كان يوم مطر

البغبغان جوّه القفص

طَلَّع لسانه لعصفورين

فوق الشجر

 

خليكوا سايقين العِناد

العِش قاد وخسرتوا ويَّاه الوِلاد لما انفجر

هو انتوا حمل السيل ولا حمل المطر؟

كان فيها إيه لو تعلموا زيِّي وتقولوا زي ما يقول البشر

 

ردوا عليه العصفورين

لو عَ الوِلاد.. البطن ولاَّدة

والعِش مهما يِقيد

صخر الجبل عناقيد نفرِشها سجادة

 

وانتا اللي فرحان بالقفص

أصلك قفص

كتموا الهوا جواك

ونسّوك إن ما بينِ الحياة والموت نفس

هشام الجخ - البغبغان

وبقولها انا انت وانت انا

مين الحمار فينا

انا اللى حمار ولا الحب اللى نازل رجرجة فينا

طب انت انا ... وانا انت وجه فينا اللى جه فينا

حظوظ الناس مصالحاهم وحظنا ليه مجافينا

 

طظ يا حظ يا ملاوع هحبها ويكش تولع نار

هاكونلها بر وسفينة هنتحمل وهنكيدك ونضحك رغم ما فينا

وشوف غيرنا يا حظ خلاص مفيش والله رجا فينا

ده انا انت وانت انا طب مين حمار فينا

 

حمار الليل مطولش فيوم السهرة والزينة

حمار الواد بتاع اللب

فاكرة يوميها عالكورنيش

قطع احلامى وكلامى عن الترحال

ويوم سفرى ويوم ملقاكى عالمينا

 

حمارة صاحبتك لما بتمشى معاكى فالشارع

يبان حسنك يغطيها يخللى شكلها شوارع

بحبك ظايطة فاللمة واحب اللمة فعنيكى

وبفرح كل يوم لما تسافر ايدى فايديكى

 

ياعم حسين يا ملقانا

يا شاهد فرحى وشقانا

انا اللى حمار ولا هى

ولا الحب اللى ورّانا

 

حمارة سياسة التعليم فدى الدولة

وقال تعليمك العالى

ياولدى يبقى ليك اولى

بقالى سنين انع يا ناس

مابين ثانوى وبين جامعة

اقول ابنى سحابة شوق

تاخدنا لفوق وتبقى هى دى الجامعة

 

هاتجمعنا لوحدينا

تدارى كسوفها منينا

وانا فصدرك .. وانتى فحضنى

نرجع تانى نتلخبط

ما نعرف مين حمار فينا

 

ساعات اقعد مع نفسى

فليلة صيف وبلكونة

وقمراية ونص سيجارة

اروق حبة عن نفسى

وكام نظرة على اشارة

يطيروا منى للجارة

لو انتى جيرانا لزقالنا

وكاشف بيتكوا شباكنا

ماكنتش اكره الشقة ولا القعدة

هاشوفك كل يوم نايمة

وهشوفك كل يوم قاعدة

انا شايفك وشايفانى

وصوتنا موصله التليفون

اكن الكون بقى بتاعى

او احنا وبس جوه الكون

لكن حظى التعيس دايما

مخللى عمارة ولا اتنين

مابين بيتى وبين بيتك

وداروا بيتى عن بيتك

 

بس انا عرفت الحمار الان

فلان احمد فلان

عشان سايب كل المكان

وبانى عمايره وسطينا

وساب روحى تروح روحك

ويتلاقوا فنص السكة

مابينك وبين الكون

يطيروا فالهوا حبة

يدوبوا حب ومحبة

ابصلهم يا وخدانى

وقلبى صافى ومزقطط

وارجع تانى واتلخبط

ولا اعرف مين حمار فينا

 

بحبك نانا او ناعسة

بحبك ليلى او المظ

نعيمة .. تمر حناية

بحبك وانتى بالمينى جيب

واحبك شال ودلاية

بحبك وانتى فالتليفون وفالجوابات

بحبك.. وانتى ويايا

بحبك بت حكاية ورغاية

تصحى سكوتى جوايا

تلاعبينى واغمى عيونك السودة

صوابع ايدك الممدودة

بتدور على حضنى وتتدور

كسوفك عنى حايشنى وحاششنى

وطيش حبك مطيشنى

كفاية تعبت مالطيشان

مفيش مرسى يدفينا

ايديكى تنام على صدرى

فى حتة يدوب تكفينا

وليل نعسان يغطينا

تغير الشمس منينا.. تصحينا

يهيج قلبى ويتخبط

وارجع تانى واتلخبط

ولا اعرف مين حمار فينا

 

بحبك طايشة جواية

مسافرة ضلوعى فضلوعك

وانا طوعك

يزلزل صوتك الزلزال ويحينى

يخلينى انا.. عصفور فى شباكك

يا ناشرة فالمدى شباكك

ايديكى يوم ما ضمتنى

حضنت الكون بكفة ايد

وبالتانية سندت القلب فمكانه

بحبك... يااااه

يا نار فالقلب نوارة

انا حمار اللى حبيتك

وخليتك بحبى حمارة

يــــا حمــــــارة

هشام الجخ - حمارين حبيبة

بنى الانسان على خمس هشام الجخ

الحضرة الذكية فؤاد حداد

عشب الربيع مهما اندهس بالقدم
او انتنى فى الريح
بيشب تانى لفوق
يغنى للخضره وطعم الالم
حبيبتى وإن يسألوكى
قولى مسافر بعيد
رايح يقابل العيد
على قلعة فوق الجبل
واللا فى سجن جديد
فى غرفة ضيقة فى ساحة
الإعدام
يرمى الرصاص واللا
الخلاص
فى خية المشنقة
مشوار بعيد المعنى
عالى الصوت
إذا مارحتوش أموت
وعالمى ينقفل
والشمس تسحب خيوطها وتنسحب فى خجل
وسعيد كل ما قربت المواعيد
وهل فجر جديد
سعيد بكل اللى متألمه
كل الألم فى الدنيا متعلمه
فى زماننا ده ما أخيب اللى
الحزن يفطمه
تعبت أقرا الوجوه بحثا عن
الإنسان
وتعبت أقرا اليفط بحثا عن
العنوان
كل الخرايط ما توضح تبهت
الأوطان
لكن خلاص كتبت اسمى
بومض الرصاص
وفديت عيون الوطن وفديت
عيون الناس
ويا امى إن يسألوكى لا يرتعشلك حضن
ولا تردى بحزن "وتقولى مات فى السجن"
ساعتها يبقى الحزن بلا موضوع
والسجن بلا موضوع والموت بلا أكفان
وكفايه جربنا سنين الموت بالمجان
والتافهه المتهان آهاننا بالمجموع
فى المحكمه الإيد مست القضبان
فى المحكمه الإيد حست القضبان
الزهر مد رقبته م الأسوار
وقف الحرس إنتباه لتهرب الازهار
آه يا زمان الفجر
لا السجانين مساجين ولا المسجونين سجان
يا قاضى بالله عليك انت بتخدع مين؟
ما كلنا فاهمين تحت الوشاح ددبان
تحت الوشاح مخبر جبان خسيس
يلمع صولجان الحاكم بدمعه الاوطان
على اجمل الفتيان واشجع الشجعان
تقتل خيوط الفجر بالأجر
ما أوضحك فى الضلمه وش
يا قاتل الشيطان
ما أوضحك فى الضلمه عش يا غابه القضبان
لو جرب السجان نعيم القفص
ما كان فتلك عش م القضبان
والمتهم منشور كإنه العلم وإلا ابتسامته وهيه بترفرف
وتهمته واضحه وضوح الشمس وليها نور يخطف
واقف سعيد راضى يخوف القاضى
وعينه ما هياش للأرض
يا اللى مفهمتش ابتسامه الشهيد إحنا بنفهم بعض
الشهدا احنا مهما نتباعد لا يغنى واحد فينا عن واحد
تحت الهدد فى العالم الموبوء
بيهتف الزاهد ووشه شمس الفقير
وطلعه الرغفان والفجر لما يهب م الوديان
بطل يقول ويطول اسمر
ولا يسابقه القفص فى الطول من غير سؤال بيقر
والقبضه قابضه ع الحديد لا يفر
القاضى يستغبى
والمتهم بيصر
شمس الحقيقه تحر
والمتهم صامد
كل القضاه زايلين
والمتهم .... خالد


عبدالرحمن الابنودي - المتهم

مختارات الأبنودي 1 -  قصيدة البيت القديم

مختارات الأبنودي 2 - قصيدة سواق قطار في يوم العيد

مختارات الأبنودي 2 - قصيدة الأرض والعيال

مختارات الأبنودي 2 - قصيدة النمل

هشام الجخ - اللي زيك

واحد يا موحد الواحد
اتنين يا جد الحسين
تلاته يا سوء الشماته
اربعة يا حبر المطبعة
خمسة يا عزمى يا حى
سته يا بكرة يا جاى
سبعة يا قلبى يا مايل
تمانية يا شوق الزمايل
تسعه يا دنيا يا واسعة
عشرة يا خاين يا حشرة
اعرفكم جميعاً ان السجن سور ..
اعرفكم جميعا ان الفكر نور
اعرفكم جميعا ان السجن شايخ
واعرفكم جميعا ان بابه خايخ
واعرفكم جميعا ان الثورة فكرة
واعرفكم جميعا انه هايبقى ذكرى
وابشركم جميعاً .. ان الوعدة بكرة
والنور عندنا وعندكوا .. يا حبايب :)

بنى الانسان على خمس هشام الجخ

ibn-rashed