من يوم ما وعيت ع الدنيا 
وحاسس 
إن مافيش في العالم حاجة اتكتبت ليّا ..
واني قريب جدًا هبقى لوحدي
وان إيديا 
لا يمكن تمسك قطرة مَية ..

وان بقالي سنين في الشارع بجري ..
جايب أخري 
لكنّي فـ أي حديدة بفُوت ..

وان لقلبي عينين .. بتشوف من بدري ..

واني هموت في الآخر خالص
بعد ما كله يموت ..

واني خلاص 
مش عارف اكون مبسوط ..
مهما عملت ...
.
مهما شربت ومهما أكلت ..
مهما الدنيا تجاوب ليّا على اللي سألت ...

مهما الحظ يقوللي يا حظك !
مهما شيطاني يقوللي ماعدتش تاني هوزَّك .. 

هفضل هذا الشخص الخايف ..
خايف أضحك .. 
خايف انام ..
خايف احب .. ويطلع حُبي من اللي بكام ..

خايف م الأحلام البايتة ..
وم الأيام الفايتة ..
وم الأيام الجاية ..

حاسس إني هودع حد قريب مني .. قريب ..
شامم ريحة حزن الناس اللي ماحزنتش ..
سامع حِس بكاهُم ع اللي ماماتش ..
سامع ناس بتقول كان راجل طيب ..

شايف نفسي بعيّط ..
شايف نفسي بخيّط بَفتَة قماش .. 

لسه اليوم ده ماجاش ..
لكن برضه بعيشُه لوحدي في أوضتي يوماتي .. 
آخر يوم هتبسِّم فيه في حياتي ..
وهتنشف آخر دمعة في نن عينيا ..

من يوم ما وعيت ع الدنيا 
وعارف 
إن الطلقة انطلقت م القناصة وجايّة عليا .. 

ومافيش في إيديا غير اني استنى ..
واحاول اعيش .. 

واتمنى ان مُت .. أموت بشويش .. 
من غير ولا أنَّة .. 

وكويس جدًا 
إن مافيش 
جنازات في الجنة ..

..

شعر  / أغسطس ٢٠٢٤
"مونوفوبيا"
-حسام إبراهيم

مونوفوبيا - حسام إبراهيم

• شاعر عامية مصري ، مواليد 14 أبريل 1994 ، محافظة دمياط
• أنهى دراسته الجامعية في الهندسة المدنية / جامعة المنصورة عام 2019
• أصدر ديوانه الأول بعنوان "مفيشاليا" عن دار تويتة للنشر والتوزيع في يناير 2017
• أصدر ديوانه الثاني " سجن أس أربعة " في يناير 2019 والذي حصل به على جائزة أحمد فؤاد نجم في ديسمبر 2019
• أصدر ديوانه الثالث بشيكل فول وبنص طعمية في مارس 2020 ، والذي حصل به على جائزة المجلس الأعلى للثقافة 2020 (الكبرى)
• أصدر ديوانه الرابع البني أشياء عن دار تويتة للنشر والتوزيع في يونيو 2021
• قام بكتابة برنامج مش مسامح حسين الذي تم عرضه في ديسمبر 2021

﴿يَا أَيُّهَا الَّذِينَ آمَنُوا اذْكُرُوا اللَّهَ ذِكْرًا كَثِيرًا ۝ وَسَبِّحُوهُ بُكْرَةً وَأَصِيلا ۝ هُوَ الَّذِي يُصَلِّي عَلَيْكُمْ وَمَلائِكَتُهُ لِيُخْرِجَكُمْ مِنَ الظُّلُمَاتِ إِلَى النُّورِ وَكَانَ بِالْمُؤْمِنِينَ رَحِيمًا﴾.

اذهب حيث الغناء فالاشرار لا يغنون
https://www.facebook.com/omar.fakhre

http://instagram.com/omarfakhre

مونوفوبيا - حسام إبراهيم

Hossam Ibrahim ✪