النبض بصوت فؤاد حدّاد

البنّ
			
القهوه تحبّ كنكه
والكنكه تحبّ كنبه
والكنبه تحبّ قعده
مبسوطه مربّعه
و كنّا أربعه
أنا و انتِ و انا و انتِ

و كنّا عيون كتير
و طبليّه و زير
ولا بنحبّ نبكى
ولا بنعرف نطير
أنا و انتِ و انا و انتِ

سبنا البوسطه ورانا
فى الترماى اللى داير
العتبه للإمام
كان ريقك جنبى ساكت
حبّيتك من زمان
أنا و انتِ و انا و انتِ

شمّيت لادن سعيد
شمّيته من بعيد
شمّيته من قريّب
خمس سنين حاغيّب
على الشمّاعه خايف
و باخاف على الدولاب
و بادوب على البلاط
و باحسّ الظلّه تقلت
و باسمع الوابور
و باحسّ الميّه تقلب
أنا و انتِ و انا و انتِ

الظُهر الشمس تلحس
الظلّه فى الليمان
والظُهر الشمس تعمل
سيبرتايه دهب
بصّينا لبعض فيها
و مشينا لبعض نبكى
و قعدنا من التعب
أنا و انتِ و انا و انتِ

باقول لك إيه باقول لك
حاجيب حاجات قديمه
قلبى كوره شراب
نلعب والاّ ما نلعب
فرحت لنا المدينه
و امبارح فى التراب
أنا و انتِ و انا و انتِ

و بنفرش ضيّنا 
على ظلّة بعضنا
و احنا بنبرد هناك
علشان ندفا هنا
والقهوه تقول لنا
على بال النار ما تلسع
بتبقى حنيّنه
أنا و انتِ و انا و انتِ

قصيدة البن بصوت فؤاد حدّاد

ايها المواطنون مجلس الانس الكريم

في بداية الاحتفال اشكر الاخ ابراهيم
النهارده جبتكم للمناقشة في الحوار
تسمعوني و اقلكم هكذا يبقى الحوار
بس قبل الاحتدام خلو بالكو صحصحوا
حد اثناء الكلام يتنقل من مطرحه
كل عام و انتم بخير
النهارده في بلدنا أي واحدعنده حق يبدي رأيه في أي حاجه الا في السياسة .. لأ
احنا آه ديمقراطيه بس في حدود الحدود
تيجي شلة ماركسيه او مُزايد او حقود
كل عام و انتم بخير
فيه كلام عن مشكلات هم مالهم بالبلد حد جاع او حد مات كل مولود انولد
فيه تفاوت في المعايش ايوه بس الحقد عيب
والمثل بيقول يا غايش كل هدمه وليها جيب
كل عام وانتم بخير
اما شغل التنظيمات و اللي دايرين يلطموا يبعتولي وفد منهم ما اقتنعش ح افرمه
واحنا برضك عيلة وحدة والرغيف ح نقسمه يجي واحد مش فاهمني يعني ايه ح نقسمه
كل عام و انتم بخير
فامشوا احسن من سكات ع الحوار المستقيم
احنا برضك فلاحين نعرف العيب من قديم
و احنا مجتمع سلام والسلام يعني السرور
والتسامح و الزهور
و المحبة و العطور
و المباني و الاغاني
و الاماني بالبخور
و المباهج في القصور و القناعه في الكفور
و احترام الاغنياء زي شارات المرور
و الكبير يفضل كبير مهما يغلط او يغور
و الصغير مش ضروري انه يكبر او يثور
و الجعان يبوس ايديه لو يبات من غير فطور ليه؟
لأن الشكوى عيب
و النجوم غير الجذور
هكذا نبني السلام و السرور ع الناس يدور
ايها المواطنون مجلس الانس الكريم
في نهاية الاحتفال اشكر الاخ ابراهيم

مجلس الأُنس الكريم - الشيخ امام و أحمد فؤاد نجم (أنور السادات) قصيدة

صبرين - كلمات: أ. ف. نجم

زي العادة - بصوت فؤاد حداد

إكبَر يا ليل - بصوت فؤاد حداد

طـلـعــت أدبّ نــزلـــت أدبّ
وطـالـع نــازل اقـزقـز لـب
أردبّ أرادِب
أرنب أرانْبّ
دا كـُله دا كله في بطن الدبّ
وكمـثل الـدبّ كمـثل الــدّبّ
يجُب في جُب يعّبي في عبّ
طلعـت أدب نـزلــــــت أدبّ
طلعت أدب…
طلعـــت أدبّ أدبّ دبـيـــب
ونـزلت أدب سبع سراديب
انا اخوك الدبّ ماانيش الديب
ومفنجلْ عيني تقول دا أديب
والاَّ دا عاشق داب في دباديب
الحلو اللي بيغطس ويقبّ
طلعت أدب …
طلعت أدبّ البط ما باضش
نزلت أدب أخوك ما قبضش
انا باستعبط وما باستعبطش
انا باتْلخبط  وما باتْلخبطـش
انا صاحب رقّّه وصاحب بطش
تزفّر بقي والاَّ أسبّ
طلعت أدبّ …
طلعت أدب برجل وإيد
ونزلت أدب وعيشْه بتقيد
ريَّحت رقبتي من التحويد
وعمـلـــت صغــّيـر قــلـت يــا ســيـــد
انْ كانـــّك مــش شـايف لـبـعـيــــــد
إعمـــل زيي على ظفـــرك شـــــــِبّ
طلعت أدب …
طلعــــت أدبّ الـســقـــف أتــــــــرجّ
نـــــزلـــت أدب الـبــــيـر اعــــــــْـرَجّ
الـعــالـــم ماله ؟ الــــــعــالـــم وَجّ
قــــال كـلــت حـبــيـبك ؟ كلته ياحْاج
ويــا حـبــيـبي كان طـعـمـك فـــَــجّ
انْ كـنـت حـبـيـب انا بـرضـــه مُحبّ
طلعت أدب …
طـــلــعـــــــــــت أدبّ ولا الأمــــــراء
ونــزلــت أدب يـــا وز عـــــــــــــراق
يـــا حياتي وموتْي ولـقا و فـراق
ويومـــأتى   بـتاكلْ  مني  في  راق
آخـرتي  شـمــاعه  في  قصــر فـراء
مــا حـاســــيبش غير الفرو المجربّ
طلعت أدب..

رقصة الدب - بصوت فؤاد حداد

                              

أطيب من شراب الورد  - بصوت فؤاد حدّاد

موّال قتيل المحبّة - فؤاد حدّاد

في الذكرى السابعة والعشرين لوفاة الشاعر فؤاد حداد ننشر ثلاثة تسجيلات نادرة بصوته لثلاث من قصائده

بكيت في الأول بكيت في الثاني - فؤاد حداد

الشجره بتخضر - الشيخ امام

انا والد الشعراء ..فؤاد حداد
أيوه...
انا الوالد ...
و ياما ولاد.. !!

موّال قتيل المحبّة - فؤاد حدّاد

Foad Haddad