عود: حازم شاهين
صوت : امين حداد

"اجعلنى قصيدة "

اجعلنى قصيدة 
تنهيدة تخلص و تروّح 
كتكوت فى الشمس بيطوّح 
اجعلنى شهاب فى السماوات 
اجعلنى كلونية ستّات 
خلّينا ندوّر على بيتنا و نلاقيه دافى 
الليل مش على قد كتافى 
و الصبح بعيد 
اجعلنى سعيد 
اجعلنى فى العيد كحكاية 
أو لبس جديد 
واجعانى تكشيرة الدنيا 
و واجعنى الوقت 
اجعلنى صحبة ورد
و ماتجعلنيش أبداً زهرية 
على باب القبر 
علمنى الصبر 
علمنى أفضفض و انا مبسوط 
علمنى أكون نسّاى 
علمنى أموت 
بس قبل ما اموت اجعلنى 
نعناعة فى كوبّاية شاى 
بتغنى فى الحلق
..................................................
"قصيدة العيش "

العيش السهران
على طاولة عيش عند الفران
العيش اللى يسيب الرده
على مفرش كاروهات ومشمع
فى مائدة الرحمن
العيش اللى بيستنى المدفع
العيش اللى فى إيدك لقمه
تحت الطبلية ينام
على ركبة بنت مربعة وسط اخوات وقرايب
وفوقيهم صورة واحد غايب
العيش فى الجيش
عيش التعيين لجنود جعانين
العيش اللى بنجرى وراه وبيجرى ورانا
العيش اللى بيتفرق فى المولد
والعيش اللى يروح لأشرجية بيفطروا فى الشارع
العيش اللى يروح المدرسة والكيس النايلون فى الشنطة
العيش اللى بيستنى الأوتوبيس جوه الجرنان اللى مبقع زيت
العيش النعمه اللى نبوس بيه جبهتنا ونحطه جنب الحيط
العيش اللى فى صرة منصوره ورايحه لجوزها الغيط
العيش المترصص على ست سْبته راسيين بحوايه
على راس الولد اللى يسوق العجله
العيش اللى بيتقمر ومحروق
ويحب الجبنه البيضا والبطيخ والقته
العيش اللى بيعمل فته
والعيش اللى يغمس فول
العيش الصابح والعيش المبلول
العيش اللى يروح الجنه
والعيش البايت فى مشنه
العيش البايت فى العياشه
والملفوف فى قماشه
العيش اللى معشينا ومعيشنا
ومعشى أبويا وأمى فى زمن الحلميه
ومعشى جدودى الفقرا فى زمن الباشا
ومعشى فراعنة فجر الدنيا
متحنط ويا الموميا
العيش والملح
بينادوا لبعض
وينادوا علينا
تترج السما والأرض
ينزل شلال القمح يغطى الوادى
ويغطى الدلتا
يملا الأفران بدقيق وعجين
وتغنى جموع المصريين
لرغيف العيش

اجعلني قصيده  -صوت امين حداد

فلنحاول أن نغني ليظل غناؤنا معنا يقاتل

"Musick has Charms to sooth a savage Breast,
To soften Rocks, or bend a knotted Oak."

اجعلني قصيده -صوت امين حداد

Timoun Mounirian