بالمختصر المفيد ...   Zeina Coutry ~ زينة القطري

كلمات واداء : الشاعر محمد عبد العال
(https://www.facebook.com/77Melsayed)

هندسة صوتية: أحمد مسعد عدلي
(https://www.facebook.com/anaahmedmosad?fref=ts)

~*~*~*~*~*~*~*~*~*~*~*~*~

قلب خشب

سكتت .. سكت
غابت .. فغاب
و قلبه من خوفه بيحضن
ذكرى ف كفوف قلبها
مشيت .. مشي
سابت .. فساب
و روحه كافرة بالفراق
و لا عمره تاب عن حبها
بعدوا أوي
تاهوا و طريقهم مُلتوي
نسيت قوام و هُو نِسي
قلبه .. يُدق عَندها
هل يستوي ؟
إحساس فــ قلبه و قلبها
دقات حَنين
دقات شجَن
دقاته أصلاً كُلها
كانِت إليها و مِنَّها
 
كان كُل يُوم بتموِّته
فيها بِدون ما تحذَّره
إن الفُراق هَيكون طَريق
و عِنيها مِش بيهزَّروا
فجأة الزَمن عَدا قَوام
حتى مَلامحه اتغيَّروا
فاتِت سِنين تُلضم سِنين
و الذكريات بتصبَّروا
كان نفسه يعرف عنها
حاجة تصبر وحدته
وقفِت حَياتُه عندها
مشيت حياتها ونسيته
 
و هو تايه ف اللي فات
شاف طفلة أوي تشبهلها
ضِحكتله بَص ضِحكلها
و قبل ضِحكه ميكتمِل
الصَدمة فَرَضِت نفسَها
مكنش بالصُدفة الشَبه
حبيبتُه كَانِت أمَّها
 
قاوِم دُموعه و ابتسم
بَص لحبيبتُه و قالها
بنتِك جَميلة تِشبِهك
يحفظها لِيكي ربنا
طبطب على البِنت بحَنان
بإيد رَقيقة حِنينة
و سَابلها قَلب خَشَب
يَدوب في حَجم كفَّها
كان ذِكرى حُب مِن زَمَن
و أمانة حالاً .. رَدَّها !

قلب خشب - محمد عبدالعال I Mohamed Abdelaal - Wooden heart

الشتا المرادي يفرق
عن شتا باقي السنين
الشتا المرادي.. بارد
بيتنا اصبح ناقصُه واحد
بيتنا نِقصه اهم واحد ..
أنا عارف ان العمر نصيب
زي الأرزاق..
و انه قانون من قبل ما نيجي الكون محطوط
"الناس بتعيش , علشان هتموت"
و اللي بينزل تحت بينسى
و العايش هو اللي بيفضل دايما يشتاق..
و بيفضل داير ف دماغه شريط التفاصيل..
أنا فاكر ..
من ساعة ما ابويا اخدني
الصبح ف اول يوم "كي جي"
خلاني اسوق و انا فوق فوق حجره
كات ماشية العربية..و ماشي..العمر جميل
و لغاية ما عقارب ساعتي
أخدوني على خوانة و جريوا
و لاقتني ف وسط عزاه.. بليل...
,
فيه حاجات اكره افكر فيها
من كتر ما فعلا و جعاني
مثلا..
الدنيا ف وقت مكان فيها
و كان عادي بيقعد ف الصالة
او يقعد ع الكرسي مكاني
مافضلتش حاضنه ازاي لما..
كان لسة الحضن ف امكاني ؟
اللي بيمشي بياخد دايما
من قلب اللي عاشرهم حتة
مش ممكن تتعوض تاني
و أنا ابويا ف وقت ما كان ماشي
و بيلملم روحه و بيسافر
خد قلبي معاه جوة الشنطة
و ساب جرح ب عمق مالوش اخر
مش ممكن صاحب او بنت هتقدر تملاه..
,
أنا باين قدامهم بارد
باين أهدى و أعقل واحد
أنا كنت عليك دايما ساند
دلوقت انا لازم أشيل عنك
أنا جامد زيك و طالعلك
مش عايزك تقلق على ابنك
لكن بيني و بينك يعني..
مالحقتش لسة أشبع منك
ما أضحكش عليك
أنا بفضل بليل مستنيك..قدام الباب
الساعة اتناشر ليه و ماجتش
و طلبتك كذا مرة ماردتش
البيت منغيرك بقى ضلمة
و الجنة أكيد هتنور بيك
تعرف....
أنا بنسى ساعات
و بدل ما أدعليك ب الرحمة
بدعي يمد ف عمرك ليا.. و يخليك
ليه ف الجنة مفيش شبابيك ؟
كنت أشوفك حتى دقيقة و لو مش هنطق
عايز أفضل حاضن فيك..
و لغاية ضهرك ما يطق طق ,,
صحيح..
و ديت الساعة اللي ف اوضتك
تتصلح , طلعت مش بايظة
مع اني حاسسها بتمشي ابطأ !
أشهد انك كنت حنين..
و انك كنت و نعم الأب..
ده اللي مخلي فراقك صعب...
انا اسف لو برغي ,
أديني..
إرتحت و فضفضت شوية
و بالنسبة ل أمي و أخواتي
فانا زي ما كنت مربيني
بابنيلهم بيت جوة عنيا..
و لغاية ما عقارب ساعتي
تاكل ف العمر و أعديلك..
مع ألف سلامة...بدعيلك
نتقابل ع الناحية التانية..

كلمات و أداء : محمود خليفة
هندسة صوتية : مصطفى حسنين

إلى والدي -- محمود خليفة

الحكاية باختصار .... كلمات : عمرو حسن

مريض كانسر_اشرف عبدالهادي

ايه ياولدي

مزايا الجانب السئ


سعيد جدا
بتشريفكم مخيلتي
فى هذا الوقت تحديدًا
يا كل مذابح التاريخ
سعيد اكتر
بأن وجدي فـِ الدنيا
مجرد غلطة فـِ التأريخ

"سعيد صالح" توقع
ان مشهده فـ "زهايمر"
هيعملي إكتئاب
كان ممكن اصعب عليه
وعشان مايعرفنيش
مثل المشهد ومات
المكتئبين في الوقت الحالي
عملوا المشاهد شماعات
نظرية الاحتمالات ظالمه
م المستحيل ترضي الجميع
يبقي احتمال إدماني للضلمه
هيجعل مني شخص وضيع

"لما تقوم الصبح وذكرياتك ميح"

هتبقي فرصه مدهشه
انك هتبدء من جديد
كل الحاجات
دا فى حد ذاته شئ مهم
تعالي نحلل الموضوع

القيمة فى الذكريات
مش انها قديمة
انت ابن ليل
ظهورك بالنهار يشبه جريمة
يجوز هتلقي الشمس 
تبرقلك لوحدك
ما تخفش اجمد
دار المسنين اكتفت
عود للرصيف افضل
شاعر وطردوة القصايد
تفتكروا ليه يفضل
رد السؤال بالرفض
ماهوش محتاج لأذن
حرارة فاقت ترمومتر الحزن
اجدع وجع هو اللي باقي وبس
موت السجاير ع المخادع
خلاك بتكره قعدة الفوتيهات
فـَ حبيت القعاد على الارض
اسهل ف تحديد الخساير
جابتلي هدية ولاعة
لاقتني بطلت السجاير

مزايا الجانب السئ
عيوب متغلفه ب اخطاء

-الاستلواح سر النجاح
بيع اللي شاري
واغتنم ذنب التجني


-كله عند العرب صابون
ترغي بنية التنضيف
برضوا الوساخه مقررة لحلمك


-يا صابت يا خابت
احتمالات كتير هتغرقك
زي ما تكون ف اتوبيس 52 راكب
واتزنقت تلم اجره

-كله بيعدي
بس هيدوس عليك
كأنك خنفسة والحزن فيل

-البضاعة المُباعه
تشبه رباط كوتشي القناعه
تملي مفكوك ف الاذاعه
مشهد مكرر ف البشاعه

-المولد الزحمة
اروق كتير م الشِعر ف دماغك

سعيد خالص
بكل اللي اتكتب عني
وكل اللي اتكتب رغما
وبعض اللي اتكتب سهوه
مريض بالسرد والتصوير
سعيد بالحب
بعد ما جالي متأخر
بمحض الصدفه اعجبها وتهواني
وصدفة برضوا اتلخبط
على المسرح ف قصديتها
واعيد تاني
يا عاجبك وانتِ عجباني
يارب ما يبقي ما بينا فراق
ببلغكم يا كل الناس
مزايا الجانب السئ
عيوب متغلفه ب اخطاء

#أبــوالـــرتـــايـــن

مزايا الجانب السئ/علي سليم

كلمات : ابتسام مختار 
https://www.facebook.com/ebtesam.ahmed.mokhtar
هندسة صوت / يُوسف الدالي
https://www.facebook.com/daly.yusuf?fref=ts
أداء / سما نوار
https://www.facebook.com/samanawar2

ياما قُلت
ومحدِّش صدَّقنى
إنى بحبها.. وبتكرهنى
وبتخنقنى
وبتزعجنى
وتشعلقنى
وتمرمطنى..
وافضل احبها رغم الزحمة
رغم البيه السيد حِشَرى
واخته الرغَّاية.. واخوه الكِشَرى
وبرغم الأمورة.. الرِخمة!
وبرغم الكُرسى المِتكسَّر
وبرغم التنطيط ع الكوبرى
ما هو كله يهون علشان خاطر
خَط من الأول للآخر..
قادر.. بالصُدفه يعلٍّمنى
قادر إنه يخرَّج منى..
ضحكة بتخُض اللى يشوفها
فِكرة.. بتخلينى اعرفنى!
شوف رغم دى حاجه بترْكَبها
مع ذلك بتعلِّمك المشى!
وشوارع مصر المحروسـة
الواقفة.. الزحمة.. المنحوسة
تدِّيك الصبر ده مجَّانى
فوق إن سماعك للرغى
بيضيفلك عُمر واحد تانى
بالذمة ده عرض ده يتفوِّت؟
هتقولى الزحمة دى بتموِّت!!
طب مش حلوة الموتَة جماعة؟
أرحم من كام واحد حى
يومياً بيموت م الوحده..
فِعلياً عُمره ما جرب سَعى
عُمره ما جرب رِزق الكرسى الفاضى الْمِستَّنيه
الكرسى الفاضِل.. مَخصوص لْيه!
عُمره ما جرَّب بسمِة جِدة..
لْواحد فاضِل..
فضَّل راحِة سِت كبيرة عليه
مع إنه فعلاً مش قادر..
يفضَل واقف على رجليه
يعنى بالعربى من الآخِر..
إن كان أتوبيس, ولَّا سيرفيس, ولَّا مشروع!
إن كنت جعان ولا تعبان ولا موجوع
وسواء بردان.. هتموت م الحَر
صايم.. فاطِر ..
فى الزحمة هتتعلم تِدى
تِكسب وِدى
هتدوس على رجله يبرَّقلك
تتأسفله, هيروح زاقَّك!
وفاجأة يضحكلك من قلبه
ويقولك: يا عم وَلْا يهمك!
ويبُصِلها: يا آنسة فى مكان
آه.. هناك جنبُه!
ويوسَّع ويسيبها تعدِّى
فى الزحمة انا باخد شنطتها
وبشيل عنها..
وبتشيل عنى
وبفكَّرها بمحطتها
بيفرمِل, هى بتستندنى!
فى الزحمة هتقرا الجرنان
تسمع قرآن.. أو هتغنِّى
هتلاقى حلاوة فـ وسط المُر
وفـ عز الخنقة هتكون حُـــر!
وفـ عز الدوشة مبتموتشى
أصل محـدِّش..
بيموت م الصبر



في الزحمـــة_إبتسام مختار_سما نوار

قصيده"من غير مناسبه موت" (رحمه ناصر)

#لم_يُرسل_بعد!

قصيده:الحياه كات كدبه فعلآ..كلمات والقاء "رحمه ناصر "

لم يدفئني نور العالم بل قول أحدهم لي أني ذات يوم أضأت نورًا في قلبه

في الزحمـــة_إبتسام مختار_سما نوار

Sama Nawar