تأليف : جوزيف فيكتور
إلقاء : أمير طلعت
هندسة صوت : إيرينى كامل
===================================
السنة بتلملم أوراقها ... قمت أودَّعها في فراقها
ولقيتها سابت ع المكتب ... كشف حساب وعليه إمضائها

كشف حساب مكشوف قدامي .. تفاصيله بين البندين
بند جمايل مني بتخرج .. والبند التاني للدين
والبندين يحتاجوا مراجعة .. أفكار رايحة وأفكار راجعة
وأنا بينهم واقف ممتن..
ممتن لأشخاص حوالي وقت هزارنا ووقت الجد
وأفضل أحصر ليهم دينهم .. ألقى الدين مالهوش الحد
تحت مواقف مش منسية ... ألقى الخط عليها اتمد
مش ناسي لصاحب في زيارته ... كان همه يعرف أخباري 
ولا هأنسى عيلتي في وقفتهم جنبي وده ماكانش إجباري
وسرحت بعيني في الورقة بأرفع عيني وأبص الفوق
ولقيتني بأسافر في مراحم لإله مابيعرفش فروق
كان بيغطي عليّ ويستر وقت الضلمة أو في شروق
وصوت الرحمة يرن في ودني زي البوق خلاني أفوق
فاكر لما الحفرة اتغطت والوقعة كانت محتومة
وبإيدي رفعتك ونصرتك فَرّحت النفس المغمومة
فاكر لما الأمر إتوقف على ورقة بإمضاء مختومة
وإنتظاراتك طالت زادت .. وبتستنى ولو معلومة
ولقيت الأبواب تتفتّح .. أو تتقفِّل بس لخيرك
أنا كنت في ضهرك وبأساندك .. وأمشي بنفسي معاك مشاويرك

ولقيتني واقف مبهور ... فجأة لف علي الدور
ولقيتني بأراجع خطواتي .. مرة أتكعبل، مرة أقوم
مرة أمد الإيد بمساعدة .. ومرات تاني أكون محصور ... جوة مشاكلي ونفسي وشكلي
وقت ماكانت ناس محتاجة
ومشاعري جوة التلاجة
ولقيتني من قلبي بأدعي ... للرب إللي في إيده الأمر
زي ما بالرحمة غطيتني ... خليني نافع وبأسُر
وأمد الإيد وقت الحاجة .. وأنا بأطلب مليان بلجاجة
كان الدمع مغطي عينيَّ .. بين الحزن وبين الفرح
وإتغسل الكشف المتسجل فيه الجمع وفيه الطرح
ولقيت الصفحة بتتصفى
والقلب المحتار استكفى
طول ما أنا لي إله بيعاون .. مش محتاج تفسير ولا شرح

كشف حساب

RadioSama