الحزن يوم
بس الفرَح أيام

هتنام / تقوم
تشوف دنيا متعرفهاش
و تضحكلك 
فيضحك وشك الكِشَري
و يظهر منك الشخص الجرئ
المجدع .. العِشَري
ترد عالافيه باخوه .. يا ترد تضحك
اي حاجة .. المهم ترد
و هتحلى فعينك كل الدنيا
تحَلِّي فعينك كل الممكن يحلى، فَ عينَك-
-تحلى كمان
انت كمان نَفسك تحلى
و ترد روحك فيك
في لحظة بس ..
تنام تقوم
ماتبقاش عارف تعمل ايه

"ما أشبه اليوم بالبارحة"
فَرْح أنا ماعرفوش و ماعشتهوش
و مفيش معايا ما يؤهلني
اني أخوض التجربة من غير مابوظها-
-و جبان
فمش هاجازف بالتحرك من هنا
لو مش اكيد كان فيه هناك

العشرة مش بالشوف كتير
ولا عمر الفرجة عالفرسان تديك فَرَس
كل الحكاية يادوب فرص
طرق .. متشابكة للغاية
و الغاية ماللقا .. عشرة

فلما تقابل الفَرَح
هتقوم -اوام- تنام
لان الحزن عادةً بييجي يوم
بس الفَرَح أيام

محمد عبد المحسن " كآبة " - العِشرة

Muhammad Abdul-Mohsen