Mstdfr Show 2022

ضيف الحلقة [ عبدالله غازي ] 

مع دخول سنة ٢٠٢٢ حسينا انه أفضل طريقة نبدأ فيها السنة هي بحوار فلسفي نفسي سلس وعميق في نفس الوقت… وفيه شوية فضفضة كمان. وعشان كدة في حلقة اليوم أستضفنا صديقنا الدافور د. عبدالله غازي واتكلمنا عن العادات والتقاليد الشخصية والمجتمعية وتعميمها على الاخرين وكيف نقدر نتعامل معها.

The Mstdfr Show

#237: رجاء كل عقدك خليها لنفسك

ضيوف الحلقة [ نهار الحمراني و عبدالله غازي ]

اليوم عالم الأفلام والمسلسلات صار صناعة في المملكة… إيه نعم ما زالت في بداياتها لكن المهم إنها بدأت. هذا لا يعني أننا عمرنا ما صنعنا محتوى بشكل احترافي لأننا بنص محتوى على مستوى جيد من عقود. مع ذلك ما كانت هذه الأعمال متواجدة في بيئة متكاملة تدعم هذه الصناعة زي بعض المناطق الثانية مثل هوليوود وبوليوود ومصر. وحبينا ندردش في هذل الموضوع اليوم واستضفنا صديق البرنامج المنتج المبدع الأستاذ نهار الحمراني وصديقنا الصدوق د. عبدالله غازي واتكلمنا على بعض الأفلام العالمية والمحلية اللي عجبتنا واللي كمان ما عجبتنا.

#238: صناعة الأفلام غير إنستجرام

ضيفة الحلقة [ نوف النجيمي ]

مشاركة مشاعرنا مع الآخرين مهي حاجة المجتمع من حولنا يحبذها… ودائماً كانوا يعلمونا اننا نخلي مشاعرنا لأنفسنا، لكن أحياناً الواحد فينا يحتاج يخرج اللي لنفسه لأحد… واليوم مع شبكات التواصل الاجتماعي صرنا نشوف كثير ناس يفضفضوا بشكل علني قدام الجميع. ضيفتنا اليوم هي ”النجمة“ المتألقة الأستاذة نوف النجيمي اللي شاركتنا تجربتها مع الفضفضة التويترية والأسباب اللي دفعتها لمشاركة مشاعرها على شبكات التواصل. وكمان اتكلمنا على الأمن السبراني وعلى بعض المفاهيم الحياتية اللي ممكن تكون نتيجة برمجة مخية مكتسبة!

#239: الأصباع الصغير أنظلم كثير

ضيف الحلقة [ حمزة هوساوي ]

الموسيقى أنواع… وكل إنسان له لونه المفضل اللي يحبه ويرتاح له. وحتى الفنانين كمان لهم تفضيلاتهم وأساليبهم الخاصة في إنتاج فنهم. واللي ميز ضيفنا اليوم هو انه أختار لون فن غير دارج في مجتمعه وكمان بلغة مختلفة. ضيفنا الفنان المتألق حمزة هوساوي وهو مغني سعودي أتخصص في لون الـ”آر أند بي“ باللغة الإنجليزية، وفي ٢٠١٥ اشترك في فئة "سولو إنترناشونال" من الموسم الرابع من أشهر برنامج اكتشاف المواهب ”ذا إكس فاكتور آرابيا“ بإشراف الفنان راغب علامة وفاز بلقب الموسم. واليوم جلسنا مع حمزة وأتناقشنا في الفن والحياة وكمان بعض المستجدات في عالم التفن والتقنية.

وحلقتنا اليوم برعاية سماعات نورا إللي مع مستدفر يقدموا لكم فرصة الفوز بسماعات جديدة!

لو شخصين بدلوا نظاراتهم… غالباً ما حيشوفوا شي لأن كل واحد فينا عيونه مختلفة. هل تتخيلوا أن كل واحد منّا كمان سمعه مختلف؟ سماعات نورا تتميز بتخصيص الصوت للمستمع، أول مرة تلبسوا سماعات نورا، بتختبر سمعكم، ولما تسمعوا الأغاني اللي تحبوها حتعيشوا تجربة جديدة وكأنها أول مرة تسمعوا موسيقى. وتقدروا تجربوها اليوم في جدة والرياض. إذا حابين تشوفوا سماعاتهم او تجربوها، تابعوهم على الانستقرام: https://www.instagram.com/nuraphoneme/

عشان تشاركوا معانا في السحب… تابعوا حساب نورا فون إم إي وعلقوا على صورة مستدفر في حسابهم وأكتبوا لنا ”مستدفر… أبغى سماعة“ ونختار أحد المشاركين ونرسل لهم سماعة مجانية إلى بيتهم.

#240: ألحان زرقاوية بكلمات غربية

ضيفة الحلقة [ ريم طيبة ]

ضيفتنا اليوم مميزة لأكثر من سبب… أولاً هي كانت أكد المحفزات لبرنامج ”عِلم إف إم“… ثانياً كانت ضيفتنا على الحلقة العاشرة من البرنامج عام ٢٠١٥… ثالثاً هي اليوم أحد مقدمي برنامج عِلم إف إم… لكن الأهم من هذا كله هي عالمة رائعة جمعت بين عالمين نادراً ما نلاقيهم يجتمعوا، العلم وفنون القتال! وبالتحديد فن الكنج فو. ضيفتنا الدكتورة ريم طيبة جلست معانا وحكتنا على رحلتها للصين وكيف تعلمت فن الكنج فو وكمان أتناقشنا معاها عن الطاقات الكونية وأشياء ثانية كثير.

#241: علم وكنج فو وكلام حتنسوه

ضيوف الحلقة [ أميرة الحربي و نوف النجيمي و عبدالله غازي ] 

القدر شيء ما نقدر نتحكم فيه أو نغيره… ربي يكتبه علينا ويحطنا في الأمر الواقع. لكن الشيء اللي نقدر نتحكم فيه هو كيف نتعامل مع هذا القدر! الخيار الأول هو إننا نستسلم له… أما الخيار الثاني هو إننا ما نخليه يحكم حياتنا ونتعايش معاه بطريقتنا. وهذا التصرف ممكن يخلي وضع ينظر له الكثير من الناس بشكل سلبي… يتحول لشيء إيجابي في حياتنا!

وهذا هو بالضبط اللي ضيفتنا اليوم قررت تسويه مع قدرها… دافورتنا المتميزة أميرة الحربي ما خلت إصابتها بمرض الروماتويد يحكم حياتها… وأصرت انه الأثر الإيجابي ما يكون على حياتها فقط… بل على حياة العشرات غيرها كمان. شارك معانا كمان في حلقة اليوم أصحاب البرنامج الدوافير الأستاذة نوف النجيمي والدكتور عبدالله غازي. وإذا حابين تعرفوا أكثر عن أميرة ومبادرتها، ممكن تتواصلوا معاها عن طريق حساباتها في شبكات التواصل:

سناب شات:
 @rheumatoidmecca
تويتر:
@RheumatoidMecca
إنستقرام:
 @0_amira

#242: أميرة المكية لا الروماتزمية

ضيوف الحلقة [ نوف النجيمي و عبدالله غازي ]

على مر التاريخ كثير من القصص والروايات وحتى الأفلام أقنعتنا إن الحب أحياناً يقع من النظرة الأولى… لكن الواقع في الغالب يثبت عكس ذلك. ممكن لأننا بنخلط ما بين الحب والإعجاب والعشق وغيرها من المشاعر. والكثير من المجربين يجزموا ان الحب يأتي نتيجة العشرة ومعرفة الطرف الآخر من خلال المواقف المختلفة التي يعيشها الاثنان. 

اليوم قعدنا مع أصدقائنا الدوافير الأستاذة نوف النجيمي والدكتور (المتخصص في العلاقات الزوجية) عبدالله غازي وناقشنا الموضوع هذا مع بعض المواضيع الأخرى المتعلقة بعادات الزواج في السعودية وبعض القصص المختلفة والغريبة بعض الأحيان في عالم الخطبة والزواج.

#243: الحب عمره ما يكون من أول نظرة

ضيوف الحلقة [ نورة خورشيد و نوف النجيمي و عبدالله غازي ]

كثير من الناس عادة يحاولوا انهم يكونوا جزء من فريق… ويكون في تشابه بينهم وبين باقي الناس في مجتمعهم من حيث اللباس والكلام والتصرفات. لكن في بعض الناس على هذا الكوكب اللي صعب نلاقي زيهم… ويتميزوا في كل شيء يسووه ويتفاخروا بتفردهم عن الآخرين! ضيفتنا اليوم هي الأستاذة نورة خورشيد وهي أحد المخلوقات البشرية الفريدة من نوعها على هذا الكوكب… فهي كاتبة وممثلة وكوميدية وصانعة محتوي… ومؤخراً كانت أحد أبطال المسلسل الجديد ”جميل جداً“ على شبكة شاهد. وشاركنا في الحلقة دوافيرنا المتميزين دائماً الأستاذة نوف النجيمي والدكتور عبدالله غازي.

#244: نورة هانا زمان بس اليوم نوران

ضيف الحلقة [ عبدالله رافعة ]

أحد مقدمي بودكاست مستدفر أجتمع مع أحد مقدمي بودكاست كرتون كرتون ولأول مرة الإثنين سجلوا حلقة مع بعض وبدون صديقهم اللي عادة يشاركهم تقديم البرنامجين. وبما إن رامي وضيفنا لليوم الصديق والكرتون وممثل الأصوات عبدالله رافعة أجتمعوا بدون عمار في حلقة… من الطبيعي انهم يطقطقوا عليه شوية. وما بين الطقطقة دار النقاش حول ريادة الأعمال والرسوم المتحركة والجمع ما بين أكثر من مشروع في وقت واحد.

#245: كرتون و دافور بدون الأخ عمّور

ضيفة الحلقة [ نوف النجيمي ]

هل شبكات التواصل الاجتماعي إدمان يضيع وقتنا؟ وهل لو مسحنا برامج التواصل الاجتماعي حنكسب استغلال الوقت بشكل بناء؟ ضيفتنا الدافورة والكرتونة نوف النجيمي سوت هذه التجربة واكتشفت إنه برضه وقتها ضاع منها… فقعدت معانا وتناقشنا في الموضوع مع مجموعة من المواضيع الثانية اللي تشعبت في أنواع استغلال الوقت وكيف ممكن نطلع بفائدة من الأشياء اللي نحب نسويها… وكمان كيف انه ”الحلطمة“ ممكن تكون سلبية علينا لكن في المقابل ”الفضفضة“ ممكن تكون مفيدة!

#246: بطلوا حلطمة أبدأوا فضفضة

ضيوف الحلقة [ هاشم الزين و عبدالله رافعة ]


الصداقة الحقيقية مهي سهلة… وكثير مننا مازلنا نبحث عن أسرار هذا النوع من الصداقات اللي صعب يكون في شيء يهدمها. دافورنا الصدوق والكرتون الفخور عبدالله رافعة قرر انه يستحوذ على حلقة اليوم في محاولة لمعرفة أسرار الصداقة الحقيقية… وطلب من عمار وصديق طفولته الدافور د. هاشم الزين انهم يشاركوا معاه في هذه الحلقة مقومات صداقتهم اللي استمرت لأكثر من ٢٦ سنة وقت تسجيل هذه الحلقة.

https://medium.com/@hashim.alzain

#247: مدرسة جمعتنا وحياة ما فرقتنا

ضيفة الحلقة [ شروق شمس العطار ]

التعبير عن الحب من أهم الأعمال اللي كل أب وأم لازم يعودوا أنفسهم عليه، لأن تأثيره جداً كبير على الأطفال في صغرهم وبالذات بعد ما يكبروا. ضيفتنا اليوم الفنانة الرائعة والدافورة شروق العطار أتكلمت معانا عن التعبير عن الحب في حياتها وعن مواضيع كثير من ضمنها تأسيسها لنادي جيلي اللي من أساسياته التعبير، وكمان أتكلمنا عن مواضيع ثانية كثير من ضمنها نظام ”أكشط واربح“ في الزواجات اللي كان المفترض يكون عنوان الحلقة… بس شروق ما رضيت.

https://jellysclub.com/
https://www.instagram.com/jellys.club/
https://www.tiktok.com/@jellys.club

#248: عبروا عن حبكم لكل أطفالكم

ضيوف الحلقة [ مي حكيم و عبدالله غازي ]


الغضب هو من أسوأ الحالات اللي ممكن تعدي علينا… ولما نغضب إحتمالية اننا نسوي أشياء حنندم عليها في المستقبل كبيرة جداً. فما بالكم لما الغضب يتراكم ويتراكم لسنوات؟ النتيجة حتكون كارثة يصعب النجاة منها!

العالم كله شاهد تجسيد لموقف فريد من نوعه وكانت تكلفة الغضب المتراكم مسيرة فنية وأنهتها نهاية محزنة فعلاً… وحاولنا اليوم نتعلم من هذا الموقف دروس ممكن تنقذنا من الوقوع في نفس الخطأ. شاركنا في الحديث اليوم صديقة البرنامج الدكتورة والفنانة مي حكيم بالمشاركة مع صديقنا الدافور الدكتور عبدالله غازي.

#249: صمدت الصخرة أمام قوة الإرادة

بمشاركة [ سلوى رضوي ]

سمعنا كثير في الفترة الأخيرة عن الـ ”إن إف تي“ وكثير مننا ما يعرف إيش هو وليش الناس كلها بتتكلم في الموضوع… وأغلبنا بيتسائل إذا كان هذا هو الصيحة الجديدة والطفرة التقنية اللي حتصنع ثروات للناس إللي حيدخلوا سوقها من بدري. وعشان كدة كلمنا صديقتنا الأستاذة سلوى رضوي المديرة التنفيذية لشركة نقطة اللي هي أول منصة سعودية حصرية للـ NFT وطلبنا منها انها تشاركنا الحوار عشان نفهم الموضوع بشكل أكبر.

وممكن تتواصلو مع شركة نقطة بشكل مباشر عن طريق موقعهم: https://www.itsnuqtah.com/?lang=ar

#250: وجلسنا نفتي في الإن إف تي

بمشاركة [ أفنان باويان ]

مهم لكل المتخصصين في أي مجال انهم يتعلموا ويتدربوا لسنوات لجمع الخبرات قبل ما يتحولوا لمحترفين بمناصب عالية، وفي المجالات الدارجة في أي بلد المسار المهني غالباً ما يكون واضح. لكن لما يكون المجال جديد ومافي له العدد الكافي من المنظمات التعليمية والجهات المختصة التجارية اللي تدرب المبتدئين في المجال… حيكون الموضوع شوية صعب لأنه الطريق غير واضح.

وهذا كان نفس الوضع اللي ضيفتنا اليوم الكاتبة والمخرجة المبدعة الأستاذة أفنان باويان لقت نفسها فيه في مجال صناعة الأفلام، وحكت لنا قصة دخولها المجال وإحتراف الإشراف على النصوص لعدة أفلام سنوياً قبل ما تبدأ بكتابة نص فيلمها الأول وإنتاجه.

#251: سيناريو كتبناه وسليق غرفناه

بمشاركة [ محمد باشراحيل ]

الكثير من الناس يؤمن بالحظ وانه السبب في سعادة الإنسان ان كان جيد وتعاسته ان كان سيء، وبعض الناس يؤمن أن الحظ بكل حالاته هو نتيجة تراكمية لعمل أجيال من البشر. وبالتالي تغيير وضع الإنسان ممكن لكن ان كانت النتيجة التراكمية سيئة زاد العمل على من أراد تغييره، الموضوع واسع وشاركنا الحديث صديقنا وأحد مقدمي بودكاست الزبدة الأستاذ محمد باشراحيل.

ممكن تسمعوا بودكاست الزبدة على الرابط: https://podcasts.apple.com/us/podcast/azzbda-%D8%A8%D9%88%D8%AF%D9%83%D8%A7%D8%B3%D8%AA-%D8%A7%D9%84%D8%B2%D8%A8%D8%AF%D8%A9/id1122025804

وممكن تتابعوا البرنامج على إنستجرام: https://www.instagram.com/azzbda/

#252: هل الحظ أكبر من انه يتغير؟

بمشاركة [ غازي عبدالله ]

من الدارج حول العالم وفي جميع المجتمعات نلاقي ناس نظرتهم لبعض فئات المجتمع مغلوطة ويغلفها بعض الجهل، واللي في كثير من الأحيان يظلم هذه الفئات. من أكبر المظلومين في المجتمعات هم ذوي الإعاقة وللأسف الظلم ما يكون من قلة الخدمات والسياسات بل هو من المجتمع بحد ذاته. وعشان كدة ضيفنا اليوم كرس حياته لخدمة هذه الفئة بالذات وتوعية المجتمع بحالهم ووضعهم وبأفضل طريقة ممكن نتعامل معهم بها.

الأستاذ غازي عبدالله قعد معانا على بودكاست مستدفر ودردشنا على مواضيع مختلفة تدور حول خبرته في العشر سنوات الماضية في مركز العون بجدة، وكمان أتكلمنا معاه عن فئة مظلومة هو ينتمي لها شخصياً وهي فئة الأيتام. ومع إنه غازي ما يحب إنه عن بعض المواقف السلبية اللي عاشها هو وأخوانه، حكى لنا عن بعضها اللي صعب لأي أحد فينا ممكن يتخيلها… لكن كمان حكى لنا عن اللحظة اللي غيرت حياته للأبد على يد أمه الفاضلة… الأستاذة ناجية جميل.

#253: غازي ولد ناجية همته جداً عالية

بمشاركة [ أحمد ”اليونق“ صدام ]

الفن عنده القدرة انه يسافر حول العالم وينقل الثقافات من شعب لآخر بدون أي قيود… وهذا كان الحال مع فن ”الراب“ اللي بدأ في الولايات المتحدة الأمريكية لكن اليوم صار من الفنون الصاعدة في العالم العربي. وهذا شيء مهو غريب لأن فن الراب مبني على الشعر… والشعر عندنا كعرب كلنا نعرف مكانته. وعشان نعرف اليوم أكثر عن الراب السعودي جلسنا مع الفنان أحمد ”اليونق“ صدام اللي ما بس أكتفى بكونه واحد من أفضل الرابرز العرب وقرر يدخل عالم التمثيل من أوسع أبوابه.

وبمناسبة عيد الفطر المبارك حبينا نعيدكم ببعض من أعمال اليونق الشهيرة وكمان حتسمعوا أول دقيقة من أغنيته الجديدة ”دايسين“ واللي حتكون متوفرة على المنصات التالية يوم ١٠ مايو ٢٠٢٢:

https://open.spotify.com/artist/0cCdSqBWH0WY1rg6yFTA3C

https://www.youtube.com/channel/UCULI3kksEPiW0I2kAo1JWog

https://www.deezer.com/us/artist/111416292?app_id=140685

https://play.anghami.com/artist/8052163

https://music.youtube.com/channel/UCOI7GYSN18ZQXFDGa0AmSoA


وكل عام وأنتم بخير

#254: باليونق جايين وكلنا دايسين

بمشاركة [ ولاء باحفظ الله ]

اتكلمنا كثير عن عالم الإنتاج السينمائي من يوم ما دخلت السينما السعودية وبدأنا عصر جديد في صناعة المحتوى المحلي اللي الوم صار يصدر للعالم، لكن ما زالت في بعض الجوانب من هذه الصناعة اللي لسة ما اتكلمنا فيها، واحدة من هذه الجوانب هي تجارب الاداء واختيار الممثلين. وشاركتنا الحديث اليوم أحد رائدات مجال الإنتاج السينمائي في المملكة الأستاذة ولاء باحفظ الله اللي أعطتنا من خبرتها الوفيرة في هذا المجال اللي تعدت ١٤ سنة. لكن كالعادة في كل حلقات مستدفر ما قدرنا نمسك موضوع واحد واتشعبنا في عدة مواضيع مختلفة.

#255: اسم شركتي الفهد الوردي

بمشاركة [ أنس إسكندر ]

للناس البيتوتية الحجر اللي صار أيام بداية جائحة كوفيد ١٩ كان نعمة… لكن للناس اللي حياتها أتمحورت حول السفر ومقابلة شعوب مختلفة من الناس كل يوم… بالنسبة لهم الحجر كان أصعب مما تخيلوا. ولصديقنا الرائع والرحالة الأستاذ أنس إسكندر كان الموضوع ملهم وخلاه يتعرف على نفسه بطريقة ما أتوقعها. اليوم أنس جلس معانا في حوار على #بودكاست #مستدفر وحكى لنا على رحلة الإكتئاب اللي تحولت لرحلة إكتشاف نفسي ما أحتاج انه يركب لها طيارة أو سيارة… الرحلة كانت داخلية وأتعلم منها أشياء ما كان حيلاقيها في أي واحدة من سفراته.

تقدروا تتابعوا رحلات أنس حول لعالم على قناته في اليوتيوب على الرابط: https://www.youtube.com/user/ansvlog

#256: أنس بعد الحجر عرف نفسه أكثر

بودكاست مستدفر هو برنامج إذاعي سعودي من تقديم عمار ورامي يأتيكم كل أسبوع فجر يوم الأحد من مدينة جدة ويقدم لكم حوارات عصرية  وترفيهية وثقافية مع مجموعة من أبرز العقول في مجتمعنا اليوم.

ونقدم لكم محتوانا بشكل عفوي وصادق من قلوبنا إلى عقولكم