الكلمات 
.
.
.
.
.
.

سفيرة النكد

البنت زى الوردة
محتاجة لعناية
متحبش الوحدة
ولا حتى لثواني
البنت شئ تاني
شيء حلو من جوا 
من برة 100 حاجة
ساعات تكون باردة 
أعصابها تلاجة
وف لحظة تقلب انثى
كالعادة شكاكة
خلصانة بشياكة
البنت كائن يحتوى كل الصفات
كائن يعيط مُبتسِم كدة من سكات
كائن ملوش في الفرحة ابداً
مولود بيعشق العياط





فرحانة .. بتاكل
زعلانة بردو بتاكل
اما بقى لو زهقت ف يوم
تلاقيها بردو بتاكل
عاوزين حل عاجل
الاكل عاملي مشاكل
بس بجد
حنيتها
تِكفي العالم ليل و نهار
اما دموعها
تِطفي حريقة ماليها النار

ثم اما بعد
البنت يا ناس بجد
بتعشق النكد 
على ما أعتقد
اه بتعشق النكد
لو منكدتش عليك
تبقى مبتحبكش
وفـ النكد بقى …
 مقولكش
تعمل م البحر طحينة
ما هي واخدة القلب رهينة

فيه حقيقة علمية
اثبتها العلماء
البنت إذا غارت
صارت أشد غباء

الغيرة حلوة مفيش كلام
بس بلاش يتبعها خصام
مش كل شوية هتتخانقوا
عشان عاكس او إتعاكس
وهو منك هيروح فين
ما هو كدة كدة لابس
بيحبك اه وبيعشق أهلك
وعارف إنه يا ماما يستاهلك
فكوني ليه ام وسند
ومتنسيش واجب كل يوم
لازم تملي حياتوا بنكد
…..
هحكي شوية حكايات
حصلت كتييييييير لبنات
فيهم بنات عاشت
بتفكر تنتحر
والباقي كله مات

ماتوا من الحسرة 
سببها معاملة أهل
وأقل شئ يتقال
قسوتهم .. كانت جهل
عاملوهم بقلة حيلة
 مكنوش كدة قد الشيلة
اختاروا كل الصعب 
وسابوا كل السهل


إلى البنت اللي عمالة بتعيط
عشان واحد سابها وباع
كفاية صداع
هو فات وجع جواكي 
وراح يوجع في واحدة غيرك
وإنتي زعلتي شوية خلاص
كفاية كتًّر 1000 خيرك

اللى زيه ميتزعلش عليه
هو انتي يعني اللي بعتي الحب ؟
طب لو عندك فرصة عشان
تنقذي قلب
هتبصي لكلب؟
انقذي قلبك
وبلاش عياط
إنتي غير كل البنات
إنتي ابتسامتك تدي روح
لحد مات
وأى واد
فكر يجرح مرة بنت
أكيد هيجي عليه الدور
داين تدان 
وفـ 1000 داهية .. يلّا غور
..
هو ليه البنت مصِّرة تحب
واحد عمره ما حبها
ليه مبتختارش القلب 
اللي بيعشق اهلها
ليه مبتبصش على حد
مش حابب غير قلبها


فيه كتير بيحبوا جسمك
فيه كام واحد شاددهم اسمك
وفيه واحد في قلبه راسمك
وعاوزك بس تحسي بيه
ولا انتي قلبك راح بلاش
ده انتي عندك 100 " كراش "
يتمنوا بس نظرة منك
فيها امل ولو طشاش
..
مجتمعنا ده مجتمع لطيف
فيه بنت بتبيع نفسها 
بكل سهولة عشان رغيف
واللى بتشتغل في محل 
التحرش حلو على خفيف
طب تعمل ايه بس البنت 
تقعد تشحت على رصيف ؟
هو ليه مفيش آدمية
ليه عايشين في مجتمع مريض
ليه العيب دايماً البنت 
واحنا مفيش عندنا تقاليد


فكرت مرة تقابل بنت 
تطلب منها تشد حجابها 
عشان جسمها باين
ولا انت عنيك كانت بتعاين ؟

والله حاجات بسيطة بتشد البنت
خوف – اهتمام – وسهر معاها ع النت
تفضلوا تتخانقوا طول اليوم
وف اخر الليل 
تصبحي على خير
وتشوفوا بعض في عز النوم

وانا قولتها ف قصيدة قديمة
الحب عمره ما كان فيه جرح
بس احنا مبنختارش صح
فاختاروا صح

سفيرة النكد ( البنت ) - عبدالله صبحي

Egyptian Poet  ✋ 
 28 Years 👑
Instagram: a_sobhi1
WhatsApp: 01066900356 ☝

سفيرة النكد ( البنت ) - عبدالله صبحي

✍ Ai Songs | AbdullahSobhi ✍