sound by HM 
chant :lily
guitar: walid mokrani 

Ya Belarej

و انت تسمع في الموزيكة، اتخيل،
عالبحر قاعدة تتفرج و الليل مليل، 
اسرح بخيالك مع كل نسمة، و مع كل هبة ريح، 
شعرك طاير و طيرك معاه، 
و انت طايرة طيشت كل شي تحب تنساه، 
و عشت لحضة مع روحك و قعدت معاها، 
روحك اللي كي تغلط تلومها ،
و تفكرها في مشومها، 
الي تلونها على خاطرهم و قريب تنسى لونها، 
انت الي عمرك ما تسامح الخاين و انت ديما تخونها، 
اما توا هاك قاعدة مع روحك و لروحك ترضي فاها، 
تحكي معاها، 
و بقطرات البحر الباردين تغسل في ذنوبك معاها، 
زعما تغفرلك، 
نفسك عزيزة اما اكيد تغفرلك، 
متوحشتك عندها برشا من آخر مرة شافتك، 
ياسر توحشتها و تحب تعنقها، 
و تقلها في وذنها نحب نعنقني، 
الدنيا باردة و انا وحدي مانيش خايفة، 
اما باش نقلك انا خايفة، باش انت تفهم وحدك و عنقني، 
وانت اكاكا يدين تعنقك،
انا الي عنقتك و الي سمعتك، 
سمعتك تناديلي كي شفت عينيك تاعبين، 
قداش بكات و قداش مبكاتش، 
قداش تغمضت و قداش من مرة شافت، 
تاعبة عينيك ناداتلي و قتلي اجريلي، 
ايجا شوف في في سواد عيني طول ليلي، 
ضلامو الموحش، عندك برشا عايشتو وحدك، 
سمعتك و كي سمعتك حطيت الموزيكا و سمعتك، 
خليتك تسرح و تتخيل سيناريوات، 
و عيشتك حكاية من الحكايات، 
و عنقتك، 
بكلامي عنقتك و في سكاتي بستك، 
من خدك البارد و مبلول بهواء البحر، 
بستك، ولبستك، 
موش انت تحب شكون يخطفك بتعنيقة، 
و يحسسك الي سما لا ارض، لا و طول و لا عرض ينجمو يرفعوك، 
و على غفلة و انت سارحة يسرق بوسة، 
خفيفة تدغدغ و ساعات مرصوصة، 
و يقلك سامحني كان زربت، 
شفت شفايفك بردو من قطرات البحر، 
ياخي قلت نشبربهم انا و نذوق المر، 
ياخي نلقى الملح بنين و احلى من العسل، 
و تو باش نقعد نعس و نذوق كل ما تعاود تتبل، 
نعرفك ماتحبش اللي يسرق من غير مبرر و هاني لقيتلك الحل، 
كل حاجة خايبة نزينوها بحروف و كلمات و جمل، 
تعجبك فكرتي و تضحك و تحشم و تسكتني،
نسكت خاطر عينيك لمعت و غمزتني، 
و انا فهمتها،
 و في سكات حكيت معاها و كلمتها، 
نسمعو في الموزيكة، انا و انت،
و بالموزيكة سافرت بيك،
شبيك لبيك  خيالي بين يديك، 
الي تطلب تلقى، 
كل مرة باش تتفرج معايا في حلقة، 
و الليلة حلقة في مدينة جميلة، 
مدينة  قديمة، كل شي فاها عندو قيمة،
و بجنب المدينة غابة كبيرة و بعد الغابة بحر، 
و انت قاعدة عالبحر اذاكا و انا معاك، 
نتفرجو في القمرة كي الذيوبة، 
و القمرة تتفرج فينا، 
القمرة تحب الذيب،
خاطر مايخونش،
ماكش ذيب كان ما تصونش،
القمرة من غير ما تجهرنا و من غير ما تحيرنا، 
نورها نورنا،
طيرنا،
كبرنا و صغرنا،
و من عالم خايب و حررنا، 
و فجأة نكتشف لي انا ماعادش يكفيني قطرات البحر، 
ماعادش يكفي حتى تحت المطر، 
جريت انت للبحر تحب تررمي روحك و تبل بدنك، 
في البحر البدن حر،
و بدنك تاعب و شاحب، 
جريت جريت و بين امواج البحر عريانة و في احضانو ترميت،
سيبت بدنك و اتكيت، 
و انا نتفرج فيك، 
بعد ما تكمل مع روحك و نجيك،
نقرب منك و بدني يتعرف على بدنك،
و نحبو بعضنا،
و انا نحب فيك نسافر بيك 
و انت تسمع و في صوتي الي خلقو كلامي،
نخليك مسافرة في بحر خيالي و احلامي...

اتخيل © البورجوازي الفقير

ما نسيتكش

عمرو السكات مانطق حاجة ماتسواش
وعمرو الليل ماغطى تنهيدة ماحسهاش 
وعمرو البرد مايطفي روح القلب ماعشقهاش 
وعمرها الضحكة ماتغدر وتيتم الجاش 
----------------------------------------
وحدو لكلام يتحس ومايتقراش 
وعمرها المحبة ما وعدت الي ماوفاش
وعمرها الدمعة ماتروي المذبوح
و عمرها ماداوات والجاش مجروح 
و عمرو النبض ماهز غير للي سكنو الروح
و لا عمرو وقف ولا نساهم ... ولا نسى الكاس المكسور
ولا بعدهم و لاغربتهم .. و لافراشهم المهجور
--------------------------------------------------
وعمرو الظلام ماسكت شمس ماتطفاش 
وعمرو البعد ماقتل محبة حبوها ماتضناش 
وعمرو عمري ما تكتب بحروف مش ليك 
وعمرو قلبي ماحكى في منامو كان عليك 
وعمرها التنهيدة ماتدوم 
وعمرو الوجع ماكان بلا لوم 
وعمرو لبحر الي في عينيك ماطلع يعوم 
----------------------------------------
اش عليك في كلامي وسلامي وهزاني ونفضاني 
سيب عليك من تخلويضي والبسني وماتخطاني 
 لسانك وحدو الي حكاني ومانساني
----------------------------------------
لساني ساكت ..ورزين.. وخايف متكتم عالكلام
قلبي ينادي .. ويناجي.. ويفركس فيك عالاحلام
نلبسك و تلبسني
نملاك و تملاني ..وتهزني للطريق إلي هواني
تعنقني..و تسرقني.. و تلمني و ترصني في تركينة ما تسيبني
تكتبني بكلامك وكلامي.. الي تكتبو في سرنا بلا ما جهرنا
تكتبو قبلنا بلا ماحكينا ولا تلاقينا
خليني عندك ومانخطاك
ولا نسلم في الخيط الي يربطني بصرة هواك
----------------------------------------------
مانحلف كان بعينيك وحر جواجيك 
وما نفهم كان غزرتك الي تفكني منهم ونرجع نجيك 
ونحيا معاك 
تحت غيمتين من حر سماك 
وفرد منام كي نربش نلقاك 
وعمري لا نسيبك ولا نخطاك 
ومانستحقش نقلك ونحكيلك
ولا وجعي يبكي بش يشكيلك 
 ولا روحي تزهى كي تغنيلك
وكيفاش تحبو يسوى السكات وهو عليك ماحكاش 
وكيفاش تحبو الليل يسترك مني كي شفري غيرك ماراش 
وكيفاش آه وتنهيدة 
وكيفاش ماتتحرقش لكبيدة 
وكيفاش عشقة قديمة جديدة 
ماتتحكاش 
ماتطفاش 
 ماتستناش
تلب 
تحب 
تتحب 
تتاكل 
تتشرب 
تتعاش 
تعذب 
تتسب 
تشيخ 
 وترجع تتحب
صرتي مزالت مربوطة في سراك 
وقلبي حالف مايدق كان حذاك
-----------------------------------------
وعلاش تحلف وانتي عمرك ما تخلف 
وعلاش تشكي وعينيك هي إلي تحكي 
وعلاش تقول علاش 
 وأنا غارقة فانية فلي عمرو ما يتعاش
خليك بيني وبين روحي .. ساكن خطوطي 
وهايم سارح في بحر شطوطي
خليك بين الشهوة والتعنيقة
خليك ريحة عايشة فيا 
ناسية الدنيا والناس و إلي حواليا 
خلينا ساكتين .. ساكنين 
ناعسين بين حلمة وعشقة عقاب الليالي 
وشهوة على غفلة في الفجاري 
خلينا فيها
خليها نايمة
ناسية
ساهية ما تصحى 
تتكسل وترجع تهزها الثملة 
لا تفيق ولا تفرق لعشية مالصبحة
خلينا في التعنيقة
والأمارة 
ولڨمارة 
إلي جات بين بوسة الخال
وشهوة تفاحة الأدغال 
--------------------------
وخلينا في سكرة 
بلاش صحوة 
وعمارة 
ولحظة عشقة غدارة 
تتشهى تبدل لحوال 
وتقعد عشقة مشتهية 
على زنود الوقت مرمية
ماتتكالش بالمال 
 ولا بدعيوة خير حلال

هكا شقال السكات 
 وشحكمت لحوال

سكاتك وسكاتي سماوه غرام يرعش مرة في الفال 
 يلب ومايتقال
.... ومزال يسال

[Amine.G] & Myriam Bribri

سكاتنا شقال ؟ (Amine.G & مريم بريبري)

Subscribe and share 💚
Written and performed by: Mehdy Khmili
Follow on Instagram: @mehdykhmili 
Facebook: Mehdy Khmili البورجوازي الفقير

❀Khayba❣خايبة✿ Mehdy Khmili ❁Official Audio❁

- و شيء- 
  اداء صوت :يسر مشفر
نص:  خديجه بكوش

و شيء- نص:  خديجه بكوش / اداء صوت :يسر مشفر

صندوق

عيني في عينيك .. 
ما نجمش .. 
اخزرلي ..
ما تضحكش ..
حاول تقاوم 
التذبيلة ما تتصنعش ..
و مع التخميرة اسحرني و ما ترمشش
ما نجمش .. 
سيب علينا منهم و اخزرلي ...
احكيلي ..
منغير كلام سمعني اشكيلي 
عيني في عينيك .. 
و الدنيا نسينا ..
لا همنا الصيف و لا تعبتنا الليلة الطويلة..
و لا حسبنا بالوقت و لا حتى عيينا .. 
خزرة و ثملة محبة في طراف ايدينا .. 
رعشة مكنتنا م الراس حتى لساقينا. ..
قلي ..فسرلي علاش هكا حسينا ..
منغير ما تتكلم 
زيد اخزرلي و اش علينا .. 
من هداريهم تبرينا ..
من دنيتهم سايي تعدينا ..
عيني في عينيك حتى لضو طفا
بقات روحي معلقة فيك ..
غادي على طرف الماء..
هائمة بين هوا و فضا ..
زيد اخزرلي و اسكت..
من عينيك كلمة نحبك تنطق .. 
و القلب في هواك يرخف و يعزق .. ملي قعدنا .. 
اش خلاه تاعب صبح موجوع .. 
من خزرت العين و التذبيلة دايخ مخدوع..
لتوة في روحك عاشق.. 
.يلوم في الوقت الي غدرنا و فيسع خلانا و فارق 
.. عيني في عينيك ..
و الليلة حكاية ..
بين زوز خباو الهدرة..
و تلفو الجرة و نساو الحكاية .. 
المخاخ سارحة قدام القلوب الي بلمة فارحة ..
و بين الناس متغافلة ذارخة ..
عيني في عينك و قلي ..
علاش سكنتني كي ضلي .. 
علاش 
دخلتني دنيا اولها محبة و آخرها طريق طويل ما يوفاش .. 
اخزرلي 
ما نجمش
نحي الحشمة و على روحك ما تفلمش
نحبك..
و الوحش صعيب ما نطاوقش 
عيني في عينيك 
في لحظة الدنيا فارغة 
حكاياتهم قشور و هداريهم فانية .. 
اخطانا منهم ..
احكيلي .. 
عل القمرة في طراف الليل ..
على طيف النجمة المعلق عندو سنين ..
احكيلي عل البحر .. عل السفر 
على السما .. على كتبو ع العشق و الهوى 
احكيلي على لبنان على تراكن الدنيا على حكايات ه الزمان .. 
عيني في عينك 
و كيما قال سلمان .. عيناك ليالي صيفية

عيني في عينك .. <3

مني و منك ثنين متراضين متباغضين 
مني و منك بحر ماه صافي و غريقو مر 
بيني و بينك سفر ، 
ما يهزنا لبعضنا كان الساقين 
في خاطري ممدودة ، 
نقرالك في الكف ، ظهرك ترخف و حملك خف 
لابستني كي رداك نحس في دفاك محلاك 
عاد قتلك نقرالك في الكف ،
كف يديك الحمرا المكنوزه ، و الشفة عليها الروح مركوزه 
نطلع نطلع نطلع 
لحمك قام شوك ، تخاف لا يشوفوك ، مسوك ؟ 
والا قرايتي ليك خرجتك قلمْ ،
لفيتني بكف و قتلي يزي عف تلمْ
انا كتيبه تبدا و ما توفاش ، ما تقراهاش ، 
قلي علاش ما نمسكش ؟
علاش العين تشوف و القلب ميت بالخوف ،
أبيض صافي حليب ، أنا لقلبك حبيب 
قلي علاش ما نحبكش ؟
شفت في عينيك خزرة و سمعت من صوتك نبرة 
ما نعرفهاش 
جديدة عليا أول مرة نمسها أول مرة نحسها 
كي حطيت يدي و مسيت لحمك و ثبتْ في عروقك السايل فيها الدم 
مانيش باش نتلم 
باش نزيد نبوسك و باش نزيد نحبك باش نزيد نهبل بيك و معاك 
هات كفك لاخر نقراه 
هات خلي نكشف المستور 
و الا تخاف لا بدنك عليا يثور

Musique : Eternity And A Day - Eleni Karaindrou

تَفَاصِيلْ - Details

نحب نرجع مللول
خدي أحمر و ماعنديش ظوافر 
شعري أرطب و يديا صغار ما يشدوش لكورة 
نرجع لركايب المزلوعة مالطياح و اللعب في البطحة مع الذكورة 
نحب نرجع للصفحة البيضاء الي كانت في مخي
الي فيسع تتفسخ منها طريحة أمي 
و نبزة بابا 
و يتفسخ منها أول نحبك و أول محلاك
أول حل شعرك
و البس روبة ، تي هات بوسه شبيك مزروبة 
نرجع للنسخة لولة 
تحت لمطر مبلولة ، 
جابلي سحابة تغطيني ، قتلو يعيشك خلي لمطر ترويني 
نروح على سقاي و نغني الحيا حلوة بس نفهمها 
و يا ريتني ما فهمتك 
حبارك ما يتفسخش كي الوشام 
أكحل مدرغم ظلام 
كل حرف باش يعيش معايا و يموت فيا 
كل بوسة طبعتها فيا 
كل حلم دفنتو في جواجيا 
كل غنايا دندناها 
و كل ثنية بدلناها 
و قطعة نحيناها 
كل عركة و كل كلمة دونية 
و كل ما ترضيني و تقلي لا ينحيك عليا 
عبيتها تصاور و زرزقتها بدموعي 
حرقتها لهبتها بشموعي و نار كي تمسها تحرق لحمي من داخل و
تخلي أمارة 
لا لعمر يحب يرجع و لا الصفحة تحب تنضاف 
و لا حب لحمي يبرا و الحمل يخفاف 
لحيوط ضياقت و ما نجمش ندور راسي و نشوف ورايا 
و كان درت و شفت 
باش نشوف تصويرتي ... في مرايا *
ياسمين الماجري
Music : Gladiator - Now We Are Free (Piano Version)

Miroir

هكّا يا قلبي
تخلّيني نحب
وتعلّمني الي ورا كل روح صافية
فما عزقة تحكي حتّى وهي غافية

يصيح سكاتها
وماتتحكاش حكاياتها
حتى كي تتكوى وتزيد تتعطب

وهكّا ... تحبنا ننطقوا
بش نقولوا... ونقعدو نعاودوها :
ايه .... مزلنا عايشين
بش نضحكوا ونحكيوا
وحلفنا معادش بش نبكيوا
وديما شادين في بعضنا
بش نحبّنا كي نزيدو نعشقو تبسيمة حيّة
تبسيمة تفرفط في الجواجي
وتجي على غرادة
وتبهنيسة تحكي علينا
حتّى ببلادة

تي هذيكا هي صنيعتنا
كيف ماكانت ديما العادة

هكّا يا قلبي
سرّيتك على سرّي
وفضحتهم انت عينيّا
وعرّيتهم وحدك شهاويّا

خاطر وحدك الي تفيق بيّا
حتى كي نقلّك اخطاني راك بليّة

وقد ما ترعش عليّا وتسترني
نلقاك زادة تفضح فيّا

أما انا مزلت نحب نحب
ونحبّك معايا تقعد تتلب
خاطرك بدقّاتك
رشقت فيّا
العشقة واسرارها
وزرعت جاشي
بالحشمة وخنّارها
وعلّمتني الغيرة وعزارها

هكّا يا قلبي
بعد هذا الكل
تخلّيها بيّا

وقت الروح
لقات وين تتنفّس لهوا
ولقات كاس منّو
تترشّف غرام وتتروى
ولقات شكون سقاها
وشكون غطّاها
وخذا منها خزرة حشّامة
وقوّة في الشدّة عطاها

هكّا يا قلبي
وقت الي لازمك تدق دقّة
دقّيت مرتين
وفضحتني بلمعة عالشفرين :
لمعة لا تتشرى ولا تتباع
لا تتعطى لا تتفك
ولا تتكال بالغرام
ولا حتى بالصاع

تي هكّا يا قلبي
تفكني من دنيتهم
وتدّيني لدنيا احلى
وتسلطنّي بغناية تشبهلي
وماتشبهش لحكايتهم

وهكّا ماتقلّيش ؟
ماتورّينيش ؟... وماتوصّينيش ؟

قدّاش مزالت طويلة الثنية
وقدّاش منها النيّة
وقدّاش بش نقعد نتكّى عليك
ونقيّدها على منامة مشتهيّة
وموش مالعدم مكريّة

هكّا يا قلبي
كي نشدتك خلّيتني وما لبّيتني
وزدت دزّيتني
ولحضن الدنيا رميتني
وقتلي برّه فارع
فك ليك وخوذ بايك

وأقعد أسمعني وكلّمني
وعمرك ماتخلّيه ينشح حبارك

تي هكّا يا قلبي
ماتقلّيش وماتسرليش
الي العيشة فيها
ديما كيّة ووجيعة

كيف مافيها انت وانا
ستانسنا نزهاو
ولسابع سماء نطيروا
ونخليو شيختنا احلى صنيعة

وفما انا نمّن بيك
يلعن مذهبك
قبل السنّة والشيعة

هكّا يا قلبي
تغدرني
وتخبّي عليّا
وتقلي برّة جرّب وحدك

واصبر ميسالش ...
وتعلّم من غير علاش
وتفكّر ديما وماتنساش :

الي جاية الراحة بعد التعب
وحتى كي تفركس وما تلقاش
ماتسلّمش ! وارجع فركس ...
لازمك تتليّع بش تفهم وتتفهم
وانا راني مانحيركش من عدم

ولازم توة تلقى فيّا فيّة
وهذيكا هي لهديّة
وممكن هذيكا هي الديّة

هكّا يا قلبي
تزرع فيّا نوار عشيّة
وتوصّيني نبكي
كي نرخ بش نرتاح
ونحسب كسوحيتك
ديما في حضني طريّة

تي الحسبة ما تقابلش :
انت مزلت شادد صحيح
تضربني وتضرب عليّا
وتجافيني وماتحملش فيّا
وديما تقلّي ديما هذيكا هيّ

هكّا يا قلبي
ساعات تقوّيني وتعّلمني
وتقرّيني والطريق تورّيني
وساعات تعاندني وتوصّيني :

وتقلّي مزالت تستنّى فيك
ولازم بش تلقاها
الي بش تخطفك بغزرتها
وفي اسمك بش تنسّيك
وتلهّيك حتى عليّا

تو وقتها نرجع نفكّرك ونقلّك :

ايه ... هكّا يا قلبك الي دق ووصّاك :

ماتمسحش ندوة سقات عروش لحبق
وماتنساش الي ديما عندي عليك حق
حتى في كمشة حروف تفرتهم عالورق

وهكّاكا قلبك
اش بغى
وهاكي روحك كي تحب
كيفاش تتبلى
وهاكا جاشك الي اشتهى
كيفاش يتعمى
ولا تشيلو لا أرض ولا وطا

وهكّاكا ... لازمك تحب
وماتسألنيش كيفاش
يصبح شبعان وهو عالخواء

هكّاكا القلب فاش يتلهى
هكّاكا هو ...
ما يعشق كان كي نوا
ومزال ما صحى ...

وهكّا يا قلبي
قد ماتفرغ
ديما بالمعزّة تقعد معبّي
وانا في وسطك متخبّي
نشهدلك ونشهد بيك
ويشهد علينا ربّي

[Amine.G]
-------------------------------------
نص وإلقاء : أمين ڨلّح
موسيقى وعزف : Rami Ourabi

تَفَاصِيلْ - Details

Yasmeen Mejri

Recent comments

imi

Related tracks