تتفكّر كي كنت نحبّك
و ما نحملش حدّ يسبّك
و ما نجّمش نجي ضدّك
و ندخل بعضي كي تفدلك
و ما نعرفش وقتاش تحكي بجدّك
 
تتفكّر كي كنت مغرومة بيك
و ما خلّيت ما كتبت عليك
و نموت على كلّ حاجة فيك
و كلّ شيّ في عيني مواتيك
و كنت نستخايل روحي ما نجّمش نعيش بلابيك
 
تتفكّر كي كنت نعشقك ونهواك
و ما تحلالي القعدة كان بحذاك 
و نغزرلك في عينيك ونقلّك محلاك
و نسمع حديثك يبهرني و نقول ما اذكاك
و نهتري بيك و نحكي عليك ونشتهاك
 
تتفكّر يا ولد النّاس
كي ما عبّرت فيّ احساس
و مالدمّار أيّست و والفت الكاس
هاني اليوم نسيتك ولاباس
غيرك حبّيت, وتحبّيت, وهذاكا حدّ الباس :) 

تتفكر كي كنت نحبك

الوحش..

الوحش و لا الأذية

الوحش عملها فيا

عمالي قلبي و عينيا

ربطلي يديا

و علاش! شفما؟

هكاكا، غمة

علاش شصار؟

شي، ريق صغار

طلعة مالطلعات

تحب تاخذ قد و الا أكثر ملي عطات

في ليلة و نهار

و شي ما صار

شوية هبال

برشا دلال

تلوج على فال

تحلم في الخيال

و الزين؟

زين و عين

و الدين؟

يلعنلو الرب و الوالدين

و السنين؟

تتعدى في رمشة عين

و العينين؟

عمرهم ما كانوا كذابين

بكاية، مساكين

أما اسألني عالقلب

اسألني عالقلب و قلّي شنوّة الذنب؟

شنوة ذنبو كي يغزر لفوق

و تحت القاع يحس روحو مخنوق

شنوة ذنبو كي يحب يعمل جوانح

كي يحب يطير و هذاكا فاش فالح

شنوة ذنبو كي ما يرضاش بالقليل

و فيسع ما يفدّ و دموعو تسيل

شنوة ذنبو كي يرى روحو ياخذ في أقلّ ملي يستحقّ

و مقهور و شادد غصتو و كاتم و ما نطق

اسالني عالقلب الأسير

الّي ما حب يعمل تغيير

الّي مكبّش و ما نجّمش يسلّم

و الّي كان يمشي يمرض و يتألّم

و الّا, لا, ما تسألنيش

و في مواجعي ما تفكّرنيش

خلّيني هكاكا, هاني, تقريبا, نعيش

و نستنى في حلمة ما تجيش..

حلمة ما تجيش


https://www.youtube.com/watch?v=ylRg_aldTAk
 
 
 
توحٌشتها كلمة نحبّك ...
 
نبدى نستنّى فيها ، وذني تلوّج و تكبٌش ما ترقد كان ما تعنّقها و تبنّن بيها ، ستانست بيها ربّات الكبده عليها ولاّو خوات ، توامه ، عرف زيتون و حمامه ، ڨمره و نجوم دايرين بيها ، ورده و نحله مقيّله في وسطها ، ماء و حوته في وسطو ، دمعه من عين حزين ، ضحكه في فمّ صغير ، تنهيده في جواجي متليّع ، تخميرة وليّ صالح ...
 
توحٌشتها كلمة نحبّك ...
 
في عقابات اللّيالي نبات بيها ندادي ، مخّي ياقف ، يعكس ، يتعصر ، يذبل ، يدوخ و قلبي فيه يفيّق ، يقوم يشطح يهبل يتحزّم و يبدى يغنٌي ... و سبني أحلم سبني ... ياريت زماني ما يصحّينيييييش ... مخّي .. كل ما يسمعها يوحل يبكش يتكونسى يرجع غشّير يرضع في صبعو يحبّ على أمّو . يدخل في سينه أخرى دنيا حمراء قلوب و عصافر بيض ، جنّة الحبّ و جهنّم البعد .. يولّي يهتري يلبّو لعرق يسخن و يبرد فرد وقت ، ياقف  يقعد ياقف يقعد يدور على أجنابو ينڨّز يهيج يريض يركح و يقوم يصيح ، يطيح مافي عينو بلّه ..
 
توحٌشتها كلمة نحبّك ...
 
رعشه الصّوت قبل ما تتقال ، لمعة العين قبل ما تتنطق ، الدٌقه الزّايده في القلب ، لكموته الخوف الي في الجّواجي تتحصر، العرق يلبّ ، الفمّ يشيح ؛ السّاق تترخف و النّفس يتكبس ، الدّقيقه تولّي درج و الوقت يولّي غول .. الزّلقه بفلقه ، الكلام موزون بالرّنه بالنّغمه ، موّال و كمنجه و عود ...
رعشه السّتيلو قبل ما تكتبها ، فسّخ و عاود ، كل حرف عندو بنّتو و مطعمو ، ن كيما نموت عليك ، نتمنّى نحيا في عينيك دمعه نهبط و نموت فوق شطوط خدّك ، نتحوّل ياسمينه نفوّح روحك و نسيّب عروقي في تراب يديك نعمّر معاك مياة سنه و نكمّل حياتي بين صدرك و قلبك ... ح  كيما حياتي بدات بيك و ما تسوى شيّ من غيرك ، ظلمه ليل لغراب عشّش فيها ، حلمت بيك كي كل ليله خيال هارب من بين إيديّ ، رمل تسرسب منّي ، ملح ذاب في دمّي و منّك حرمتني ، حبستي في حكايه مبتوره ، ناقصه نهايه و منّي مسروقه  .. ب كيما بيديّ نزرعلك ورد الجنّه و العطر إلّي تتمنّى ، ، بروحي نصنعلك لحاف و مخدّه و بقلبي نهديلك أحلى دقّاتو ؛ بحروفي نصنعلك شركه تونّسك في غيابي و نقطفلك نجمه تضوّي عليك اللّيالي .. ب كيما بكّيتني و بكاي  فرحه ، وجعتني و لوجيعه من عندك مقبوله ، مرضي منّك دوا  ، تعبك راحه ، كذبك حقيقه ، بعدك حريقه .... ك كيما كلمه منّك بالدّنيا ، كتاب كلّ ليله نقراه ، نشرب ماه ، نحفظو ، نلبسوا نفصّلو على قياسي ، نحلف بيه  ، نمّن بالّي فيه .. كيما كنت و لتوّا روحي فيك  ، عاشقه و مهبوله و ضايعه من زاويه لزاويه نشعّل في الشّمع نلوّج عليك .. كنت و مازلت ليك قدّ ما حاولو منّك يخطفوني و على سراطك يبعدّوني  ، قدّ ما حاولو فيك يكرّهوني ، و على دينك يردّوني ، قدّ ماحاولو في ريحتك ينسّيوني و يذكّرو فيّ بحقيقتك و يبكّيوني ...
 
توحٌشتها كلمة نحبّك ...
 
تهبط على جرحي  كلضّميده ، تدخل في الجّواجي و تبرّد لحريقه  ، تسكن في كبدتي و تسكّت لوجيعه ، تبكّيني مالفرحه تخلّيني نعوم و نسرح ، نرج حيّه  ، نفيق من نومي كالبهلوله نمسّح على تليفوني ،هي سبب جنوني و التّبسيمه من غير سبب في عزّ محوني ، هيّ إلّي خلّات قلبي يدقّ وفهّمتني شمعنتها عبد يتحبّ ، يخمّمو فيه في كلّ وقت ... أربعه حروف يحسّسوك إلّي في قلبو عندك وجود ، إلّي سيادتك متربّعه على عرش الحبّ ..
 
توحٌشتها كلمة نحبّك من عندك...
 
عندها ريحة المسك و العنبر ، ريحة المطر و التراب المبلول ، ريحة الرّمل بعد نهار سخون ... توحٌشتها كلمة نحبّك من عندك قدّ ما بعدك قالوها و ليّ حلفوا انهم يقصدوها ، قدّ ما ليّ كتبوها و زيّنوها ، قدّ ما سمعتها قلبي و عقلي طيّشوها ، قدّ ما بيها ودّوني و زادو فوقها ذهب و حولي..
 
كيف ما يرجع الفرططّو للنّار الّي تحرقو .... أنا نحبّك إنت .. و توحٌشتها كلمة نحبّك من عندك إنتِ ...
 

توحٌشتها كلمة نحبّك ...

يا الزاني واش دواه خويا الزاني واش دواه
دواه الدڨلة و حتى الحليب عداه كي يباتو اعضايا فوڨ اعضائه
و مالغرب حتى للفجر خلي يسهر الزاني 
و محلا بوسة النيبان  يبات الريڨ على سنيها غيرة و حمة سكران تفرشلو طرڨة حوليها

كاس البوخة

في القايلة خرجت بالسرقة على امي نلعب بالزربوط و انقز في الكاري و الغميضة و  السبعة حجرات و كانت اخر المرات                                           
تفيق بيا و تنحيلي والديا و تعطيني طريحة نباشة لقبور 
و في عشيتها ننساو في الي مروح في البابور 
و تعرضو ميما بالهلالو و هو بطبيعتو لمشومة على حالو  و اخر مرا نشوفوه و اخر المرات 
                                                      
قبيح و زبرات و ياقف في راس النهج في عشية صيف و الشهيلي يعرقها و حل الكعبة و يطرشقها و يشربها و يخلط عيها ثلاثة كعبات و كانت اخر المرات 
يكش عليا بابا و يقلي ايجا قيل لا نحكلك الفلفل ، نقرص خويا الصغير و يبكي و يشنعها و لاعاد فما قايلة و لا نوم و نبردها بكعبة فريقولو و مماتي تخرفلنا حكايات و كانت اخر المرات 
 
رمضان رمضن و لساني بياض
و امي اطمع فيا بالمالح و البريكات و الزلابية و المخارق و الحلويات و كانت اخر المرات 
و لحمي زراق بالناموس و ريحة السبخة تفوح و تعرف الي الصيف في حومتنا شرف و تعرف الي سخانتو تخوف 
كيف تطلع في الكار و المترو و تهبط تتنفس بالقصبة و تنصح الي تحب بالشب و البرفنات و كانت اخر المرات
و للبحر مشينا و بالرمل عملنا لخويا دفينة و قام و نفظو علينا لين عمالنا عينينا و شللنا بالما و قرصتنا الحريقة و فطرنا الطاجين و السلاطة و بردنا بقازوزة و بطيخة و في الليل شعلنا العافية و غنينا غنايات و كانت اخر المرات 
صيف تعدا و صيف قعد و في حجري تمد و فك مني ميما و فك الي روح من فرنسا و صغري و الي تعدا من عمري ، صيف لعرق و عروسات فوق السطوحات و  بيوع الشراب بالسرقة و ولاد الحومة يكمبسو في حرقة و حومتنا بالعرك خلات و كانت اخر المرات
نسمة حلق الواد و بوسعيد و في قهاوي لمدينة كل ليلة عيد و المشموم المركوز لمزين بالياسمينات و كانت اخر المرات ..

آخر المرات

Subscribe and share 💚
Written and performed by: Mehdy Khmili
Follow on Instagram: @mehdykhmili 
Facebook: Mehdy Khmili البورجوازي الفقير

عطشـــــــــــــــــان..
ماعادش لاقي شنوة يرويني، بعد الجبال و الغابات و البحر
تعبت و انا مسافر في رحلة بدات من الصفر،
نلقى روحي في صحراء،
ريحتها شايحة و لون تربتها صفراء،
يقول لونها لون ذهب،
قالو في الصحراء تاو تلقى إلي تحب،
غادي تنجم تلقى إلي يفهمك و يجاوبك،
غادي تنجم تلقى إلي ملقيتوش، الخلاصة..
و كان ملقيتهاش فاها ماتلقاها في حتى بلاصة،
في الصحراء تنجم تزرع افكارك،
وين تنجم تحفر بير غارق تغرق فيه اسرارك،
و تبني دارك، وتعمل جنينة من خيالك،
في الصحراء تنجم تكون حر و تعمل لي يحلالك،
هاني جيت للصحراء،
عندي برشا و انا نمشي، ونسيت اصلا قداش عندي،
الشمس جهرتني و حرقتلي جلدي،
مسمعتهمش كي قالولي "ماتمشيش عيش ولدي"
انا لي خترت نهجرهم و ننفذ بجلدي،
انا لي بحرت بسفينة خيالي عكس الموج،
انا لي غرقت في دوامة افكار ما منهاش خروج،
انا لي عملت خريطة في ثناياهم،
و انا لي قررت إنو لحكاية كيما بدات توفى معاهم؛
و ماكنتش غالط،
اما انا الغالط موش هوما،
مايخلفوها الصيادة كان جات تنفع البومة،
و الصياد هو إلي يعرف وين يصطاد و هو الفنان؛
اما انا نتعلم و نصطاد و مانيش صياد، انا رسالة بدون عنوان؛
انا انسان،
يجري و يلوج عالإنسانية الضايعة،
و في كل بلاصة يلقاها سلعة و عندها ناس شارية وناس بايعة،
و من وقتها و هو يلوج و ما تعبش،
هو يمن إلي الإنسان ذكي و قوي ما يتغلبش،
اما عاش في زمان الضعف و الجهل و الغلبة،
عاش في زمان سماو فيه حياتهم العيشة الكلبة،
في غابة إنقرضت منها الصيودة و حكمتها قرودة،
وين قانون الغاب يعطي لكل شي حق و ما عندك فيه حتى حق؛
وين حريتك منك كل يوم تتخطف و تتسرق؛
وين تراهم قدامك،
بعد ما سرقو حريتك إغتصبو أحلامك،
وين بدات جوانحك تتقص،
و إنت الغالط خاطر إنت لي تصنع في المقص؛
و بعد جوانحك، يقصفولك شبابك؛
و يدخلوك في حيوط و يرسمولك فيها شبابك؛
شد الصف ورى غيرك قدام شبابك الجنة،
ماتعملش الحرام باش تدخل،
العمل عبادة و العبادة عندهم حرام و الحلال هو إنك تبخل،
إنت عبد الله اما عايش عبدهم،
تاكل و تشرب و تخدم عندهم،
ماكش حر،
انت عضو منخرط في عصابات الشر،
في الغابة كل واحد في عصابة،
و إنت عايش في غابة القرودة،
عصفور فوق الشجرة يصطاد في دودة،
موش إنت العصفور؛ إنت الدودة،
نتفكر شفتك زادة في البحر،
قداش من مرة إستعملوك طعم و ذوقوك المر،
إنت الوسيلة،
و إنت لي تتعب و تندم و تقول ما باليد حيلة،
إنت ديكور في فيلم الحرية مهمة مستحيلة،
إنت لي ممنوع عليك اكثر من المسموح
و ممكن إنت لي قلت على بلادك "تونس تقتل الطموح"
إنت لي قسمو جناحك خلاوك مجروح،
إنت لي ملقيت حتى تفسير لضحكتك الصفراء
و هاني جيت نلوج في تفسيرها في الصحراء،
و توا وين فهمت..
التفسير نلقاه واضح و ضاهر،
في الصحراء مالقيت حتى حد آخر،
ايام و ليالي و انا نمشي و نسيت اصلا قداش مشيت،
جيت نلوج على كل شي ملقيتوش لكني شي ما لقيت؛
مالقيتش الخلاصة اما لقيت الإشكالية،
لي هي تتلخص في برشا مشاكل،
كيما غياب الإنسان لي من عندوش مبرر،
و الحرية غايبة هي زادا و من غير مبرر،
بعد ما إغتصبو أحلامك قدامك،
و بعد ماقتلو الوردة لي حلمت باها في منامك،
حصروك إنت و كلامك،
و اليوم جات فرصتك،
اليوم القرصة قرصتك،
و هاني قرصتك باش تصدق لي هاذي حلمة،
باش تصدق لي انا بديت بكلمة،
عطشان،
ملقيت شي يرويني، كان الكتيبة تسقيني،
و بعد مانموت نهارهم في الليل تحييني،
كلمة نبني باها الحلمة
و الكلمة كلمتنا،
و الحلمة حلمتنا،
حلمتنا حريتنا،
بذور جيت نزرع فاها في الصحراء،
هي فكرة و نضرية و إقتراح
كل مرة نحكيلك حكاية تخليك ترتاح؛
كل مرة نعطيك حقيقة،
و في امخاخنا نصنعو فكرة و طريقة،
تكون طريقنا للحرية الابدية

عطشـــــــــــــــــان Mehdy Khmili 〚Official Audio〛


يا معصية.. يا ذنوب.. 
وقتاش منك نتوب ؟
يا خطيئة.. يا غلطة.. ما تتمحاش ..
يا زهر ما فماش.. 
يا جرح ڨلبي لي ما براش ..
يا بخت مفڨود.. يا عشقه سعدها مكبوب .. الحجرة تذوب و الروح لي عشقة مرّة محال إتوب .. يا مكتوب .. ما منوش هروب .. 
من الوحش جرحي متحير معطوب ..
نتڨّي .. و نخبّي .. 
نصبر .. و نكذّب ..
و نڨول وحشها لا ما يعذّب ..
و سرها في جواجيا ذايب ..
حبيتها و نحبها و هي عز الحبايب ..
و كل ما نفكرها دمع العين يحدر سكايب .. يا ضلام .. موحش من بعدها .. 
لا شرڨت الشمس .. 
و لا هب نسيم يروح عالنفس .. 
و الكدر و الزمم فوڨ صدري تكدس ..
نكتب نص .. بدمايت جرح ينزف .. 
على ڨلب تردف .. 
و حبها لين زعف ...
.............
يا زمان قداشك خوان طحان 
تعطيني لمان وتخطفها وتودني بلمحان
وجاه ربي وربها في عالي سماه 
وغلاوة مبسمها والزين الي غطاه 
لا ننساها ولا نحيها من افادي 
لا نجم نخطاها ونعيش كي اندادي 
لا تسوى رشفة الميّة وهي مش من كفوفكها
ولا تحلى غزرة من غير ما عيني تشوفها
ندعيلها وندعي عليها
نجريلها وعيني فيها
نحكيلها ونبكي عليها
نشكيلها ملي مني سرقها 
نكفر بروايح زنودها وننقض فرضي بعرقها

يا غصة في الجاش مكوية 
يا نار شاعلة في عبي مرمية 
يا رعشة تلبني تزيلفني مشتهية
يا غصة متروكة مش منسية
يا للاتهم 
يا تسلطينة في مواويل غناياتهم 
يا تسلهيبة من لياليهم وفروحاتهم 
يا حضن دافي ماجبتا اماتهم

يلعنها ويهديها 
ندفنها بش نعاود نحييها
نضربها بش نرجع نرضيها
ننفسها وبدم جروحي نداويها 

يلعن كل دقة في قلبي دقت على بابها 
يلعن كل دمعة سالت سقات الياسمين على ترابها

يلعن حبها
يلعن غدرتها
يلعن عمري قبل عمرها
يلعن ربي وربها ... علاش مزلت نحبها
وعمري عندها تخطف
والجرح عمالو ينز ماجف
ولكنين بهواها وسماها زاد حلف
تي خليها ... بالك نزيد نهواها ونخف ...
__________
نص مشترك مع Amine Gallah

حلمة ما تجيش

Ichraq Matar