حميد

محمد الحسن سالم حميد

7imaid

ugool

حِمّيد

سرسار

Mazin Atta

أناشيد الزنادقة

لو تعرف الشوق / شرحبيل احمد

amzjradio's tracks - سميرة دنيا - يمة أنا زولى ما جا (made with Spreaker)

عبدالخالق محجوب ندوة الجامعة

الضو وجهجهة التساب

شارع الشعب محجوب شريف -الهمبريب

الهمبريب

حميد - السرة بت عوض الكريم

السرة بت عوض الكريم

شأن الحق يضوي at شأن الحق يضوي

مصابيح السما التامنة وطشيش- محمد الحسن سالم حميد

فقدتك الاما نقنق    كلمات حميد الحان واداء عثمات عبد العظيم

مصطفى سيد احمد .. مريم الاخرى اوركسترا

هردت لهاتي بالغنوات محمد الحسن سالم حميد

ضهر المعزه محمد الحسن سالم حميد

يا الله ما أحلى الوطن
يا الله ما تديني يا
أديهو عمري يكون فدا
عشان تبقى الحياة المخضرة بينات اوفياء
الأرض ورث الصالحين الأنقياء
ويا دنيا مين زي المسالمين اتقياء؟
ويا الله إن زالو الرسل ما زالو منك اولياء
أقبلني واحد منهم والهمني صبر الأنبياء
على عالمي المجنون يكون مسكون محنة وحن ضياء
من ناس شموس تطرد ديوش الظلمة والضر والرياء
يا الله انا الكادح إليك طول الزمن ما بوصلك من دون وطن تديني يا

يا الله ما احلي الوطن محمد الحسن سالم حميد

في دبابة .. في دبابة
مساويكك في دبابة
أباريقك في دبابة 
و مشاويرك في دبابة
تنوم و تحس في دبابة
و عاد لي متين في دبابة
تظل معزول عن الدنيا
و مَقطِّع بينك أسبابا
ولا تاخد خبار أهلك
و لا أخبارك في زول جابا
رويدك لا يغرنك
نعيم الفيها و أطيابا
حصارك كلما طول
موايدك جفت أكوابا
نهارك و إنت ماك فلاح
سموم و هجير وتَّابة
و من النسمة التهب بالليل
بقت عينيك هوابة
في دبابة
مصاقر حالك التبدي
و تراعي عليهو جلابة
تمارض وضع ينساقط
فروع ضبلاني من غابة
تعوِّر مركب التاريخ
تعصلج دفتو وتابه
صلاحو الطيبة ما هبت
بلا حبّانا و أحبابا
يا عايق الشعب يا غافل
ضياء عمرك في دبابة
بلاك يا سيدي الغافل 
عن الأيام و دولابها
منو الفي الدنيا ما فاكر
شوارع الثورة جيّابه
منوا لفي الدنيا ما فاكر
كراع البقرة جيّابه
شنو البتش شمس باكر
تظاهر ناسا و إضرابا
و مجرد فرض يا قاصر
و إرادة الشعب غلاّبة
إذا سديت دروب الأرض
وإنطامنت علي أبوابها
فكيف تضمن سماء الخرطوم
سماها الماها كضابة

في دبابه محمد الحسن سالم حميد

الجابريه محمد الحسن سالم حميد

ست الدار محمد الحسن سالم حميد

عطبره محمد الحسن سالم حميد

عبيت زاودني الريقة من بايت القوى 
بايت القوى الوطن الدشر … 
غيمو الربط 
ساعة بقينا من الروى …… 
فرسخ مطر 
سافرت لك بأشواقي لي آخر المنافي 
بحت في كل المخافي .. 
وكست عنك في الخرط 
في التواريخ القديمة .. 
التواريخ الرؤومة .. 
بين نقوش نبتة ورسوما 
في الطنابير العظيمة 
وبين لغة مروي القديمة 
وخط .. في خط 
راجعت بك كل الأسامي .. البعرفا 
كل الجمل .. 
حتي الضمائر .. وأحرفا 
صححت بك زمني الغلط 
باختبك قلبي الشقي .. 
وبشرتو بي لقياك عبط 
يا طيبة زي شارع وسط .. 
يمشيبو كادح وأرزقي 
وممتنعة زي قبض المياه 
والمافي 
والما بتلقي 
غالبني جيتك أصادفا 
لا في المعابر والموانيء المترفة 
لا في المطارات الوسيمة كما الفراغ 
لا الأرصفة 
كل الدروب التعرفيها وبعرفا 
التألفيها وبألفا 
خشيت دغيش سِعن الدني 
المرفوع علي سيبات وفا 
روابي كان قطاع غني .. 
وشوقاً مفورن وانكفي 
قدام خطي الوجد الِحفي 
غابن صباحات القرب … 
وبقت ضلامات الجفا 
وضي المصابيح الجريح .. 
كترت علي الريح …. وانطفا ؟؟؟ 
هوي يا بنية من الغبش .. 
من حر أباطهم مترفة !!! 
وين إنتي شان نرقد قفا 
وين إنتي وين .. في يات دغش 
ما بيننا بين غيبتك كفي 
لو بق حسك في... 
هشيم دبش الضياعات والسأم 
زي أغنية شوق .. 
زي نشيد .. 
اندبي همسك زي نغم 
او خب خطوك زي شهيد .. 
رفت مسيرتك زي علم 
ما كان مهابات الصقور 
(نخت) تحت رخة رخم 
وين إنتي وين .. 
ما كان هجم ديش العجم …. 
والدنيا ضو 
وامسن سبايا الأغنيات 
العزل … ألاه … شن تسو ؟؟؟؟ 
ولا في الكفوف الخاوية سيف … 
لا في الكتوف الزاوية ضو !!! 
دلَّجت درب الأربعين .. 
براً 
وبحراً 
حتي جو 
أشريك قلت من الزمن 
واعتق معاك رقة مشاعري 
أزوجك كل الوطن 
كل الرجال الحملو أرضك بالحلال 
وأفتق سحاب العشق شو 
ولا بنتي في الزنج البجم … 
لا كنتي في العرب الأشو 
لا في شلوخا … 
ولا الوشم .. 
لا في شيوخا ولا في عو 
بل فيك غشاني الزمن … 
أداني صرصر وبعتو نو 
كوترني .. بي حبل الوخم 
كل ما انقطع تو .. بان لي .. تو 
ناقز وراك .. 
ناقز وراك .. 
ناقز وراك .. 
انترتعت رؤياى .. 
هكع .. 
ما بين أريت … يا ام زين … ولو 
وبين تبقي وين .. 
لاك في الوجود 
لا في العدم 
لا في الحقيقة … ولا الوهم 
لا زين 
لا شين 
لا البين بين .. 
يا راحة الباقالو هم 
لا عنك أفتاني الزمان .. 
لا منك انقطع العشم 
يا ريتو أغناني الكمان 
آ طيبة عنك صوتك نغم 
من أعلي ميضنة فيي 
كان أعلنت موتك للأمم 
أو .. صح بجيتك لي الرمم 
لكنو صمتك طال … 
وحان ميعاد زفافي علي الألم 
قلت أرفع أيديني وأقول … 
خاني الصبر .. 
خان وانهزم ؟؟؟ 
زي ما أتهزم كمين نبي … 
وخانت علاي التاريخ ذمم 
آ طيبة أخافك ؟؟؟ واللا اخاف 
السبة واللعنة الوبيلة ؟؟ 
تحل ورايا كما الجفاف ؟؟ 
أو ….. تار علي أكتاف قبيلة ؟؟ 
معلمي الله من عتاد .. 
يبرد حشاها .. ولا في حيلة 
بلا تأمل في البعاد .. سنين .. 
سنين .. ودنين .. طويلة 
وكيف ؟؟ وكم ؟؟ 
والإنأخذ بالدم غصب … 
مافي البرجعو إلا دم !!!! 
آ طيبة هيلة .. 
سلام 
عوافي يا أصيلة .. كما المعانا 
أو .. بديلة علي اللي مافي 
يمه أدخلي علي غنانا .. 
يا أمرقي من القوافي 
يا أحذرينا وما تخافي 
وما بنخيب حاشا ظنك … 
ينفخوها وما بتموت 
حية نارك … حية يوت 
ختي قدرك في الأثافي .. 
يوسف الفي الجب يمرق 
ضاربا ريقة اليلقي قوت 
روقي أكنك .. 
واللا كنك .. 
تاوقي في البحر الخرافي .. 
يونسك في ياتو حوت 
سمَّ ينده جوفو حافي .. 
وهطينا علي الأثافي …. 
وهبي نارك لا تموت 
يا حمامة غار محمد .. 
يا خيوط العنكبوت 
يمة كسناك ضمة مافي .. 
الدروب وين غيبنك ؟؟؟ 
في سؤالنا الضاري عنك .. 
سدن أبوبن بيوت !!!! 
والبيوت البشبهنك .. 
انكرننا وانكرنك !!! 
ننكشف لا لوم عليهن .. 
بس ها كيفن يسترنك ؟؟ 
وفي سكاتنا الجاري منك 
رحبن بينا السجون 
الدرادر والمنافي 
فينا من روَّح فدايتك .. 
وفينا من لا زال … 
وفينا 
ما في من بدل لرايتك 
وانتي في ذات السكوت !!! 
التراب يتشهي حنك .. 
السحاب عابر يفوت 
واللا يكمد للعيون 
بالغبار غمة وسوافي 
وانتي يا آخر المرافيء 
يا أم وجوداً صار خرافي 
في صحاريك داخ غفاريك .. 
من برد زمنو الرعافي 
دون كواريك .. 
مات واتاريك 
غبتي بي كل المرافيء 
يا لساريك .. لاك موافي 
لا كمان قادرين نسيبك 
نمشي في الزمن المجافي 
ما عهدناك عاد تخافي 
كانفعالات المراهق ... 
شابكة كالشجر الضفافي 
خيلك - الريح - حين تناهد 
لوحة التاريخ بيشهد 
لونا والدم الإضافي 
إلا يا وتري وغناهو .. 
راحة أنغامو .. وهناهو 
يا نبي الثورة الغشاهو 
برداً أكتر من غتاهو 
إلا يا بت جاك زمن دارع الأيام قلب 
الدفاتر والكتب 
إستحمت بالغلب 
التلاميذ النجب .. 
طيشا الفقر …. 
الغبينة 
صنت الأجراس وجينا 
إلا يا .. آخ … ما لقينا 
الجوامع مستباحة .. 
والمصلين صر جنب 
الكنائس جالبا دينا !! 
والمدينة تبيع عوينا !!! 
لي النخاسية الغرب 
لي اللحاسية وعقب 
تشتري آفات الرعب 
والهتافات الجرب 
عربدت باسم السما ... 
توكت ريح السحب 
ومن ضروعاً .. كان تكب 
كل أطفال الفقاري .. 
وكلهن في فد شخب !!!! 
في اللغة الجرسية .. سب 
في التقي النجسية .. سب 
في الوقار الفاوة .. سب 
في شعار ما ساوي .. سب 
واللا أريت ما كنا منك .. 
لا في بيناتنا القرب 
كنا أقلا نشوفو عادي 
التردي الجاي وغادي 
دسادي في النعم الزيادي 
وابن آدم بالأيادي 
لي سترة الحال يكافت .. 
غابة غابة .. 
ووادي وادي 
ينبح المسكين يا طيبة .. 
طيبة يا راحة الفتارى 
وواحة الفي الصي حيارى 
عورة الشرفاء الفقاري 
سترها ولب المباديء 
يا بنية الأجر أم خير .. 
أو نبية الشجر الطير .. 
يا رسول البسمة للأطفال … 
حبيبة نيل بلادي 
يا طليقة الغيم … 
عروس طين البوادي 
المناديل بانتظارك … والأيادي 
معبأ شوق .. 
يا طيبة .. 
طيبة .. 
طيــــــــــــ .. 
ولا حياة لمن تنادي 
بكَّاك بكيتي .. سكت برايا 
كنت حافي علي إبر .. 
بتَّ حابي علي شظايا 
من انكسار رماش عيونك 
فوق مسام سام المرايا 
من كتر تعباً تعبتو .. 
قلت ألقاك ما كفاية 
يا تكملي في صمتك 
يا أخلص بيك غنايا 
دي الحنايا وراك يبست 
ولامست عشميق الخلايا 
وبت أمسد من حروفك 
وأقتل الأيام .. قراية 
بتق الغيم .. برضو أرضك 
ما استجابت لي سقايا 
وقلت أخطك بي دمايا 
يا أصابعيني أبقي ريشة 
ويا شراييني الدواية 
وقنعي الريح الورايا 
النكع بالخيل .. محالاً .. 
يدي بي بقر الدرايا 
انتهت كل الخفايا 
وقلت أكوسلك في الخطايا 
لما في ذات لقيا حر .. 
وزاد هواكي علي هوايا 
وقمت خنتيني معايا ؟؟؟ 
اشتكيتك لي القمر 
لما أنسام السحر 
الرياحين والزهر 
شهدوا لي عليك يا اخية 
جاء القمر سواك برية 
وباعتزاز في إبرة حية 
صاح في جمعنا يا برية 
من يكن من غير خطية 
......... 
وقم رميتك بالتحية من اللي في 
فيا ….وفية 
يا معاكي تغيبينا .. 
يا تعالي وابقي جية 
للبعيشو غصب عشانك … 
والبموتو بحسن نية 
حار علينا بعد طراوة … 
وبين عيون أحباب تقية 
نبقي في كتمة وشقاوة 
وبين أراذل 
وارزقيـ……ـة 
كفاك شكية !! 
يا التشرك لي غمامك … 
وتحتك الأنهار قوية 
ما انسرق ذات ليل سنامك … 
لو قبيل كست الحوية 
كفاك شكية !! 
وما بيضيع حق لا قضية 
لو في طلاب من وراهو 
ونية بيضاء وبندقيـة

البحث عن ذاكره لوطن مفقود محمد الحسن سالم حميد

السلام ملح المشاعر محمد الحسن سالم حميد

تسجيل خرافي سفر الحسين والرضيه

الرجعة للبيت القديم  محمد الحسن سالم حميد

حكاية الضوّة بت عجبين

متقريفك*

هناك

نورا........مصطفى سيد احمد

محمد الحسن سالم حميد - لا نغنيك ولكنا نناضل - " للسلام "

انا ماشي راجع لي بيوت 
تفتح لي ادق او ما ادق 
من غير تقول الزول منو 
ولا حتي عل الداعي خير 
لا مالك الجابتك شنو 
لي بيوت بجيها في اي يوم 
ان جيت ليل ان جيت دغش 
طوالي ادفر الباب واخش 
مرات اضيق قاصر الطريق 
من بيت لي بيت وفي بيتنا 
زي خيط الدغش في ابر النهار 
او زي نسيمة معدي شيمة 
لا اش لا كش 
خابراني كلوب الفريق 
زولا صديق الليل 
رفيق حجر الدغش 
لا قطعت نوم النائمين 
لا الباري للحيشان تقش 
عند شوفتي تجري علي هدم 
في محلها الشوق يترسم 
تنجهني حتان بالاسم 
تندهني عقبان تبتسم 
هادي المخاليق مؤمنا 
بسماحة الدنيا الهنا 
كم تامنك يوم تامنا 
ولا فرق بين الضيف وانا 
غير كم كليمة ملونة 
بالالفة هليج اعتنا 
زولا يجيها في كل فجر 
ولا ان يتم كمين سنة 
تتلقي زي ام الجنا 
وترشح سحابات المني 
بالصحة00بالعز00بالهنا 
ينجيك من اولاد الحرام 
يحفظ يغتيك ربنا 
هادي البيوت مطمنا 
ودايما قريبه من البعيد 
ذي مو غريبه علي الدنا 
ماها المريبه ومابتكيد 
مفتوحة طيبة محاننه
مفتوحة لي كل البشر 
كل الخلوق من طينها بس 
كل البسيماتن تبق 
لو وش زماناتن عبس 
مفتوحة قلبا كلو خير 
شايل حمالتو بلا جرس 
مفتوحة كالفضا للطيور 
وبيوضة للصيد والتبس 
لا طبلة لاكيلون سويتش 
ولا ترابيس لا جرس 
لا سلك شائك لا ترس 
لاغفير تفاوضو ولا حرس 
لا كلاب تشمكشم جراب 
فتيش وجس 
لا اه لاسب 
وناس ست نور كتلو الكلب 
كتلوهو مجبورين غصب 
ما من نياحتو ولا سعر 
ظنو الكلب بين الفريق 
حامي البطينين اللعب 
اخر الليالي من البيوت 
قافل الطريق ساد الدرب 
لاخواتا قالت ست نور 
مادام في امان والناس بخير 
سعي الكلاب في الحله شر 
هوهيوا بعزاق للاجر 
احسن تعيش بي راحتها 
تمشي الجناين يا البحر 
ان كان تطفش للصبار 
واب عفنة تشغل للورر
الحله يكفيها الولاد 
يكفي البهيمات الجداد 
يكفي الطيور الفي الشدر 
الحله يكفيها البشر كان جاها شر 
الحله يكفيها الحصانة الفيها 
مادارت كجر 
حرس الزرائب  شن فضل 
فطن الزرائب  غير بعر 
صنت شويتين ست نور 
شالت حجر وجدعت حجر 
جدعت حجر وشالت حجر 
وقالت 00 قرايبها ذات ليل 
يمكن يجوها من السفر 
اول زول غريب حاربو الدليل 
عابر سبيل زانقو المطر 
يقصد رواكيبهم جور 
اول شي ينلقي الكلب 
اللاب يرحب لاب يبش 
وليشن يتورنا الكلب 
وليش الكلب يبقالن وش 
وكان الكلب لازم يموت 
الكفشوه حرن يطش 
وكان الكلب لازم يموت 
شان المحنة الفي القلب 
تحيا وخيوط زمن الوصال 
لا تنسلب لا تنقلب 
ومات الكلب 
وين يابيوت عز البرود 
ضمتنا كونية دفي 
ومن لدغة الصيف الغريب 
قامت حواية همبريب 
وتحت القمر حيشانا قيزان السمر
تدينا لامن نكتفي 
يا بيوت من الخاطر قراب 
ورهاب رهابات تختفي 
الاعتذارات ماب تفي 
وجيت مالقيتكم ماها في
بوابنا مو صاجات حديد 
يغسل درابزينا الرزاز 
حيطانا مو اسمنت وحجر 
شباكنا لو سيخ لو قزاز 

يا ضو جماعاتا عزاز 
ذي ماك بشر مامنو شر 
قص الدقل 
يا شيل حطيبة من الارض 
لا خوف ولفيت لا حزر 
لي كلبة الكبد ابقي هاز 
مفتاحنا مو اكتر من كشر 
ما ابوابنا من شدر الحراز 

والحيطة اقصر من وصا 
قالوها عند ساعت السفر 
وكان القطر قام صوتو راز
البيت دا بيتك يا حبيب 
ادخل مخير وما ك غريب 
انمد في اقرب عنقريب 
مبهول في حوضو الهمبريب 
النيمة يا العنابة ضل 
اغشي التكل خرمان في شاي 
جيعان اكل 
وداك التمر والزير قريب 
بايت من البارح ملان 
راقد في صدر الهمبريب 
در تقرا ديك كتب الولاد 
قلقت او طال الرجي 
كورك نقولك هوي بعاد
رسلنا المرسال نجي 
ياروق باحساس المحب 
سيد بيت وعننا ما ضهب 
الهيلنا هيلك شن ندس 
ماطال عمرا ينحسب 
في ياتو بنك وياتو عب 
يات خزنة غير خزن النفوس 
الماهلي مفتاحها القلب 
قول لابن ادم في بلد 
طالت معاناتو وتعب 
سكانو دايشين بالشرق 
واولادو طاشين بالغرب 
احنا اللي فاقدين اي شي 
في الدنيا مالكين كل شي 
بالفينا بالحيل ودا الدرب 
والتابع الصاح ماضهب 
ويا ارزقية كضب كضب 
احنا التعابة ال باختيار 
صرمتنا ترتاح الديار 
ينجم بال بلدا تعب 
نحن الطيابه الصح كتار 
احنا الغلابة اكبر حزب 
لابننغلب ولابننقلب 
والتابع الصاح ما ضهب 
اول تصب مطر العشم 
نار الوخم بتموت غصب 
عقبان ندي الفرج البعيد 
بنشوفو شوف العين قرب 
هادي البيوت ماب تتلخم 
في الحكوة ماب تنضم كتر 
لاها البتنصنع نضم 
شايلي الفصاحة من الطيور 
اليوت تغني علي التمر 
وخارتي المهابة من النجم 
مطعوم سكاتها من الصبر 
بينا وحروف الامنيات الطيبة 
الف صلة رحم 
علي رغم افات الزمن الصرمة 
حافات الفقر وحش المقادير النهم 
سيل المضاضاة المدلهم 
هادي السمر ست الضراعات الخدر 
عارفاهو من وين جا الفقر 
والحال سجم 
عارفاهو عرفتا لي بعض للطير 
وقش الواطة والسعي بالاسم 
يا حكمتا الزي كلمتا المن خدمتا 
واطاته واحدي وفد هدم 
ماها البتتكلف ستر 
مستورة خلقة ودا المهم

الرجعة للبيت القديم- محمد الحسن سالم حميد

تعال قص البلد وارجع
تعال ادي الغبش طلة
بقالا اليل غُـتى ومقنع
سترتك يا صباح الله
ضراعك مدو لي رضّع 
ضروع اماتو قطّن قط
مراكب شوفة لا مشرع 
ولا بان في مداهن شط
-------------------
تعالنا نحن من شفع 
نفك الحيرة بي حيرة
ولما  الليل يصن نسمع 
وراء الآهات غُلب نورا
-------------------
ابوى قالولنا جيبن ده
صباحات الله بخيرها
تويب امي الزمن هدا
صباحات الله بخيرها
وصباحات الله لاقيتا
لا كراسا لا قلما
صباحات الله لاقيتا
ململم في العيون الما
صباحات الله لاقيتا
تليس في شقوق بيتا
صباحات الله لاقيتا
وشيها عليهو وتّابة
 ورمت للمعزة ورتابة
مودّي التُرمة للبقرع
تباصر وكم رجا إتقطّع
صباحات الله أبت تطلع
محل خليتها تتوجّع 
في مستشفى
فِطن إندايا - جامع - سوق
محطة - ملمة - 
اكان في قيفة أو مُشرع
------------------
صباحات الله ما إنتو
دقّوا من الأرض مطرة
إنتو بقّوا من الأرض مطرة
شنو الخايفنلو يا فقرا
شنو الداخرنو في مترة
دقيقاً ما يقك الريق
وسمكةً ما في في بحرها
شديراتن بقت حطبا
وتمرةً ما تفك طلبها
وبيوتاً جنّـها المطرة
دي فجيعة نورا يا فقرا
ترف من شدرا لشدرا
تلف الدنيا كايسالكم
تجبد الكُدَّح الأجرا
ومن التعب البلا صالح 
يجبد الكُدَّح الأجرا 
------------------

تعال قص البلد وأرجع - محمد الحسن سالم حمّيد - ياسين عبد العظيم - صابر عبد الهادي

طواقى الخوف - حفل التدشين

AfArm

رسائل ست الدار بت أحمد جابر
محمد الحسن سالم حميد
محمد النصري

ست الدار

موثق للانسان محمد الحسن سالم حميد, اله الشعر عند العربان
واخرون...

في دبابه محمد الحسن سالم حميد

Mohamed Issam Bob