scientifiquement prouvé الغـراب يحـب ♡ {أما على ما يبدو ما يتحبش :) }


ما فهمتكش
حيرتني و ما نجمتكش
وين غبرت ما عوايدكش
توحّشتك, توحّشت حديثك و ضمارك الي ما يفارقكش
أما اسمع!! يمشيش في بالك نحبّك! لا راني ما نحبّكش
أما ما فهمتكش
 
و انا نحب نفهم كلّ شيّ
و ما نحبّ يخفى عليّ شيّ
و انت مالناس الّي تحكي كلّ شيّ
و ما تحكي حتّى شيّ
و غموضك الواضح يعذّبني عذاب الحيّ
 
انت ما تضوّيش
على أمورك ما تحكيش
المخبّي ما تورّيش
و عمخرك ما تهبّط فريش
 
و هذا الّي علّقني بيك
خلّاني نخمّم فيك
و نكتب عليك
على خاطر كي نتوحّشك ما نجّمش نجيك
 
اما انتِ تجيني
عمرك ما وحدي تخلّيني
ديما تجيني
و في همومي تنسّيني
ترسم الضّحكة على خدّي و تمسع الدّمعة من عيني
منّك عطشانة انا.. و انت مالشّهوة تسقيني
منّك جيعانة انا.. و انت مالحبّ ما تعطيني
و ديما تجيني
 
تجيني و عيني ما تشوفك
و وذني ما تسمع صوتك
و بدني ما يحسّ بوجودك
ديما تجيني
 
تجيني و ما نشمّ ريحتك البنينة
و ما تلمسني يدّك الحنينة
و لا نتهندملك و لا نعملّك زينة
على خاطر
تجيني في الخيال
انت وهم هبال
حقيقتك فال
ما تخطر على بال
 
إيجا.. أمان إيجا و يزّينا ماللّعب
إيجا نحكيو على هموم الشّعب
إيجا اتّكّى في شوني و نحكيو عالبلاد
و علّي عامل معاها الدّوني و هاززها للواد
إيجا العبلي بشعري و احكيلي عالثّورة و النّظام
و نتناقشو في السياسة و نتفرّجو عالأفلام
 
و إيجا
 
إيجا نشطحوا راقدين
و نتمايلو عالفرش زاهيين
و موش كان يدينا متشابكين
و توشوشلي كليمتين
بيهم نجنّح و نطير يسار و يمين
و نحفظ فيك و تحفظ فيّ كلّ شبرين
و نعبّيو البيت فلّ و ياسمين
و احنا ساهرين
من خمرة الغرام  شاربين
و نباتو مصبّحين
 
و تدخل الشّمس مالشّباك
و نغير منها كي تجي بحذاك
و كي ترسم على بدنك نورها و نوّارها
نتّرما عليها و نقطعلها ادبارها
 
و نسكّر الشباك نخاف لا تقوم
و نعشق هواك مواتيك حتّى النّوم
 
و نحسبك وليدي
نبنّن عليك بيدي
و نحسبك محبوبي
نبوس جبينك العروبي
 
و كيف تصحى و تفيق
نعرفك توّ تمشي و ما تحبّ هالرّيق
أما إيجا بركَ شيّ ما يصير
إيجا نفرشلك زربيّة حرير
 
إيجا و ما يهمّكش
إيجا راني ما فهمتكش
 حيرتني و ما نجمتكش
وين غبرت ما عوايدكش
توحّشتك, توحّشت حديثك و ضمارك الي ما يفارقكش
أما اسمع!! يمشيش في بالك نحبّك! لا راني ما نحبّكش
 
 
05:19
28/05/2014

إيجا.. أما راني ما نحبّكش

يرجع الفرططو للنار إلي حرقتو 
ويرجع القلب موجوع مالوجيعة إلي غاضتو 
ويرجع لمنام للعين إلي ما شافتو 
ويرجع النفس للنفوس إلي ما حستو
ويرجع الوقت يقيد وما يخبي 
ويرجع البخت يمني وما يعبي
وترجع اللحظة مابين البينين 
ما بين غزرة وغمزتين
ما بين الليل والفجر لحزين
وترجع الرعشة على راحة لكفوف 
وترجع الرعبة من غدوة والعرقة مالخوف 
ويرجع لكلام مخلوض مفتفت طروف
ويرجع الصبر للوقت إلي نساه 
وترجع الرعشة في الجاش ما تخطاه 
ويرجع السكات لليل إلي ستناه 
ويرجع لكلام للأفام إلي تهواه 
ويرجع المسافر لحضن أماليه 
ويرجع الشاقي بعد ما حفات ساقيه 
ويرجع الباقي للي مستحقو ويستنى فيه 
ويرجع المشتاق لهدرة يحكيها وتحكي عليه 
ويرجع العاشق للصباح إلي يعرفو ويصبح عليه 
ويرجع خيالي مثمول بالفرحة إلي متوحمة عليه
ونرجعلك 
كيف ما يرجع غشير يفرفط لجواجي أمو 
كيف ما يرجع ممحون يتبسم وهو شايل همو 
كيف ما يرجع المجروح ينين يكفكف في دمو
ونرجعلك 
كيف ما ترجعني الثنايا عليك نلوج 
كيف المغبون من مكتوبو لمعوج 
كيف ما يرجع المشتاق لتبسيمة ملهوف متحوج
ونرجعلك 
كيف ما يرجعلك شاهد لعقل 
كيف ما يرجع عليك رزن لحمل 
كيف ما تطل عليك الشميسة كي بابك يتحل
ونرجعلك 
كيف ما يرجع فرخ صغير للبطاحي إلي فيها لعب 
كيف ما ترجع عليا عقاب تنهيدة وجايع التعب
ونرجعلك 
كيف ما أصلك يرجع عليك 
كيف الوحش يفكرني فيك 
ويخليني عايش ليك 
بش نرجعلك ونعاود نلاقيك 
ولا عاد نخليك ولا نسلم فيك
نرجعلك حتى وأنا نعرفك بش ترجع تقسى 
نرجعلك حتى وأنا نعرفك كيوفية ديما تنسى
نرجعلك حتى كي توجعني ونحلف ما نسامحك ونرجع ونحن عليك 
نرجعلك حتى كي في بالك تدفني وفي بالي منك بريت وماعاد تقتلني ونرجع وروحي في يديك 
نرجعلك ويزي مالتعب ودمار لكرب 
 ويزي ما قلبي عليك دوان وزاد غضب
ونرجعلك 
من بلوتي ومحبتي لسماك 
لترابك ونسايمك وهواك 
لفعايلك وهدايرك ووحش ملقاك 
ونرجعلك وفمي ساكت 
وقلبي مزروع فيك وفي جاشك نابت
لا عرفت نجافيك ومن بالي نحييك 
وننسى ومن خيالك نهرب ولبعيد نشب
ولا تعلمت كيفاش نكرهك وماعاد تتحب
#أما_راجعلك

ندور ونرجعلك

ما نسيتكش

قداش -
  صوت: يسر مشفر
نص: أمين ڨلّح

قداش لا عندك لا وعد ولا عندك كلمة 
وقداش منها الساق تعفس حافية عالجمرة 
وقداش مني نستنى فيك تحت حيط خايخ 
بارد سارد اكثر من جواجيك 
وقداش كرهتك ومزال عيني فيك 
وقداش عشقتك وهربت من مسة يديك 
وقداش اشتهيت نكذب عليك 
نسبلك عرق بلوتك لولاني الي سلسلني فيك 
وقداش منو الوقت الي قالو ينسي
والشكوى لسكات الليل وين بش ترصي 
وقداش الدمع نشح 
وقداش منها لغبينة والقلب لابس اكحل مافرح 
وقداش منو عمري وعرفو الي تهد 
وقداش ماحلاها الدنيا ومكش فيها 
تب اي نكذب ماو قالو الكذب ينجي والدنيا تربي الي نساها
قداش طويلة الدقيقة
وقداش باردة لمخدة 
وقداش من تصويرة في اللحظة تعمل بلعاني لا تتفسخ لا تتعدى 
ضيعت حسابي 
ونسيت ناسي وحبابي 
وغزرت بعين الشماتة لشبابي
ونسيت قداش عبيت من غزرتك عيون وجوابي 
ونسيت قداش كتبتلك "نحبك" بسكاتي الي تدفن في ترابي
قداش مانترباش ومانشعفش 
وقداش سكاتك مايرحمش
قداش من علاش 
وقداش منها عشقة ماتموتش وماتوفاش 
وقداش ماتكلش وماتعياش
وقداش ماعنديش كلمة ومانترباش

قداش - بقلم أمين ڨلّح- صوت يسر مشفر

همْسْ الليلْ
صوت و نص : سيرين السوسي



همْسْ الليلْ

بجاه اللي خلقك و خلقني

- و شيء- 
  اداء صوت :يسر مشفر
نص:  خديجه بكوش

و شيء- نص:  خديجه بكوش / اداء صوت :يسر مشفر

عيني في عينيك .. 
ما نجمش .. 
اخزرلي ..
ما تضحكش ..
حاول تقاوم 
التذبيلة ما تتصنعش ..
و مع التخميرة اسحرني و ما ترمشش
ما نجمش .. 
سيب علينا منهم و اخزرلي ...
احكيلي ..
منغير كلام سمعني اشكيلي 
عيني في عينيك .. 
و الدنيا نسينا ..
لا همنا الصيف و لا تعبتنا الليلة الطويلة..
و لا حسبنا بالوقت و لا حتى عيينا .. 
خزرة و ثملة محبة في طراف ايدينا .. 
رعشة مكنتنا م الراس حتى لساقينا. ..
قلي ..فسرلي علاش هكا حسينا ..
منغير ما تتكلم 
زيد اخزرلي و اش علينا .. 
من هداريهم تبرينا ..
من دنيتهم سايي تعدينا ..
عيني في عينيك حتى لضو طفا
بقات روحي معلقة فيك ..
غادي على طرف الماء..
هائمة بين هوا و فضا ..
زيد اخزرلي و اسكت..
من عينيك كلمة نحبك تنطق .. 
و القلب في هواك يرخف و يعزق .. ملي قعدنا .. 
اش خلاه تاعب صبح موجوع .. 
من خزرت العين و التذبيلة دايخ مخدوع..
لتوة في روحك عاشق.. 
.يلوم في الوقت الي غدرنا و فيسع خلانا و فارق 
.. عيني في عينيك ..
و الليلة حكاية ..
بين زوز خباو الهدرة..
و تلفو الجرة و نساو الحكاية .. 
المخاخ سارحة قدام القلوب الي بلمة فارحة ..
و بين الناس متغافلة ذارخة ..
عيني في عينك و قلي ..
علاش سكنتني كي ضلي .. 
علاش 
دخلتني دنيا اولها محبة و آخرها طريق طويل ما يوفاش .. 
اخزرلي 
ما نجمش
نحي الحشمة و على روحك ما تفلمش
نحبك..
و الوحش صعيب ما نطاوقش 
عيني في عينيك 
في لحظة الدنيا فارغة 
حكاياتهم قشور و هداريهم فانية .. 
اخطانا منهم ..
احكيلي .. 
عل القمرة في طراف الليل ..
على طيف النجمة المعلق عندو سنين ..
احكيلي عل البحر .. عل السفر 
على السما .. على كتبو ع العشق و الهوى 
احكيلي على لبنان على تراكن الدنيا على حكايات ه الزمان .. 
عيني في عينك 
و كيما قال سلمان .. عيناك ليالي صيفية

عيني في عينك .. <3

مني و منك ثنين متراضين متباغضين 
مني و منك بحر ماه صافي و غريقو مر 
بيني و بينك سفر ، 
ما يهزنا لبعضنا كان الساقين 
في خاطري ممدودة ، 
نقرالك في الكف ، ظهرك ترخف و حملك خف 
لابستني كي رداك نحس في دفاك محلاك 
عاد قتلك نقرالك في الكف ،
كف يديك الحمرا المكنوزه ، و الشفة عليها الروح مركوزه 
نطلع نطلع نطلع 
لحمك قام شوك ، تخاف لا يشوفوك ، مسوك ؟ 
والا قرايتي ليك خرجتك قلمْ ،
لفيتني بكف و قتلي يزي عف تلمْ
انا كتيبه تبدا و ما توفاش ، ما تقراهاش ، 
قلي علاش ما نمسكش ؟
علاش العين تشوف و القلب ميت بالخوف ،
أبيض صافي حليب ، أنا لقلبك حبيب 
قلي علاش ما نحبكش ؟
شفت في عينيك خزرة و سمعت من صوتك نبرة 
ما نعرفهاش 
جديدة عليا أول مرة نمسها أول مرة نحسها 
كي حطيت يدي و مسيت لحمك و ثبتْ في عروقك السايل فيها الدم 
مانيش باش نتلم 
باش نزيد نبوسك و باش نزيد نحبك باش نزيد نهبل بيك و معاك 
هات كفك لاخر نقراه 
هات خلي نكشف المستور 
و الا تخاف لا بدنك عليا يثور

Musique : Eternity And A Day - Eleni Karaindrou

تَفَاصِيلْ - Details

نحب نرجع مللول
خدي أحمر و ماعنديش ظوافر 
شعري أرطب و يديا صغار ما يشدوش لكورة 
نرجع لركايب المزلوعة مالطياح و اللعب في البطحة مع الذكورة 
نحب نرجع للصفحة البيضاء الي كانت في مخي
الي فيسع تتفسخ منها طريحة أمي 
و نبزة بابا 
و يتفسخ منها أول نحبك و أول محلاك
أول حل شعرك
و البس روبة ، تي هات بوسه شبيك مزروبة 
نرجع للنسخة لولة 
تحت لمطر مبلولة ، 
جابلي سحابة تغطيني ، قتلو يعيشك خلي لمطر ترويني 
نروح على سقاي و نغني الحيا حلوة بس نفهمها 
و يا ريتني ما فهمتك 
حبارك ما يتفسخش كي الوشام 
أكحل مدرغم ظلام 
كل حرف باش يعيش معايا و يموت فيا 
كل بوسة طبعتها فيا 
كل حلم دفنتو في جواجيا 
كل غنايا دندناها 
و كل ثنية بدلناها 
و قطعة نحيناها 
كل عركة و كل كلمة دونية 
و كل ما ترضيني و تقلي لا ينحيك عليا 
عبيتها تصاور و زرزقتها بدموعي 
حرقتها لهبتها بشموعي و نار كي تمسها تحرق لحمي من داخل و
تخلي أمارة 
لا لعمر يحب يرجع و لا الصفحة تحب تنضاف 
و لا حب لحمي يبرا و الحمل يخفاف 
لحيوط ضياقت و ما نجمش ندور راسي و نشوف ورايا 
و كان درت و شفت 
باش نشوف تصويرتي ... في مرايا *
ياسمين الماجري
Music : Gladiator - Now We Are Free (Piano Version)

همْسْ الليلْ

Cyrine Ben Othmen Soussi

Recent comments

Last Lord

Last Lord

Related tracks