كلمات :سامح رضا 
أداء:سامح رضا 
ــــــــــــــــــــــــــــــــــــــــــــــــــــــــــــــــــــــــــــــ
سَاند حلمه على كَنَبَه تحت الشيــش ..
 روحه بِتِتْسَرسب منه
 بِتِتْكوِّم في سيالته
 نِفسه في نِسْمة فَجر بس مفيــش !!
 بينه وبين نفسه مَقْبض شيــش
 تَواشيح الفَجْر طايفه حوالين سَمْعُه .. بدون فَايده
 إمْشــي يا نُور الصُبْح خايف من الوحْده
 خايِف لـ تْمِس كرانيش فُسْتانها وَقْت الزًّفــه
 إفْرَحى إنْتى .. أنا فرْحِتى خايفــه !!
زَاهِدْ تُراب نَفْسى وتَحْريكه لِتفاصِيلــى
 طول عُمرى أَجْري عَلى عُيونِك ولا تِجِيلــي
 بَزَعَّقْ وعُروقى تِتْبعتر عَلى رَقبْتي مِن الزَّعْقه.. ومَتْخَوِّفْــش ،،
 جَبَــان يـا أنـــا ،،
عايِش في الحَياه بِضِلّى ..عايش بِعَفَاريتــى
وبِلْياتشو مِصَاحِبْ حِتّه مِن رُوحى .. بَضّحّكْ بيها حَبّة نـاس 
خــــايـب .. خايب في وصف ملامح تشبهنــى
 مَعَ إنى بِمِليون وِش !! 
رَسْم الكَنَبَه بِتَفَاصيلها .. بِرُكْن الشيش وستايرها.. مِزاحمه كَرَاكيبى جوايــا 
تِهَيّج عفَار الخنقه في صدري 
تِدْمع عُيُونى وتِحْكي لِلحُضُور قصّه .. يُحْـــــكَــى أَن ..
 الحِلْم لو طوّل .. يِعْشَق الأَوْهَــام 
والحُزْن لو ميّل .. هَيْزُق في الأيّـــامْ 
يِسْنِد الحُزن راسُه على جِدار الحَياه ويبتســــمْ
 يِلبِس عَبايتُه الغَميقـــه ويِتْرســــمْ
 نَاسِجْها مِنْ يِجي مِلْيون عــامْ 
مِتْرَقّعه بِوشوش خَلق مَوجوعَــه
 أَعْرفْهم كُلّهم .. واجْهل سِر أوجاعهـــــمْ !!
 أفوت ومامرمِيش السّـــلامْ
يطْلق نَصَايحُه زى سِرْب من الحَمــــامْ
 ضَل الطريق لمسَامعــــى
 أَجرى ..وأَجَرّى الحِلم فى نفســى
 يُصرخْ .. يِلمْس حِتّه من البراح
 يلعَن صفَاتى المِلاح ،،
يغْضَب يرجع يضيـــــق .. ويستجيب آخِر الطريــق 
وكأنى .. وكأني بقصُد اتْكعبل فى تُوب الحِلم !!
 كأنى أصْلا بَحْلم بَحق وحقيــق ،،
 وكل حَاجه فى حَياتى (كَأنى)  كأنّى بَـحِـبْ , كأنى بَحـْـلَـم , كَأنى مَـاشِى،،
 يا خُوفى لــ العمر يِقْطَع ضفاير شَعرها السوده 
ويدْهَس زَهْر أَنْفاسى عَلى المَاشــــى
 ويقْلع زَوايا البيـــت
 يا خُوفي لـ يحْسِبْنى كَأنى مَكُنتش جِيـــت 
 لَكنى رافِضْ .. لكني رافض الفِكْره
 رفْض السِجين للزَنازيــنْ .. للسّــور .. لِلأســـلاك 
رافض فَك ضَفايرها السّوده ونَزْع البيـــت
 رافضْ فِكرة إنّى مَعُدّتش هَشوف عُيونْها .. بِتودّعنى من الشبّـــاك
 لَكني هَحَاول .. هَسافر ويا نــور الصُبحْ واعْملّها فُستان فَرَحها بأيديـــا
 هَرْفُضْ إنّى أصَاحبْ حُزْنى مِن تاني .. صَعْبه عليـــــا !!
 سامِحْنى يا صَاحبى .. مَفيشْ بينى وبينَكْ أى كَلام
 نَصَايحَك ..ومش سامـــع
 وبَردو هَعَدّى عليك ومِش هَرْمى أى ســــلامْ
 جَعان السّعاده  .. يِحْلم بسُوق الفـــرح ْ
يِحْلم بِموسم الطّــرحْ 
وجَعَان الوِحْده ..  يِحْلم بِغِيِط بنِى آدميـــنْ
 يِحْلَم بِهُدوم الشتا .. وريحة المطَره فُوق الطيـــنْ 
يِحْلَم يصاحبْ .. يصاحب حتى أَحْزانه ،،
يا صَاحبي ..حَاول زيي تصاحبْ نُور الصبـــح 
إحْلم .. إحْلم شِدْ الهوا لِصدرك وتباريحـــهْ 
عِيش .. عِيش حِلمْك متتكبـــرشْ
 حِلْمكْ يكبرْ .. متتكبــــرشْ 
عِيش كَما أَسْنان المشــطْ
 عِيش حِلمَك كَأنك عشْــت !!


جعان سعادة

Sameh Reda 8