مفيش مانع.. اشوف الدنيا بعينيكي
واكون م المغرمين بيكي
واكون تابع..
مافيش مانع..

مافيش مانع نغم ضحكك بيرويهم مايروينيش
فماتلومنيش.. 
عشان عطشان لاكتر من سماع ضحكك
مافيش مانع تواربي الشيش.
وأطُل فوشك البسام
مافيش فالدنيا دي شاعر, مافيش رسام في وصفك وصفهم نافع
مافيش مانع..

مافيش مانع اتابع رسم خطواتك في رمل الشط
وألوم الموج يقوم يتخض
واقوله: "حَضَنْت رجليها سِكْتّْ وعقلي كان هيشت"
"وماشي حيزاها طول الشط.. بجزر ومد"
"وانا متابعكوا زي الضل وقلبي م الضلوع هينط"
ونفسي تلتفت وتطل وشال الشط فيا وحط
حَضَنْها الموج ووسط الحضن كان طماع
مسح رسمة خطوايها في رمل الشط
ولما أسأل عمل كده ليه؟ وايه الدافع؟
يرد يقولي ايه المانع؟!
مافيش مانع..

مافيش مانع عينيا لم بتشوفك 
تكوني الحضن في المطارات
تشوفك ضحكة في عيون بنت
جديدة العهد بالجوابات
اشوفك كِيف ماتبقي انتي
ماعداكي يكون تعريفه لكياني في بند "حاجات"
ورغم ان اللقا صدفة ومالوش ترتيب
لُقَانا كله كان ترتيب.. لُقَانا وحبنا بالذات
ولو كل البشر كفروا بإمكان اللُقَا التاني
فانا هكتب لُقَا رابع.. لُقَا سابع.. مافيش مانع

مافيش مانع تكوني جنتي ع الارض
مافيش مانع اكون سائل لو انتي في يوم هتبقي الرد
تزيدي فوق فروضي فرض
وافضل ع الصراط والعهد
وحبك يبقى له طريقة ونهج ووعد
والملم كل دراويشك واكتبلك ديوان جامع
مافيش مانع

كلمات: محمود عبدالعزيز
موسيقى : Cairo Taxi CD mp3- مصطفى الحلواني

مافيش مانع - الديوان / محمود عبدالعزيز

Ma7moud Abd ElAziz