حواديت عزيز

قضيت ليالي زي ديا كتير
مش فارقة غير تقل الجسد
وقلة النسمة

مش فارقة غير 
الضلمة صاحبتني الليلادي
والقمر غايب ماجاش
والمروحة بتلف في مليون اتجاه
زي المصير 

سقارة يا سقارة يا وجع 
مصر القديمة
يا وجع روحي ونوحي 
في الليالي الأليمة

قضيت ليالي زي ديا كتير
بس الليلادي الروح اخف من طفي السجاير
من نظرة عينين عاشق
من أنين 
الليلة روحي اخف من كل السنين 
والذكريات بتدق صدري قبل نص الليل
تفتح لي سكة قمرها بدر تمام ..
تفتح.. يضيق
وامسك زمام الأمر , .. كإني 
 ملكت أمري
لكن غريبه ما ملكتش اي شئ
...
اربع حيطان بتضيق  على عضمي 
ما اسمعش صوت تهشيم
بتطولني نار خالي ابراهيم 
ما اسمعش صوت ألمه
حاسس
, أكيد بيتألم 
 لكن بدون ما ينادي حد
دلوقتي زارني في ليلة ضلمة 
زي الليلادي
غريب... 
...
..
قضيت ليالي زي ديا كتير
فبقت بتوحشني
اطفي اللمض
واعلي صوت حرق السجاير في ايدي 
 اصوات حروق الدم
في وريدي
اصوات تنادي في عقلي  من غير صدى
تفتح ف عيني المدى
وارجع صغير
واقف قدام مراية الباب الطويلة 
ماسك مسدس خرز 
وبنشنه في صدري
وبموت

٢٠١٨
محمد السيد عزيز

مسدس خرز

كلمات : محمد السيد عزيز
https://www.facebook.com/Mohamed.Azizz 

أداء : منّة كُردى
https://www.facebook.com/Kawkabmashy?ref=tn_tnmn 

شُكر خاص لـ أحمد رامى 
اللى طلع عينه عشان يرجعلى برنامج الـ Mix :D

الهندسة الصوتية : للأسف أنا -_-

موسيقى مسلسل حكاية حياة لـ عادل حقى 


الكلمات : 


بنشد أزر ولادنا بالبسمة 
ونشد ازر اخواتنا بالاحضان
من فينا لسه ما حسش الازمة
من فينا حر ومين ورا القضبان

السجن اوسع من خيالاتك 
الدنيا اضيق مما تتصور
صوّر قلوب المسجونين صوّر 
تلقاها اكبر 
واحنا بس اصغر 

عشرين سنه 
ما يقدروش ع الهم 
والموت 
والجلد
شوف البنيه الشابكه ايدها مع الولد
شايله دموعه ف شنطة ايدها ف المناديل 
شوف الجموع 
تلقي بشر شايله بشر
بتوصل المأذون لهم بالرحيل 
...
احنا كلنا هنعيط 
بس حاسبو من وشاية الاندال لأمهاتنا 
الام مش مستحملة 
تشوف تحت عينا اسود 
ولا جفن عينا احمر وفاير 
ولا فوق شفايفنا الصدي 
من حرق السجاير
ولا مستحملين 
نقضي بقية العمر ف الصمت 
وانتظار البشاير 
نكتب كلام فوق الورق
ما يبل ريق 
ولا يطلق الحر من جوا القفص 
الأم منذ الام الطلق وهي حالمانه بولد 
بيشق كل المستحيل 
ويحوله لحلم , وفُرص
بكفاية حسرة قلبها علي اللي سافر
واللي مات 
واللي اتحبس 
واللي اتشنق 
يا جمعنا المبلول بدمع من الوجع 
حيّو الجدع 
بكره هيخرج م القفص 
اشجع كتير
اجدع كتير
واكبر كتير مما سبق 
...

احنا هنكتب
وانتو تفضلو مساجين 
احنا هنكدب
وانتو تفضلو الصادقين 
احنا هنبكي 
وانتو توزعو البسمات علينا
وتقولولنا الضحك زينه 
فـ "خذو زينتكم عند كل مسجد"
وابقو علي الموعِد 
ما تفترقوش .. 
واضحكو اكتر 
برغم برك الدم
ع الرصفان
وع الاسفلت
وتحت الكراسي 
وفوق الوشوش ..
اضحكو وما تقلقوش ..
..
بنشد أزر ولادنا بالبسمة 
ونشد ازر اخواتنا بالمغشوش 
من فينا لسه ما حسش الأزمة 
من فينا لسه اليأس ما قتلهوش

حيّوا الجدع _ منة كُردى _ محمد السيد عزيز

للسيده جمالات شيحه 
بعد السلام والذي منه 
قلبك معبق بالريحه 
وقلبي شم وشاخ سنه
انا وانتي ديماً بنحنو 
لناس محال تاني هترجع 
يمكن تشوفنا او تسمع 
لكنهم مش هيردو 
للسيده جمالات شيحه 
بعد السلام والذي منه
انا قلبي دايب إكمنه 
ضاع منه غالي من الغاليين
وبعيد يا قلبي عن السامعين
انا لسه بتخيله عايش
لكن صورته خيال بايش
اول ما بجري عشان احضن
القاني بحضن ف الفاضي
وافضل استِّف ف الماضي
وارص باقي فتات صورته 
واشم ريحته اللي فـ اودته
وافوق علي الدمع الماضي
واحسرتاه يا ولاد يا ولاد
للرب حكمه فـ اخده عباد 
له برده حكمه فـ مد مداد
لعباد نَفَسها علي الفاضي
للسيده جمالات جمالات
اتمسي بالخير يا جميله
بكفايه جرعات الليله
ومسيرنا نتقابل تاني 
ارض الله واسعه بلاد وبلاد
للسيده جمالات جمالات

محمد السيد عزيز

للسيدة جمالات شيحه

ورق كوتشينة-محمد السيد عزيز.m4a

"مزيج الأطلال + نص "قدرت اغشك بالأمل،معلش
كتابة وإلقاء: محمد السيد عزيز

..
وبعد ما دمر كل شيئ
ولع سيجارة 
وقعد يبص على الرماد في الجو
كات فرصة سعيدة جدا
لما القمر قرر يزين مشهده الدامي 
ببدر الكمال 
والمطر يحلو
مشهد ببعد الاحتمال بشوية
بس مش قاسي
كان بردو قادر يطبع 
فوق كل الخراب لمسة جمال حانية
بتخلي نار الدنيا مش حامية
وازازة قادرة تخلي البرد نار قايدة
فقرر يشتعل
في التو
..
هاتي ايدك
جسي نبض القلب لو طالع
ترجمي الدقات قصايد
او توك للشعر
تقيّد النبض اللي فاير
في خصل شعرك
وتصد فمك عن كلام لابد منه
عتاب بايت
أو لوم سيوف تلمع
تعكس شرار عينك 
فيصد عيني عن النظر في اكتمال وشك
قدرت اغشك بالامل معلش
مع انه كان صادق
والوعود ما كانتش كدابة قوي
وان القلوب في البدأ كانت مطر
وفي النهاية سراب
فطلعت في الاخر بياع كلام كداب
بيجيلي نوم بالليل عادي
و بقضي يومي زي كل الناس، 
ع الباب

ودموع بتشبك
 في كراسي باص المدرسه
  .. بتشبّر الشبابيك
..  ما نشوفش حاجة

قومي تترسمي فوق بخار المايه
زي جنيه
زي ليل البعد والغيه
تترسمي وانتي
كفاية انتي للطريق
والقصد 
والنيه 

تتمد ايد الاسطى علشان تمسحك
تنمحي الدنيا
فانمحي في ثانية
والعنه في سري.
.....
لعله خير
عيل يموت في الحرب 
او
حادثة طريق
او يتنسل من بطن امه حتت لحم
لعله خير


اعشقك
احلم 
اعيشك
اهجرك في اليم
لا احد يهتم
لعله خير
يبقى ده الهم الاخير
تنبت الجناحات تطيري
واترمي في بطن بير
بس لا "جاءت سيارة"
ولا ارسلو واردهم ، 
ولا ادلى دلوه
شوفي كام يوسف في بطن بيره
مات لوحده اسير
طيري، احلمي، وعيشي
لا تهتمي
وانا هعطشك
م البير
..

محمد السيد عزيز 
٢٠١٧


مزيج الأطلال - قدرت اغشك بالأمل، معلش

Track: RENEE S Feat. Kawtar Sadik - Samouni Salam
كتابة وإلقاء: محمد السيد عزيز

محور الكون
ديسمبر ٢٠٢٣

Self Involved - محور الكون

Music: Emm el khelkhal - Khlaed Jubran
كتابة وإلقاء: محمد السيد عزيز
----


ارتاح هنا
ع الباسطا-دي
حاسب 
دي سلمه مكسورة
خبط عليا وانا هفتح
واطبع بوسات فوق القورة
اطبطبك
 كلك تتهز
وانفضك
من لمز وغمز
ارقيك من الحاضر والأمس
وبكرة 
ان كان له ضرورة
.....
وانا 
ما بقولش بحبك
لكن
هعقدلك عقد فصوصة بريق
 فصين م المرو
وفص عقيق
يحميكي من الضلمه وم الضيق
وان لف رقابك
تلقي امان
وان لف رقبتي 
ما اكونش برئ
..
راجع من اخر الكون 
ملعون
في ايديا قلوب دايبه من الخوف
كات راسمه كيان حواليه بتطوف
بتهمهم بالنبض المألوف
وتضخ الدم في عب الكون
والكون ملهوف ومهوش فاضي
بيلف يلف
وكعوبي انا دابت ع الفاضي
والشمس تحف
تلسعني قلوبهم مش شمسك
وان كنت بشوفك.. مش لامسك
يا حلاوة بكرايا وامسك
وحلاوة روح بتروح عندك
ارجع عطشان..
انا مش هقول بردو بحبك
لكن
 هفصصلك رمان
يروي الزمن لو كان عطشان
ويرد ايد الكون عنك
وعيون الجان
..
لو روحي تسند على صدرك
القاني بشوف
لو راسي تسند على كتفك
ارجع مألوف
وان كلي يتكن ف كلك
ارجع انسان
.. 
وانا مش هقول بردو بحبك
لكن
هسأل
عن سر لون عينك في الشمس
وغربتك وسط صحابك
وكلام الهمس
وان فات عبيرك.. غطاني
القى العبير كله معاني
بتفسر السر الكوني 
و الانهيار الانساني 
..
القصيدة اتحولت غزل
من غير قصد ولا نية
انا كنت بفتح لاصحابي 
 .. لقيت جنية
اتاريني بفتح باب البيت 
على شباكك
رماني وجعي ل اقرب حضن
في شباكك
ما تخافي شوكي مبيشوكش
 ان شافك
في الليل بيقلب نور اصفر
و حنية
..
قلبك
بقى صبار يستني االليل
يمكن 
كف يطبطب فوق شوكه
من غير قصد
في الضلمه
..
..

محمد السيد عزيز
يناير 2024

هفصصلك رمان

Music Track: Ibrahim Maalouf Naga (feat. Adnan Jubran)trio Jubran
كتابة و إلقاء محمد السيد عزيز
......

في المحنه
طبطب ع اللي بيبكي
وخاف ع الساكت
واحضن في اللي يخاف
الدمعه ان نزلت .. فهتجري
اما اللي دموعه ما نزلتشي
هيعيش خواف 

الدنيا 
بتعري  الروح وقت المحنه
وترص عيال آدم 
جوا الفتارين
انتو  سبقتو واحنا اللاحقين
والموت شواف 

تدلق القهوة الساقعه على دراعك
تلقاه سقعان
كام حضن الليلة مكانش معاك
كام ودن بتسمع دب النمل
ومش سمعاك
كام ليل بيعدي
وعدى وهيعدي
وانت الواقف مش بتعدي
زي المانيكان
.. 

من اللاشئ
للا شئ
لشبه حروف
جايين نهد الدنيا
بدمعنا المولوتوف 
راجعين نداري سؤتنا
فساقتنا الظروف
قومنا سرقنا الموسيقى
من ابراهيم معلوف
وعشان حقوق فكريه
هيمسحوه قريب
ده ما يمنعش ابدا
ان ابراهيم طيب
بيحتوي الانسان
وبيعمل المعروف
...

بنستنى الغروب لجل نتحرر
م العيون
نظرات البشر سكاكين
من تحت جفون
بتسرسب م الخوف خوف 
وتبص لكن ما تشوف
وتلوم وتعاتب
وتصالح
او تطرح  ملح
وساعات بتطبطب
وتطمن
وساعات ت ج ر ح
والدنيا
فيلم porn طويل
ساعتين ع ال loop
دقيقتين راكب
والباقي مركوب

والانترنت الغير محدود
محدود
زي وضعك لاقتصادي
والاجتماعي
وانتهاء صلاحية الوعود
..
...

بنخاف من قرص الشمس
ومن ضل الشجر
وبندمن مهدئات طبية
و مكملات غذائية
الطبيعه مخصمانا
فاستبدلناها بأدوية
تعدد الشخصيات لانفصامي
مش الزامي
لو كلها دراميه
وتعدد الحواديت
بقى فيلم (porn) طويل ع ال (loop)
دقيقتين راكب
ساعتين مركوب 
والانترنت الغير محدود
محدود
محجوب
زي عينيكي على سطح البحر
وانا بغرق
في ظروف دامية
..
..
لو هطلب  حضن
ابقى شخص اعتمادي
كلمة معلش بقت غالية
في وضعنا. الاقتصادي
فبقيت تحضنهم وانت المحتاج المعلش
وتقول معلش
خليها عليا المرادي
...
لو هطلب اهتمام
 ِِ (Attention whore) ابقى 
...
لو هطلب الوصل
ابقى شخص حكاك
..
لو هطلب 
ابقى شخص محتاج

فطلبت الوحدة
ونسيوني
بتلف الدنيا
افتكروني
رجعولي في ليلة فلقيوني
مبقتش بخاف
وبقول للاعور ف عيونه
يا جمال عينك
خطفوني
وبشيل سكاكين تحت جفوني
نتبادلو سوائل عبر الويب
نتبادلو مشاعر عبر الويب
كله مميكن
فبقيت انشف من الصوّان
لو تطلب عيني 
هلين
واخلعهم
لو تطلب ايدي الاتنين
هستأذنك تقطعهم
لو تطلب قلبي 
هقولك في قلوب احسن
الناصيه الجايه شمال في يمين
في يمين
في شمال
واما هتمشي هرجع تمثال
كما كان الحال
...
دي مش قصيدة
ده ريسيت (Receipt)
خبيت بلاوي ف قلبك
شيبت
من كتر ما اتخضيت
اتوسخت بلون الدنيا الاصفر
بقيت معفر
اشبه بنهار مطلعلوش شمس
او اغبر
واختارت تفكر فترة
ثم 
مبقتش تفكر
اخترت تسنك مع ترس الدنيا
بتلف تلف
على قد الوسع اللي ف قلبك
عقلك بيخف
فنجان مظبوط
صدرك مكبوت
عقلك مضغوط
وتلف تلف
٣٣ سنه في عجلة هامستر
خلصت؟
استريح
كنت فاكرك جامد
ميهزكش الريح
اتارينا فوق جرف هار
فانهار بنا
بس لسه بنطلع التصاريح
... 
....
هذا الوضع الاقتصادي
مش محتاج صندوق النقد
ولا جامعة الدول
ولا دول النفط
هذا الوضع العالمي 
مش محتاج سقوط امريكا
ولا السوشيال ميديا
والانترنت
هذا الوضع العربي
مش محتاج قائد عربي
ولا مسواة الراجل بالست
هاذا الوضع الشخصي
مش محتاج هذا الكم
من المهدئات
وجلسات الثيرابيست
كل الاوضاع دي
محتاجه
 ٨ ٨٪
او 
٥٪ 
at the least
....

فيلم بورن/ عجلة هامستر -Hamster Wheel   
محمد السيد عزيز
20 يناير 2024

Hamster Wheel - عجلة هامستر

يا طرح البحر يا هدية
يا حورية
وحرية
وساكنه القلب 
جنيه
اليكي القصد والنيه
و فرحة قلبي و جروحه
يا راسمه بكره وطموحه
وخالعه الجسم من روحه
وكل مشاعري محنيه

يا نور عينك
وظلماتي
بدندن لحن مش عادي
بيسري في ليلي بآهاتي
يصحي الطيبه ف عينيا
وجفني يصلي في الرايحه
ويذكر ربه في الجايه


احب مقولش 
ولو سيفك بيسرقني
انده عليكي الليل
مفيش غير قلبي يسمعني
ارسم خطاوي فوق الرمل
يرسم عينيكي الكحل
يدبحني
يتهز حلقك 
يهز القلب
يوجعني
وانا ٣٤ سنه تعب
خزلان
لو مس قلبي حنان
هيتفتت
يصبح رماد
يكحل عيون رمشك
يرسم خطاويكي اللي جايه واللي مش جايه
لو بس خطوك ناحيتي
انا كنت ارقص طول الليل
يطلع نهارك احضنك
يتكر عمري في سحبة المناديل
يتدارى اسمي في لهفتك
لو شوفتها
كنت ابقى صاحب بار
اصب قلبي لعطشانين العشق
اشق صدري بطول طريقي اليكي
وامنح لكل العابرين اسمي
واقولهم اسمك 
علشان يحبوكي ربع المحبه ف قلبي ليكي
وامسح رخام البار 
بقمصاني
من امتى كان الحب له اسباب
بنحب
بنعاني
هتحبني؟
لا
هتسافر
هتنساني
هتحبها؟
باقي العمر هحبها واخلقها طول الليل
زي القصايد 
فصلت
في مجملي الانساني
زي الخطاوي في رحلتي
فوق كتفي اشيلها 
جوا قلبي
في عنفواني
واغرق 
يسحبها رمش عينيا على شطي
متغرقيش
عيشي
كوني ولو مش ليا بس تكوني 
في الوجود 
نسمه في ليالي الصيف
وردة ف ربيع
خماسين خريف
وانا في الشتا راح ارسمك
جكاكيت في حيطة اوضتي
انظرك
لو قلبي فات فيه برد الليل
ينظرك
لكنه يفضل يستحي يقوم يلبسك
وان كنتي طيف
وان كنتي ذكرى عابره في وسط السنين
اشعر حنين الآن هيهد حيلي
هيرسمك قدامي كإنك
حق وحقيق
كان نفسي نصبح اي حاجه
وأي شئ
ايه العمل يا صديق 
معرفش
خليني احبك في ليالي الضيق 
خليني جنبك
مش عايز منك اي حاجه
مش عايز منك شئ 
..


محمد عزيز
مايو ٢٠٢٤

مش عايز منك أي شئ

طحان

باكتبلكم من اوطى نقطة في العالم
من روحي الضلمة
باكتبلكم بارادة حرة
من غير ورقة وقلم
غير ميكروفون 
وخشبة المسرح تقول:
يا ايها الناس اسمعو
لم يسمع احد
يا ايها الناس اجمعو
لم يجمع احد
لكن ما زلت بقول واغني 
على خشبة المسرح
تمر ذكراكي ف خيالي اسرح
ما اعرفش ايه خلاني اعمل كده
لأ
عارف
انا كنت ضعيف وخايف
كنت بترجى الاجابة وانسى السؤال.
انا ابقى ايه ? 
وهبقى مين ?
وشايف نفسي فين كمان خمس سنين ?
سألتني (الاتش آر) بمنتهى الانانية 
وسكت بمنتهى الاهمال
لكن في عقلي تدور افكار عيال
ماعندهاش تربية
عن شكل رجليها تحت المكتب 
ولون الجزمة 
دلوقتي اقدر اجزم 
اني كمان 5 سنين 
هبقى كتاب مالوش لازمة
يسندو بيه كعب ترابيزه بتميّل 
مع السنده
.. 
انا مش عايز ابقى زي عم محمود
ومش ببحث زي بدر عن الخلود
ولا بهرب زي كيفي من الاله
ولا ازمتي في بنت حبيتها وصدتني 
فصدتني
- لكن -
هذا اقرار مني بندالة منهجي
وخذلاني لخلاني 
وهوان العشره على ولاد الحلال ، مش سهل
مش سهل برد الفرشة
كل اللي اتعلقو بطرفي ، 
اتعلقو بقشة 
انا ولا حاجة
انا اللي اخترعت اللاشئ وحبيته
وانا اللي نهيته بايديا دول
معرفتي بالحياة 
اني جيت في رابعه ابتدائي
حبيت ايه احمد
واني كنت خلفة صالحة
من اب صالح
وام صالحة
واني كنت فالح في العلام
واني كنت اول اخواتي
واخرهم باين
مش عارف
بس بردو كنت خايف
و أبله جليله 
كانت توصلني المدرسه بدري
درءاً لخوف امي اني اتوه
كنت بحبها لكن 
خليت امي تقطع رزقها
لما العيال افتكروها امي
وبقت امي توصلني
واقول للعيال امي اهي امي اهي
ما اعرفش ايه حصل
خلاني استعر من نفسي زي ابله جليله
من جوفي .. من خوفي 
و قلة حيلتي ، وهدوئي الكيّس
ما اعرفش ايه خلاني اوصل كده 
انا كنت كويس
كنت كويس
كنت بعرف انصح الناس
وآويهم 
كنت احب القعدة وسطيهم
لحد ما بقيت من غير قصد بأذيهم .. ويأذوني
اعزيهم .. يعزوني
وكنت 
في تانية ثانوي او في اولى
مش فاكر
لاجئ في بير مسعود
زي العساكر 
كنت بترجى نظرات البنات
ونظرات البشر 
دلوقتي نظراتهم تاكلني
*قرنفلايه تحت ضرس العقل* 
وانا معدي في وسط البلد بالليل
ما اعرفش ايه حبك لوسط البلد
ما اعرفش ليه حب البشر كلهم لوسط البلد
مالها اطرافها؟ .. 
بعيدة .. و غريبة زينا 
يمكن عشان كده بنلملم نفسنا 
من حوالين البلد
ونروح وسطها
عشان ما نحسش الغربة 
والغربة ناشفة ،، بتفرّط 
وامي لسه كانسة الارض م الفرافيت.
...
مسيري هوصل للي مش عارفه
ومسيري هبقى اللي مش عايزه
زي ما بقيت كده بالظبط
انا هموت بنوبة ذكرى
او بنوبة ضغط
مش عارف .. بس هموت
دي رحلتي بردو 
من الكيوت 
للاصفر البهتان
دي تكملة قصة امبارح
بس انا كنت تقريبا غرقان
ولسه بصحى اهو وبفوق
و انزل لتحت
ما اعرفش تعبان ولا ارتحت
ما اعرفش انا فين
ما اعرفش انا ليه
ما اعرفش ازاي
عليك السلام يا ضيف احمد 
والرحمة والبركات
وتعالى نوزع قُرص ، و نشرب شاي 
رحمة على روحك ، 
على كل اللي مات
اهو انا دلوقتي اقدر الليلادي ابات 
مرتاح
او شبه مرتاح
وبكره راح يطلع صباح 
هيثبتلي ان اللي قولته ده كله كدب 
وكل اللي هقوله كدب 
كلها محاولات 
لايه? ما اعرفش
بس بنحاول
بنحاول اننا نبقى اي حاجة 
عشان نعرف نداري 
طراطيف صوابعنا الخناجر
لو غرزناها في قلوبهم
هيصيبهم عمى في عينيهم
ويصيبهم شلل ف رجولهم 
معلش معلش معلش انا اسف
انا اسف اسف اسف معلش
انا اسف يا كل الناس
على جوف القلب وقلب الوش
اسف لخالي ابراهيم 
على رميته محروق 
اسف ل خالي حسين 
لما مات مضغوط
اسف يا خال مجدي 
على حادثة الاسعاف
اسف يا حاج سيد 
على وقعتك مكبوت
ودورة الكون بعدك دورة كاملة باستخفاف
كان ما حصلكش حاجة
اسف ل جدي 
اللي كان نفسه يشوفني رفيع 
عشان كنت بصعب عليه
تُخني بيدرّله الشفقة ف عينيه
ماعرفش ليه شافني مُدّر للشفقه
ماعرفش ليه شافني 
ذو شأن 
كل اللي شافه ما صابنيش 
لكن دوشني
ما اعرفش ليه ما ودعتوش قبل الموت
ما اعرفش كنت ببكي على سريره بجد 
ولا كنت بمثل عشان عمي يشوفني
فيحسني بحب العيله اكتر
ما اعرفش ليه بصغر دلوقتي او بقصر
ما اعرفش ليه بعد نبؤة كل العالم
اني هكون احسن واحد في العالم
دلوقتي بدمر كل قناعتهم عني 
ورؤاهم الساذجة العبيطة
ربما غرتهم لمعة خدودي 
ونظراتي الحويطة 
ربما غرتهم نفختي الكدابة 
ربما 
بملك برائة ف عينيا ، بس جوفي
ما فهوش برائه
في حاجات لو تطلّعو عليها
هتجحدوني بالحيا
او يمكن ترؤوفو بحالي
تمدو ليا ايديكو عطف
وعينيكو شفقة
انا اسف
انا اسف
هنام دلوقتي 
وبكره الصبح 
هكمل حياتي زيكو 
وتصبحو على خير 
ويبعدني عنكم في المنام
اول واحد بيصحى 
واخر واحد ينام
سلام
...
محمد السيد عزيز

انا كنت كويس

الصيف
رحلتي من كابتن الى عمو
بالنسبة لعيال الشارع
ريحة درة مشوي ويود مكبوت
بتردك عيل وياهم 
كام سنة جايين والشيب هيحش سواد الشعر
كام عيل راح يفضل عيل
وينادي عليا يا عمو
عديني الشارع
كام قلب يدق عشان خاطري
وكام بسمة هتفضل في وشوشكو
اذا فت عليكم بالصدفة
كام مرة هحاول افضل 
طفل كبير
كام مرة الناس تستحمل
قسوة صدري
كام مرة هزوغ قاصد
من شيب الشعر ودوب الكعب
وتجاعيد الدنيا ف عيني
كام مرة وكام مرة فاضلي
ما فاضلش كتير يا عيال 
مافاضلش كتيريا عزيز
الحق جرب عيشة العواجيز
...
ريحة مطحن بن تطل في بلكونتي
زمارة غزل بنات
سرسوب الشمس الطابع فوق حيطة الصالة
رغم رطوبته
مين فاضل متعشم في الخير
طبع طفولته
مين حب العيل فيه 
مين قسى عينيه ؟ 
مين ضامن يلقاه في الجنه
ضمن الولدان 
مين عاش انسان زيه راح يفهم لكن
بكره هيزهق
والدنيا تراهن ع الزهقان
لو رمى طوبته...
..
عيال كتير متشعلقه ببكره
وعيال كتير مراهنه ع الصدفة
وعيال كتير تحب ما بتكرهش
وعيال كتير عايزه 
لكن خايفة
وعيال كتير تكبر لكن بتموت
وعيال كتير تفضل عيال
وتموت
وعيال تخاف من بكره 
بس الأمل
بيشد ايد الدنيا بالعاافيه
ايد العيال دافيه
وايدين كبار ساقعين
هتشوفنا في الفتارين اذا فايت 
فوق جسمنا قمصان من الغالية
تخرقها نظرة موظف جيبه مش فاضي
بس العيال طول عمرهم أولى
انا العيال اسقيني وقت الحر
اغرسني لو قامت قيامتي 
فوق شطوط الملح
اطل من فوق البشر صفصاف
أضل وقت الحر على روسهم
اتلقى النسيم يطبع على خدود العيال
ومافيش ثمر هيطل من غصني
ولا حد دافن كنز فوق جدري
...
منسي يحب الفكر ف الأموات
يرجعهم صور اطياف 
تدوب ذكرى
اعمى
يحب البص ف عيون البنات
وسماع غنى صدورهم اذا حرة
سلام عليكم
وعليكم سلام
يا ولاد بترمي الشبكة ف الموجة
تطلع بلا محارة ولا اسماك
تطلع لنور الشمس معوجة
الدنيا سنت سنة
واحنا سنينا السنان
نعض قلوبنا في الضلمة اذا خوفنا
نقسم ضلوعنا اتنين على جوفنا
ونداري دمع اتدارى
في الاركان
...
الموج يهد الحفرة لو حافرينها ليك
يعكس صفار الشمس جوا عينيك
يلمس خدود السمرا تقلب حمار
وعمار قلوبنا طول ما فيها النور
وعمار يا دنيا
طول ما فيكي بحور
وسلام عليكم
واحنا لينا الايدين
تترد باردة تتلج 
الدمع ف عينيك
ينزل ازاز مكسور على الأسفلت
مين رد قلبك بعد اما كان بيطير
مكسور جناحه بيشحت الانسان
....
محمد السيد عزيز

عيال الشارع

مش كفاية نشوف بنات حلوين
عشان يحل عن رقابينا
مر الزمن
مش كفاية نكتب قصايد 
تبل ريقنا في حر الخريف
انا مش اخير
وانتو مش اول بشر بيخافو م الدنيا
فتعالو نستسلم للـ "بروزاك"
واثارة الجانبية 
نشد برد الليل على صدورنا
يحضن عضامنا يرد فينا الروح 
البرد شاهد زور
باننا عايشين
والضلمه خبت براويزنا 
فوق حيطان البيت
يخبطنا خيط هربان
من فتحة الشباك
ياهل ترى نلحق نهار العام الجديد ؟
ولا الخطاوي تزقنا تحت الرصيف 
100 اختيار بيزغزغزالعقل العجوز 
والكلاكسات راجة قلبك 
امتى الكاوتش هيحضنك؟
لكن 
بنخاف نموت كافرين 
انا مش هصارع على مطرحي جوا الحياة
انا عايز اطير
بره حدود عقلي وحكاويكم
بره الحياة البرزخية 
بره الحياة 
والموت
بره عذاب القبر 
والأخره 
وحبل الصراط , والجنة 
والملكوت
انا مش هصارع على مطرحي جوا الحياة 
يا يجيني بهدو وف سلام ..... يا ارحل 
مع الماشيين 
خدوني وياكم رافع راية استسلام
كيس المخدة الابيض المبلول
يا دنيا لم تفتح دراعها الا لو تضرب
يا دنيا لم تضحك في وشي الا لو هتغيظ
خايف اعيشك
بس 
خايف اموت , 
فبعيش

محمد السيد عزيز

انا مش هصارع على مطرحي جوا الحياة

ماشي كإني عارف السكة

كانت 
الدنيا دايرة بزمبلك
كانو عيال
كنت الملك
دلوقتي بهرب م النبي 
ما بصليش عليه
اصب عرقي مع البلح
وارفعها سِك
الِّف تُقل الدنيا على صدري
لا يصيبني برد
اهرب 
اشتري لحبيبتي ورد
تدبل معايا 
اما ادبل معاه 
اوصل حدود التراقي 
القى ايادي تشب
ارجعها مشي زي من هنا
لحد العِب
تتلف ساق على ساق
فاتكعبل في القسا
لسه ؟
لساه
لسه الايادي اهي بتكتب 
...
فات الربيع ع الروح 
لم الشجر 
والورد 
والنسمات
هزت ايدين (اسراء) ف كتفي
(قوم 
بابا 
مات)
هزة الاسفلت في يناير
بالدبابات
صوت رعد في يوليو
في دماغي بس 
لا صوت طلع
غير همهمه
على همس
دلوقتي نقدر نسيب السطر ده وننزل
دلوقتي نقدر نسيب الرحلة دي ونتوه
هزة ايديكم
وانتو بتحطوه 
في مثواه الاخير 
في صورة ف التابلوه 
في ملامحي
وف بدل جوا الدولاب
وخطوتي كل يوم ع الارض 
بلا اسباب
...
هتبقى حدوته حلوة وملتوتة
هتبقى النهاية مأساوية يا رب
لو بس تسمح ما تخليهاش ممطوطة
وتنتهي قبل انتهاء الحرب
سلاحي مش مسنون 
غير على رقبتي
وضوافري ما بتخدش 
غير ايدي
الموس حافظ طريقة لوريدي
والخوف عظيم 
بيرُد ايدي عن ايدي 
....

فتحت صدري على الدنيا
قولتلها ها ؟
قالتلي ها هاهاها
دي تجربة 
مهما تجرب تفضل الخسران
انا قولت طيب 
مش هلعب
هقسى وهتعب
تلاعبني تغلبني وتكسب
وانا مش ندمان
الشق حط ايديه فيا
وانا وحديا
بغني نفس الأغنية
فات ليها زمان
.....
كتب على قبره: 
" اخيرا
هاأو,,, خليكو عايشين"
اتحول صوت بالليل يسري
ف قلب الصاحين
ما بقاش بيخاف لا نهار يطلع
يكشف عيبه
ما بقاش بيخاف يتحول مسخ 
بالاعيبه
مابقاش بيخاف ولا مين هيقابله
ولا يسيبه
مابقاش بيخاف من بكره الجاي بايه وبمين 
ما بقاش بيخاف م البني آدمين
مابقاش بيخاف
ما بقاش

محمد السيد عزيز 
..

بغني نفس الأغنية

ممكن 
لو مافيهاش اساءة ادب 
تنقذيني اتنين وجمعه 
وتلات وحد 
وانا هعرف اكمل باقي الاسبوع وحدي
من غير تعب
ولا حد
علشان انتي ايدك انعم 
وشفايفك ارق 
وانا جسمي باظ من قلة الاهتمام
ومن الأرق
وعينيا حمرا من الدخان

ومن البكا بالليل 
في الشق

ومن النظر في عيون بنات حلوين
بسهام اقل 
من اللي مغروسه في صدري
لكن أدق

ومن النظر ف عيون يتامى الأب زيي 
اعرف اطبطب على قلوبهم بعيني 
وبكف ايد وهمي 
وبكلام زي العسل لو قلبك حجر 
هيطيب 
ويرق

ما بقاش ف قلبي حبيب غيري 
انا .... أنانية
والدنيا دي ضيقة وكبيرة
ومدورة 
ومتنية
مالهاش طريق سالك على ركن كان جواك
قادر يضمك
كل الطرق بتوصلك 
لأمك
وانت الوحيد العارف الذنب القديم
فتخاف تضم 
وتخاف تحب 
وتخاف تعيش
وتخاف تموت 
مبقاش في قلبك بيوت 
غير بيت العصافرة
والشوارع السد
والذكرى ام ريحه

والضحك من غير سبب ع النكت القبيحة
وحاجات كتير
لو قولتها
هتبان فضيحة
وحاجات كتير فضلت ف قلبك 
من وانت عيل
بيوقفوك في الجون علشان تخين
ويعلموك تبقى لوحدك
وتبقى حزين
يدخل فيك جون, جونين 
تلاته 
اربعه
تفضل في عينك طيبة قاعدة مربعه
بيشوفها بس اطفال المدارس
فيضمو نظرة عينيك بضحكة من البريئة
وده كفاية

محمد السيد عزيز

لو مافيهاش اساءة أدب

كنت قاعد
كنت واقف
كنت زي الصنم
فيه مواقف صمتنا بيكون لغم 
لا مجال للحس
او للألم
قومت غازل صوف على ايديا 
حك خدي في مسحتي عينيا
انظرك
بعينين بتشلب دم
امشي
رجليا تقطّر دم
احضنك تتلف ايد على ايد
المسك
بالوهم
والتنهيد
امشي م الشط ده للشط ده
كات جميلة السكة 
متسفلتة
كات جميلة البنت
مترددة 
وال عيال مكبوتة في ضهري
صحيو يوم ثايرين على صبري
يجرو ويزعقو 
وانا بجري
سقطو من جيبي على الاسفلت 
كنت صايم عن حاجات دلوقت
بس كلت ولما كلت ندمت
بس كلت ولما كلت 
ببص
انظرك
بعينين بتشلب دم
امشي رجليا تقطر دم
احضنك
حضني ده يبقى الكام؟
لم نعد وسيبنا للأيام
تحسب الفاضل على بكره 
فيه كلام محسوب 
وفيه فطرة 
واحنا لو هنحب مش هندوب
فيه حذر لندوب ما نتجمعش
واحنا لو غيبنا نقول مكتوب
واحنا نتفارق عشان ما نفعش
فيه امل 
طبعا 
ماهوش لينا
احنا بنطبطب على ايدينا
كتفنا بيخاف من الطبطبه
تسري فينا رعشة 
على كهربا
عودتنا الدنيا ناخد حذر
وبسلامة نية خوّنا
نص بسمة من شفايف القدر
نترعش ونكش في ديلنا
توبنا عن حتى النظر 
لعيون بنات جيلنا
انظرك
بعينين بتشلب دم
امشي رجليا تقطر دم
احضنك
بقعة في صدري العليل
كنتي طابية 
وكنت عقر وزير
فيه روتين في الحركة بس امان
والحياة بالشك.. والسجان
تدفنك 
لو حي في الفوازير

محمد السيد عزيز

عودتنا الدنيا ناخد حذر

اسأل عليا لو باقيلي سؤال
وانا هبقى اقولك كله عال العال
وفوت ف روحي 
زي نسمة ليل 
وفوت في قلبي 
زي خطو عيال
هسأل عليك انا لما افوق م الشوق
واحضن ايديك 
اول ما افك الطوق
وهفوت في روحك 
قلب باكي عليل
وهفوت ف قلبك
باقي طفي حروق

معلش نابي طويل 
شوكت قلبك يا ابن الليل
والضلمة بلت فرشتك 
والأرض
انا كنت فايت اميل
وف خطوتي تنميل
ونَـفسي ريح خماسين
بتشيل وتحط
مش شرط تبكيني كل اما تجيني
ولا فرض تمد ايديك 
تمسح عيني
علي عيني الحزن ده كله 
وعلى عينك
ادعيلي المولى يعيني
وهيعينك
عشان انت جميل 
..
فايت على قهوة قديمة
ما لقيتش حد
كل الكراسي الفاضية 
مليانة شوق مألوف
وانا كل ما اطلب شاي
انساه يبرد
والسكر داب ف الكوباية
من كتر الخوف
تسع سنين ياما على الخواف 
قد الغموس من قلبه الحاف 
وكتمان الصدى جواه 
تسع سنين ياما 
في الضل مش متشاف
من غير لا صاحب ولا اتباع 
"فاتّبع هواه"
تسع سنين وحدة 
بتحول روح صافية لآلة
تسع سنين مادة
بتحول روح حلوة لأداة
..
اعرف واحد
جرب عمر بحاله يعيش انسان
مالحقش يعيش
بنجرب كل ما نلمح نور م الشيش
ونحاول نكره قسوة ليل 
ونصاحب نور الصبح
فيقرر ما يجيش
..
اعرف واحد 
جرب عمر بحاله يعيش انسان
مالحقش يحب 
كل اما يقرب م الحلوة
تطلع, فيشب
كل اما يقرب يلمسها
تهرب , فيشيب
والشيب بيزود ليستة
"ما يصحش" " والعيب"
كل اما يطول طرف ضفيرة
يتساب
فيسيب
ويغيب بالسنة في الأوضة قصاد أفلام
ويعيش احلام بطل القصة
لحد اما يخيب
فيطفي الفيلم
ويخش ينام..
..
اعرف
اشوف الحكمة في المأساة
واعرف اطبطب ع اللي ليل قساه
واعرف اشوف اشباهي وانا قاعد 
على قهوة قديمة
واعرف امد ايديا واساعد
وبنية سليمة
وبعرف ارقص على جرحي 
والرقصة أليمة
طول ما انتي سامعه اللحن وحباه

محمد السيد عزيز

معلش نابي طويل

29 سنة 
ماشي بدور على ودن تسمعني
واما لقيتها
لساني قرر ينتحر زي الفرص 
رن الجرس ماعرفش فسحة ولا دي المراويح 
ده انا لسه كنت بعافر اخرج 
من بطن أمي بصرخة 
نزلت زي الترجمة في أوضة الولادة 
على السرير من تحت 
"مش عايز"
يا ترى يا فندم انت بتفكر ف ايه ؟
مش عايز ايه ؟ 
وليه يعدي الحلم يتمختر
فستان سواريه 
يطرف عينيك الحمرا لون دمك 
تنزل دموع زي الزعل....تبكي من الأول
بكره هتنشف زي اختها ف كمك
تنزل دموع زي الأمل .... تضحك من الأول
بكره هتنشف زي اختها
وأمك 
والليل اكيد راح يجي بعده نهار
بردو النهار راح يجي بعده الليل
وده صاحبي اللي اتحدي عشانه قرص الشمس
حسبه تلخبط 
زي الاعاقة المجبرة ع الشرف .. 
زي الدموع الناشفة في المناديل
دموع ترف
احنا اللي فات من ذكريات بتدق في قلوبنا الخزف
تخلق شروخ باينة على وشوشنا الرغيف
تحرق عينينا النار
دي نار شوقنا
ولا دي نار وخلاص
خلاص كبرنا بدون خلاص 
والطفل اللي عايش جوا 
ما يلزمنيش.

إعاقة مجبرة ع الشرف

انسان على الفطرة اللئيمة بنت الدنيا
والدنيا فانيه يا فاني يا ابن الموت
وقَّفت خطوك مشي ثانية بثانية 
اخرس يا أخرس 
دنيا بنت سكوت
عودت نفسك ع القعاد وحدك
بتخاف لتخرج 
تمشي وسط بيوت
الدنيا مش عايزاك ولا الاخره
مفيش قعاد
ولا خلق متاخره
والدنيا نكته وبنت عاهره وساخره
مش بنت بنوت
..
عندي سؤال جوابه مش معروف
احنا اللي موتنا مش قدر
كان خوف
احنا اللي موتنا 
كان عمل معروف
خلّصنا منّا وخلّص الدنيا

انت اللي بتنقي من بين الشجر
التوت
معدش فاضل لينا سُكنى بيوت
هنا الفطرة بتلعب دورها في الاحباط
معملش حاجة غير سكات في سكات
صحى بالأمل 
قام مات
ده مش عبث
ده بس م الازمات
والدنيا ماشيه
واحنا اللي واقفين بالعرض تحت الباط
قلقان ؟
بتتحدي الملل بالملل
شكرا على القلب الكبير قوي 
قد الأمل
الدنيا قررت تنقي قلبنا 
فيعيش
بس احنا فقدنا القدرة ع التغيير
مش هنتهي
مش هخلص
لسه فيا كتير
اخر نفس
اخر سيجارة مكتومة
منفسة
بتخرّج التعبير 
وبتسأل ايه العمل ؟

كان السلاح ابيض
والنهار اسود
كانت الدنيا بنت كئيبة بس مش بنموت
عايشين بنتنفس 
والدنيا باب ورا باب
كام كف بيخبط 
واحنا اللي مش فاتحين

الفودكا مش دوا وانت اللي مش سكران
نفس داخل 
نفس خارج
مفيش ضيوف وجيران
جمهور وبيسقف
ومش انت بطل الفيلم
كان النهار بين الخيال
والعلم
تسعه وعشرين سنه وكام حلم
بكره هنطلع بس بكره يكون
وانا مش ٱله علشان يكون فيكون
وانا مش اله 
ولا بشر
ولا قزم

الساعه واحدة وربع
بكره اكيد هرقص معاكي 
وما ترقصيش
بدخل في حضنك طفل
وما تدخليش
انا قلبي كان ازرق فلوماستر بايظ
بيشخبط كل حيطان البيت
بكره هيكبر
يعرف ان الحياة 
مش زي ماهو عايز

كان ليا حلم. كبير وانا صغير
لما كبرت ناسيه
ومش ناسي
كات صدفه مريبه 
و جيت عافيه
وقاسي

الفودكا مش دوا العيان
وانا مش سكران ولا بكره غريب
انت الكئيب 
والدنيا فاتحه دراعها باصرار
وبشكل ومريب

انت اللي مش عارف 
ومش معترف بيه في دور النشر
عشان مفيش حبيبه
مفيش جمهور
مفيش تسقيف
الليل بيشطب وانت المستعجل وسخيف
انت البيوت 
والناس ماهيش ساكنه
انت الامل في العيون
ومفيش عيون ساكنه
ولا فيه صديق ولا ضيف 
.....
احنا اللي ضحكولنا العيال
وحبونا التلامذه
وكرهونا الكبار

احنا اللي لسه صغار
وقلبنا صغير
ولسه بنحاول نغير الدنيا 
فنتغير

لسه الحياة بنت النكته العنيده
احنا االي بين الهوا وبين الهوى وانتي البعيده 
وقع قلبي فدوست عليه
في نهاية القصيدة

احنا كبار 
احنا صغار
مش عارف
بس ديما كنت خايف
وما كونتيش سعيدة

حواديت عزيز

Mohamed Aziz