رحمة الله عليك يا ابي ونسئلكم الدعاء 
النص ...
.......
بدفني فيك 
واحييك
تعيش فيا 
خبيت سواد الدنيا ف عنيا 
وفتحت نورك للمشاع تشرب 
مديت وكانت خطوتك اقرب 
مقدرتش اهرب م الجسد قبلك 
او حتى اقبلك قبل ما تسبني 
حتخوني كل حروفي مهما حكيت
لله غيابك عن ضلوع البيت 
لله وجودك ف الكلام عني 
" ابنك ميشبهلكش غير ف الشكل " 
كنت اختصاري لما اقول الاهل 
والسهل وقت ما كل شئ يصعب 
بهرب اليك مني ف وقت الخوف 
بهرب اليك من عجزي وقت الشوف
دلوقتي بهرب للحروف منا 
صوت دعوتك / بوابة الجنة 
والحنة تحت خطاك بتكسي الارض 
كانت صلاتي قصاد غيابك فرض 
وفشلت اكفي سُنتك بعدك 
لله خطوط الصبر فوق ساعدك 
ولا حد ساعدك ف الشقى غيرك 
مغزول يا نور ايامي من خيرك 
ورماني سيرك ف السكك وحدي 
لله شقوق الدمع فوق خدي 
وياريت بكتر الدمع راح اردك
عايش لوحدي وانت مش وحدك 
وياك سنين م الذكر والصلوات 
خطوات ف جوف الفجر للجامع 
راجع تحني الصبح بالدعوات 
كلمات تنور ضلمة الشارع 
رافع جبين العز ف الازمات 
حكايات ترد النبض للسامع 
ولهذا بحسب نفسي م الاموات 
واحسب غيابك رحلة الراجع 
واجع لساني حرف محكتلوش 
واجع عيوني دمع مبكتلوش 
جتلك لبيتك بلعن المسافات 
وعنيك قصاد عيني ومتقبلوش 
كانت ما بينا غربتي ف جسمي 
اسمي اللي لسه تحت حكم الطين 
وانت اللي حر ف رحلة السموات 
ولهذا بحسب نفسي م الاموات 
ملياش دليل ف التوهة غير ضلك 
ضليت وخبت وعمري ما بضلك 
طب ايه فضلك فيا من نفسي 
وانا حتى نفسي فيا من فضلك 
وفاضلي بعدك ايه سوا الاحزان 
انسان مفهوش ما يشبه الانسان 
ملياش مكان الا ف كلام عنك 
او صورة خبت  ضحكتك م الموت 
حتكونلي باقي وكل شئ حيفوت 
وحكون معاك مهما الزمن حيطول 
مستور ف ريحك من جفا الاوقات
ولهذا بحسب نفسي م الاموات 
مهما السنين ف ضلوعي كات حاية
حدفني فيك 
واحييك تعيش فيا 




نُص النهاية - محمود صابر

Somebody that I used to know

في ليلة غير كل الليالي
 هتعيش فاكرها مهما قلت نسيت
 هتخبط الايد الغريبة بچنتلة ع الباب 
وهيدخل الضيف الودود ...
 شایل ما بينكوا الكلفة و العيب والحدود .. 
يقعد معاك ع الأكل ..
 زي اللي طول عمرهم أحباب 
وحبة حبة هيبقى عنده مکان 
في كل اوضة وعنده ريحة وشكل
 هتسيب ايديه علامات .. 
فوق الستائر والحيطان والعفش
 مرة في علامة مكان دماغه على المخدة
 مرة تانية في ريحة جوا الفرش 
حتى مكتبتك حبيبتك
 اللي انت دخت تلم فيها سنين
 هتبقى شبهه
 وذوقها من ذوقه
 حتى الصور .. 
كل حيط في البيت هيغير البراويز .. 
المتعلقين فوقه 
وهتراقبك عيون تانيين
 هتراقب عاداتك
 و قلبات موداتك
 وشكلك في المتاهة وانت هایم 
بين حيطان الدنيا وأحضانها 
كل ريحة هتختلف
 حتي صوت الدوشة جوه البيت 
في ليلة غير كل الليالي 
هتعيش فاكرها مهما قلت نسيت 
اللي شقلبلك حياتك .. 
وقاسمك الأيام .. 
وقاسمك الأحلام .. 
وقاسمك العالم بأفراحه وأحزانه 
هيمشي فجأة بدون کلام 
من غير ما حتى يقول سلام 
و كأن كله كان خيال
 لا عمره كان 
ولا الليالي عمرهم كانوا
 في الوقت ده .. 
لازم ترتب البيت من جديد 
وكل شيء يرجع مكانه
 تنضف الحيطة
 تغير الاقفال
 تكسر البراويز 
وتكسر وياها الاماني
 وتكنس كل حاجة
 وتمشي زي الحياة لقدام 
وتبدأ حياتك من هنا .. 
من جديد تاني

نشيد للحب - ماريا ميرسيدس كاررانسا

قصيدة هتموت - محمود صابر

المثلث الثاني

إيه بقي يا سيدي اللي انت عامله ده فهمنا .. إشرح وجهه نظرك 
 أنا كنت دايما بخاف من ربنا و عقابه و النار .. لكن اكتشفت إن الجنه و النار  نتيجه أكتر ما هي ثواب او عقاب 
أنا لما أحط إيدي في الكُبس .. مش بتعاقب إني أتكهرب .. لا دي نتيجه ! الجنة و النار حالة أكتر من أن هي مكان 
متهيألي في جهنم مفيش نار او آلات تعذيب
لكن مجرد فكرة الغربة او البعد عن ربنا هو العذاب الحقيقي ..الخوف و الرعب و الفزع اللي الناس عايشاه بسبب إنهم ميعرفوش مين هو ربنا؟!
 و الجنه هو إنك تعرف مين هو ربنا و تكتشفه .. 
و الحالتين بيبتدوا جوانا هنا و بيكملوا معانا لفوق ؛ و هو ده اللي حاولت أعكسه في المشروع بتاعي

مشهد من فيلم بالألوان الطبيعية

مجرد رسالة صوتية #2

هوس - ضحكتك ناقصة "fête de la musique"

(رقصة الكلب - فؤاد حداد (إلقاء عصام شوقي

لا تهجرني لا تنساني

العشوائية، التشرد، اللامعنى والمعنى، التيه، والحب.
كل هذا هنا.

نُص النهاية - محمود صابر

mahmuod saber