قصايد حاف

Visuals by Mhd Saudi 
Sound by Liev 

Out on all streaming services on September 9, 2023

:النص 

علّيتني 
ليتني بقطع حبل الوريد 
ليتك ما إجيتني 
بر الوالدين مش دين علي
بدّك ياني أبرّك على طريقتك وبنفس الوقت 
بدّك ياني أوقف عرجليّ 
بس باقي تقول لي: الجنة تحت أقدام الأباء 
ييي لا بس ممكن صدري يبيّن
ما أنت تبع العار والعرض 
تبع الحجاب والفرض 
مش طلقت أمّي عشانها رفضت تتحجب 
وحجبت أختي بالغصب 
وبتفتخر إنّك بزمناتك كنت نسونجي 
لك ياه نيّالك 
ما أنت علّمتنا بأحسن جامعات عشان نواجه الرجال اللي أمثالك 
الموضوع يابا عالوجع 
مش بس لوم 
ما أنا بفكّر فيك كثير 
خصوصاً قبل النوم 

قلت لي بدّك ولد 
تلعب كرة معاه وتروح معاه عالمسجد 
كان عمري ٩ وبلعب كرة وبصلّي 
حسّيت حالي ما بكفّي 
رجعت عالبيت وبكيت وصلّيت 
وطلبت من الله اللي كنت أشوفه رجّال  
يجاوبني على السؤال اللي لليوم بدور في راسي 
كيف أحب بابا لو لسة بخاف منّه؟ 
بالزبط زي سؤال 
كيف أحّب الله لو خايفة من ناره؟ 
وكيف أفهم الحب بدون أقطاب 
وبدّون حطّاب حامل قضيب 
غصن مقطوع وغصة 
وغضب عمره سنين 
مش رح أوئده اليوم 
ورح أوعده نلاقي طريق فيو تأنيث 
وفيو بحر وآلهات صدورهن حنونة
وفيو ذكر ما بيعبد نصوص ولا فلوس وما بيعبد 
فالوس بحدّه 
بدنا نتعلّم نحب من أوّل وجديد 
النهر لولا ضفافه ما بفيض 
يابا

يابا

Visuals by Mhd Saudi 
Sound by Liev 

Out on all streaming services on September 9, 2023

:النص

مش رح تفرحي فيّ حتى لو اسمي فرح
و يمكن تحزني كل ما هل الموضوع ينطرح
بس بوعدك راحة بال لأنّه
مش رح يكون عندنا نسايب نتخانق معاهم
و لا مهر و لا مقدم و لا مأخر نركض وراهم

و لا حماة و لا حمو
تجمعّوا و تلاحموا

الزفّة الليلة عحسابي مع أصحابي
و أحبابي
و رح تلاقوا بين إيديكم كتاب شعر أو نثر
لمّا أكتب كتابي
بفضّل دار النشر على دار نشر العرض
و بفضّل إنّه الحب يكون سنة مش فرض
و بفضّل أضل بعيدة عن العزايم و النميمة
حكي حكي حكي كتير أصلا كله بلا قيمة

ما تخافي عليّ من الوحدة
ما الحبايب كثار
و ليش أخلّف لو الأيتام ماليين الدار
و بعدين ...الأمومة مش لكل حدا
في أمهات عندها رحم بس ما عندها رحمة
و الأمومة موهبة زي الموسيقى و الشعر

عشان هيك

مش رح أتزوج و مش رح أجيب ولاد
و مش رح أطلّق و نفس القصص تنعاد

مش رح

Visuals by Mhd Saudi 
Sound by Liev 

Out on all streaming services on September 9, 2023:النص

قلبك بَلَدْ آمن ودافي وفيو طيور وشجر
قلبك بلد ما فيو حدود وما فيو قيود وعسكر
في قلبك في طريق صغير بياخدني عالبيت
في قلبك في شجر زيتون وورق عنب عالحيط
في قلبك في دُكانّة صغيرة و عمّو ختيار
في قلبك في سيرڤيس وأتوبيس بياخدوني عالدار
قلبك بلد آمن ودافي
قلبك نهره ونبعه صافي
قلبك مافيو نهب ولا نصب
ولاحرقة
قلبك كل جذوره متفرعة
مافيو سجون ولا ديون
قلبك بلد بصون
وكل سكّانه بخير
قلبك بلد آمن علمني أحب الغير

في قلبك عشقت نفسي وعرفت أرقص عالنبض
في قلبك عرفت أغنّي وأصلّي وحتّى أشم الورد

في قلبك عرفت أغسل ثوبي
في قلبك عرفت أجالس عيوبي
في قلبك قلت لا للظالم حتّى لو كان أنا
في قلبك لقيت مكان في النُّص،
ما بين هناك وهنا

قلبك بَلَدْ آمن ودافي وفيو طيور وشجر
قلبك بلد ما فيو حدود وما فيو قيود وعسكر
في قلبك في طريق صغير بياخدني عالبيت
في قلبك في شجر زيتون وورق عنب عالحيط
في قلبك في دُكانّة صغيرة و عمّو ختيار
في قلبك في سيرڤيس وأتوبيس بياخدوني عالدار

بلد

Visuals by Mhd Saudi 
Sound by Liev 

Out on all streaming services on September 9, 2023

:النص

من شو خايفة يا أمي؟
من شقاي و همي؟ 
خايفة أطلع مثلك حالمة، مسالمة
عاشقة للجمال و لغيره مش مهتمة؟ 
خايفة الحياة تكسرني؟ 
و أنت اللي من الكسر جبرتي جبر 
و أنت اللي من القهر 
عمرتي بيوت و مشيتي على دروب الصبر. 
من شو خايفة يا أمي؟ 
خلي الموج ينحت الصخر
خلي الليل يعلمني فن السهر
و لا لشو اسمك سحر؟  

فدعيني أنتظر 
دعي الليل ينسدل 
دعي الأرق يعذب أبيات ورثتها من عيني  
السحر 
دعيني ألبي نداء السماء 
دعيني أغسل الألم بالمطر 
فلن يزول الصداع إلا قبيل
 انصداع الفجر 

من شو خايفة يا أمي؟
ما جبتيني لتخافي 
و ما جبتيني لأحمل مخاوف جيلك عكتافي
إذا علموكي بإنه الفن هباء 
أنا اتعلمت إني ما أتبع ما وجدت عليه الأباء
إذا قالولك إنه الفن ما بطعمي خبز  
أنا بقولك لا تخافي
فأملي بالسما كبير
و حبي للفن كافي 
أنه يخلي مهنتي تكون محنتي
و يكون مصدر رزقي هو اعتكافي 
و عفافي عن شر الدنيا
فالمصاري مش مساري 
بس الرزقة بتيجي يا أمي 
ما دام الجهد موجود
 و ما دام القلب دافي

من شو خايفة يا إمي؟ 
من شقاي و همي؟ 
خليني أطلع متلك حالمة، مسالمة 
عاشقة للجمال و لغيره مش مهتمة

سَحَر

Visuals by Mhd Saudi 
Sound by Liev 

Out on all streaming services on September 9, 2023

:النص

أنا ظنّي فينا خير
وحلمي بطيء زي العسل
كبير زي السما في جناح الطير
أزرق وحنون، بطير على مهل

مش خايفة يخيب ظنّي
مَنا بنيت عالم من حسن الظن
بنيت جواي أماكن بتشبهني
ألوان وكلمات وموسيقى وفن

وقلبي كل ما يغّص بذكّرني وريدُه
إنّه رغم الغصّة بيحملُّه الدم
وهو بضخُّه لجسمي ويعيده
عشان هيك صرت أبتسم في وجه الهم

ولقيت أبعاد جديدة في الشعر والعِلم
خلّتني أشوف في اللحظة الكون كلّه
فناء جميل رح ياكل الظالم والظلم
فلو جواك حلم، ياريتك إتمسّه

بخاف أكيد أواجه الغول
بس اكتشفت إنّي بخاف أكثر من الخوف نفسه
بقولوا إنه الغول وهم من صنع المعقول
فكيف نلاقي الخير دون ما نلاقي عكسه؟

وكيف نهدم صروح انبنت في الهوا؟
لو أوهام البشر صرنا انسميها طموح
ولو وصرنا انسمّي المرض دوا
وصرنا انسمّي الجسم روح

فأنا اكتفيت بالحلم والأمل
ويقيني بيشبه اجتهاد الطير
أزرق وحنون، بطير على مهل
عشان هيك ظنّي فينا دايمًا خير

مادام الجسم بذوب في الأرض
ومادام الموت بيشمل النجمة والورد
رح نضل نلاقي خيط نمشي عليه
عالسكيت منمشي عليه
بيشبه خيط الصبح
ورح نضل نقول
صباح الخير

أنا ظنّي فينا دايمًا خير
وحلمي بطيء زي العسل
كبير زي السما في جناح الطير
أزرق وحنون، بطير على مهل

يابا

Farah Chamma فرح شمّا