el rass

غناء: ندى الشاذلي
كلمات، ألحان، توزيع، انتاج: الراس
الرصاص الحي: مقاتلو طرابلس

أغمد سيوفك ما بهذه الأرض حق
أغمض عيونك عن عيونك واستفق
كل هذا الشعر في الأصل لثام
صلب ألباب العرب، لا يلين لا يرق

استرح من ضباب لا تنتهي فصوله
من ذباب جائع من حلم مأكوله

مقل مدورة في جيف مسمرة
بين جحيم مفتوح وجنة مسورة

لاحقين بقيصر وصاحبي لم يبك
تعودنا الميسر
عظامنا أطلالنا فحتمنا أن تكسر
العظام من بنياننا، أن نخسر
فألنا في شامنا، يميننا في ميسرة
أفعالنا مصفرة، في اليد صرت خنصراً
فكن نصف نبي في غاره تدثرا
وما سرى في فتحه منتصرا

سيوفي غيث تغمده الغمام
عيوني اثنان يمان وشام
سمعت شمالي الآن استقبل يميني
سأزرع الغار من ورود النار
وأخلع الدثار فالشوك يقيني
والشك يقيني من حبري الكرّار
يذود عن زرعي بباب الغار أسدُ
وترسم الخيال خيول الشعر تعدو
وتحمل المياه طيور الشوق تشدو
شوقي لله كسر، جبريل ما جبر
مع العسر يسر في قلب من صبر
عصر الصحراء هذا، طوفان رمال

خذ من الصحراء شيئاً من همم
كن صرخة الصوفي في وجه العدم
جدد على شكل الصبابة عهدنا لله، أو بالله
لله در العقل ما أغناه، ما أهناه غير الآه
رباه هذا الفتى اضناه بين القاف والهاء اقتتال
لا قابيل، لا هابيل عبادتي الإقبال
قرباني الأفكار، مسقية بقبلة القلوب في الأذكار
إنكار لخدعة الدستار،
 طوبى عراة الرأس فالدستور
أن تعتنق أقوالنا الهوى، ويقتنع هوانا
برقصة السؤال في الأقوال
لا أقسم بمواقع النجوم
إن ترسم الدوائر حول قبلة تدور
تصير،
سلالم الجينات حمضاً في النواة
يذوب المعارض، ثائرٌ يحوله
فلا تقل تشوه بل سمه اختبارا
بالحب يتفوه
فإن غدا بقاؤه احتمالا
في الغاب جال
دون أن يموت،
دون أن يضيع في زرقة الفيروز، وحمرة الياقوت
صار للعقول والقلوب قوت
موسعاً مساحة الناسوت

ندى الشاذلي والراس - أثر نواة

عبالي تف عالايقاع نص طالع من المعدة
خايف المايك يدوب الكهربا بالراس بتعدي
عهدي عنفسي قول لاشباح الموت ابتعدي
متل كتاب الموتى الكلمات بتعيش بعدي
خط لكمة، بكل كلمة لكنة طعمة
متل المصلوب ما كل كلي من بعضي
نعمة، بس مش ضابط بدرعا
أنا ظفر طفل صار لتجار الثورة مرعى
بدل ما تخاف عالرب بقلب الجوامع
خاف عالرب بقلب طفل مكسور جفنه دامع
سامع؟
بدل الثورة بعمل مية
هي مش لائحة طعام وانت بتنقي القضية
طرابلس والقاهرة، تونس عمان بيروت
رقصنا أنبياء يونس ببطن الحوت
قريش هون بس بطلنا ايلاف
لك الراس مش راس الراس رؤوس بالآلاف
تصالحوا الملائكة تحرروا الاكتاف
أكداس أهداف أنا بالبيت مش ضيف
لا أكياس رمل ولا موسم اصطياف
زهر زجاجي عم ينبت عالبترول
فتحسس بالربيع وقع منخار أبو الهول
عراس مثقفين متحف شيخ ابو المول
وجع الراس ببلاد البانادول
بدل ما تخبطه عالحيط
بتخبطه عالwall

أنا الراس من جسمي
وعم خاطب راسك فيك
على ايقاع قلبك لأنه الراس ما بيكفيك
انتاج ضو برقص
خلايا الدماغ بالرأس
فأس تقطع ايد اللي بتمتد لتطفيك
الحرية روح العصر بس الروح صنعة
فالحرية والتعب متل الروح والدمعة
غرقنا بسواد فكرنا النعي وعي
صار الفعل بالكلام لما الكلام صار لعي
دعي الواتساب من يديك وتعي معي
مش عالروف، أنا بطريق مش خروف
بدنا نرجع عالبداية مش بس النقط 
الحروف بدنا نعيد رسمها
للحروف أرواح فما بنوقف عند جسمها
كونها قصة قديمة من الهند أصلها
فما تفكر قصدي راب أنا بدي شوف الرب
بالحرف مش بالحرب
لأنه الفاء التفت، روضت الأنا فالنقطة خفت وفت
ارتفعت لفوق بس الحجاج ما بيعرف
عمكثف بالمراجع حتى بالبحث تغرف
ما بتغرب شمس الحق حتى شم الحبر تشرق
مرن الذاكرة حتى الكلمة تفرق تخرق جدار الواقع
تسرق كمشة من الممكن وعالحدود تهريب تمرق
إذا بنترك المساحة لأصناف إسلاميين
غير باسراء جماعي ما بنشوفها فلسطين
فرق بين اللطم والتلطيم، بين الحكم والحكيم
تفصيل رجيم
متل النبي الثوري طه بتدرج بالأيات
أنا لست المتنبي، أنا شوي بموت حتى تعبي حياة
نصوصي من بعدي ائمة أهل البيت
لنبات بأمان، بيت لكل المظلومين، مش ضيوف المخطوفين
ثورتنا بالسماع بوطن مكفوفين
بس في راس كيميائي مضروب ترامادول
بيتلخص نهجه الفكري بمشاهدة the wall
الpink floyd بس الفيسبوك أزرق
بيضل حلمك جوا ملحك جوا إذا ما بتعرق

الراس و مونما - جدران المعدة

Music by Munma
Mastering by C-drík 

عم يقولوا الناس عنّا إننا بنعمل غير الناس
وإنه الناس بتحكي عاطل لما بتسأل عنا الناس
وإنه عيون الناس علينا برتبطنا من ايدينا
وإنه الحرية بالأكل، الهوية والشكل بيكونوا عذوق الناس

طب مين هالناس؟ بركي بدهم تطبيب بالأساس؟
بيعطيك إحساس إنه ملائكة وخنّاس
إنه انت شقفة فحم بين حقول ألماس، تيس
مين الناس؟ مصلي الصف الأول؟
حج عند مرته بس مع صاحبته بيتحول
سماهم في قلوبهم، بيسكر بزبيبته
الجبية حبيبته
ما حدا بتطول لحيته بسبب فائض طيبته

مين الناس؟ هيدي البياعة السراقة؟
برج مراقبة تقول التجارة غطاءها
"هذا من فضل ربي" مترين عالمدخل، بس لسانها ما بتضبه
هوّا عمنقل
إذا شوي دمها بيتقل، جرحها بيلزق
بضاعتها فاسدة، قد ما بترغي عليها بتبزٌّق

كرمال عيون مين بدك تحبس بنتك اختك؟
كرمال عيون مين بدك تتركي المطارح؟
كرمال عيون مين بدك تخاطري بصحتك؟
كرمال عيون مين بدك تتخبى بمبارح؟
هيدي مدن أو مسارح؟
شاشة بيضا بس بالكواليس مذابح
عنّا، لو المسيح قال من كان منكم بلا خطيئة فليرجمها
كنّا صلبنا المسيح وهتفنا: انتم كفارة ذنبونا فلن نرحمها
شلحت حجابها خففت تيابها وما كتبت كتابها هربوا العرسان عن بابها
حشوة سم بقلب ورق عريش، نوع حرص غريب
سكاكين بمخدة ريش
بنعتل همها وبطريقنا بنحكي عنها
بننشح عرضها بالحديث، ملا شرف خبيث

عم يحكوا عليك الناس من الجنّة والناس
خلي براسك هالوسواس، سكر برادي الشباك
قطش ايديك بايديك حتى تتسلم الكاس

*2

إذا الأمهات ترباية حريم سلطان
رح يطلع فرويد غلطان واوديب فلتان
عهبل صبحيات مدامات لبنان
إبن ناس ابن عيلة أهله جماعة أكابر
بيسوق رينج روفر وبيه مأجر بلدوزر تيرفع صورة زعيم
إيه لأ والنعم، داعسين عالفهم، توريت للجهل
بس شو معلم "من شابه أباه ما ظلم" !
اللي خايف اذا جديدة الحالة بيخاف من حاله
شايف عين لاحقته وما بتتركه بحاله
بارانويا، بارانويا، غطي وجهك بويا
إذا كان الخيط بالإصبع فالمخ يو يو
مجتمع نميمة مطبخ أفكاره فاضي فعلحم جاره الحي عم يعمل وليمة عزيمة
وبيرجع بيحكيك عن هيدي الأمة العظيمة
قال شرف البنت متل عود الكبريت
بس شرف الشب قداحة
شرف معبأ غاز، رجولة مساحة
متل اللي باع حمص وبده يجاهد بالقرداحة
ففضي الساحة، تتسبح الإباحة
ببركة التكرار ياللي حتى الحمار بيعرف ياخد منه راحة
إقتصاد رعوي، اغتصاب فموي
فكر مخنوق بيعمل التهاب رئوي بصدر القعدة
حط واقي فكري لسانك مرض معدي

الراس و مونما - بشرفك

البو كلثوم: 

للي بيصطادوا ببحر مين مالهن بحّاره 
حرمة المال العام بتشتغل بالدّعاره 
راسمينلك شمس عحيطن بس برّا شته 
متل يوم اللي وصفولي " بروزاك " بالرّاشيتا 
قالوا ماله قيمه الصفر عالشمال 
طب كلنا صفار بالمشرق منحط الساعه عالشمال اسماع ..
قلتلهن طلعت روحي كفّنوني 
حطّيت نون بآخر كاف بس طلعت ما بتكفّي نوني 
كن 48 - 67 - 2011 
معي أحلق بس ماركسي شعري بعل
صار للإعلام سوق لكل صحفي سبق .. و اللي متلي طلعت روحو مافي عشق خارج دمشق 
اكسر و اجبر .. عقرب ساعه بيقرص 
بذكرى يوم موت البلد أجيال جديده بترقص ..
مخلوق من طين بس ما فيي كون ألين لمّا بيضحكوا علينا و بيطيروا حمام أبيض ! .


الراس:
الشمس ما بتشرق الأرض بتدور
عجلدي بنوا مول وبعيوني أرض بور
فاحتميت بكتاب لا بيحن ولا بيتمنى
لقيت الزمن باب فتت فيه طلعت منه
كنت ناطر صرت صابر
كنت معبر صرت عابر
صرت معبد كنت راهب
صرت كائن حاضر
الموت بيشدني عشطه بخيوط القتلى بتشربك
سألني بلؤم عوجه: مين اغلى عقلبك؟
غريزة البقاء بالتجاهل أو فطرة الوفاء والتكافل؟
لا بدي وهم خوف، ولا حلمي بحق كامل
انا سلمي أو مقاتل خامل؟
سلاحي الكلمة؟ يعني القائل قاتل؟
شعر العروبة قصائد حروبها
فيه بالهلال خصوبة بس الشمس خوفتنا من غروبها
الحرية مضروبة إذا كانت النية مبنية على الخوف من هروبها
حرية انقسام: جعجع جوبا
مرض عضال بنناضل لنعيش تيقتلنا النضال
دمك سخي علبوه
ذيبك عصي كلّبوه
حبل لسانك طال فعرقبتك لفوه
واللي انت بتبلشه هني بيكفوه
بعدما الشارب يحفوه والفايق يغفوه
ويلفقوا الحديث: من رأى منكم منكرا فليقل هو منيح بس اللي حوله نزعوه
اخ تفو، بيعوه تذاكر دخول على نادي "الإنسانية"
مشرحة جثث أخلاق، اسمها موضوعية

الراس والبو كلثوم - زنبرك (انتاج المهدي)

ولما قسا قلبي وضاقت مذاهبي رفعت رجائي نحو عفوك سلّماً

كلّ يوم عاشوراء، كل أرض كربلاء، كل مظلوم حسين، كل ظلّام يزيد
في كلنا كل ذلك فقل لي كيف ينصر المظلوم دون أن يكون في جلد الجلاد هالك؟
لدرب الظلّام سالك؟
هل تظن أنّ منا من للحق مالك؟
تمالك نفسك!
الوسط في اللغة قمة الجبل، النصر بالسواد دنس بلا حبل
موقف بلا عمل، ثورة على عجل
خشب مصفق لأقدام ممثل 
أنت المسروق وأنت المحصل
أنت المشنوق وأنت المتأصل في حبكة الحبال
مع أنها أمانة لم تحملها الجبال
عقال ما دونه عقول، حضيض ما دونه دون
عبيد متعادون، خلف طغاة...متعادلون
كلّهم بادون، كلّهم أظلم
العين والسن لا يخسرهما من يحكم
ما الأحكم؟ بالرأي الكتمان أم ينطقني الظلمان؟
بل مظالم بأعداد العباد، كالطريق للإله
ترى ما كان جرى لو الحسين انتصر؟
هل كان صاغ المجزرة؟
كل مظلوم محق حتى تشاد المقبرة

سيد الكونين اقعد وشوف حسين
على الثرى مظروح يبكي ويدير العين

الراس - في حضرة الحسين

بدك تقتل القتيل وبدك ترجع تقبض ديته؟
كيف بتسقط نظام وانت راضع أبجديته؟
كيف بتستقل عن غرب هويتك نسخة عن هويته
فلسفة ترجمان محلف عند سلطان بتنشوى ليته
بالأول كنت هندي أحمر
صرت مناضل ثم ناشط، كله كلام مترجم
النسخ قضيته
بكرا بتصير كعب جيبه النجل سقف مبدئيته
بتبلش تقول جمل بتبلش ب"يا ريته"
ولك عبقريته

صاير تشبه عدوك صاير وجهك دعاية
 صاير مطفى ضوك وبتنخاف من المراية

مؤطرة فوضويته
وتوصيفه لنفسه صوفي بينفي عنه صوفيته
كيف بيكون صوفي اللي بالأسماء محبوسة نيته؟
تاجر مبذر ماركسي
هيبستر بياكل ماكدونالدز ولابس تي شيرت عليها رسمة لبانكسي
New age New cage وبيسمي تييستو ترانسي
مراسل موثوق مصادره قصص Tom clancy
بتحبه لشخصيته وخصوصي بالمطعم الفانسي
مناضلة نسوية بتسمي صاحبة صاحبها القديمة معنسة
ثوري بياكله الدود اذا أمه مش مكنسة
رابر بيقول عن حاله "شعبي" بيكتب بس للرابرجية
بففف، فيلة عايشين بأبراج عاجية
رفيقة رقيقة، تقول ماري انطوانيت
رح ناكلك مدام اذا خلصوا الخبزات بالبيت

صاير تشبه عدوك صاير وجهك دعاية
صاير مطفى ضوك وبتخاف من المراية

معيياري للعبور من بشر لناس
مقدار التناغم بين الفكر والإحساس، الفعل والكلام، الحلم والعمل
الإنسان بيولد جرح وهيك بيقدر يندمل
لما الشمس بتنبلج بدي مدد فروعي
حافظ على وحدة جذع
لما الليل بتنفرج أساريره، ونهر الرمادي يرنرن بخريره
بنار شكي بنلسع
تانفك وانجمع
عالفجر لما بيخلص بحبّ كل الملح بالدمع

متلازمة الإنسان-المشهد : إنتاج شرق أسود

ارتجال لإسكات بنات أفكار عزرائيل

الراس:
هوية مكسورة قبل العرعور بكتير
خلايا بتنقسم تكاثر بكتيري
وينك يا عروبتي بالصحرا صرتي سراب كل ما قرب بتطيري؟
بمصر صرتي عقاب عزند سلاح ميري
جاري بالبناية عم يسألني وين أميري؟ بالضاحية أو بالبيرة؟
انتماءك للبلد أصلا عأي أساس؟ 
المدينة ولا الطائفة ولا الطبقة ولا الكاس؟
سلاحك من بندر سلطان أو بندر عباس؟
دولة مين؟ شاطرة عصواريخ الحشاشين؟ 
وعلوكي وعيد عم يوزعوا نياشين؟
لبنان اثنين معلومات ومخابرات
وزيد اثنين دعارة ومخدرات
في عيادات للتجميل بس لترقيع البلد خلصوا المستحضرات
موت سريري بالذاكرة عم نهلوس
في عتمة بخنق واضواء بتفونس
مهر بكرا غالي والحرية عم تعنس
غمض غمس بدم أخوك لقمة
يا بتلبس من الوانهم يا بلبسوك تهمة
عائشة وزينب، حرب حقوق المرأة شكلها
خارج الكوكب، حروف لغات الماضي حقلها
بآمن بالثورة حربك ما بتعنيني
لا حرية بتجيب ولا بترجع بصواريخك فلسطيني
فهمت ليش عمرت السفينة؟

الردة:
الأرزة بلها اشرب ميتها دم
قلي مين نحنا بجملة كلنا للعلم؟
اجمعوا نجوم العلمين اقعدوا بفندق بخمسة
وضوءي فكري والعلم نجس لمسة

ناصر دين الطفار:

غراضي من اليمونة و دفتري من الشام و ركبت معي السردة عالعلم بلبنان
ابيض مفهومة هاي بتعني كوكايين، اخضر خلط الدولار بالبنزين
احمر الفوق يعني نبيد عموايد مشايخ واللي تحت دم مؤمنين
كلنا للوطن بس الوطن للبطون عم نتعايش ارز و افيون قطعة من السما بس مفخوت الاوزون متل فخت الاصلاح بدولاب ميشال عون
ركز، الفرق بين تماني و اربعطعش متل الفرق بين العهر و بين الفحش
الارزة بلا و شراب ميّتا دم قبل الخمسة مولانا بعد السبعة بيشمّ
بي بيأمّو بيسمّ ناس بتزحف من هم و بيسب الكفار
يخي يا بو الطقم و سيجار ياللي بتتقروص من كلمة طفار لما بعت انتصار الثوار ببازار اليسار انقسم بين البار و بشار
علبونا بعلب ربطونا بعقد بنجونا بخرافة
باسم الدين او باسم الحداثة باسم فلسطين او باسم النجاسة
بين الجزمة و الافعى ربطت الخبز مع الذل شو نفعا ؟
بدي قلك قراري
بلدنا عبارة عن شبكة مجاري، لحافظ، عوجّو الحضاري بشخ بسوليدير بنص الوسخ التجاري.. و الارزة بلّا


الراس وناصر دين الطفار (انتاج مونما) - لبنان 2

Music By Munma
Mastering by C-drik
ِِِِArtwork by Ali Rafei
من ألبوم "آدم داروين والبطريق" الذي يطلق السبت 24 أيار في مترو المدينة

https://www.facebook.com/events/640428996038205/

الراس و مونما - معركتي

كشغرة

Lyrics and vocals by El Rass
Produced by Munma
Mixed &amp; mastered by C-drik Kirdec
Art work By Ali.
From the album "Kachf el Mahjoub" to be released in february 2012.
عزيزي الوالد،
القتال مشتعل والاستشهاد وارد
بس الجو بارد
بتمنى تعذر يا بيي رداءة خطي
ايدي اليمين منصابة لاففها بحطة
حلفتك برحمة ستي ما تجيب سيرة لامي
بس يا بيي هون فهمت وحدة حبري ودمي
ولاختي قلها: ما تهتمي
خيك نسج من خط النار سجادة أفكار
رح ترقصي عليها بشي نهار قريب
لما نحرر بلدنا من الجهل المعيب
دم الشهداء لازم يغذي قلوب مش جيوب
نحن بدمنا عمنقاتل والكرامة حقنا
مش تستفيد البدلة وتقبض هيي حقنا
مش تحتى تطول اللحية وتحبسلنا جسمنا يستولي علينا يللي ما بيعرف يلفظلنا اسمنا
عشو اسمنا ثوار إذا كنا رح نساوم
عشو اسمنا أحرار إذا كلنا ما بنقاوم
هيدي رسالة من التحرير، من وديان كشمير
هيدي رسالة من نابلس، من الجوعان بطرابلس
هيدي رسالة من البصرة
من ريف حمص الحرة
من كل محمد الدرة والبوعزيزي
هيدي رسالة من بنغازي
من ملثم بسينا بفجر انبوب الغاز
من تونس، من مهد الثورة
من اثيوبية علدورة
من دوار الشهداء بالمنامة
من تلال النبطية
من رموش عين مقاوم ما بتنام
من سفوح جبال قنديل
من دم شهيد عميروي النيل
من محتلي وول ستريت، من محتجي اثينا
من دلال المغربي، من ورد نبت عكفنها
من ضواحي باريس والمخنوقين بعفنها
من متاهات الغربة والغرقانين بسفنها
كان حزننا يلفنا
والخوف في احشائنا يخنقنا
سليبا كان حقنا، فحق لنا أن ننتفض
فلتستفض أقلامنا، ولتستفق سيوفنا
فلتحترق جلودنا، لتندفق حروفنا
والبنادق
سماؤنا خنادق
محطات الموت غرف في فنادق
ترف للمنافق أن يكون الصوت صادق
شرف للمقاوم أن يكون الحكم مارق
أن يكون العدو في ظلامه غارق
عزيزي الوالد
اتمنى أن تبارك
ثورات جيلنا البطل
لقد شهدنا ما حصل، وما حصدنا من ثوراتكم
غير الكلام في الظلام
غير العتاب والنحيب
وما نفع اقوالنا وجسم معلق فوق الصليب؟
وقدسنا سليب


من ثائر Les justes

Prod. by Watar
عن طرابلس وحمص وحمص وطرابلس

 نزار قباني-عزف منفرد على الطبلة

الراس:

نفسي محبوس
خد الشك دم، بس العقل بده يبوس
حرب الحق حلم بس الوجع ملموس
عالصدر كابوس، أشلاء بلا أسماء على وجهي عم بتدوس
لطرابلس تراب حمص عمل تلقيح
عبير دمع زهور عم بيزور مع الريح
منيح بس دور الجريح مش مريح
رح صير شيخ أعمى عم بيرتل للضريح
انجرحت فالتفيت بشريط أنباء عاجل
اشتقت فاهتديت عا خط حمام زاجل
المحبة مش مراجل وانا بحار نوحي
عرّوك فكرمالك اضطريت اشلح روحي
وارميها عكتافك، الربيع بعده مطول بعدن مزرقّين شفافك
بدنا للعدية رية، طرابلس وحمص دورة دموية
شيلوا صنم ساحة النور اكتبوا "الله رب الحرية
خلص صار صوت القصف ايقاع ماشي
عزف عوتر عنف تلحين فاشي
ركضت باجريي ريح، حولي صوت مش مريح
رصاص مثل صراخ ديك مخصي عم يصيح
لا أنا ثوري لخلفي مش لسلفي
ورح خيطلك توب صوفي مش حريري بشرفي
عن شرفتك رح غني وحمص تلسعني
رح فكك حيط فكري بكرا فجرك بيجمعني

السيّد درويش:

طفّيت رموشي، غفيت، شلحت العباية والطربوشة
زعيم عشيرة طايفة، عم بيبيع بضاعة مغشوشة
الراس قال الناس عايفة ربّا، عشية خايفة عم تتخبى
فتحت عيوني
الناس مجنونة 
مقسوم التراب بالنص
لعبة تجار واللص صارت
سيناريو حمص بدن ينعاد بطرابلس... فشر
الشعب واعي هي يوتوبيا
ولسخرية القدر علقوا بشارع اسمه سوريا
جوا المدينة استعصاء بوجوه البشر
اعصر السما مافي مطر انتفاضة بلا حجر
بلشنا وأد المدن وجاية الدور على قطر
أكلنا الموت حتى ترجعي توقفي يا حمص.. قومي
شدي الحيل.. طريق طرابلس قرب
شدي الشمال رح بتشوفي الجنوب سرب
ضبي وجع الأمة تحت صدرك جوا طرابلس
رح ضلني رافض كون معك للموت لأني معك للحياة
اخلصي من عهر الطغاة اتجبري
الشمس كتير قريبة لا تتجمدي
بكرا بتمشي على جفون الناس أنتِ وعم تتخصوري
ارقصي اليوم عرسك جايين نزفك
ل12 ألف شهيد سوري بلكي عا حمص بتزوري
ولما بتشوفي وش حمص بلا معالم
رح تتعلمي تثوري عالسلاح قبل الحاكم

الرأس والسيّد درويش - ميناء حمص

يامن بالوفا قد عودوني ..  بحق جمالكم لا تهجروني
ورقوا واجبروا بالوصل كسري  .. وعن أبوابكم لا تبعدوني 

El Rass Official soundcloud page :
http://soundcloud.com/el-rass-the-head
To Buy The Album Follow This link :
http://www.beatport.com/release/kachf-el-mahjoub-unveiling-the-hidden/874444

ElRass & Munma - 3echq - Islamology

Music by Munma
Vocal recording and mixing by the Munaqresh (Stronghold)



عمو وين بتروح الناس لما تموت؟
هلق عن جد أمي وبيي بالجنة؟
سألته وما جاوبني حاطط راسه بين ايديه وعم يغني
غنية بتبكي قلبي عم يتفكّك
عمو فارس كان بيته حد بيتنا
ويا ريتنا ما سكنا حده
يوم ما رجع البابا عالبيت أزرق خدّه
عمو بكي دمّ عالمخدة ما عاد هبده يهاجر
خاله بفرنسا عنده محل فلافل
يومها اشترالي فستان وقلّي خلص منّي فالل
مين أحلى قل لي: الجنة ولا فرنسا؟
لأنه البابا مات مقهور وأنا ما عم اقدر انسى
والماما كانت تقول: إذا إجى الصاروخ
الملائكة بترده
عمو كام شقفة من جتة إمي قدرته تعده؟

ليش براسي عجقة، وعجقة عالشحن؟
نار بقلوب نص الضيعة، النص التاني صاروا فحم
وين آخذنا الطريق الطويل بدي انزل بقا خلص
ما فيي اسمع عويل، اوف اوففف
شعري بايدي كمشات عميهرّ أفعى فزع على بطني عم تلتفّ
بدّي إرجع على الصفّ، بس مين بيدافع عنّي إذا الناظر ضربني كفّ؟
كلّن ماتوا، دي موت
عمو ليش وقف الشحن؟ من وين هيدا الصوت؟
وصلنا قال لوين؟ على مركز لاجئين
فجأة مسكني واحد، حسيت بحلقي سكين
سألني عن عمري،قلي إنت بنت مين؟
لما عرف أهلي ماتوا قال في خيمة لليتيم
جمعونا بنفس المطرح مع 30 صبي وبنت
ما خفت اختنقت صرت فكّر بدي إهرب
دورت بس ما لقيت حيط فيه براسي إضرب
حانفجر حاسة عمري من دينيّي عم ينسكب
عمشوف أحرف موت علوجوه عمتكتب

 تعبت فاتوا 2 ختيارية على الخيمة
واحد ضحك سنه دهب ريحة كبريت من تمه
في بنظراته جبل لهب طلع شيكات من كمّه
التاني شكله شيخ وكرشه مترين منفوخ
عميتذلل للأول لسانه مترين ممدود
أشّرله عليي صار صدري مسدود
لما طلعه لبرا في صبي أكبر منّي قام عن كرسته وجرا

قلي قعدي، ما بدي قال اصطفلي قمت قعدت
حط عينه بنص عيني، كأنه قال عليك شفقت
بتعرفي شو بدن؟ قمت هزيتله الراس
قال حيطلعك من هون، بس كرامتك رح تنداس
رح يتزوجك ويذلك، كل ما اشتكيتي يقلك
أنا اللي خلصتك،
يتزوجني؟ هيدا الوحش؟ لك أنا عمري 15
بدي أهرب رح احفر بالتراب نفق بحش
بتعلمني؟ بتعلّم
بتساعدني؟ بساعدك بالليل لما تعتّم
لما انتحرت الشمس زحفنا بلا ضو عمنشوف باللمس
بعدنا عن الخيم قمنا نحن التنين نركض
نضحك نغني فكرنا الوجع عم يبعد
ما عرفنا إنّا اجتزنا الحدود
ما شمّينا بالجو ريحة جوع وبارود
طلع رشق رصاص شفته هوى قدامي
طلع الطلق التاني فتح براسي جرح عمتطير أحلامي
صارت بايخة الأسامي الحياة ووحلها
عمو فارس طمنّي...أكيد الجنة أحلى؟

عم دور بالغرفة متل المجنونة
حريق، صوت  صريخ
ولاد مربطني متل جدولة
الخوف ورا الباب
الدرج بحر غميق
الحيط ملون بوجوهن
أجسامن مزينة الطريق
عم اغرق لون السما عم يغمق
بين اللجوء والبيت عم اعلق
يا موت يا بهجر
نازلة عالدرج رح افجر
لو كل زوايا بيتي بيغمروني وبغمر
عكل قذ يفة اعبر
خمسين حاجز
تلاتين رصاصة وموال
أنوثتي عم تكرهني
كل ما اسمع أنه الحرب للرجال
أساور على إيدي
عم تقطع وريدي
مكبلة بخيطان عم اغزل
سماء جديدة.. حرفيا
كون حرة اكسر الجرة
قبل ما تطبا
بدي امسح الصحرا بخصبي
مو رتل حكي بعبك
دقوا عالسيارة فيقونا
عرضوا كتافن بس ديقونا
كل وحدة بخيمة..
في برا خوف
وأنا روحي معلقة ببتي.. وتحته غيمة..
شعري لسا منشور
على أغاني الميمة..
في برا حكي عن العرض..
عن حكم تاء التأنيث ما بين السنة والفرض
عن الحريم وانا حرة مو حرمة
انا امرأة مو أمة
لازم تتدفى بعيوني مو تفرض عليي العمى!
العمى!
كيف مفكرني ارضى؟
بملي عيوني رمل
وما لحظة بحضنه أفضى
لابس قبة ومخنوق..
وعم يحكي عن اللجوء
ألف فكرة جوا راسي
ألف جني عم بيسوق
دخت اشتقت لتختي
لحكاياتي أنا وأختي
لعيون ستي العتيقة
لكاس العرق والمتة
قاطعني
قلي روقي
صرخت لك قوم اتركني
مسكلي ايدي نترتا بزقت افلتني
أنا حرف مربوط بدي شاعر ليعربني
اذا ابن ابوك اضربني!

عمننقل صوت انثى اندفن الحق بسرها
عمنربط العقل والكرامة بحبل سرة

لأنه لوجع أكبر من الورقة برقص
لأنه السجع ما بيكفينا لما الأنوثة تنقص

عمحرر ت مربوطة عغرد للانوثة 
من السلمية للغوطة لجباه ما بتوطى

لأنه رحم لأرض رحب لا تتخبي ببيت المونة
أنتِ لأنثى وأنت الشعب حقول الناصرة واليمونة

عم اهديك جنوني وكرسلك املي
عم قدسك مقياس للبلاغة جوا جملي
ثورة انتفاضة كرامة
شجرة شمس حمص رقصة خرس
عدف شامي
الشرف مش دم حمامة
شرف الثورة اضعفها
يكون مرفوع الهامة

الرأس و السيد درويش و مونما - ثورت

فشة خلق سريعة لتفادي الانفجار والانتصار على الموت

الموت ما تاب رجع يدق دم علبواب
بالأول اطمن عالاخوة والاصحاب
الشعر هر قبل ما شاب قد ما العقل شاف
نفوس فقيرة عمناكل الخوف حاف
صديقي صار قبل ما ينام بيرفع اللحاف
تقشف ميزانية بس بالقنابل اسراف
إشراف أمني على مراسم الدفن
إشرب كاس دمي على مواسم الكفن
اسحب دمعات امي وبيع منهم كتاب
مذكرات قاتل سابق تاب
كثروا الكلاب
ما عاد مفهوم شو صار اسمه الجلاد
انقسمت البلاد أنا بواد وانت بواد
وملتقى النهرين دم دموع حزن وسواد
نص لبنان شمتان نص التاني معلن الحداد
معدننا واحد ايه بس فاسد الحدّاد
هي مش رسالة لحدا ولا درس اخلاق
كل ما بيّ دفن ابنه لبيي باشتاق
عمسجل هالصريخ واقف ورا المايك عاري
عماسبح علايقاع بركي في بطفي عاري
من مين باخذ ثاري؟
اللي خنقني وخنق جاري؟
ولا من فقه الصحاري؟
ولا من صهيو صليبي صفوي صيني قطري؟
هويتي اللبنانية ولا جواز سفري؟
ولا دوام طفري؟
زواج قسري بيني وبين الحروب
بس انا كاشف المحجوب
ومثل الموت عن أرضي ما رح توب
لأنه الرب رب قلوب

مثل الموت (Prod. El Rass)

Original track version by El Rass & Munma
Vocals by Mazen El Sayed

El Rass & Munma - أمة الظلم / Nation of Injustice (Munma rework)

Music by Munma
A penguin on a philosophical journey of discovering one's self

مزاجي متارجح بطريق مسرع/كل مرة باجي لارجع من الباب اللي فتت منه بيطلع/اصلا مش موجود/ ماتريكس دوووود/ذاكرة سمكية رسم عصفحة مائية نقطة فلشت علمي صار اليوم سنة ضوئية/
نسينا معنى اللغة صارت الحمد لله تقية/نستله (Nestle) استثمرت بالمي صارت المي صهيونية بس نقية/ منك 60 بالمية/ بعد بتقول صفي النية؟
إذن من الذي خانك؟/السوس هر ضراسك ولا الكز عسنانك؟/حكي الناس عليك ولا الوسخ علسانك؟/راسك اللي مال ولا سلطة راسمالك عليك/شيك بيك/ تفضل حبيبي شيل من الكعب سخنين/ نبش بالماضي عن شو صار من سنين/بتتذكر الحدث ولا بتذكر الذكرى/اذا استرجعتها اليوم وقدرت حولت الفكرة/ كيف رح اذكرها بكرة؟/ بالحدود بين الداخل والخارج غموض كتير انتحاري ناوي يشوف فيديو التفجير/ زير بكل بير وميت بير بالراس/كلمة صادها من نهر بيرة بكاس ابو النواس/
صورة نوبة كنا ننتظر عبورها صارت الواو قبل الباء نبوة أصلها اسطورة/ ازدواجية العقل جوابها للحزورة/ التوازن فرط بعدما ربينا غلط 20 سنفور عسنفورة؟/ذكور مغرورة/ البطريق مترنح بس وفي بالحب/عقله وقلبه واحد فما بيعرف يطب/الطب تبعكن مجرد جمع لسم حيتين/دواكن دكاكن سرقة ببطون حيتان/ ولكنني بطريق وسابقى هنا صامدا بس حدور       عحي ثاني

لا تقلي حمار وحشي لا تقلي بندا/ بطريق عندي جوانح بس ما بنط عن البرندا/ جوانحي كالزعانف تغوص ببحر المعاني/ ما بعاني بالجليد رغم برودة المحيط/ واحد بالتفرع مش خليط/ مؤمن بالتواضع مش عبيط/ بهاجم بمنقاري مش لبيط/ برقص حول الوسيط/ بدون تفريط بالدقة/ برقة بواصل التزبيط/ لالتقاط ترددات صراط/ مستقيم بس متحرك بالايقاع ارتباط/ تذبذب مش اعتباط/ تردد بالتسديد بس بالآخر شاط
أغزركم تفكرا أكثركم تشكيكا/ بطريق اثنين بواحد سميني اوكا واورتيجا/ سألت الاله عن سبب تأرجحي/ قال لي: عمق الايمان أن يضيء الشك فيك ليريك/ أن الأنوار في السؤال لا الجواب/اختبار للعقاب تيكون الحق خالص مش طمع بالثواب بحث عن الصواب/ مجتمع متعالي كله بده يكون عقاب
أنا إجريي على الأرض يا خي وبس بدي طير بسبح بانعكاسات السما عالمي/ حيّ على الكائن الحيّ

  




الرأس و مونما - البطريق

انتاج المنقرش (Produced by dub Snakkr)

"هذا هو اليوم الذي صنعه الرب، فلنفرح ولنتهلل، نتهلل به"

خلي مدننا تفرح قوم رقص الشهيد
حزني عالإيقاع بدبح كأنه خروف العيد
الليلة غني الأوف وبكرا منرمي مولوتوف
كاس عرق وإذا كنت متدين مافي فرق
فودكا حلال اسم الدرينك "سلفوف"
سلطن عالموسيقى هز حلحل المفاصل
فاصل ونعود للمعارك والحدود
أوعك تنسى أننا بالنهاية نوع قرود
سرود عبرود كل العمر مش مقبول
بس البوز إذا بيطول معقول تصير كلب
ويصير العقل شبيه بالغول
مش عم أحكيك عن ال"كول" عم أحكيك عن تخطيط مسؤول
إذا الغضب والتحليل بيطول
بدون إستراحة للعقول بينعكس المفعول
الفلاح بيعرف لما الأرض بدها راحة
والراس بلا قلب بينفجر للصراحة
شوف الزار بالتحرير حتى من قبل الإطاحة
شوف دبكة دير الزور عطبول بالساحة
كون درويش حور دور طير فوق السور
لازم ترتفع حتى تكشف المساحة
الناس عم بتموت والراس بده يانا نهز الخصر عالتابوت
كتير "إيغويست" مش معقول شو هالوقاحة
مدام ما دام دم الشهيد سال كرمال يضله
الراس مرفوع يرسموا الأطفال ألوان
موال سجل موقف قطشناله من زمان
ناويين ننتصر فمنخطط بإتقان
أنصت للقرآن
ما تخلي قلبك حجر خلي المي تنفجر
حتى بموسم الربيع تقدر تشرب مي زهر
اجتهد كل الشهر وبس يكتمل البدر
اخطف الفرح غدر وبالغصب عن القهر
خلي القمر ينبهر من الضو بعيونك

هور يابو الهوارة\ تحيا الثورة وأحرارها
ناس بتبكي لترتاح\ وناس بترقص من نارها

فرحي فواشة تعا بحر الموت عوم
عم أفطر عالموسيقى تعن قهر البوط صوم تعا سحور الثورة قوم
تعا بذور الصبح هون
كان نشف عبد الناصر لولا ميّة أم كلثوم
عربش على شجرة تفاح وطي بنطلون فنتر عوجه البوم
زمن مشؤوم بس الأسود معلوم لما درسته للظلام صرت اكتشف الوان بصندوق مختوم
رقص نوبي قبل ما يغرقهم بسد أسوان
قميص عثمان صار بده كوي يا مان
آخر الدواء كل ما عليها فان
بلبنان عنده مذهب الفان قواد فنان
حلولهم سوداء متل كوب كوفي عنان
ضلوا الأخضر والأفيون للشعوب
منوم اجتماعي شغل السعودية وإيران
بفضل زرع أرضي بالإقناع
داعبها بخبطة الرجلين عالإيقاع
ما رجع الشهيد لما غنيناله ارجاع
الحداد إعداد للعودة للحياة بس كترة السواد عملتنا للموت عباد
الحداد إعداد للعودة للحياة بس كترة السواد عملتنا للموت عباد

فوش\Foosh -  الراس

بيناتنا بحور بيناتنا حروب، بيناتنا فروق بين شروق وغروب
بيناتنا دم، بيناتنا ثار، بيناتنا مشنقة عمر المختار
آسف عالتكرار، بس الأفكار عدوار الاستعمار
مع إنه المليحة رجعت لبست الخمار
تحته تسريحة وبقبو البيت بار
يا ريت هالبيت ميت بار

بيناتنا تكبّر والصدى تكبير
بيناتنا نسيج واختلط كتير
بيناتنا بلفور توتال وكارفور
بيناتنا بهار استشراق وعطور
بيناتنا جهاد ابو حمزة بلندن
بيناتنا استخدامات الكوندوم
حسين-مكماهون، نحن الذين خنتم
بيناتنا سماء بغداد والفانتوم
بيناتنا فوارق بين نيوتن وكوانتم 
بنك ليبيا المركزي وسؤال:من انتم؟
بيناتنا صليب رسمتوه عالدروع، لتجرحه الأرض اللي بترابها مزروع
بيناتنا مصارف والقمار عالجوع
بيناتنا جيوش تماسيح الدموع
تماثيل الخضوع لتخليد ذكرى جيل عبيد
الصورة توع مبيد تشنج بالمبيض
تحديد للنسل او النوم بالعسل
بيناتنا تبادل خوف وكسل
بيناتنا جوازات سفر عمتولع
بيناتنا هزات جسر عميوقع
بيناتنا حوار مخنوق بالحكم
بيناتنا انفصام الدين والعلم
بيناتنا غريق
بيناتنا انتقال فلسفة اغريق
بيناتنا ثورة بتأثير منحرف
بيناتنا قناص اقتصادي محترف
بيناتنا اوهام إن الآخر المختلف
بيناتنا عبد مربوط بحديد أو مستلف
بيناتنا...صار بيناتكم السلف
نحن العرب معروفين برد جميل وقبيح
لما تثور ضواحيكم عندنا تمويل وتسليح

بيناتنا اوروبا عظهر ثور طارت صارت ميدوزا
قلب قلبها حجر لما واجهت المراية عشط لامبيدوزا


الراس و المهدي- لامبيدوزا El Rass & El Mahdy - Lampedusa

Prod by @muqataa

وقائع كثيرة أكثر من خلايا الدماغ 
صار الراس بعرض الأرض فما بيلفّه الشماغ
جلود سريعة التبدل، شعبّ دبّاغ، زمن صباغ،
اختر لونك برجك انفتاح فرجك
اختر حزبك تصالحك مع كذبك،
زئبق سامّ، بنلفّه بأعلام، تعليب امواج اوهام
تعريب باسم الشرق للشرقيين، استشراق حكام
ضحية مزدوحة التغريبة الثالثة
عداؤه للغرب بس بالسراويل السالتة
رابعة اختارت الصحرا لما تكون الخاضعة
مقاومة ومراجعة صوفية المقاطعة
خمس أصابع بالايد محتكرك الثالث
شريط أحمر سميك، شريط أزرق فالت
من 6 أجيال وارث الخيانة باليأس
جاهل بالأرقام فصار ال 666 شيطان
سورة آل عمران الحكمة السابعة*
آيات متشابهة بيتبعها شيخ الفتنة
أنا سفينة نوح والأفكار على متني
ما بحضر تلفزيون فالاشلاء ما عمتني
بالعكس، صار الموت إلي إرث
بحافظ عليه مبتسماً، الشهيد على أعمالي مرتسماً
اللي أكلك عامل حمية فسحب دسمك، رسمك، بالعار وصمك
بدلوا بنبوءاتك اخترعوا النار الثامنة*
حتى مستوطناتهم عأرضك تظل آمنة
الهندي الأحمر ياللي بقصيدة درويش،
فتح كازينو بلاس فيغاس خلوله عراسه الريش
يتسلى السائح، 
شيراك بيحب الحريري، بس تزعجه "الأصوات والروائح"*
إسلام رأسمال، ما بده ياك تقرأ، بده ياك تحضر "إقرأ"
تيبيعك بلا فائدة
MCمنسف حلال، سوق مصرف، مجال جديد للاستغلال
أسلمة بنوك، أو تهويد للإسلام؟ 
سلام...عطيني علامة استفهام.
مش رح كون مثل الجيش التاسع النازي الألماني
نصفه استسلم للروس والنصف للأميركاني
أنا واحد فاعل لآخر قطرة، الموت جايي جايي 
مش رح عيش حياتي نطرة.
عجلدي وشم ناري بدون خطوط واضحة
بقلبي رحم دامي أوجاع جنون فاضحة
من روحي حبر أحمر آلام الحيض جارحة
كل يوم صلاة جنازة وانتم مختلفين عالفاتحة
بشرية مراهقة، رغم عمرها الطويل
انقسام السلاح مش بس من التمويل
حتى ورا المايك، ألوية وأساطيل
البلاد عم تتفتت والانا عم تتضخم
صار طبيعي اللي يموت عالجبهة يتفخّم
لما العقل بصراع أناني سخيف، مع نفسه بيتوخم
عادي إنه الجسم المكبوت ما يتوخى الحذر
كرش انفزر، العرش ثقل عكتاف الملائكة وزر
ميثولوجيا الخطر
فصيلة محبطة، دواها كيميا ودين
قصيدة مربطها إسطبل خيول حطين
عناوين بس الجلد ثوب طين،
والعلم طاب تين، حطّه بالعين تدمع
ملعب كرة بطابتين فعلى مرماك عم ترجع
عاشق وكفيف، إمام وعزّة بلبع*
سألته بربك من وين الأمل ينبع
.... ثلاث نقاط يتبع

*الآية السابعة من سورة آل عمران تقول:
هُوَ الَّذِي أَنْزَلَ عَلَيْكَ الْكِتَابَ مِنْهُ آيَاتٌ مُحْكَمَاتٌ هُنَّ أُمُّ الْكِتَابِ وَأُخَرُ مُتَشَابِهَاتٌ فَأَمَّا الَّذِينَ فِي قُلُوبِهِمْ زَيْغٌ فَيَتَّبِعُونَ مَا تَشَابَهَ مِنْهُ ابْتِغَاءَ الْفِتْنَةِ وَابْتِغَاءَ تَأْوِيلِهِ وَمَا يَعْلَمُ تَأْوِيلَهُ إِلَّا اللَّهُ وَالرَّاسِخُونَ فِي الْعِلْمِ يَقُولُونَ آمَنَّا بِهِ كُلٌّ مِنْ عِنْدِ رَبِّنَا وَمَا يَذَّكَّرُ إِلَّا أُولُو الْأَلْبَابِ
*النار الثامنة هي نبوءة ألصقها الكنديون في موروث السكان الأصليين، على أساس أنها نبوءة بقدوم مرحلة تصالح السكان الأصليين مع المستوطنين.
*"الأصوات والروائح"، عبارة عنصرية استخدمها جاك شيراك لوصف الأوضاع في الضواحي الفرنسية، خلال فترة انتخابية لاستقطاب أصوات اليمين العنصري.
*عزّة بلبع هي معشوقة الشيخ إمام.

el rass

AmrOtaefy