انا الأديب و لا تعرفنيش 
تقرالي لكن ما تشوفنيش 
كلامي لا هو مادهون ورنيش 
و لا المعاني عليها غبار 
شقع بقع يا ديل الفار 
* 
يا شعب مصر يا خم النوم 
ما تفوق بقى و تشوف لك يوم 
الثورة قامت في الخرطوم 
و انت اللي نايم بالمندار 
شقع بقع يا ديل الفار 
* 
يا شعب ثور داهية تسمك 
و شيل اصول اسباب همك 
عصابه 
بتمص في دمك 
و الاسم قال ضباط احرار 
شقع بقع يا ديل الفار 
* 
اخدوا اليهود غزة و سينا 
و بكرة يبقوا وسطينا 
و الراديوهات بتغدينا 
خطب و نتعشى اشعار 
شقع بقع يا ديل الفار 
* 
الشيخ امام قال كلمة حق 
و الست ثومة قالت لأ 
و ابو النجوم على ودنة اندق 
في المعتقل و الدنيا نهار 
شقع بقع يا ديل الفار

أنا الأديب ولا تعرفنيش - الشيخ امام

إياك و ان تسترق السمع .. فقط أمعن ♥️

أنا الأديب ولا تعرفنيش - الشيخ امام

Ziad Mahmoud