Pakua

Hii leo Leah Mushi anaanza na mashindano ya michezo Olimpiki yanayoanza mwezi ujao huko Tokyo Japan ambako wakimbizi watashikiri. Kisha anabisha hodi DRC jimboni Katanga Juu kukutana na watoto walionusuriwa kutoka uchimbaji madini. Safari yake itaendelea hadi Ethiopia kwa vijana wanaotekeleza  mradi kwa ufadhili wa IFAD. Mashinani ni nchini Iraq kauli ya mkimbizi aliyerejea nyumbani na kukuta hali si hali. Makala tunamulika ujauzito katika umri mdogo kutoka kwa John Kabambala. Karibu!

JARIDANI 09 JUNI 2021 NA LEAH MUSHI- WAKIMBIZI NDANI YA TOKYO2020

Jaridani na Assumpta Massoi-

Leo ikiwa ni Ijumaa ni mada kwa kina ambapo tunaendeleza makala ya homa ya ini, pia kuna habari kwa ufupi zikiangazia habari muhimu ya siku. Katika neno la wiki inachambuliwa methali Atangaye na jua hujua!

Jaridani Julai 30, 2021- Fahamu mengi kuhusu ugonjwa wa homa ini

Jaridani Agosti 13, 2021 

Katika Jarida la leo Ijumaa tuna habari muhimu kwa siku ikiwemo hali ya kusikitisha ya ongezeko la vitendo vya ukatili wa kingono nchini DRC pia hali tete nchini Afghanistan. Aidha visa vya saratani barani Afrika vimeongezeka. 

Mada yetu kwa kina inamwangazia mwandishi wa habari nchini Tanzania aliyezushiwa kufariki kutokana na COVID-19.

Katika neno la wiki ni uchambuzi we methali heri kujikwaa kidole kuliko kujikwaa ulimi

Jaridani Ijumaa Agosti 13, 2021-Mwandishi wa habari aliyeugua COVID-19

Kilimo hai kina mchango mkubwa katika kutimiza ajenda ya maendeleo ya Umoja wa Mataifa SDG’’s hasa katika kulinda mazingira, kuhakikisha uhakika wa chakula na pia kutimiza moja ya vipengele vya lengo la afya bora. Kwa mujibu wa Bwana Waziri Kitojo, Afisa Kilimo wa kampuni ya kilimo ya Digital Mobile Africa ya nchini Tanzania kilimo hai licha ya kusaidia kupambana na uhariubifu wa mazingira kinafaida kiafya kwani chakula kinachozalishwa hakitumii kemikali bali mbolea za asili kama samadi na mboji. Kupata ufafanuzi zaidi wa kilimo hicho na faida zake Anold Kayanda amezungumza na Bwana Kitojo ambaye anaanza kwa kueleza maana ya Kilimo Hai.

Kilimo hai sio tu kinalinda mazingira lakini pia afya za watu:Kitojo 16-09-2021

Katika Jarida hii leo Flora Nducha anakuletea mada kwa kina inayo mulika jinsi Umoja wa Mataifa unachagiza mashinani mifumo endelevu ya chakula ikiwa ni kuelekea mkutano wa ngazi ya juu wa umoja huo hapa New York Marekani kuhusu mifumo ya chakula.
Pia utasikia habari kwa ufupi zikiangazia Malengo ya Maendeleo Endelevu SDGs na Masuala ya Afya.

JARIDA LA UMOJA WA MATAIFA 20 SEPTEMBA 2021 NA FLORA NDUCHA

“Ni wakati wa kupiga kengele ya dharura”, amesema Katibu Mkuu wa UN katika mahojiano maalum na Idhaa ya Umoja wa Mataifa siku chache kabla ya kuanza kwa Mjadala wa Juu wa Baraza Kuu la Umoja wa Mataifa.
Akihojiwa na Assumpta Massoi wa UN News, António Guterres amegusia ushirikiano wa kimataifa, harakati za utoaji wa chanjo dhidi ya COVID-19 duniani, mabadiliko ya tabianchi, usawa wa jinsia, viijana, amani na usalama barani Afrika na duniani kwa ujumla

Mahojiano: "Madaraka hupewi unatwaa", Guterres atuma ujumbe kwa wanawake

Hii leo jaridani ni mada kwa kina ikimulika harakati za Umoja wa Mataifa kuhifadhi kidijitali nyaraka za zaidi ya miaka 100 za shirikisho la mataifa au League of Nations. Lakini kuna habari kwa ufupi zikiangazia mkutano wa kimataifa wa viongozi kuhusu watu wenye ulemavu, UNFPA Tanzania kukabidhi pikipiki kwa jeshi la polisi nchini humo kukabili ukatili wa kingono na kijinsia ikiwemo ukeketaji na mwisho ni kuhamishiwa nchi ya tatu kwa wakimbizi 57 wa Jamhuri ya Kidemokrasia ya Congo, DRC kutoka Tanzania kwenda Marekani. Mashinani tunafunga safari hadi Mauritania kuona jinsi programu ya mlo shuleni imeleta mafanikio. Karibu na mwenyeji wako ni Leah Mushi.

JARIDA LA HABARI NA LEAH MUSHI- KIDIJITALI LEAGUE OF NATIONS GENEVA USWISI

Hii leo jaridani Leah Mushi anakuletea Habari kwa Ufupi zikimulika ufunguzi wa mkutano wa 66 wa Kamisheni ya Hali ya wanawake duniani, CSW66, hali ya chakula Yemen yazidi kudorora na siku ya Hisabati duniani na nafasi yake katika kukabili changamoto za sasa.
Kisha ni mada kwa kina ambayo Assumpta Massoi amezungumza na Jaji Hannah Okwengu wa Mahakama ya RUfaa nchini Kenya kuhusu umuhimu wa jicho la kijinsia kwenye mahakama, hususan uwepo wa majaji wanawake.
Na anatamatisha Jarida na mashinani inayokupeleka Tanzania kwenye soko la hisa la Dar es salaam na harakati zake za kusongesha malengo ya maendeleo endelevu, SDGs. Karibu!

Jarida 14 03 2022 na Leah Mushi - Habari kwa ufupi na Mahojiano  na Jaji Hannah Okwengu wa  Kenya

Katika Jarida la mada kwa kina hii leo Ijumaa Lea Mushi na akuletea pamoja na mambo mengine

-Shirika la Umoja wa Mataifa la mpango wa chakula duniani, WFP limesema wakati bei za vyakula duniani zimefikia kiwango cha juu kabisa, WFP ina wasiwasi  juu ya athari za vita nchini Ukraine katika uhakika wa upatikanaji chakula duniani.

-Mtaalamu Maalum wa Umoja wa Mataifa kuhusu haki ya binadamu ya kupata maji safi na salama ya kunywa pamoja na huduma za kujisafi Pedro Arrojo Agudo ametaka kukomeshwa kwa tabia ya kujimilikisha, kuchafua na matumizi ya kupitiliza ya rasilimali ya maji ardhini ili kulinda haki ya binadamu ya kupata maji na kupunguza hatari zitokanazo na mabadiliko ya tabianchi.

-Shirika la Umoja wa Mataifa linalohusika na harakati za kutokomeza UKimwi, UNAIDS limepongeza bunge la Zimbabwe kwa hatua ya kufutilia mbali kifungu cha 79 cha sheria za uhalifu ambacho kinaharamisha maambukizi ya virusi vinavyosababisha UKimwi, VVU

-Katika  mada kwa kina leo tunaelekea nchini Tanzania, huko wadau wa idhaa za Kiswahili duniani wamekutana kuzungumza namna ya kuzidi kuitangaza lugha hiyo duniani

-Na kama ada ya kila Ijumaa tunajifunza Kiswahili leo mtaalam wetu Josephat Gitonga kutoka Kenya anafafanua maana ya methali "Mzoea kutwaa , kutoa ni vita"

Jaridani leo Ijumaa na Leah Mushi 18-03-2022

Tunaanza na habari kwa ufupi kisha mada kwa kina ambapo leo tutaelekea nchini Jamhuri ya Kidemokrasia ya Congo, DRC kukutana na mpiganaji wa zamani wa msitu ambaye sasa ameajiriwa na Umoja wa Mataifa. Na ikiwa IJumaa tutajifunza kiswahili

Jaridani Machi 25, 2022 na Flora Nducha

Baionuai ni muhimu sana katika sayari ya dunia ili kuhakikisha usitawi na maisha ya viumbe hai kama vile binadamu, wanyama, ndege, mimea na wadudu kwa namna nyingi. Mimea nayo husafisha hewa chafu na kuzalisha oksijeni. 

Katika kuliona hilo, Shirika la Umoja wa Mataifa la Chakula na Kilimo FAO nchini Tanzania limewakutanisha wataalamu wa kilimo, uvuvi, mazingira, misitu na nyuki kwenye semina ya kuwajengea uwezo wananchi na wadau wa mazingira kutoka katika wilaya sita za mikoa tofautitofauti ya Tanzania ambazo ni Kigamboni, Karatu, Same, Kilolo, Mbarali na Kilosa lengo likiwa kutunza mazingira na kurejesha bioanuwai iliyopotea na kuilinda iliyopo. 

Mradi huu wa kujenga uwezo katika mikataba ya kimataifa ya mazingira, unafadhiliwa na Muungano wa Ulaya, EU ambapo bara la Afrika unatekelezwa katika nchi tatu ambazo ni Tanzania, Zimbabwe na Rwanda. Mwandshi John Kabambala wa redio washirika Tanzania Kids Time ya Mkoani Morogoro amehudhuria semina hiyo na kuandaa taarifa ifuatayo.

FAO yaelimisha wilaya sita za Tanzania kuhusu umuhimu wa Baionuai

Hii leo katika Jarida la Habari tunamulika kwa kina ukame na njaa Pembe ya Afrika ambapo Msadizi wa Katibu Mkuu wa Umoja wa Mataifa na Naibu Mkuu wa Ofisi ya Umoja wa Mataifa inayoratibu misaada ya dharura, OCHA. Bi. Joyce Msuya anazungumzia kile ambacho wanafanya kusaidia wakazi wa eneo hilo. Habari kwa Ufupi inamulika chanjo ya Polio Ethiopia, uzinduzi wa kituo cha kimataifa cha tiba asilia nchini India na kumalizika kwa mzozo baina ya jamii a walendu na wahema huko Jamhuri ya Kidemokrasia ya Congo, DRC, waliokuwa wakizozozana juu ya matumizi ya kanisa. Mashinani tunakwenda Ethiopia, karibu na mwenyeji wako ni Grace Kaneiya.

Jaridani 18 Aprili 2022 na Grace Kaneiya- Pembe ya Afrika - Joyce Msuya

Baadhi ya wanafunzi wa Shule za Sekondari nchini Tanzania wameeleza kunufaika na mkopo wa riba nafuu Trilioni 1.3 ambao Tanzania iliupata mwaka jana 2021 kutoka Shirika la Fedha Dunia IMF kwa kuelekeza sehemu ya fedha katika uboreshaji wa mpango wa maendeleo kwa ustawi wa taifa na mapambano dhidi ya Uviko 19, ikijenga vyumba vya madarasa 12,000 vilivyogharimu shilingi Bilioni 240 kwa lengo la kupunguza msongamano shuleni sambamba na miundombinu ya madarasa na samani za ndani kuzingatia afua za kujikinga na ugonjwa wa Covid 19 au kama wanavyoita katika nchi hiyo, Uviko 19. Katika kuonesha taswira halisi, Hamad Rashid ni mwandishi wa Habari wa Redio washirika Tanzania kids time Fm ya mkoani wa Morogoro, amefanya ziara ya kutembelea mradi uliokamilika wa vyumba vya madarasa ya Uviko 19 katika Shule za Halmashauri ya Manispaa ya Morogoro, Manispaa ambayo imejenga jumla ya vyumba vya madarasa 86.

Tanzania imepata funzo katika janga la Covid-19, inaboresha miundombinu ya elimu

Hii leo Jaridani mwenyeji wako ni Grace Kaneiya akikuletea jarida limesheheni mada kwa kina, Habari kwa Ufupi na kujifunza kiswahili.
Mada kwa kina ni uzinduzi wa filamu ya Royal  Tour Tanzania uliofanyika hapa Marekani na tunamulika mchango wake katika kufanikisha malengo ya maendeleo endelevu, SDG na mchambuzi ni Gerson Msigwa, Msemaji wa serikali ya Tanzania. 
Habari kwa Ufupi zinaanzisha hapa Umoja wa Mataifa Katibu Mkuu wa UN Antonio Guterres na ujumbe wake wa siku ya Mama Sayari Dunia. Je nini kifanyike kulinda makazi haya pekee tuliyojaliwa? Na kisha anamulika malazi mapya kwa wakimbizi wa ndani Ukraine na Habari kwa Ufupi inafungwa na taarifa kutoka Jamhuri ya Kidemokrasia ya Congo, DRC kuhusu doria za walinda amani wa Umoja wa Mataifa kutoka Malawi.
Na katika kujifunza kiswahili hii leo tunasalia Tanzania kwake Onni Sigalla na uchambuzi wa neno “nyunyuta,” Karibu!

Jaridani 22-4-2022 na Grace Kaneiya- Filamu ya Tanzania The Royal Tour na utalii endelevu

Katika Jarida la Jumatatu Aprili 25 kwanza ni habari kwa ufupi-

Ujumbe wa Umoja wa Mataifa nchini Sudan Kusini (UNMISS) umelaani vikali unyanyasaji na ukatili wa kingono ulioenea, mauaji ikiwa ni pamoja na watu kukatwa vichwa, kuchomwa moto raia wakiwa hai, na mashambulizi dhidi ya wahudumu wa misaada ya kibinadamu katika Kaunti ya Leer.  

========================================================== =============================

Leo ni siku ya malaria duniani mwaka huu ikibeba maudhui “Tumia ubunifu ili kupunguza mzigo wa ugonjwa wa malaria na kuokoa maisha”. 

Kwa mujibu wa shirika la afya la Umoja wa Mataifa WHO hakuna chombo kimoja kinachopatikana leo duniani ambacho kitatatua tatizo la malaria hivyom shirika hilo linataka uwekezaji na uvumbuzi utakaoleta mbinu mpya za kudhibiti vijidudu, uchunguzi, dawa za malaria na zana zingine ili kuharakisha kasi ya maendeleo dhidi ya kutokomeza ugonjwa huo wa malaria. 

(Siku ya malaria huadhimishwa kila mwaka Aprili 25 kwa leo la kuchagiza juhudi za kutokomeza ugonjwa huo unaokatili maisha ya mamilioni ya watu kote duniani. )

========================================================== ======================

Na jukwaa la 21 la Umoja wa Mataifa la watun wa asili, leo limefungua pazia jijini New York Marekani. Jukwaa hilo linalofanyika ana kwa ana na kwa njia ya mtandao likiwaleta pamoja watu kutoka kila pembe ya dunia mwaka huu linajikita na maudhui “Watu wa asili, biashara, uhuru na msingi wa haki za binadamu wanazostahili ikiwa ni pamoja na ya ridhaa kabla na baada ya taarifa”. 

Ikiwa ni siku ya Malaria Duniani  mada kwa kina leo inaangazia Malaria kuhusu mbinu mpya za kudhibiti ugonjwa huo,

JARIDA LA JUMATATU APRILI 25, 2022

Hii leo jaridani Grace Kaneiya anakuleta kwanza Habari kwa Ufupi ikiwemo taarifa kutoka Turkana nchini Kenya ambako Umoja wa Mataifa umezuru kuona hali halisi ya njaa. Katika Mada kwa Kina tumezungumza na Harrieth Kwetukia huyu ni kijana wa kike kutoka Tanzania akichora sanaa za kufikirika kusongesha malengo ya maendeleo endelevu, SDGs. Na katika kujifunza kiswahili tuna neno Mteremezi. Karibu!

Jaridani 12 Mei 2022 na Grace Kaneiya- Sanaa ya Kufikirika kutoka kwa Harrieth C. Kwetukia

Chakula, elimu na maji ni mtihani mkubwa kwa waathirika wa ukame Turkana Kenya 
Watu zaidi ya milioni 3 wameathirika vibaya na ukame nchini Kenya kwa mujibu wa shirika la Umoja wa Mataifa la kuratibu masuala ya kibinadamu na misaada ya dharura OCHA huku eneo lililoathirika zaidi ni kaunti ya Turkana. Maelfu ya watu wanahaha kupata mlo, Watoto imekuwa changamoto kwenda shule na maji ambayo ni uhai imekuwa bidhaa adimu kupatikana, sasa watu hao wanaililia jumuiya ya kimataifa kunyoosha mkono kunusuru uhai na maisha yao. 

Mwandishi wetu wa Kenya Thelma Mwadzaya aliambatana na ziara ya mkuu wa OCHA Martin Griffith wiki hii kwenye kaunti hiyo kushuhudia hali halisi. Amezungumza na wakazi wa kaunti hiyo na kuandaa Makala hii.

3. MAKALA TURKANA

Katika jarida la Jumatatu Mei 16, 2022 na Leah Mushi

Mradi wa mafunzo wa ILO wawainua wafanyabiashara Turkana magharibi, Kenya

UNMAS yaendelea kunusuru maisha ya watu Sudan Kusini kwa kutegua mabomu ya kutegwa ardhini

Makala ni kutoka Dar es Salaam Tanzania ambako Philbert Alexander wa Kituo cha Habari cha Umoja wa Mataifa ameingia katika mitaa ya Dar es Salaam kuzungumza na baadhi ya wasichana na wanawake kuhusu namna wanavyouelewa usawa wa kijinsia.

Mashinani tutakuwepo Ukraine kuangazia  athari za vita kwa wakulima na Umoja wa Mataifa unavyowasaidia.

Jaridani Jumatatu, Mei 16, 2022 na Leah Mushi

Umoja wa Mataifa unasema kuwa athari za kiuchumi na kijamii za janga la COVID-19 zimeathiri vibaya maendeleo ya hivi karibuni yaliyokuwa yamefikiwa katika usawa wa kijinsia. Unyanyasaji dhidi ya wanawake na wasichana umeongezeka, ndoa za utotoni zinatarajiwa kuongezeka baada ya kuwa zimepungua katika miaka iliyopita. Gonjwa hilo limeonesha hitaji la hatua za haraka kushughulikia kukosekana kwa usawa wa kijinsia ambao bado umeenea ulimwenguni kote na umuhimu wa kurejea kwenye mbio za kufikia usawa wa kijinsia. Lakini pamoja na juhudi hizo, je, watu wanaelewa ni nini maana ya usawa wa kijinsia? Ili kufahamu hilo, Philbert Alexander wa Kituo cha Habari cha Umoja wa Mataifa UNIC Dar es Salaam, Tanzania, amezunumza na baadhi ya vijana wa kike katika mitaa ya jiji la biashara la nchi hiyo ya Afrika Mashariki, Dar es Salaam – Tanzania, ambayo uongozi za ngazi ya juu unashikiliwa na wanawake, mathalani Rais ambaye ni mwanamke, haikadhalika Spika wa Bunge la nchi hiyo.

Unaelewa nini kuhusu “Usawa wa Kijinsia”? Baadhi ya vijana wanawake Tanzania wanaeleza

Jaridani Mei 17, 2022 na Leah Mushi
HABARI KWA UFUPI 

Idadi ya watoto walioathirika na uzito mdogo wa kupindukia imekuwa ikiongezeka hata kabla ya viya ya Ukraine ambayo inatishia kuitumbukiza dunia kwenye mgogoro mkubwa wa chakula imeonya ripoti mpya kuhusu watoto iliyotolewa leo na shirika la Umoja wa Mataifa la kuhudumia watoto UNICEF. 

==============================================================================================

Mkutano wa 9 wa miji barani Afrika umeanza leo katika mji wa Kisumu nchini Kenya kwa lengo la kuchagiza umuhimu na jukumu la miji ya ukubwa wa kati barani humo.  

Mkutano huo wa siku tano unaofanyika kila baada ya miaka 3 kwenye miji tofauti Afrika umeandaliwa kwa ushirikiano wa shirika la makazi la Umoja wa Mataifa UN-HABITAT, serikali ya Kenya, baraza la magavana Kenya na kaunti ya Kisumu. 

====================================================================================== 

NA shirika la Umoja wa Mataifa la  Chakula na Kilimo FAO kupitia mradi wake wa FISH4ACP limefanya mkutano wa pili wa Kikosi Kazi cha Taifa cha kukuza mnyororo wa thamani wa mazao ya uvuvi katika Ziwa Tanganyika mkoani Kigoma lengo likiwa ni kuimarisha na kujenga mazingira rafiki kwa wanawake ili kufanya shughuli zao katika nyanja ya uchakataji, wafanyabiashara na usafirishaji na kuongeza kipato binafsi na pato la Taifa. 

Katika mada kwa kina tunaangazia namna Mfuko wa Umoja wa Mataifa wa kusaidia walionyanyaswa kijinsia na kingono ulivyowakwamua wanawake huko Kivu Kusini nchini DRC

Na mashinani tutasikia kutoka kwa mtaalamu kuhusu namna ya kuhakisha kinga dhidi ya Covid-19 kwa watoto hata wakati wakihudhuria shule ana kwa ana.

Jaridani Jumanne Mei 17, 2022 na Leah Mushi

Jaridani na Leah Mushi

-Joto laendelea kuongezeka duniani kwa mwaka wa 7 mfululizo: WMO
-Mkutano wa kirafiki wakutanisha walinda amani kutoka Tanzania na baadhi ya viongozi viongozi mashariki mwa DRC.
-matumizi ya mitandao ya kijamii miongoni mwa wakimbizi katika kambi ya Lusenda.
-Mashinani tutasikia kutoka kwa Mkurugenzi Mkuu wa Shirika la Umoja wa Mataifa la mpango wa chakula duniani, WFP

Jaridani Mei 18, 2022 na Leah Mushi

Takribani miaka miwili iliyopita, Umoja wa Mataifa ulizindua mkakati wake na ukapewa jina "iliyothibitishwa" au “Verified initiative” ambao unataka watu kote duniani kutafakari kabla ya kusambaza taarifa au maaudhi kwenye mitandao ya kijamii. Mitandao ya kijamii ni moja ya njia inayotumiwa na jamii sio tu kwa mawasiliano kwa wapendwa wao bali pia kupata taarifa muhimu sehemu mbalimbali na za muhimu katika maisha ya kila siku. Katika Kambi ya Lusenda jimboni Kivu ya kusini mashariki mwa jamhuri ya Kidemokrasia ya Congo, DRC, wakimbizi, hususani vijana wamekuwa wakitumia mitandao hiyo kama vile Facebook na WhatsApp lakini wanasema kuwa moja ya changamoto ni kuwa wakati mwingine kunakuwa na habari za uongo zinazozagaa katika mitandao hiyo. Mwandishi wetu wa DRC, Byobe Malenga ametembelea kambi hyio na kuzungumza na baadhi ya vijana kuhusu suala hilo.

Mitandao ya kijamii inatusaidia lakini habari za uongo nazo ni changamoto - Kambini Lusenda, DRC

Jaridani Alhamisi, Mei 19, 2022 na Leah Mushi kuanza nia habari kwa ufupi, kisha mada kwa kina na kumaliza na neno la wiki.

Watu milioni 59.1 walilazimika kukimbia makwao nchini mwao mwaka 2021 kwa mujibu wa ripoti yiliyotolewa leo kuhusu wakimbizi wa ndani GRID na kituo cha kimataifa cha kufuatilia uhamishwaji wa watu kilicho chini ya shirika la Umoja wa Mataifa la uhamiaji IOM.. Hii ni  ongezeko la watu milioni 4 zaidi kufikia mwishoni mwa mwaka 2021 ikilinganishwa na kipindi hicho mwaka 2020. 

 Kwa miaka 15 iliyopita, majanga yamesababisha watu wengi kuhama makazi yao, huku idadi ya kila mwaka ikiwa juu zaidi kuliko ile inayohusiana na migogoro na vurugu. Mwaka 2021 haikuwa tofauti kwani kulikuwa na wakimbizi wa ndani milioni 23.7, hasa katika Asia-Pasifiki, kutokana na matukio yanayohusiana namabadiliko ya tabianchi ikiwa ni pamoja na mafuriko, dhoruba na vimbunga. Kufuatia athari zinazotarajiwa za mabadiliko ya tabianchi na bila hatua kabambe za kukabiliana na athari za  hali ya hewa, idadi hiyo itaongezeka katika miaka ijayo. 

 Mizozo na ghasia vimesababisha watu milioni 14.4 kuhama makazi yao mwaka 2021, ambapo idadi kubwa ya wakimbizi wa ndani walitokea barani Afrika, haswa nchini Ethiopia na Jamhuri ya Kidemokrasia ya Congo DRC, huku ghasia na mzozo wa Afghanistan na Myanmar pia ukifurusha idadi isiyo ya kawaida ya watu. 

================== ================================================================

 Shirika la Umoja wa Mataifa la mpango wa chakula muniani, WFP leo limetoa wito wa upanuzi wa wigo wa suluhu  kusaidia kurekebisha mifumo ya chakula iliyoharibika na kufanya jamii zilizoathiriwa na uharibifu wa ardhi kuwa na mnepo wa kuhimili mishtuko. 

Kuenea kwa jangwa ambayo ni matokeo na mchangiaji mkubwa wa mabadiliko ya tabianchi  ni moja ya vitisho visivyoonekana na vinavyopuuzwa kwa uhakika wa chakula, lishe na mifumo endelevu ya chakula. Kando na mizozo na janga la kiuchumi, kunachangia ongezeko lisilo na kifani la idadi ya watu wasio na chakula ulimwenguni kote. 

"Gharama za kupanda kwa bei ya vyakula, mafuta na mbolea zinahusishwa na mzozo wa Ukraine katika hali ambayo tayari ni tete kote ulimwenguni," amesema Volli Carucci, mkurugenzi wa mnepo na mifumo ya chakula wa WFP. 

============================================================================

 

Na Kamishna Mkuu wa Umoja wa Mataifa wa Haki za Kibinadamu Michelle Bachelet ametoa taarifa leo akisema amesikitishwa na uamuzi ulioripotiwa wa Taliban kuvunja tume huru ya Haki za Kibinadamu ya nchi hiyo. 

  "Tume huru ya Haki za Kibinadamu ya Afghanistan, AIHRC imefanya kazi kubwa katika hali ngumu sana kwa miaka mingi, ikiangazia haki za binadamu za Waafghanistan wote, ikiwa ni pamoja na waathirika wa pande zote za mzozo. Hata hivyo, haijaweza kufanya kazi mashinani tangu Agosti 2021," amesema Kamishna Mkuu huyo akibainisha kuwa tume hiyo"imekuwa sauti yenye nguvu kwa haki za binadamu na mshiriki anayeaminika wa Haki za Binadamu wa Umoja wa Mataifa, na kupotea kwake itakuwa hatua ya kurudi nyuma kwa Waafghanistan wote na jamii ya kiraia ya Afghanistan. 

 

Leo kwenye mada kwa kina tukielekea katika siku ya nyuki, tutakwenda mkoani Kigoma, kaskazini magharibi mwa Tanzania kuzungumza na mmoja wa wanufaika wa miradi ya Umoja wa Mataifa ambapo yeye na wenzake sasa wananufaika na ufugaji wa nyuki.

Katika kujifunza Kiswahili , leo tunapata ufafanuzi wa neno "DHUNUBU"

Jaridani Alhamisi, Mei 19, 2022 na Leah Mushi

FAO yasaidia wananchi wa Yemen kurejea kwenye ufugaji nyuki wa asili.

Mradi wa Sola wa UNICEF watatua changamoto za waathirika wa ukame Kori Ethiopia.

Makala imeangazia mmoja wa wafanyabiashara wadogo katika makao makuu ya Tanzania, Dodoma ambaye ni miongoni mwa wanaolamba shubiri ya athari za vita kati ya Urusi na Ukraine ambavyo vimesababisha athari ya kiuchumi duniani.

Mashinani ni Katibu Mkuu wa Umoja wa Mataifa Antonio Guterres na wito wake wa kulindwa kwa wahamiaji kwa ajili ya kuhakikisha usalama wao.

Jaridani Ijumaa Mei 20-2022

Katibu mkuu wa Umoja wa Mataifa Antonio Guterres hivi karibuni akizungumza na Baraza la Usalama alitaka hatua zichukuliwe kukomesha vita alipokuwa akizungumzia namna ambavyo ni vita ni chachu kubwa ya njaa duniani kote.  

Vita ya hivi karibuni ambayo imeongeza chumvi katika jeraha ni kutokana na uvamizi wa Urusi kwa Ukraine ambao pamoja na madhara mengine kwa ulimwengu, imeathiri uzalishaji na usambazaji wa mafuta ambayo ni bidhaa mtambuka kwa mambo mengi na inapoyumba inayumbisha karibu mihimili yote ya uchumi.  

Abuu Maahiry Mmelekwa, Mwandishi wa redio washirika wetu Irangi FM ya wilayani Kondoa, mkoani Dodoma katikati mwa Tanzania amemuangazia mmoja wa wafanyabiashara wadogo katika makao makuu ya Tanzania, Dodoma ambaye ni miongoni mwa wanaolamba shubiri ya athari za vita kati ya Urusi na Ukraine ambavyo vimesababisha athari ya kiuchumi kote duniani.

Vita ya Urusi na Ukraine imevuruga uchumi wangu – Abeid Aboubakar wa Dodoma, Tanzania

Jaridani Jumatatu Mei 23, 2022 na Leah Mushi-

-UNHCR: Mzozo wa Ukraine na mingineyo imepelekea watu milioni moja kukimbia makwao

-Wakulima wa Embu Kenya wavalia njuga vita dhidi ya mabadiliko ya tabianchi kwa kupanda miti:IFAD 

-Katika makala ni mwanamke shuhuda kwamba ugonjwa wa Fistula una tiba.

Mashinani ni ujumbe wa Rais wa Baraza Kuu la Umoja wa Mataifa kuhusu wahamiaji ulimwenguni

Jaridani Jumatatu  Mei 23, 2022

Ngoma ya Sega ni utambulisho wa watu wa Mauritius

Katika makala hii, Joshua Mmali anaangazia uhamiaji, ambapo Khadija Nin anaelezea masaibu ya wahamiaji, mathalani kuhojiwa iwapo kuna mhamiaji wa mazingira.

Makala kuhusu uhamiaji

Ungana na Flora Nducha na Joseph Msami katika simulizi hii kuhusu Waziri Mkuu wa kwanza wa Jamhuri ya Congo, sasa DRC, Patrice Lumumba! Alipitia mengi hadi kuuawa na mwili wake kumwagiwa asidi.

Simulizi kuhusu Patrice Lumumba

Wiki hii tunaangazia neno "MKABALA"  na mchambuzi wetu ni ONNI SIGALLA Mhariri Mwandamizi, katika Baraza la Kiswahili la Taifa, BAKITA, nchini Tanzania.
 

Sikiliza maana ya neno "Mkabala"

Kawaida makumbi ya nazi huchukuliwa kama taka lakini kwa mjasiriamali Bahati Sudi alioko Tanga nchini Tanzania, yeye anapata kipato kutokana na 'taka' hiyo.

Makala-Makumbi ya nazi ni mzizi wa kipato kwa Bi Bahati, Tanzania

Visiwa vya Guadeloupe vinahakikisha kuwa ngoma yao iitwayo Gwoka inasongesha utamaduni ulioingia visiwani humo karne ya 17 wakati wa biashara ya utumwa. Gwoka ngoma ibebwayo kila kona za kisiwa hicho kinachomilikiwa na Ufaransa ni utambulisho wao wa karne na karne na sasa umeorodheshwa kwenye turadhi za tamaduni zisizogusika za shirika la Umoja wa Mataifa la elimu, sayansi na utamaduni, UNESCO. Je nini kinafanyika? Assumpta Massoi amekupeleka ulingoni.

Makala ya Assumpta Massoi kuhusu "Gwoka", ngoma ya utambulisho wa wakazi wa kisiwa cha Guadeloupe

Katika Neno la Wiki hii leo tunaangazia neno “Mtambuka” na mchambuzi wetu ni Onni Sigalla, Mhariri Mwandamizi, katika Baraza la Kiswahili la Taifa, BAKITA, nchini Tanzania.

Bwana Sigalla anasema ili kupata maana ya neno Mtambuka, lazima tuachambue maana ya neno "Tambuka", ungane naye upate huo uchambuzi, kisha upate kufahamu maana ya Mtambuka..

Neno la wiki: Mtambuka

Mahakama Kuu ya Tanzania kanda ya Mtwara imezuia kwa muda matumizi ya kanuni mpya za maudhui ya habar iza mtandaoni nchini humo. Kanuni hizo zilikuwa zianze kutumia kesho tarehe 5 Mei 2018, na zinatokana na Sheria ya Mawasiliano ya Kielektroniki na Posta ya mwaka 2018.

Kupitia kanuni hizo wamiliki wa blogu, radio na televisheni za mtandaoni wanapaswa kujisajili ili waweze kuendelea kutoa huduma hizo.

Hata hivyo taasisi sita ziliwasilisha malalamiko yao mbele ya mahakama, na leo hii Mahakama Kuu ya Tanzania kanda ya Mtwara imeamua kusitisha kwa muda matumizi ya kanuni hizo hadi itakapopitia shauri la msingi la taasisi hizo. Assumpta Massoi wa idhaa ya Umoja wa Mataifa amezungumza na Deodatus Balile, Kaimu Mwenyekiti wa Jukwaa la Wahariri nchini Tanzania, TEF na kuanza kwa kumuuliza wamepokea vipi uamuzi huo wa mahakama.

Uamuzi wa mahakama Tanzania

Tarehe 9 mwezi Julai, Sudan Kusini lilikuwa taifa changa zaidi duniani kufuatia mchakato wa takriban miaka sita wa ili kujicnyakulia uhuru. Licha ya kwamba matunda ya kazi ya miaka sita yalipatikana, lakini Disemba 15 2013 mapigano yalizuka mjini Juba. Hali ambayo imesababisha janga la kibinadamu na kiusalama nchini humo, na hali bado si shwari lakini wadau mbali mbali wanafanya juhudi za kila aina kuleta utulivu ili kuepusha madhila zaidi kwa wananchi. Na kila mwananchi ana fursa ya kuchangia juhudi hizo na kusambaza ujumbe wa amani. Mmoja ya  raia hao aliye na imani kwamba ipo siku amani itarejea nchini mwao ni Emmanuel Kembe, mwanamuziki mzawa wa Sudan kusini, ambaye ametunga nyimbo nyingi kuhusu nchi yake na katika wimbo ufuatao amemshirikisha Mkuu wa mpango wa Umoja wa Mataifa Sudan Kusini, UNMISS, David Shearer. Wimbo huu unaelezea matumaini yake ya kuwa na mpenzi wake kwenye mazingira ya amani. Ungana na Grace Kaneiya katika makala hii inayoangazia wimbo ‘Lovers in a dangerous time’

Mwanamuziki kutoka Sudan Kusini na wimbo wenye matumaini ya amani

Mada kwa kina inamulika biashara  mtandao na manufaa yake kwa jamii hivi sasa hususan zile ambazo wakazi wake wanatumia simu za mkononi na wana uwezo wa kupata mtandao wa intaneti unaowaunganisha kwenye mitandao ya kijamii kama vile Facebook, Instagram na Twitter. Grace Kaneiya amefuatilia kwa kina hali ilivyo Afrika Mashariki hususan Kenya, Tanzania na Uganda na wapigaji chepuo mada hii UNCTAD ambayo ni kamati ya biashara na  maendeleo ya Umoja  wa Mataifa.

Simu ya mkononi ni zaidi ya mawasiliano ya kawaida.

Malongo Mbeho ambaye ni mwandishi wa habari aliyejitolea kwa UN News amezungumza na Khatija Safi Juma binti mwenye umri wa miaka 16 Mwanafunzi wa Kidato cha tatu shule ya sekondari Ndono aliyebuni programu tumishi yaani ‘App’ inayomkumbusha Mama Mjamzito kupata huduma ya afya ya uzazi. Kwanza Khatija anaeleza alivyopata wazo la kubuni App hiyo inayotumia mfumo wa kompyuta.

Khatija Juma mwenye umri wa miaka 16 abuni Apu ya kuwasaidia akina mama wajawazito.

Wakulima wengi hukumbwa na changamoto za kuhifadhi mazao yao baada ya kuyavuna hususan nafaka hali inayawaletea hasara kubwa ya kupoteza chakula na hali kadhalika kusababishia familia zao taabu kama vile ukosefu wa chakula. Sasa mkulima mmoja nchini Kenya David Burii, amebuni kifaa kinachowasaidia wakulima kukausha nafaka yao kwa njia rahisi. Mwandishi wetu kutoka Kenya Jason Nyakundi alimtembelea kwenye karakana yako huko Thika na kututumia ripoti hii.

Uvumbuzi wa mashine ya kukausha nafaka ni habari njema kwa mkulima Thika, Kenya

Hii leo jaridani Flora Nducha anaanzia nchini Kenya ambako msaada wa chakula umepelekwa kaunti za Mandera, Wajir, Garissa na Tana River ambako mafuriko yameleta adha. Kisha Sudan  Kusini wanafunzi wa shule moja ya msingi angalau wapata nuru mpya shuleni kufuatia ujenzi wa madarasa kupitia mradi wa matokeo ya haraka unaotekelezwa na UNMISS. FAO nayo na mfuko wa mazingira waanzisha mradi wa kusaidia mataifa kuwa na takwimu sahihi za misitu. Makala tunakwenda nchini Uganda ambako utasikia kuhusu manufaa ya nyuki kwa uzalishaji wa chakula na mashinani tunabisha hodi Yemen. Karibu!

Jaridani leo Jumatatu 11 Novemba 2019 na Flora Nducha

Hii leo katika Neno la Wiki, Onni Sigalla, Mhariri Mwandamizi kutoka Baraza la Kiswahili la Taifa nchini Tanzania, BAKITA, anatofautisha maana ya maneno 'Hayati' na 'Marehemu'.  Katika uchambuzi wake wa maneno hayo yenye etimolojia ya kiarabu, anafafanua tofauti katika matumizi. Karibu!

Neno La Wiki- Marehemu - Hayati, tofauti yake ni ipi?

Leo tutajifunza maana ya methali "HERI KENDA MKONONI KULIKO KUMI NENDA RUDI" na mchambuzi wetu ni Josephat Gitonga, mhadhiri kutoka Chuo Kikuu cha Nairobi katika kituo cha tafsiri na ukalimani nchini Kenya.

HERI KENDA MKONONI KULIKO KUMI NENDA RUDI

Na Leo kwenye Neno la wiki tunaenda Uganda kwa  Mwenyekiti wa idara za Kiswahili katika vyuo vikuu Afrika Mashariki Aida Mutenyo kufafanua maana ya methali
"Hakuna mchele ukosao ndume na hakuna masika yasiyo na mbu"

METHALI-Hakuna mchele ukosao ndume na hakuna masika yasiyo na mbu

Kwa miaka 25 ya katiba ya Jamhuri ya Uganda, vijana walio chini ya umri wa miaka 30 wamekuwa wakisaka fursa ya kukubaliwa kugombea nafasi mbalimbali za kisiasa katika serikali za mitaa kutokana na vizuizi vya sheria za uchaguzi.

Vijana hao wamekuwa wakiona kwamba hali hiyo inawanyima nafasi ya kushika nafasi za  kisiasa na hatimaye kupona ukosefu wa ajira. Hata hivyo mwezi huu wa Oktoba umekuja na marekebisho ambapo bunge limepitisha mswada wa kuondoa kikwazo hicho na kuruhusu vijana kuanzia umri wa miaka 18 kugombea nafasi mbalimbali za kisaiasa.

Je, vijana nchini humo wamepokea vipi habari hizi? Basi ungana na John Kibego makala makala ifuatayo.

Vijana Uganda wakaribisha sheria ya kugombea chini ya umri wa miaka 30

Idhaa ya Kiswahili ya Umoja wa Mataifa inatangaza habari kila siku kwa lugha ya Kiswahili, Kiarabu, Kichina, Kiingereza, Kifaransa, Kireno, Kirusi na Kihispania. Na mara moja kwa wiki inakuwa na vipindi vya lugha ya French Creole, Kibengal, Kihindi, Urdu na kiindonesia.
Radio ya UM inabadilisha taarifa zake kutokan na habari mpya zinavyokuja kila mara kwa siku. Pia inaandaa makala na kufanya uchambuzi wa mada mbalimbali za kijamii, kisiasa, kiuchumi, maendeleo na masuala yanayohusu tamaduni yanyohusisha Umoja wa Mataifa na kazi zake. Vipindi vya Idhaa ya Kiswahili ya Umoja wa Mataifa au UNNews  viko vingi na ni kuanzia habari,  makala, vipindi maalumu na taarifa za habari za kila siku na zile za kila wiki.
Na vipindi vyote hivyo vinaweza kutumiwa na vyombo vingine vya habari au watangazaji, na vinaweza kutumiwa kama chanzo cha habari kwa waandishi.  binafsi.Na kwa kuongezea tuu ni kwamba vipindi vyote hivyo na sauti zingine kwenye tovuti yetu vinatolewa bure bila malipo yoyote. Unaweza pia kujisajli kwenye ukurasa wetu ili upokee taarifa kila wakati zinapochapishwa.
Kwa uchaguzi zaidi wa ushirikiano usisite kuwasilina nasi.

UN News Kiswahili

Pinned to spotlight

Popular tracks