمين ڨلّح
موسيقى وعزف : Rami Ourabi

هكّا يا قلبي (نص [Amine.G] موسيقى رامي عرابي)

Lyrics and Vocalization: Wassim Amor
Background Music: Schindler's list - Main Theme
Wallpaper: Denis Forkas - Children Praying in the Dark
____________
Lyrics:
اللي الداخل مني مدفون
مردوم بسنين و عباد
سر من أسرار الكون
نفخة روح هبات
*
المخ ولى ينسى
و العينين ولت ترا معاش تشوف
فرغت حتى م الحروف
مالكلمات
لي كنت نهز بيها العروشات
نحرك القلوب
و نعنق الموجوعين

مساطت الحكيات
فناجن قهوة بايتين 
اعقاب دخان.. 
غطيان مفرتين
نوم مكسر
و جفون محوقين.. 
و الحجات الصغيرة..
لي كانت تصبيرة
بين الخنقة و الوجيعة
معاش لا تتحس لا تصبر..
*
الألوان بهتت
الأنفاس همدت
و الشعلة ولت رماد مطفية
الأيامات هي هي
نهار واحد
 مهما تبدلت فيه حجات
هو نفسو يتعاود
محسوب عالعمر شهور و سنين

فمّا حاجة في العينين..
رمشتهم فيها خريف
غزرتهم فيها برود 
النبرة غلبها السكوت
و الكلام فرغ مالمحبة و الدفا
فما حاجة غالطة هنا.. 
في صدري.. 
في بدني
ديما تاعب
يوجع و غالبو النوم

فما عُقد و هموم
خانقة الطموح
مكتفة الجموح
حابسة الروح
في أطراف البدن
*
كلامهم السم
يخثر الفن و يقتل الرغبة

اغزر لحالتك
متكور في حفرة
ميت بالحيا
تتنفس 
أما النور في صدرك طفى

محصور في تركينة
أصواتهم السكينة 
كل مرة تقص منك شوية
تحير الندوب المنسية
و الجروح لي ماتسكرتش
محبوس من وقت الحلمة لي ماكملتش

الباب محلول 
 اما انت مشلول بصوتهم يرن في وذنيك 
بنفس المشاهد لي تتعاود
كل ما تسرح والا تغمض عينيك

غارق في الظلام
تسمع في صوت ألوان البرة
تتخلق و تتشكل
أما بدنك مشكل و متكتف بيك
روحك مخدرة
صدى صوت غارق ينادي فيك
و انت تتخبط وحدك و تلاجي
لسانك معقود روحك تناجي
انا مش هكا هذا مش أنا
أنا أحلامي كبار
و عينيا مليانة
بمحبة و دفى و بتبسيمة
كنت ديما نغلب الحكايات القديمة
و كل مانطيح نقوم خير 
كنت ناخو بيد الموجوعين 
و نوصفلهم الدوا
تخنقت مالقعدة هنا 
نحب نخرج للنور 
نتحرر
 نشق سماوات و بحور

تتخبط و تفارع و تصيح
و صياحك صدى
يضرب في حيوط صدرك الباردة و يطيح

صياحك سكات 
معبي حكايات 
يعرفها كان الليل
حد مايعرف وين تسرح في شرودك
و لا سكات الليل شيعمل في حدودك
وصوت البحر و نسمة الفجر
الوجوه تتبدل عالعتبات.
و انت على كل عتبة بوجه..

*** 

اليدين لي تتمد سراب ليهم و ليك
حد ما بش ينجم يخرجك والا يحميك
حد ما بالحق بش يحس بيك 
و يفهم العقد المدفونة
 و الحكايات المخبية
  و الروح المسكونة
 بخيالات و رؤى
 بحجات عباتك 
ملي كنت نجمة شاردة في السما
 بسناريوات تكتبت و ماتعاشتش
و بوجيعة نصوص تبدات و ماكملتش.. 
*
فماتتمناش حد يجي ينجيك
اوعاك تتخيل انو الدنيا واقفة عليك 
اللي تعدا وفات مش بش يرجع
و اللي جاي مش معلوم، 
خليك في اليوم
قوم افرد بدنك
انفض خوفك
واغزر في قلب الشمس
اخرج مالحبس 
خلي قلبك يملا نور
و عروقك تنبت ورد
واجه مخاوفك و اعمل جرد
و كون انت بكلك 
بعيوبك و ظلك
بخايبك و بلي محلّيك
بالسر المدفون فيك
 حد ما عندو حاجة عندك
و حد ماو شادد السما لا تطيح عليك 
ارسخ جبل في أرضك
يا جبل خنارهم مايحوك فيك

Wassim Amor - السر

Lyrics and vocalization: Wassim Amor 
Background Music: Linkin Park - In the End - cover by GnuS Cello
Wallpaper: On stage blog
_____________
Lyrics:

قالّك اللي لينا لينا واللي خاطينا خاطينا 
و اللي حسبناه لينا خطا بعيد ومشا، 
وجيعة قلب ما ليها دوا 
غير دور مثلتو لين تصدق
أنسى و ارمي لتالي 
ماكثرش منها الحكاوي 
ماحسبتش شيجي نهار و  قلبك يغفلق
و اللي نسيتو الكل يطلع ماتنساش 
الكانون ما هباش و النار مدكنة تحت الرماد.. 
تستنى في حاجة تلهبها
فكرة شاردة تربشها
  غناية سمعتها مش بالعاني
نص خانتو المعاني و فصلتو على قياسك،
نفس الريحة أما ماتعرش منين غزاتك 
أي قطرة تفيض الكاس 
و ترجع تتخبى من الناس ورى تبسيمة ملفقة.. 
ضلوع صدرك مالشققة 
مالكذب و الهروب 
كسرت القلوب مش كان بالوجيعة والبكا 
ممكن بانك تزلي ما تحسش روحك هنا.. 
بانك تولي عايش خاطر ما متش
من داخل مدشدش أما ماقلتش
خفت تواجه روحك 
 تغزر لجروحك 
وتشوف فيها قداكش ضعيف.. 
فخرجت للدنيا كاينك صحيح 
ولي يشوفك يقول جبل مايتحناش
كاسح نار تضوي سعات تحرق 
و ماتخباش..

أما الحقيقة انك معطوب
 لا فرحتك كالفرحة
ولا وجيعتك تتحس
مخدر.. 
الداخل  منك بايت الحس
والبرة مش مهتم

في اللخر بش تلقى روحك
مدغور بقلم 
حاولت تكتب بيه و مانجمتش 
خاطر وقت لي كان لازم تقول لا
ماتكلمتش.. 
و على قد ما توجعت ما تعلمتش
خفت تاقف عريان قدام عيوبك
مانجمتش تقبل ندوبك
و تحبك كيما انت 

أما في اللخر تو تعرف إنك انت
لي كان لازم تحمي ظهرك
ماتستنى حد
انو عيوبك مش ذنوبك 
ذنوب الناس لي خافت انك تكسر قيودك
و تغلب الخوف مالتغيير لي حابسهم
تحطملهم آلهتهم
و تكفر بالي،وجدوا عليه آباءهم الأولين
والا تجيبلهم دين يقول حبوا بعضكم
و اقبلو المختلفين
رغم إنو كل الأديان تقول
أما اللي تحطت فيه يد الإنسان 
منقول و كل واحد يزيد كلمة
فاعتزلهم و ما يعبدون
تو تلقى أول الطريق و طرف الحلمة

 اغطس في روحك.. 
واعرف بالحق انت شكون
بطل تلوم 
و تحرر مالقيود لي كبلوك بيها
اقبل عيوبك مهما ذموك عليها
و عرّي صدرك للريح.. 
قبل ما عروقك تشيح

Wassim Amor - اللي لينا

Credits: 
Lyrics and vocalization: Wassim Amor
Background music: Finneas, Break my heart again, Karaoke
Wallpaper: Gustave Courbet, Sunset on Lake Leman, 1874
___________
Lyrics:

سكات..  
ظلام تولد منو النور.. 
آخر جمرة هبات.. 
ظوات بعدها بحور.. 
ورد حنين نبت في الصدور 
و مطرة دقت عالشباك
 طاقة سرات في العروق
طرشقت بذرة تنسات.. 
العينين تحلت.. 
صوابع تحركت 
و الحكاية عاودت بدات..

فصل جديد.
رغم إنو اللي فات كان صعيب
واللي جاي أصعب.. 
أما مهما كبرت.. 
مازلت بش تكبر
و تفهم
و تتعلم
و تطيح و تقوم
مهما كبرت الهموم.. 
مهما تعبات الحفرة سموم


الحفرة غارقة
 الظلمة دامسة 
و انت مش عارف روحك
 لا وين 
لا شكون 

غرقت بين الخدمة والنوم
في الخدمة راقد
و كي ترقد مخك يقوم

ديما تاعب 
لكن تخاف لا يقولو مغبون 
فتخرجلهم عادي 
فرحان، متماسك وهادي 
و الداخل منك بركان مكتوم


أيها المفتون بالدنيا 
خابت مساعي العاجلين 
أتدفن في حياة غير حياتك
أم تجوب الأبعاد مع أرواح الزاهدين


ارمي روحك في روحك
تحرر من كل قيد كبل جموحك

لوج وحدك و اسمع و شوف
خاطر الحقيقة تتبدل حسب الظروف

ماتخلي حد يحفظك الحروف
ولا يخليك تشك إنهم خير منك
انت انسان كامل بمخاوفك و همك
و بكل تفصيلة فيك
فماتخليش غرورهم يأثر عليك

اعمل لي تشوفو صحيح 
حتى كان غالط.. 
و آمن بالحاجة..
تو تلقاها صارت


الطريق بش يكون طويل
و مع أول خطوة بش تاكل أول كف 
ماتسلمش.. 
قاوم و تو تلقى الحمل خف
و تو تلقى يديوة حنينة
تمسح عليك غبرة الزمان
كبش فيها 
و اجبدو بعضكم لقدام

الحب الحقاني
مايهزوش الطوفان
الحب الحقاني
يهون لي جاي و يصبر علي فات
تعنيقة و كليمة حلوة
يردو الروح في القلب المات


لكن   حياتك مش المفروض تكون ديما فرحانة
الدنيا وجايع و عينين مليانة 
طاقة و دفا 
المهم تعرف كيفاش تعيش هنا

فحب روحك بش تنجم تسمع السكات
و تشوف النور المولود من ظلمة الأيامات 

كتابك محلول
و المحبة.. سر الكون 

فاكتب.. 
اقلب الصفحة و ابدى من جديد.. 

حارب..
ما تخليش أحلامك تخيب

Wassim Amor - سكات

خوذ منّي وأعطيني 
أعطيني من غزرتك غمزة 
تفيّقني ... ترجّعني نفارع الوقت 
نفكلو درج وقت زمانو حضر
ويعطيني دقيقة ماتحرّرش مالعمر 
وزيد اعطيني منك شوية من كلّك 
الي كي تاخو منّي ماتشاورش 
وكي تعطيني ماتحسبش

تي اعطيني تبسيمة ولاضحكة 
ترد الروح 
تعطي بلا حساب 
تفكّرنا في الأحباب
وتبرّي الجروح 
فماش ماينطق سكات
ماحب يحكي ولا حب يبوح

وزيد اعطيني كلمة 
نبني عليها بقيّة كلامي 
الي نحب نكتبهولك 
كلامي الساكت الي انت فكّيتو 
تي هات ... اعطيني منّو شوية نفس 
نفكّو وناخذو وندور ندور ونرجع بش نقلك :

أعطيني منّك 
العين الي حتى كي تدمع تفرّح 
والتنهيدة إلي حتى كي تطوّل ترتّح

وزيد أعطيني من قلبك 
الروح الي في روحي تسرح
وماتشاورش 
الروح الي ماحبيتش تسمعها 
وخوذ كل شي يحلالك 
خوذ الي يواتي زينك ودلالك 
وخليلي قلبك يونّسني
ويعطيني دقة انت مانجمت اتبّعها

تي خوذ السماء بسحابها 
والأرض بترابها 
والناس بأحبابها 
والغربة بعذابها
وزيد خوذ دمعتي شيّحها
وزيد فيّا مالدنيا شوية 
والشدّة كيّة مني أطرحها 

وخليني وحدي نستنّى 
في غناية تفكّرني فيك 
وبلاصة تحكيلي عليك 
تي خوذ كل شي 
وأعطيني مالظلمة طرف ضي
وخليك انت ليا للاّ وانا ليك البي 

أعطيني برك ... حويجة من محبتك 
نشتهاها كي في منامة تجيني
وكل ما نستنهاها تطل فيسع وترجع تواتيني 

تي فلخر : 
أعطيني حتى بوسة
 تصبّرني على وحشك 
وفي غيابك تهنّيني 
يهديك ... تي هات أعطيني
يلعن بلوتك في كنيني 

#أعطيني_منك_حتى_شويّة_تززّيني 

[Amine.G]

أعطيني

Feeling the universe inside of u allows you to project it to the world in the shape of texts, called slam.
Feel, Dream, CREATE

Wassim Amor - السر

A.mor

Recent comments

Abdelrhman Elsawy

Areej Korkad

Rawen Zoghlemi

Nesrine Kanzari

Related tracks