Mstdfr Show 2018

استضفنا اليوم الكوتشز سيرين فتيح و عبدالله الصبان… صراحة الإستضافة ما كانت اليوم كانت قبل عشرة شهور بس أستروا ما واجهتم :) وأتكلمنا على تربية البنات في المجتمع العربي وتشجيع الأطفال بصفة عامة وبناء ثقتهم في أنفسهم. ودخلنا في كم موضوع ثاني على جنب زي ما عودناكم، وإذا عجبتكم الحلقة وحاببين تسمعوا أكثر لعبدالله وسيرين ممكن تتابعوا برنامجهم على شبكة مستدفر “بودكاست نقاش الكوتشز” إللي يناقشوا فيه قضايا شخصية واجتماعية ووظيفية في المجتمع العربي عامة والسعودي خاصة.

The MSTDFR Show

#080: كلام مدربين مهارات الحياة

حلقة اليوم طلعنالكم هي من خزنة الحلقات المفقودة! سجلناها في أغسطس ٢٠١٥ وبعد التسجيل أكتشفنا إنه الصوت كان فيه مشاكل وما قدرنا ننزلها. ولكن بعد سنتين وخمسه شهور قدرنا ننظف الصوت لدرجة شوية مقبولة وقررنا إننا ننزها اليوم. ضيوفنا كانوا الدكتورة أسماء مهرجي وعمير طيبة وخيرة بندقجي، واتكلمنا عن أشياء مختلفة من ضمنها كيف سماعات التيلفون تشتغل و كيف جهاز الأشعة يشتغل بشكل سطحي جداً. وكمان اتكلمنا عن الساعات الذكية و بعض البرامج التلفزيونية والأفلام زي Doctor Who و Interstar Galactica و Ghostbusters. ونتمنى انه الحلقة تعجبكم.

#081: حلقة مفقودة من ٢٠١٥

قد فكرتم في يوم من الأيام أيش ممكن يصير في العالم إذا التكنولوجيا أصبحت ذكية لدرجة إنها تسيطر علينا؟ يمكن الفكرة هذه تكون شوية غير واقعية… لكن بالوضع الحالي اللي إحنا عليه وطريقة تتطور الكمبيوترات وشبكات التواصل حول العالم، صارت الفكرة محتملة! عمار اليوم أستضاف صديق البرنامج علي الزين للمرة الثالثة وأتكلموا على بعض أشهر ألعاب الكمبيوتر إللي أتحولت إلى أفلام، وبعد كدة تطور الحديث ووصلوا لنهاية العالم… كيف؟ ما نعرف… بس أسمعوا الحلقة عشان تعرفوا أيش اللي صار وقولوا لنا إذا تتفقوا مع كلامهم أم انكم ضده تماماً.

#082: ت" تعني تمرّد تكنولوجي"

كلمة “الواقعية” هي حاجة نسمعها دايما وعادة ما ينطلب مننا تطبيقها في حياتنا اليومية. لكن أحياناً تكون النظرة الواقعية في بعض الأمور حاجة سلبية وتقتل أي طموح وأحلام ممكن تكون عندنا.

واقعياً… البودكاست في العالم العربي مشروع فاشل! واقعياً… شخص واحد ما يقدر يغير العالم! واقعيا… الرسم والفن ما حيأكلك عيش! واقعياً… ما تقدر تسيب الجامعة وتصير ممثل!

هذه كلها جمل سمعناها كثير واحنا صغار ولمن كبرنا، وعمار اليوم مع عمر ضياء وعبدالله رافعة أتكلموا على معاناتهم مع “الواقعية” وكيف كل واحد فيهم تحدى مجتمعه وحول أحلامه لواقعه.

#083: خلينا ما نكون واقعيين

وأخيراً… وبعد غياب… عمار ورامي أجتمعوا في استديو مستدفر وسجلوا حلقة مع بعض بعد قطعة لأكثر من شهرين! واليوم أتكلمواعن فكرة برنامج جديد بيشتغلوا على إنتاجه وحبه إنهم يشاركوا معاكم الفكرة وياخذوا أيكم فيها. البرناج الجديد عيارة عن بودكاست علمي للأطفال، والفكرة أبطالها خريجة جامعة ذكية ومخلوقين فضائيين إسمهم دقّس و أمبة. والبرنامج أستلهم من من عدة برامج علمية للأطفال مثل بودكاست (Wow in the World) وبرنامج (Beakman’s World) التيلفيزيوني من التسعينات. ومن ضمن الأشياء الأخرى اللي أتكلموا عليها مسلسل كوميدي أمريكي من السبعينات عن مخلوق فضائي يزور الأرض (Mork & Mindy) وافتتحوا الحلقة بسيرة الأستاذ القدير حسن كراني، واذا تبغوا تعرفوا ايش دخل حسن كراني في الهرجة… أسمعوا الحلقة!

#084: دقس و أمبة و كوكب رقم-٣

حلقة اليوم كانت حلقة عشوائية بتسجيل مباغت! كنا جالسين وفجأة المكرفونات أشتغلت وسجلنا حلقة… كنا حتى جيعانين وطلبنا أكل (ووصل في وسط التسجيل) وبالتالي بدأنا بالكلام عن الأكل وأنواعه اللي نحبها واللي ما نحبها. بالذات عمار إللي غالباً ما يحب أغلب الأكلات. ومن هناك دخلنا على قوانين الأدب والاحترام بين الكبار والصغار واللي بقدرة قادر أتحولت إلى كلام عن التخصصات في الجامعة وعلاقتها بالوظائف المثمرة والشغف الشخصي. وفجأة لقينا نفسنا بنتكلم عن الجنة ونعيمها وقعدنا نتخيل أيش كل واحد ناوي يسوي هناك، وبعد كدة أتفلسفنا شوية عن الإستماع للإنتقاد والنصائح من الآخرين وأنهينا الحلقة بحوار عن المبالغة في الإعلام والبلبلة الإخبارية… ألخبط من كدة… مافي :)

#086: ريحة اللبن عفنة ولا مو عفنة؟

كثير تجينا تسائلات من مستمعينا عن ريادة الأعمال… ”كيف أبدأ مشروعي؟“ أو ”نفسي أشتغل ممثل أصوات“ وغيرها من الأحلام والتخصصات… وبصراحة مافي معادلة سحرية اللي تمكن الشخص من إنه يحقق أحلامة.

لكن قلنا نجيبلكم مجموعة من رواد الأعمال اللي بدأوا بشق طريقهم في المجالات اللي يحبوها وبدأوا مشاريعهم من الصفر… وأول شيء مشترك بينهم كلهم كان إنهم ما خلوا جهلهم بطريقة البدء بمشاريعهم توقفهم! كلهم أشتغلوا على نفسهم وعلموا نفسهم كيف يبدأوا… وأهم نقطة هي انهم بدأوا!

وشارك معانا اليوم عمر ملائكة الشريك المؤسس في شركة كوانتم، وعبدالرحمن باعقيل الشريك المؤسس في شركة جدة أتراكشنز ومجدي اللولو مؤسس شركة قرنتافاي… وكلهم حكونا عن مشاريعهم وبعض الدروس اللي أتعلموها في عالم ريادة الأعمال.

@Quantums.sa
@Grintafy
@jedAttractions

#145: هيا بطل دلع و أبدأ المشروع

لمن نقضي سنين من حياتنا نسوي شغلة معينة وبعدين ننقطع عنها تماماً… حيجي علينا وقت اللي نحن في لحياتنا الأولانية! وهذا بالضبط اللي صار مع عمار وكان أحد الأسباب لتسجيل هذه الحلقة. السبب الرئيسي هو لأنه كل ما يشوف شغل ضيف حلقتنا اليوم يندم للحظة انه ترك عالم التصميم المعماري ويتمنى لو كان يقدر يفتح مكتبه الخاص.

ضيف اليوم هو المصمم المعماري المبدع خالد هاشم واللي استضافنا في مكتبه ودردشنا عن عالم التصميم المعماري بمحاسنه ومشاكله اللي غالباً ما تتمحور حول العملاء… وكمان دخلنا في بعض دروس الحياة المختلفة اللي عدينا فيها عبر السنين. إذا كنتم مصممين معماريين أو طلبة كليات العمارة فهذه الحلقة أكيد حتعجبكم!

#147: جلسة معمارية مع حصة جمال

من المهم ان الواحد يكون عنده الحرية انه يعبر عن رأية… في نفس الوقت من حق كل صانع محتوى انه ينتج محتواه بالطريقة اللي تعجبه واللي يشوف انها مناسبة له. ونحن في مستدفر نؤمن بهذه المبادئ وفي نفس الوقت نؤمن بأهمية رأي مستمعينا اللي ممكن يساعدنا في تطوير محتوانا في حال رأيهم كان متماشي مع توجه البرنامج.

وبالتالي من الحين للآخر بنقعد من أحد مستمعينا وندردش عن بعض المواضيع اللي سمعوها في حلقاتنا… وردة فعلهم لها… وأيش ممكن يضيفوا على الموضوع.

اليوم قعدنا مع المهندس الكيميائي خالد الأحمدي اللي تكرم عينا بوقته واتكلم معانا عن بعض المواضيع اللي سمعها على مستدفر زي ”هل نقدر نكون بس أصحاب؟“ و ”ليش أولادكم ما يبغوا زواج“ وبعض المواضيع الثانية اللي طلعت لنا في سياق الحديث وكمان عمار حكانا في آخر الحلقة كيف خالد ”فزع له“ لمن كان حيجيب العيد وكيف أنقذ خالد بمجهوده وكرمه الموقف.

#149: ترا إذا عطشان فغيرك مرتوي

ضيفة الحلقة: د. كايرو عرفات

حلقة اليوم مميزة بالنسبة لعمار… لأنه سجلها مع الإنسانة والمعلمة والمربية القديرة (والدافورة كمان لأن عندها شهادتين دكتوراه واحدة في التعليم والثانية في علم النفس) إللي أعطته الفرصة إنه يعيش حلمه ويطور نفسه في عالم الترفيه التعليمي. د. كايرو عرفات كانت المدير العام لمؤسسة بداية للإعلام، الجهة المنتجة لبرنامج افتح ياسمسم وكانت د. كايرو برضه المنتجة التنفيذية للبرنامج والمسؤولة عن المنهج التعليمي للبرنامج كمان.

وهي اللي وظفت عمار في المؤسسة في منصب المدير الإبداعي ومسؤول تحريك الدمى للثلاثة سنوات الأخيرة ويوم تسجيل الحلقة كان آخر يوم لها في المؤسسة لأنها قررت تتقاعد أخيراً بعد أكثر من ٣٠ سنة في التعليم الأكاديمي والتعليم الترفيهي. الإنسانه هذه عبارة عن موسوعة تربوية متحركة وانجازاتها وعلمها لا يكفي أن يسرد في حلقة واحدة.

وإذا حابين تتواصلوا معاها أو تستفيدوا منها أكثر ممكن عن طريق بريدها الإلكتروني: 

cairo.arafat2009@gmail.com

#151: يوم نهاية بداية قاهرة بأبوظبي

بودكاست مستدفر هو برنامج إذاعي سعودي من تقديم عمار ورامي يأتيكم كل أسبوع فجر يوم الأحد من مدينة جدة ويقدم لكم حوارات عصرية  وترفيهية وثقافية مع مجموعة من أبرز العقول في مجتمعنا اليوم.

ونقدم لكم محتوانا بشكل عفوي وصادق من قلوبنا إلى عقولكم