نهاية اليوم 
بداية
بس يوم تاني
لشخص 
وحداني
عزول
قادر يشوف
و مش قادر
يشوف النور ومايطفيهوش
يقدر يحس
حاجات مفيش انسان يحسها
قادر يفكر في المشاكل
زي ما تكون لعبة
 بيفككها
و يركبها تاني
يقدر يكون اناني
بس مش عايز
عنده اللي يخليه
 اكيد
لكنه قال : 
"جايز..!"
ملهوش -دلوقتي عالاقل-
حد يعرف هو فين بجد
و لو سألت أي حد 
هيقولك هنا
من ييجي اكتر من سنة
شفته مرة بجد
كل حد كان بيشوفه
كان بيقول جميل
كان حر
رغم بغضه للقاهرة 
حب النيل
كان قادر انه يبني الجسر دايما
و يخطيك عليه
و يتسرسب 
على قد مانت تستوعب
لحد ما تآلف عليه
قادر يعرف اني باتكلم عليه
و مش قادر يقول انا
 تايه
 زي نجمة فالسما 
في مكانها،
 بس مش عارفة المكان
يقسم مع الحيطان أحزان 
-ولو معاه فلوس- دخان
لحد الشمس
الوحدة خير من علمك نفسك
و مش سهل افتعال الحضن
غير باللمس

#اليوم_التاني
#كابيات

محمد عبد المحسن "كآبة" - اليوم التاني

Muhammad Abdul-Mohsen