على الهامش
نزود فى الكتابة حروف 
بنسبه كل شئ ملهوف 
فيرجع كل يوم مخطوف 
وتاني نطوف 
طواف عابر سبيل للدنيا بين قلبين 
على الهامش 
بنمسح حرف فبينزف عليه سطرين
ونقسي على الحياة يمكن 
تشوف قسوتنا هي تلين 
على الهامش 
نحب بقلب مش مغشوش 
نِبِّل الروح بدون ما تبوش 
نرجع كل شئ سيبناه 
لناس مشيوا وماهتموش 
ببايع قلبي ليكو امام 
فبسرق م السطور أقلام 
نصيبي من الكتابة حروف 
بتبكي الليل بدون ما تنام 
نصيب الثورة ع الهامش 
حدود بكرة 
نصيب الصحبة ع الهامش 
بيبان ذكرى 
نصيبك انتى علي فكرة 
يضيق لو يبقي ع الهامش
على الهامش 
قوارب صيد 
وبحار يرمي كام شبكة يصيد الناس 
فى ناس الجوع بيسرقها 
فتملكهم بطُعم رخيص وشَربة كاس 
تقيدهم بأفكارك / وتجعل منها افكارهم 
تطفي بجلدهم نارك / وتنفخ جاز فى مواقدهم 
على الهامش فى ناس غيرهم 
تعيش الدنيا بالنية 
ومين لو راح ماهوش راجع 
وكل الجاي ملوش دية 
دي ناس لو ذكروا كل الكون 
هتفضل بردو منسية 
على الهامش رجال فرعون 
علي الهامش كنوز لقارون 
على الهامش بواقي سنون 
قلم مقصوف فى اخر سطر ف كتابته 
يجوز لو كان ولد ساكت 
بيسجد (ذل ) فى عبادته 
يجوز لو كان طبيب فاشل 
بيقتل أهله فى عيادته 
مكانش نفوه فى مملكته 
وكسره سنونه لكن سن 
سابوه يشهد على نهايته
على الهامش 
بواقي النيل في قلب العاشق السهران 
بنات بتميل قصاد عابد بيقرأ ورد م القران 
ومزيكة أغاني الست واخر ربع ف الفرقان 
على الهامش 
شتا وامطار 
واخر فرد جوا الزار 
واول مرة اكون درويش 
وكفري بكل شئ بقشيش 
عشان الشئ بدون مجهود 
يموت تأثيره لو هيعيش 
نصيبي من الصحاب فرقة 
نعيش العمر يوم سرقة 
ونسرق م الكلام ورقة
نسيب الكل ف المينا
نحب حاجات نعيش ليها 
لكن ماتكونش يوم لينا 
نروح لقلوب 
بتحفظ صم أسامينا 
نشيل الدمعه للفرحة 
وناس ميجرحوش فينا 
نشيل الفاس لارض عمار 
نجيب دراويش لباب الزار 
تعيش الثورة بالثوار 
وننحت بكرة بأدينا 
على الهامش حاجات اكتر
عن الاحزان هتلهينا
على الهامش مفيش هامش
على الهامش حياة انسان
بتكمل بس بالهامش 
بيحلم لو يشوف الكون 
يدور لكن على الهامش

على الهامش

اخترعتك 
من صوت نغم فيروز مع القهوة 
وسميتك الشتا
من القهاوي والنواصي والمطر 
من ليل ديسمبر والدفا 
من ضحكة كانت نصها مسافات 
وعملت لونك 
تشكيلة من الوان عيون كل البنات 
واديت لصوتك لحن مزيكا حزين 
اخترعتك من سؤال بتحب مين 
- بديت القصة تحت الشتي
بأول شتي حبو بعضن - 
اخترعتك 
من كل لحن بإسم عمر خيرت 
من كل مطرة ف الشتا نزلت 
من كل شارع فيه مشينا 
او كل حلم حلمنا بيه 
وانتى اعتبرتيه كان هزار 
اخترعتك 
من الفجر والليل والنهار 
من صوت ناي بعيد جدا 
وكوبليه منير 
-يا حبيبتي البعد نار
قلبي داب م الانتظار - 
انا اخترعتك 
من لحن عمار الشريعي وصوت حليم 
من كل شئ قيم اكيد 
علشان قديم 
من نجاة 
في القريب منك بعيد 
من كل حاجة ريحتها فايحة 
من وردة ماشميتيهاش 
من بارفاناتي اللي انتي دايما 
محبيتيهاش 
من كل قهوة وشها مظبوط 
وعملت من البحر حواجز 
وعملت من الرملة سدود 
و ف كل سد بعدي منه بعيش 
وف كل مرة بعيشها ليكي بموت
اخترعتك 
من كل تحويجة بن 
من ضحكة كل عجوز مسن 
عشان شوفت فيها طفوله 
تشبه الواضحة ف عيونك 
اخترعتك 
واخترعت معاني ليكي 
مستحيل تقدر تخونك 
انا بسأل الناس والسحاب 
والتلاقي والغياب 
والدعاء المستجاب 
ليه اللى موجود بنداريه
وبنبكي ع الموجود غياب 
الصبح لعنة كل سهران م الوجع 
دايما يشوف النور 
كاشف لكل المستورات 
الليل جدع 
بيجمع الادوار ف دور 
ويموت ف نفس الدور سكات 
الشتا صاحب ,,, صديق تدارى فيه 
انت وهي !! انت وبس ومج النسكافيه
الشتا حالة ,,, الشتا حيرة 
والمطرة حبر بيحكي بيه 
دعا واشواق ,, صلوات وغيرة
الشتا بيغني بصوت فيروز 
-ما زالا قصص كبيرة
و ليالي سهر و غيرة
تخلص بكلمة صغيرة
حبوا بعضن .. تركوا بعضن 
اخترعتك 
بس كان اول شتا 
وخلصت القصة بتاني شتي 
تحت الشتي تركوا بعضن -

اخترعتك

لو هاخد فرصة ب اني اختار 
انا كنت اختارت ابقي ممثل 
افلامه قديمة ومابتتشافش 
وملوش جمهور غاوي يتابعه 
والفيلم كئيب واخد طبعه 
وبيضحك لكن بالصدفة 
او ممكن اكون لاعب كورة 
موهوب ف قعاده علي الدكة 
ومصاحب يأسه طول السكة 
مستني الفرصة اما تجيله 
متاخر دايما عن جيله 
علشان بيكسل يتمرن 
ويبرر فشله قصاد نفسه 
ويقول انا مستني الفرصة 
او ممكن اكون عازف موهوب 
لو هاخد فرصة ب انى اختار 
انا ممكن العب ناي وجيتار 
واعرف مقامات وامشي سلالم 
واحفظ الحان لاغانى زمان 
لاغاني محدش يعرفها 
ومحدش فكر يسمعها 
او ممكن اكون نفس الكاتب 
اللى كان اتبرع وكتبها 
او ممكن ابطل بعديها 
وافضل اني ابقي مغني 
واقول انا عايز اغنيها 
لو كنت اختار ف هكون شاعر 
اشعاره تأثر ف بلاده 
ويحب الناس زي ولاده 
يتاخر مرة علي معاده 
علشان يسمع صوت الجمهور 
بينادي عليه ويقول اسمه 
موهوم بالخيلة الكدابة 
من ناس عارفاه بس بأسمه 
لو كنت اختار ف هكون مخرج 
واشوف الدنيا من الكاميرا 
وازعق ف اللى بيستهتر 
او ممكن اطللعهم برا 
واعيد المشهد 100 مرة 
وامنتج في كلام و في ناس 
واطلع كل الاحساس 
في العدسة الفاتحة على الدنيا 
واقول هايل لجميع الكاست 
واعيش انجاز ان انا خلصت
لو كنت اختارت غير الواقع 
كان بردو اكيد هيكون واقع 
وابقي اتسرعت 
وارجع واقول 
لو كنت اختارت 
.

لو كنت اختارت

دواير دواير 
حياتك دواير 
تهل البشاير 
وتنقص سنين 
دواير تلف السعيد والحزين 
دواير دواير لحد النهار 
تعدي الثوانى بسنين في انتظار 
ملخص حياتك في كلمة هزار 
تعدي ,, تشاور 
تفكر ,, تحاور 
ويغلب عليك اللي راح في اللى جاى 
تقول المهم انى عايش وحي 
تغمض ف عينك وتحلم بضي 
فحلمك يناور 
يكلبش ف ايدك ,, فتِحلى الأساور 
تعيش عبد صدفة 
وعبد المصاير 
وكل اما تنقص في درجة يعاير 
قانون الحياة زي نقطة في دايرة 
وكل اللى جاي واللى فات في الدواير 
دواير دواير وربك عارفها 
بتزهد في حاجة وتطمع في طيفها 
تقرب تقرب تقول مش شايفها 
وتبعد فتكتم ساعتها في صوتك 
سكوتك 
طريقك 
وطوج النجاة 
وموتك 
صديقك 
بطول الحياة 
وقُوتك 
يفيدك 
لاخر مداه 
ووقت اما يخلص 
هتفضل لوحدك 
يسيبك تكمل 
وتعمل مساحتك 
كلامك بيشبه لفصل الخريف 
مميز ف صوتك 
وحزنك سخيف 
بتشبه للقمة ناقصها الرغيف 
بتشبه لطوب رص جوا العماير
بتشبه لطفلة تطوِّل في شَعر 
وعمره في مرة ما شاف الضفاير 
بقولك دواير 
مسيرك هترجع لنفس المكان 
وتكتب كلامك ده مرة كمان 
مسيرك هتبعد 
وترجعلي تانى 
تقولى ساعتها ده مجني 
وده جانى 
هتفقد ساعتها في معني الحياة 
وايه الحياة لو تروح المعاني 
هقاطعك ثوانى 
وكل اما تحلم في مرة هقاطعك 
غشيم بالوراثة 
معاشرك وعارفك 
جبان بس تظهر 
مقاتل وثاير 
بتحسب نجاحك 
بحجم الخساير 
وتخلص حياتك بتشبه لعقرب 
مجرد وظيفته 
يلف ف دواير

دواير

ازاي تتكلم عن بكرة 
وانت ملخص أيامك يوم 
وازاي تتكلم عن واقع 
وانت مقضي الايام في النوم 
ازاى بتنام 
مقصدش ازاى بتنام بالليل 
انا قصدي ازاى غايب دايما 
ازاى بتكون حاضر بينا 
كإضافة فرد ف مجلسنا 
بيحسس قبل ما يلمسنا 
او ممكن حتي ميلمسناش 
تقييمي الشخصي على حضوره 
انه استأذن أو لسه مجاش 
ازاى أحلامك أكبر من حيز خطوة 
ازاى بتنام مع انك شارب كذا قهوة 
ازاى مجروح من غير ما تكون أصلا بتحب 
طب ليه بتقفل شبابيكك 
من قبل الريح عندك ما تهب 
طب ليه بتسب 
للعيشة وللعايشين فيها 
وبتلعن بكرة ب 100 ملة 
وازاى بتشوف كل الناجحين ف الكون قلة 
وازاى بتنام رغم انك عارف ان الفجر خلاص أذن 
طب شوفت الشمس ف كام مرة تطلع من بدري وتضحكلك 
وتلاقي عيونك بتحزِّن 
العمر بينحت تفاصيلك 
وبيكتب بؤس على جبينك 
وكأنك مسخ من الماضي 
عايش فى إطار المستقبل 
الدنيا بتديلك فرصة 
وانت اللى بتحلف ما هتقبل 
مش قصدي ان الدنيا دي جنة 
ولا حلم و أسهل يتطبق 
لكن معروف اللى بيبدأ 
هو اللى بيوصل ويحقق 
طب بص لكام واحد جنبك 
كانو زيك عايشين في سراير 
الدنيا اديتهم طرف الخيط 
والخيط بيكر ف خيط زيه 
والدايرة بتكبر ل دواير 
طب بص لكام ثورة بتنجح 
لمجرد اصرار م الثاير 
أو بص لخلق الله حواليك 
أو تابع اوقات اليوم 
النور بتلاقي وراه ضلمة 
والضلمة ييجي وراها النور 
ف ازاى بتوقف كل الكون 
والكون أصلا من طبعه يدور 
لو ناوي تكمل ف الاحلام 
من غير ما هتبدأ تنفيذها 
يبقي توفر على نفسك يأس وحيرة وخنقه وسب 
وسجاير تشرب بعضيها 
وتعييش اليوم زي ما هو 
انا اقصد يعني تقضيها
ونصيحتى تقوم احسن م النوم 
سيب الاحلام علشان غيرك 
علشان الناس اللى بتحلم 
وتقوم تسعي مع نور الله 
وبلاش تتكلم عن حاجة 
عمرك ما ف يوم هتحققها 
وكإنك تايه ف السكة 
وبلاش تحكي عن الظلم كتير 
وتزود تحابيش للحبكة 
وبلاش كل ما تزهق تكتب 
ف حاجات والاخر تمسحها 
وازاى بتقابل كل مراية وتشكيلها 
وتقوم ف الاخر تكسرها 
جدران الاوضة اللى اتخنقت 
من ريحة همك وسجايرك 
مبقتش تصبَّح وتمسِّي
وكلامي اللى كتبته ده كله 
كان مشهد ليا قصاد نفسي 
.

المراية

هبه .wav

حلف القمر يمين وقاللي يا حلوة ساعة ما شافك

حلف القمر

تيرا ريرا تيرا رارا 
ناس مهدية وناس محتارة 
ناس بتقضي العمر ف ضحكة 
وناس بتشوف الضحك خسارة 
تيرا ريرا تيرا رارا 
الدنيا دي حلوة وغدارة 
بتبيعلك في المية سمكها 
وبتكسر فيك السنارة 
تيرا ريرا تيرا رارا 
الاحلام بايته ف خمارة 
تحلم أكتر تشرب اكتر 
والمسألة مش عايزة شطارة 
تيرا ريرا وتيرا رارا 
طب فاكرين حج العبارة 
ناس في البحر وناس في الملعب 
والكورة دي دايرة ودوارة 
تيرا ريرا وتيرا رارا 
رمى كشاكيله وجابله سجارة 
قالوا شهادتك بكرة تفيدك 
قال لو صح ادوني أمارة 
تيرا ريرا تيرا رارا 
فيلم وحصري وكله اثارة 
هات رقاصة كمان رقاصة 
وهات مسطول في اديه سقارة 
هات طبال 
واديله الطبله 
كام شيخ ضال 
غيروا في القبلة 
قطعوا اديك 
وادولك دبلة 
شوفت فلان 
ولا عمري عرفته 
كان يا ما كان 
ولا كان وكنتوا 
حب زمان 
دلوقتى كرهته 
مسحوا الدم 
وسابولك ريحته 
في الجرنال 
كتبولنا القصة 
نصر عظيم 
قصدك دي النكسة 
بكرة مراجعه 
واخر حصة 
ويارب تكونو اتعلمتو 
ودعيتوا ورانا وأمنتوا 
والمجهود ما يضيعش خسارة
تيرا ريرا وتيرا رارا 
خش وفرق زيت ف الحارة 
طب والرز يا ثروت أفندي 
- إدي لكل محافظة شكارة 
تيرا ريرا تيرا رارا 
يام عيون واسعه محتارة 
سيبت الكون غرقان وناديتك 
وسط القلب بنيتلك بيتك 
مديتلك ايدي ودعيتك 
حطي اديكي ف ايدي يا جارة 
تيرا ريرا تيرا رار ا

Ahmed Mohsen

Popular tracks