وإن التجاعيد اللي فـ وشي 
مش م التدخين ..
ولا أثر السِن ..
أنا لسه بَحِن ..
ولسه مبطلتش تفكير 
ولسه بشوفك صُبح 
وضُهر وعصر وليل 
ولسه بَطَبْق فـ البالكونة أيام وأيام 
ولسه بنام ..
و بفتح عين وبغمض عين 
وبَلف شوارع ولا بعرف 
أنا رايح فين ..
الفُرّقة يا ست الناس .. سرطان 
وأنا أصلي جبان 
والوحِدة بتتشكل عفاريت 
والله يا ست الناس .. حبيت 
ضليت ..
صَليت ..
ومسحت دموعك 
وإتوضيت ..
ورجعت عن السِكة إياها 
كل التفاصيل اللي ما بينا 
مش عارف خالص أنساها 
وكأن التوبة مقبلتنيش 
وأنا عيل لسه 
فـ سِن الطيش 
وارد أغلط 
وارد أنساق 
لو كنت عرفت 
إن أنا هشتاق 
كنت إتدروشت ..
سكنت المرسي ..
مع الرايدين ..
أو كنت كفرت  بطعم القهوة 
ليوم الدين .. 
وحرقت قصايد عم نزار 
ورسايل كافكا ..
وقصة حب زياد ودلال
 ومروحتش أي مكان روحناه 
ولا شوفت عنيكي اليوم إياه 
أو يمكن كنت محبتكيش 
كان وارد جدا إني أعيش 
من غير تجاعيد ..
مش عارف مين فينا اللي بعيد 
وأنا كل ما أقربلك حبة
 بتزيدي بعاد.. 
وكأن ما بيني وبينك زي تضاد 
ومجال رافض لقانون الشد 
بتكلم جد ..
سامحيني عشان والله زهقت 
(لو أني أعرف خاتمتي ما كنت بدأت) 

#أحمد_سعد

Messages not written by Kafka - Ahmed Saad / رسايل مكتبهاش كافكا - أحمد سعد

أحمد سعد : شاعر عامية مستقل

Messages not written by Kafka - Ahmed Saad / رسايل مكتبهاش كافكا - أحمد سعد

Ahmed saad zezo