محتار كتير 
و نفسي أقطع شكي بيقيني 
حبيتك قد ما اتمنيت تحبيني
في الشتا كنت أحضنك
علشان تغطيني 
كنت لك فرش و غطا
علشان تدفيني
و قلعت هدمتي استرك 
علشان تضميني 
و لبست لاجلك مرمطة ..
و الآخرة كانت شعبطة 
مشيها ..
هات كاس ازاز مليان فراغ
و زيّنه .. حليه في عين الناس
و بيّنه .. الكاس هيتغير!
هيفضل برضو كاس 
و الناس هتفضل برضو ناس 
معاليك لوحدك اللي عملت
للكاس زينة و للناس قيمة
هِدمة قديمة .. عليك كات حلوة
براك راح تترمي في زبالة
الحاجة قيمتها في ربطتها
مش فكرة حلوة و بس خلاص
حلوة و مع مين؟
طب حلوة ازاي؟
طب مين قصقصها و لمعها
مين اللي اتجرأ و ابتاعها
مين اللي يغامر و يقرب
مين اللي يحاول و يجرب
مين دور علي شيء مش موجود
و عملّه وجود ..
مين حط لكل الناس دي حدود 
مين اللي ملالك أسلحتك طلقات و بارود
مين كان لك أرضك و حدودك 
جيشك و جنود
مين قطع لحمه عشان عينك 
مين باع تفاصيله عشان يرضيك
مين اللي ادالك مقلب فيك 
الواحد مهما بيتعلم و بيتكلم
تفضل فيه حتة ماهيش فاهمة 
ولا عارفة كلام 
مش عارفة تقولك ايه يعني 
ولا عارفة تقول أصلا ليه 
إن فارقك شيء غالي في مرة 
متلومش عليه ..
انت اللي عملته و بنيته و عملت له قيمة 
و انت اللي في ايدك دلوقتي تديه بقديمة
و انت اللي تعدي علي جراحك سكاكين تلمة
و القشرة بتاعتك لسه سليمة

كتابة و إلقاء: أدهم أمين
ميكس الموسيقي و تصميم الكڤر و ترابيزات بلياردو و بينج: بحر أفندينا
موسيقى: بحيرة البجع 

كاس إزاز | أدهم أمين

مجنون بيقول كلام موزون .. يقلب ميزان الكون

كاس إزاز | أدهم أمين

Adhm Amein