"حدوتة شباك سارة"
***********************
نص:رهف نصر
هندسة صوتية وأداء:زينب فرحات
____________________________

حكاياتى دايما بتبدأ بهو أو هى.. دايما من غير أسامى ولا ملامح.. بس 
النهاردة هى سارة.. و علشان عيونها زى شباكها شبابيك على الفرحة.. مينفعش تكون غير سارة..
شباك سارة اشهر شباك فى شارعنا.. شباك عمر الزينات الورق ما فارقته.. ولاد وبنات ماسكين فى ايد بعض، فراشات وعصافير من ورق بكل الالوان.. والأهم فى زينات سارة أنها مش مجرد ورق.. سارة بتكتب على كل زينة بتعلقها جواب.. جواب لكل حد وكل حاجة بتعدى عليها.. جواب للعجوز اللى كان مكشر فى الشارع تطبطب عليه.. وجواب للطفل فى الأتوبيس تشكره على جمال ضحكته.. جواب تعتذر للقطة اللى خضتها غصب عنها لما فتحت الباب الصبح.. وجواب حتى للهوا تقوله أنها مسامحاه علشان بيتصنت على وشوشة زيناتها..
ولاد الشارع كلهم كانت عيونهم مبتفارقش شباك سارة.. إلا يحيى.. كان بيتعمد يحط وشه فى الأرض كأنه مش شايف أى حاجة.. بس ده بالنهار وبس.. أما بالليل فيحيى كان الوحيد اللى عيونه بتتعلق بشباك سارة.. يحيى كان بييجى لوحده ويجمع الزينات اللى وقعت ويقراها.. هو الوحيد اللى اكتشف انها جوابات.. وعلى عكس اسمه يحيى كان دايما محتاج سبب علشان يحيا ويقدر يعيش.. والسبب دايما كان بيلاقيه فى جوابات سارة.. وعلشان كدة لما مامة سارة اتوفت وبطلت هى تعلق الزينات.. ورغم زعل كل الولاد إلا أن يحيى بس اللى خبط على بابها واداها صندوق مليان بجواباتها.. قالها انه كان بيعتبرها رسايل من مامته  الله يرحمها ،كل ما توحشه أوى.. قالها أنه عارف إنه صغير بس لو اعتبرته صاحبها هيكتبلها كل يوم جواب لحد ما تقدر ترجع تكتب ليهم هم الاتنين..

#حدوتة
#شباك_سارة


حدوتة شباك سارة

صوت الونس🎙️ زينب فرحات

دعوني أموت مؤقتًا، إنها هدنة.
Insta: Valketh_

Disappear completely and never be found again.

an Egyptian writer.
Listen to: BGG Radio (Blue Green Girl)
 When you stumble make it part of the dance !

حدوتة شباك سارة

Zeinab Farahat