
" فادك بإيه البُكا ؟ "
( 1 ) 
الاسم : أطول م القصيدة بميل .. 
الحالة : أعذب من وريد النيل ... 
المهنة : سارح والقُليب قنديل .. 
عنوانى : ساكن فى الشتا والليل .. 
السن : جايز لسه ماعرفتوش .. 
بس المقدّر سنى كان عشرين !
( 2 ) 
مين اللى يقدر يرمى همّه ف كفن ؟ 
مين اللى شاف الدنيا رحلة عفن ؟ 
موجوع وقلبك حظه مات وإندفن .. 
إيش ياخد الريح م البلاط يا ولد ؟ 
غير روح حزينه ومالها غيرك سكن ؟
( 3 ) 
فادك بإيه البُكى .. والنهنهه واللوم ؟ 
فادك بإيه السهر .. والدمع نُص النوم ؟
قلبك لا عُمره إشتكى .. ولا هزّه نَعق البُوم .. 
يا صخرة المُشتكى .. إيه فى الحمول بيدوم ؟ 
درويش وقلبى الصبى عايش مع الحرافيش .. 
حرفوش وسيدنا النبى .. صليت عليه بشويش .. 
حُضنى الفراق رقّعُه .. بقى زى حتة خيش .. 
سهم المُنى وقّعه .. كسّر ضلوعه الشيش .. 
والهم مهما إتكوى .. ما بيتوقف له نزيف .. 
كل اللى مسّه الهوى .. قلبه ماعادش نضيف .. 
مدمن غرام وإرتوى .. 
يا اللى إنتشيت بالجوى .. فادك بإيه الكيف ؟ 
عيل ماليش موهبه ... غير فى العياط والنوح .. 
عيل ماليش فى الصبر .. غير اللى شق الروح .. 
أيوب ياطيف النبى .. مش كل صبّار نبى ولا كل رُبّان نوح .. 
وأنا قلبى شق الندى .. رص الكلام وإبتدى .. 
يكتب قصيدة هدى .. سابنى الغرام مجروح !!!
( 4 ) 
إياك تِئن وتنكِسر زى العيال .. 
إياك تبين دمعتك لو جرح طال ..
إضحك فى وش الريح وعافر وإنتصر .. 
ده العيب عليك .. 
إنت اللى غاوى تكتأب وتصدق الدمع القزاز .. 
تماسيح بتبكى ليل نهار .. 
وإنت اللى عايش فى إنهيار .. 
مسكين بتمسح دمعهم وبتبكى نار .. 
حتى اللى كان صادق معاك .. 
مبقاش فى نقطة براح فى قلبك قادرة لحظة تصدقه .. 
ماتت حاجات كات جلوة فيك .. 
كان نفسها لو يوم تعيش .. 
ومافاتش غير يوم أو يومين ..
كات بين إيديك .. 
وأديها عايشه لحد تانى وقادره تنسى إنك مفيش ..
ما إنت الوحيد صدقتها وآمنت بالدين الحرام .. 
أدّيت فروضك والنوافل والزكاة بعد الصيام ..
سخرية القدر اللعين .. 
ضحكت عليك .. 
وفهمت كل الدين غلط ..
دينها رسالته مختصرها ف كلمتين .. 
طبع الخيانه ع البشر بقى فرض عين !
( 5 ) 
إعتزال الشعر واجب .. لإنكسار الحب فيا .. 
وإندثار الدمع سنة لإنشطار الجرح بيا .. 
زمّلونى بالقصايد يوم فراقى وإضحكوا لى .. 
ضحكة أوسع م البراح .. 
اللى ف ضمير عيل بيحبى .. 
وابنوا قبرى ف عُقر دارى .. 
وإمنعوا عنى الزيارة .. 
وزّعوا على روحى زمزم .. 
م الدموع اللى ف عنيها .. 
وإقرى م القرآن يا مريم .. 
هَزّ جذع النخل رؤية .. 
هَزّ نعش الموت كبيرة .. 
وإن لقيتوا فضيلة باقيه .. 
من حياتى اذكروها .. 
وادعوا ليا بظهر غيب .. 
ألف رحمة ونور عليا .. 
واكتبوا على باب قرافتى .. 
صدقة جاريه أغانى غاليه 
وأى غنوة بصوت منير ..
#محمدعبدالله

فادك بإيه البكا

اصوات عشوائية علي هامش الوقت

وحدي أنا يمّاي.. وحدي أنا والنّاي..

كائن سارح في ملكوت الله بيتأمل في الكوكب و هو باصص في السما لفوق.. كامنجا تايهه مع عود و ترومبيت علي مسارح ارض الاله.. صوته بيطلع وقت ميكون مكتوم و يسمع الخلق.. الالوان من مبعثات البهجة بس :')

فادك بإيه البكا

محمد عبدالله Darweesh