مصطفى إبراهيم

هيحزّموك زي الجنيه ف الأستك
هيسيبولك الفُتات
و يبيعولك الأمل ف الإعلانات
و الهجرة لبلاد البلاستيك
و ف خطبة الجمعة عن الجنة
و قُولِة استنى.. فات الكتير هانت خلاص
لحد ما خيل الحكومة..
 يدوسه عَجَل الميكروباص
 النظام العالمي بيقتل
أوقات كتير ..
من غير رصاص
الهوا ..
هيحَصّل المَيّة اللي بقت ماركات
تعددية تعني.. تعدد الشركات
حرية تعني حق فتح القفص ..
على الناس اللي ملهاش باب
الأخطبوط الرأسمالي اتساب
على الناس اللي ملهاش حظ
على الناس اللي ملهاش فرص
حياتك 
مهمة لبياعين الحلم 
وفاتك
 مهمة لبياعين القُرَص
حسابك حتى في قبرك مهم
رخصة الجنة مهمة لبياعين الرُخَص
و لبياعين الدين 
و لبياعين الآخرة اللي هتنصف المساكين
 "العالم بيتطوّر"
يمشي إسم مسرحية..
أما الحقيقة المضحكة المُبكيّة..
العصاية اللي بتوقّف و بتدوّر..
بتمشي..
من إيد صحاب الجنة..
لصباع صحاب البندقية..
لجيوب صحاب البنك...
دم الغلابة بيتحرق ف التانك...
شامم ريحتهم و انتا بتفوّل...
الغرب هيموّل..
إعمار ِبيار النفط..
لضمان زيادة منسوبات الشفط...
و ضمان بقائك عبد متسوّل...
يا زميل الكوكب المنكوب..
رَكب الحضارة ماشي بالمقلوب...
يا زميل المنطقة المنكوبة...
رَكب الحضارة كان لازم له ركوبة...
العالم بيتطوّر...
و انتا شمعة بتتحرق علشان ..
برج التجارة ينوّر..
..العصاية هي هي و شكلها بيتحول
العالم بيتغوّل
و انتا واقف ف وش الطيارات بالطوبة.. هتعيش حمار و تموت حمار...
أخرك تحس بإنتصار لما...
بتولّع الأعلام..
و تدوس على صورة إصحاب الدولار و القرار بالجزمة..
 القناة ..في نشرة الأخبار.. 
هيقولوا عنك فوضوي و قاتل..
نفس القناة وقت اللزوم ..
هتطلّعك مقتول و بتناضل..
فيه ناس كتيرة أكل عيشها الأزمة..
و ده عيبه..
إن هذا العالم صوته من جيبه.
و مفيش حقيقة صعب تتأوّل..
و دي ناس تعرف تبيع الآه
زي ما بتعرف تبيع اللأ 
الميديا بائع حق...
متجول..
بشرى لابناء العالم التالت م العالم الأول
بشري لابناء العالم الهمجي
م العالم الإنسان
العالم الحر اللي ما بيضربش ف المليان
بس بيجوّع بلاد لحد الموت
القاتل الشيك المحترف
 أبو طلق من غير صوت
فيه الجيوش ما بقوش
 لابسين هدوم ميري
و الطيارات ما بقتش بتوزع منشورات اليأس
و البنوك مش هيسيبوك تتحبس ...بالعكس
النهارده حاطط إعلانات ع التاكس
علشان عليه أقساط
بكره تتعلق على هدومك 
زي اللعيبة ف الماتشات
عالم جديد 
هتخشه بمزاجك قبل ما نزُقّك
الكهنة فيه لابسين بدل و كرافتات
هيأكِّلوك الحقيقة بمعلقة ف بقك 
و كسر حُقّك ياللي مش عايز
عالم ديمقراطي رأسمالي سعيد
الشركة فيه اقوى من الاوطان
غضبان ؟...أكيد غضبان
مربوط ف ساقية و بتجري في مكانك
مسجون و مش عارف وش سجّانك
عايز تخبّط كوبايات الحبس ع القضبان لكن هتعمل إيه ...معذور
أمريكا عملت سجن من غير سور
أمريكا رابطة الناس ف بعضيهم
أمريكا رابطة الناس و مربطّاك بيهم
تدّن في مالطا قد ما هتدّن
أمريكا هتفضل بتحب البشر جدا...
و بتعمل جِميل فيهم..
فيها الخير يا هل ترى
 ولّا فيها فلوس؟
أمريكا فيها الحلم
و بلادنا فيها كابوس
الناس تخاف
امريكا تحميهم
الناس تجوع
امريكا تديهم
تِكسي بالإيد اليمين اللاجئين 
بعد ما إيديها الشمال تعرّيهم
شركة بتهِدّ البلاد
 و شركة تبنيهم
شركة بتبيع السلاح
و شركة بتطبطب على اللي يموت
العالم بيتقسّم دول
العالم بيتقسّم بيوت
العالم بيتقسم لبني آدم
و لبنكنوت
مكتوب على شهود البلاد الممسوحين بأستيكة
أنتَ حر
ما لم تضر
أمريكا



www.facebook.com/Mostfa.Ibrahim

هندسة صوتية : رفيق عدلى
One Take Studio

البنكنوت - مصطفى إبراهيم

ما عملش حاجة تستحق الذكر
موظف عادي في هيئة حكومية
إجمالي ما يحصل عليه
الف  تلتمية و حاجة جنية
لا يعول
 و غير مسؤول الا عن نفسه
لا يبوح للأصدقاء العابرين عن أمله او يأسه
كان عادي جدا مضموناً و شكل
مش شرير و مش طيب
مش موهوب و مش غبي 
مش مجذوب و مش نبي
و لا حتى عاش قصة كفاح ع اللقمة في بلد أجنبي
تِلهم بتوع السيما يحوّلوها لفيلم
او حتى يوحش حد ساعة الأكل
م النوع اللي تستغرب لو جه لحد ف حلم
بس النهارده ف المنام جالي
واقف على الشعرة اللي بين الوجود و العدم.. 
فاتح عينيه
ماشي ف شارعهم المليان تراب
خطاويه ما بتعلّمش ورا منه
و كأنه من غير قدم... ع الأرض و كأنه
كان ماشي بس الزمن هوّ اللي ما بيمشيش
كان ماشي و احنا متسمّرين حواليه
لحد ما بلعه الضباب بشويش
يشبه بطل أسطوري و خيالي
ما عملش حاجة تستحق الذكر
غير إنه واقف لسه على رجليه


ما عَمَلش حاجة تستحق الذِكر - مصطفى إبراهيم

الشكّ عمره أطول م الحقيقة
بيموت ف بيتولد غيره ف نفس الدقيقة
و الحقيقة
أجمد م الرخام
الشكّ بيرتوي بالوقت
و الحقيقة بتغرق شبر شبر ف الأيام
الشكّ شاب زهقان م الطريق السهل
مستني يطلع بره بيت الأهل
و الحقّ أب عجوز بيمشي خطوته على مهل
الشك يمكن و الحقيقة بجد
لكن محدش فيهم بيغلب حد
زي النهار و الليل
و الصخرة اللي نحتها السيل
و النهارده اللي بيشرح امس
في البدء كان الظلام 
قبل أمّا تبقى الشمس
و سلاسل الزمن تتفك
كأن من بدء الخليقة
في البدء ما كانتش الحقيقة
و في البدء كان الشك ..

الشكّ - مصطفى إبراهيم

زي ما يكون الزمن له صوت
بيطلع جوا كل الناس بعد عمر طويل
يقول ان كل الحاجات تحتمل تأويل
و كل شيء وجهة نظر حتى الجنون
و الغلط و الصح 
أكتر من إنهم يكونوا اتنين
و الرمادي هو اقدم لون
و احنا حبة رمل مرمية ف صحاري الكون
عرفت تعيش أكتر
قدرت تصمم أجهزة
تقدر تشوف العالم الأصغر
و العالم الأكبر
و إن حتى المعجزة
حبة حبة هتتكسّر
و توب الطمأنينة الجميل
حبة حبة هيبقى مليان بالرقع
فيه كل يوم تمثال قصادي ف الدنيا بيقع
كل يوم بتأكد إننا ضايعين سوا
شاكّين لكن ماشيين
ورا المتأكدين بنقول
جايز شراعهم المقفول.. 
هوّ اللي هيلاقي الهوا
المتأكدين مش أغبيا
على الأقل ماشيين ف إتجاه
المتأكدين
ناس ما ينفعش تسمعنا
المتأكدين
هما اللي بيمشّوا تروس الحياة
و احنا لسه بندوّر على المعنى

المتأكدين - مصطفى إبراهيم

 -------------(م)-------------- 
ماسبيرو أخطر م الرصاص و القصر
ملّى عنيك بالدم...قبل الطلوع قدام
ما تسيبش جيشك تِقسمه الأعلام
مش كل مين جنبك....جواه بيهتف مصر
 
--------------(ا)---------------
الوقفة جنب النار ..بتقلل الدخان
- إهتف هتاف إبن المكان و الظرف
- إضرب بعزمك ... أو ما تضربشى
إرجع بضهرك ... أو ما تهربشى
إمسك عصاية ثورتك م الطرف
التاريخ ضمن الغنايم ..و بيكتبه الكسبان
 
 
 
--------------(ن)--------------
نقى دايما طوب صغير حدفتك توصل بعيد
نفترق ساعة المطاردات ..أربعات
نشّن الباراشوت ناحية الصف العريض
نجرى فجأة.. نردّ فجأة.. نص قوتنا المفاجأة
ندّم اللى يعورك........و إقطعله إيد
 
--------------(ي)--------------
يؤتَى الحِذر من مكمنُه
يأتِى الغبى باللص ثم يحلّفه
يؤتَى الهتاف... رَّجاً بممن يَهتِفه
- يؤتَى الجدع... قلبا بمما إتجَدعنُه
 
--------------(ف)--------------
فّرق ما بين....الجرأة و القلب الحديد... و الرمى جوا التهلكة
فتش بإيد ع المستفيد ..و بإيد عن الصاحب الجدع
فتح اذا الناس غمضت....غمض إذا نظرك خدع
فرّغ عياطك ع الصحاب... دم و خميرة... مش بكا
 
--------------(س)--------------
 
سمى الحاجات دى بإسمها...الكدب... و الخوف... و الخيانة
سجادة المسامير... تتحط ع الناصية ...غطّيها بالدخان ..ولّع قصادها كاوتش
سد الطريق لورا علشان ما تترددش
سيب باب لجيشهم يهربوا منه
سلّم رايات الحلم لحد من سِنُّه
سلّم قراركوا لأكتر كفّ عرقانة
 
--------------(ت)--------------
تبّت يدا من ساب رفاق المعركة بطولهم
تمن القضية اللى اندفع مبقاش يجوز يرجع
تتعب تبص ف عين.. إصحابك الطايرة....شوف مين من الآخر دفع....لو زيهم... إدفع
تلت الرصاص نحو العدو... .تلتينه للخاين..الطعنة جاية من هنا مش من هناك
تعب النهاردة غير تعب بكرة....الوقت مش دايما معاك.
تحتك فيه ناس عاوزة الأمل...مش عاوزه؟... سيبهولهم
 
--------------( و )--------------
وسّع الجبهة لو إنتوا كتير... و .ضّيقها لو إنتوا أقل
ولع شماريخ وسطكوا اول ما تلقى الرتم قل
وقّع لمض كل العواميد اللى كاشفة ناحيتك
وّدى الإعاشة قبل ما تدوق لقمتك
وجّب مع السكان و أهل المنطقة...حتى لو فاهمين غلط...فيه ناس كتير متلخبطة ...إكسب عدد ....و إكسب غطا
وزع عيونك فوق و تحت....و خاف من اللى يصورك
وطّى و عينك باصّة فوق ع الطوب و إلا يعوّرك
وقّف إذا سحبوك على شارع طويل
وفّر بديل
وافق على الهدنة إذا سحبوا الكلاب...لو سابوا خليك انتا آخر حد ساب
واحد بيفرق ف العدد جدا
- و عشان كده.... أول ما تلقى إن الصفوف ناقصاك -
 وسع مكانك... للى جاى وراك


https://www.facebook.com/Mostfa.Ibrahim


موسيقى و هندسة صوتية : رفيق عدلى
تم التسجيل بأستوديو بداية 
شكر خاص لأحمد العايدى 



المانيفستو - مصطفى إبراهيم

كأي يوم عادي
وغير مصيري
بدأته ونا لسه ف سريري
بالدخول ع المواقع الزرقا
لقيت تلاتاشر طلب صداقة جديد
ولقيت صحابي
وصحاب صحابي
عندهم حالات وفاة
كاتبين أماكن العزا وتحتها المواعيد
ولقيت أعياد ميلاد كتيرة
لناس صحابي من بعيد
وزمايلي ف مجلس الدنيا
بيتناقشوا بنفس الحماس
 يوميًّا 
في آخر الأحداث
وبيشتموا البُعدا
وناس كتيرة «دايمًا »
طالعين في الصور سُعدا
- إزاي صورهم أجمل من العالم كده؟ -
وواحد ما اعرفوش بيحذَّر
من ضرر قلي البطاطس
اللي بتسبب كذا
وناس بتلفت نظري للأذى الواقع على أقليات الهند
من فضلك اعمل send لكل زملائك
وناس بتخرج م الحياة لأن تليفونها اتسرق
وناس بيدعوا ربنا ع الملأ
يمكن هيسمعهم هنا
حتى الجرايد
برضه سابت الورق
ودايرة على الشاشة بتشحت ناس
وناس بتشتم كلها الستات
وناس بتشتم كلها الرجالة
والآلة قدامك بتتأكد ان انتا مش آلة
ونا لسه بعماصي
بشوف قصص وبشوف مآسي
أكتر مما اتحمِّل
لاكن صباعي لوحده بيكمِّل
لأن الوحدة بتخوِّف
ونا مش وحيد
وامَّا يجد جديد
هكون في انتظاره هنا
أنا
وولادي
وولاد ولادي
على المواقع الزرقا
علشان نعلَّق
ونبرَّق عنينا
ونعرف قد إيه الدنيا حلوة
وفاضية
ومليانة
ومش فارقة
علشان هنا
بنحزن كلنا مع بعض
وبنضحك كلنا مع بعض
واللي بيخرج م القطيع
بنسيبه ورانا
أو ندوسه تحتنا
هنا
أخيرًا
مش هنبقى لوحدنا....

المواقع الزرقا - مصطفى إبراهيم

Mostafa Ibrahim | مصطفى إبراهيم