محمد ابراهيم

كل حاجه ناقصه صوتك ناقصه صورتك .. ناقصه سيرتك .. ناقصه تكشيرتك فـ غيرتك ناقصه ريحتك ناقصه روحك .. ناقصه حضنك ناقصه خدك لما يتحول لـ ورد ناقصه نفسك لما يلمس .. كف إيدى فـ وقت برد .. لسه حتى القهوه مره فـ إنتظار سُكّر شفايفك .. غبتى فجأه وسبتى قلبى فـ كل حاجه شايفها شايفك


كلمات الشاعر : محمد ابراهيم
غناء : نسمه عادل

Kol 7aga - كل حاجه ل محمد ابراهيم

محمد ابراهيم - كتبت وراكى بالمللى

عاوزة أفرح بيك
لما أفرح بيكي انتي الأول
اتلم ياواد بتكلم جد
انا عاوزه اتطمن ليك وعليك
والنبي فكّك 
والله عبيط
انا يابني هاروح مش هاقعدلك 
محتاجة اشوفك ساكن بيت
هو انا يعني بنام ف الشارع ؟
ياحمار اديني عقاد نافع 
مش هتجوز انا كده مرتاح
أنا أمي كمنجة وحضن متاح 
ومشاعر معرفش احكيها
أنا متجوز أمي أساساً 
متطمن وانا عايش بيها
أنا كل ما بهرب منها واغيب 
بكتشف إن انا بهرب فيها 
الست دي حالة ماتتكررش
نتغير ..... هي ماتتغيرش
الدنيا تشيلها وتهبدها 
تطلع تنزل
تكسرها تقوم 
أنا أمي أنوثة بـ100 راجل
ورجولة بدرجة ناي مكتوم 
ساعة ماتوفى أبويا وراح 
شوفت ف نظرتها كلام وجراح
من يومها وهي عمود البيت
والآمر دايماً / والناهي 
الدوا جيبته ؟
فاكراني نسيت ؟؟
انا عارفه ان الدنيا تلاهي
احضنها تقوللي امشي يانصاب
بتغيب أيام زي الاغراب 
وتقولي مشاغل وأبصر ايه
انا أصلي بقيت شاعر معروف
قالك معروف .. بأمارة إيه 
كوافيلك تشهد يامهزأ
ف رضاكي يامزة أنا بتلزق 
واخرج على أوضتي شوية وانام 
واسمعها تصلي وتدعيلي
الواد تلفان
انما طيب .. وانت قريب
ارزقه رزق بحجم السماوات 
وارزقه بالخلفة ولاد وبنات
وتنام وتقوم تلاقيني مشيت
فتقوم تبدأ ترويق ف البيت 
أنا اسف جداً ياحبيبتي
علي سفري الدايم والاشغال 
علي كل كلام ضايقك واتقال 
انا مهما بدور وباعيش ف الدور 
باطلع وانزل واجي عليكي 
أنا راجل جداً 
ورجولتي تلخيصها ف بوسة علي ايديكي 
والدنيا ان ضاقت ف انتي براح 
وانا جنبك باتطمن وارتاح 
وخناقنا ساعات بيكون راحة 
وخصامنا كتير بيكون تلكيك 
الأم مكان لسكون الروح
وخضار من قلبك طارح فيك
أيوة ياماما ؟
عاوزة أفرح بيك

قصيدة عاوزه أفرح بيك

كلمات : محمد ابراهيم
القاء: خلود ايهاب
ميكساج: محمد البرقي

اسف يارب - كلمات محمد إبراهيم-  إلقاء خلود إيهاب

عشان أعيش 

إلمسينى إن مُت جايز ..
فيا روحى ترد تانى ..
ليه بحبك بس دايما فيكى حاجه مخوفانى ..
فيكى شك وفيكى حيره ..
وفيكى منى حاجات كتيره ..
وكل شيئ بحتاجله فيكى وكل حاجه فيكى فيا ..
زى مانكون فوله قسمت نفسها ومش دى القضيه ..
القضيه إنى حابّك وإنتى حابه محبكيش ..
عشتى فيا فـ مت فيكى .. فـ موتى فيا عشان أعيش !

موسيقى : أسامه الهادى 

عشان أعيش

وجع قلبك وتنهيدك ..
وصوتك و انتى قلقانه .. 
وشكلك و انتى زعلانه
وشعرك لما بتلميه ..
وحُضنى لما بيلمك 
تخافى إزاى وانا موجود 
ومين غيرى يشيل همك ؟!
دانا بيتك و انا أهلك ..
يا ماشيه فـ دمى على مهلك 
بلاش تبقى سبب حيرتى ..
وتكشيرتى و سرحانى وتفكيرى 
مفيش غيرك هينفعنى ..
ولا راح ينفعك غيرى !
بلاش يبقى الكلام بشروط 
كفايه سكوت وخوف مـ الجى 
دانا لو طال سكوتك أموت .
وبسمع صوتك أرجع حى !

وجع قلبك وتنهيدك .لـ الشاعر محمد ابراهيم

محمد ابراهيم - كان يوم عادي

عن حدوته الحب الأول .. اللى عمرها ما خلصت بالجواز .. و عن الصدفه اللى بتجمعنا بناس كنا ما صدقنا نسيناهم 


_________________________________________________________

كان يوم عادي

سبتها من ست سنين فاتو ..	
_دلوقتى انا متجوّز غيرها _ 

مبحسش ناحيتها بحاجه 
مع ذلك و الله فاكرها 
ده لإن الجرح اللى يعلم 
عمره ما بيروح ..

مشهد متعاد .. 
بصيت لمراتى و قولتلها 
" بابك مفتوح "

فتحت بابها و قفلته تانى
بس يا سيدى  
مسكت إيدى .. و قالتلى 
هنسهر فين طيب ؟!
" ودينا مكان يبقى قريب "
علشان الزحمه وضيق الوقت 
و عشان مش حابه ان انت تسوق
شكلك مخنوق ..
رديت " أبدا " .. مضغوط 
و الشغل مهوش ماشى ..
ردت ماشى .. 
ودينا كافيه نشرب حاجه 
محتاجه أحس ان انا جنبك 
_ انا نايمه إمبارح زعلانه _
جه الوقت تكفر عن ذنبك 
قولتلها خلاص قلبك أبيض 
فـ قالتلى لا أبيض ولا ألوان 
ودينى مكان ..
 ويكون هادى 
ولحد الآن اليوم " عادى "
و مكانش فـ بالى انه هيقلب 
بحنين و بشوق ..
نازلين بهدوء 
و لقيتها قصادى معديه ..
معقوله بجد تكون هى ؟!!!!

معقوله الست سنين عدوا 
وبقينا بعاد 
" مشهد متعاد " 

و انا قاعد باصص لمراتى ..
_مزيكا حزينه بصوت واطى _
تقتحم المشهد و انا سارح 
و الوقت بيرجع ست سنين 
و كأنى مودعها إمبارح 
قاعد فـ كافيه و فـ إيدى كتاب ..
تدخل مـ الباب 
و فـ إيديها إكياس فيها هدايا ..
و حاجات انا كنت جايبهالها 
_ الشك بيكبر جوايا _
مستنى تقرب و أسألها 
فـ تقرب   و انا دقات قلبى 
عماله تزيد ..
الشك بيتحول تأكيد 
و بتسحب روحى مع الكرسى 
و بتقعد و تكلم عينى 
بنظرات مقدرتش أحللها 
و بتمسك ايدى و تفتحها 
و تحط الدبله و تقفلها  
و تعيد فـ كلام معناه مفهوم 
و تقول " معلش  انا لازم أقوم "
و المشهد يقلب تراجيديا 
وسواد متغلف بكوميديا 
ودراما فـ فيلم إسمه الدنيا
وده حالنا وحال كل العايشين 
 الحب اللى بيكبر فـ سنين 
يتهد فـ جزء من الثانيه 
ومحدش عارف ايه الأسباب 
 ومحدش عارف مين مسؤل 
يقطع سرحانى سؤال ..
بيقول ..
مالك يا حبيبى سرحت فـ إيه ؟!
_ أبدا يا حبيبتى انا مش سرحان _
انا بس فصلت عشان تعبان 
و أتنهد و انا ماسك إيدها 
و أوعدها انى أفضل أسعدها
و أضحك و أسأل بتحبينى ؟!
فترد تقول " طبعا يعنى "
مع انك بتطلع عينى 
وبسببك قلبى بيوجعنى 
 
" نكديه بطبعك هعمل ايه "
و مشاكلك فـ الغالب تافهه
فتقولى اسم الله و نتعاير  
و أطلع مـ العلبه سيجاره
فتمد اديها و تخطفها 
و تقولى بلاش شرب سجاير
عارف ؟! .. 
انا عمرى ما حسيت بأمومتى ..
غير و قت ما حبيتك جدا 
من قبل ما نتجوز حتى ..
بدعيلك و الفجر بيدن 
و كأنك إبنى اللى انا بنته 
ومسنوده عليه .. وماسكاه 
فـ إيدى ..
كل الموضوع ان انا عايزه 
أتدلع و أتحب يا سيدى 
حقك .. و الله انا حبيتك 
حسيت انك فعلا بنتى 
مع انى مكنتش متخيل 
اللى أتجوزها تكون انتى 
ده لأن انا و انتى زمان كنا 
إتنين إصحاب يدوا نصايح 
يا بنمسك دايما فـ خناق بعض
يا بنمسك على بعض فضايح
ومكانش فـ بالى ان قلوبنا 
مشاعرها فـ لحظه هتتحول 
و أكتشف ان انا بعد ده كله 
حبيتك انتى من الأول  
أيوه الواقع عمره ما كان 
يشبه للأفلام يا جماعه |
لو دققنا فـ كل الناس 
هنشوف كل الناس متباعه 
واحد سايب واحده وواحده 
سايبه فـ واحد سايب غيرها 
آه الأحاسيس فـ الأول حلوه 
بس وجعها يبان فـ آخرها 
الجارح بكره هيتجرح 
و المجروح ده مسيره يخف
كلنا أدوارنا بتتبدل 
طول مالأيام دايره تلف


كان يوم عادى _  محمد ابراهيم

الغايب الحاضر "زي الافلام" _محمد ابراهيم

متعتذريش القصيده الكامله
من ديوان لما كنا 
معرض الكتاب 
2017

الكلمات 

متعتذريش .. لا حبك آخر الدنيا ..
ولا وجودك سبب لحياه 
انا فـ " مآساه " .. 
بحاول أجمل المشهد 
و أمثل انى مش مهزوز 
" شبح أراجوز "
مركب وش على وشه 
عشان ميبانش ايه جواه
 
لا هشحت إهتمام تانى ..
ولا هطلب حنان لله 
انا كويس ..  كده أحسن
ومش هنكر ساعات بحزن
و أحن لكلمه متقاله ..
وذكرى و صوره ورساله 
فمتحاوليش .. تكونى ضحيه 
فـ القصه ..
و إوعى تصدقى الحاله
ده زى ما فيه بنات إتكسروا بسببنا 
فـ ياما بنات كتير حاولوا و نجحوا
فـ كسر رجاله 
وياما بشوف من الدنيا 
حاجات اغرب من السيما 
وربك برضه ليه حكمه
و ليه حسبه و تقسيمه 
و انا اللى مشيت و انا مآمن 
وسبت مشاعرى و اطمنت 
نسيت ان البلاء وارد
وقد يأتى فـ هيئة  "بنت "
انا يا حبيبتى مش تمثال
و ليا شعور و بعرف احس 
و اتأثر 
و قلبى ازاز .. 
يعور لما يتكسر 
متتخدعيش فـ كام ضحكه 
بخبى الحزن جواهم 
ده لو بصيتى جوايا 
هتلقى الحزن متفسر 
و تلقى الجرح ساب فيا 
علامه الوقت ممسحهاش 
وممسحكيش 
متعتذريش ! 
متعتذريش .. 
و صلى جنازتى وياهم ..
قصاد القلبه حطى الدبله و إدعيلى 
و قولى كان مريض و إرتاح 
كفايه نواح .. 
على القلب اللى شافك ورد 
فـ وطى لجل ما يشمك 
قتلتى قتيل ؟! .. و ايه يعنى 
فداكى .. خلاص و لا يهمك 
مسير اللى إتكسر 
يتلم .. مسير اللى اتقتل هيعيش 
متعتذريش .. 
ساعات الإعتذار بيهين 
ويجرح قبل ما يداوى ..
سلالمك كلها تعابين ..
و انا معرفش أكون حاوى ..
يا حبل إتلف بالتدريج على رقبتى 
و انا من طيبتى سبت الحبل عـ الغارب 
بنبعد مهما نتقارب .. و أشوفك غلطه و أستمتع 
بطعم الغلطه فـ بعيدك ..
يشاء ربك .. بإن الطيب الغلبان 
يبطل طيبه على إيدك ..
 
برائتك .. شكل من بره 
ديكور بيدارى سوء طبعك 
و انا مقلبش أكون تابع 
و خاتم تلبسيه فـ صابعك
انا راجل .. و ليا كرامه لو راحت 
حياتى تروح 
 وبابى لا عاد لا متوارب ولا مفتوح 
ومهما تحنى و تنادى 
خلاص باب الرجوع اتسد
بكيت بعد الفراق ؟! .. عادى
بكيت على نفسى مش على حد
معدش ما بينا شئ فاضل 
عشان نرجع نقول يا حنين 
ده لو نزلت دموع راجل 
ينضرب الوجع فـ اتنين  
مفيش راجل مبيعيطش لو فارق 
الفكره بس ان احنا بنخبى 
معرفش ببكى عليكى ليه و إزاى 
معرفش ليه وعلى ايه بتتحبى 
يوماتى عـ الله بسأل نفسى ..
ليه انتى ؟!
و ليه بالذات  
و كان فين قلبى  و انا مسحوب 
لتيارك 
و كان فين عقلى و انا بغلط 
و بختارك
وداخل جنتك عشمان ..
أتارى جنتك .. نارك
مخدتش بالى انك " وهم " 
مشيت عكس اتجاه السهم 
و قلبى اتذل و إتعلق بأكتر حبل كان دايب 
انا اللى اتسابت طول الوقت 
عشان مرضيتش أكون سايب 
رضيت أطلع فـ حدوتك بدور الحاضر الغايب 
 و أحبك من طرف تايه 
وراكب قطر مبيمشيش 
متعتذريش .. عشان و الله مش فاهمك 
و مش قادر أحدد موقفك بالظبط ..
براجع كل تفصيله .. 
مفيش فـ القصه حلقة ربط ..
مفيش حبكه .. مفيش ربكه 
مفيش فـ القصه دمعة عين 
 و قبضة قلب أو قهره 
أكيد فيه حاجه مش ظاهره 
تعالى نبص عـ المشهد .. 
نراجعه من الألف للياء ..
نشوف مين فينا كان مشتاق 
و مين قصر .. ومين إهتم 
و مين نايم بكل برود 
ومين سهران يعيط دم 
أكيد حبك مهم .. أكيد 
لكن يعنى كرامتى أهم 
فـ كان من حقى أقول همشى ..
و أقول سبتك لكل الناس 
و انا كداب ..
صحيح سبتك انا لكن 
انا المتساب ..
انا المتساب بأفعالك .. 
و إهمالك .. 
و إحساسى ان فى حياتك 
مجرد طيف ..
و ساكن جوا منك ضيف 
لا ليا حقوق ولا كرامه 
و عايش بس من غير صوت 
وطول الوقت بتذلل 
و بشحت كلمتين حلوين 
فـ آخر اليوم ..
عشان أعرف انام مبسوط 
بقول سبتك لكل الناس و برضى غرورى 
وسطيهم .. و انا جوايا نار قايده 
" مفيش فايده " .. بكابر قد ما بكابر 
و قلبى من الحنين مفضوح 
قريب وغريب .. يبص فـ عينى 
فيشوفك بكل وضوح ..
و لسه انا تحت تأثيرك .. 
ومش شايف بنات غيرك 
لكن أصبحت مبشوفكيش 
متعتذريش

أشعار : محمد ابراهيم 
رؤيه فنيه و توزيع : الموسيقار محمد معانى 
تسجيل و ميكساج  و ماستر : كريم حسن
فوكال : محمد الشبينى _هاله حسن 
ناى : أحمد أبو المجد 
باص جيتار : باسم معانى 
اليكتريك جيتار : أحمد طارق

شكر خاص 
" آيه عماد الدين فؤاد "

متعتذريش

محمد ابراهيم _  "متعتذريش " من ديوان لما كُنا

عمرو حسن جوابى الاخير

دي مش فيونكة .. دي بواقي تجربة انتحار فاشلة
قولتلكوا ميت مرة ما تدخلوش الرئة من غير ما تستئذنوا
بتقربوا .. والقرب كل ما بتعاطاه بدمنه

ودي مش فيونكة

بتحب ليه السيما .. اسال محمد خان 
واسال صبي حبها .. واداها روحه اتخان 
بتحب ليه الشتا .. اسال بقى الدخان 
واسال خيوط الصوف في البالطو هتقولك
لولا الشتا يا صديق .. كنا اتحرقنا حريق
ودي مش فيونكة .. 

من قصيدة السيرة الذاتية لحي الزمالك 
للشاعر \ عمرو حسن 
الحان \ احمد فوزي
توزيع الباند ..
من حفلة الربع 11 - 3 - 2017

احمد فوزي - دي مش فيونكة

غناء والحان نجوان 
من مسلسل الا انا حكاية ضي القمر

محمد ابراهيم - كتبت وراكى بالمللى

Yasmine Yousry 1

Recent comments

TRS - Promo1 Channel [DNB]

TRS - RECORDS [The Random Society Recordings]

Masters Of Sound

Walaa Adel

Related tracks