Jaridani leo tunakuletea mada kwa kina na katika kuelekea siku ya walinda Amani duniani itakayoadhimishwa Mei 29 leo tunakupeleka Jamhuri ya Afrika ya Kati CAR kumulika jinsi mchango wa kusongesha maendeleo wa kikosi cha walindamani kutoka Tanzania TANBAT6 unavyopokelewa na wananchi wa taifa hilo. Pia tunakuletea habari kwa ufupi zikiwemo za masuala ya jinsia, biashara huru na haki za binadamu. Katika kujifunza kiswahili tutasikia maana ya methali “Aanguae huanguliwa.”
1.	Hii leo katika makao makuu ya Umoja wa Mataifa Katibu Mkuu wa umoja huo Antonio Guterres amemtangaza Kapteni Cecilia Erzuah kutoka Ghana kuwa mshindi wa tuzo ya kila mwaka ya Mchechemuzi wa Masuala ya jinsia kwenye operesheni za ulinzi wa amani za Umoja wa Mataifa.  
2.	Leo ni siku ya Afrika ikiwa ni kumbukizi ya kuanzishwa kwa Umoja wa nchi huru za Afrika, OAU sasa Muungano wa Afrika (AU) tarehe 25 mwezi Mei mwaka 1963 ambapo Kamati ya Umoja wa Mataifa ya Biashara na Maendeleo, UNCTAD imesema eneo la biashara huru la Afrika, AfCFTA linatoa fursa ya kukuza biashara ya ndani barani humo.
3.	Na baada ya kuwa mtoro kwa zaidi ya miaka 20, hatimaye Fulgence Kayishema, mmoja wa watuhumiwa vinara waliokuwa wanasakwa zaidi kwa kuhusika na mauaji ya kimbari dhidi ya Watutsi nchini Rwanda, amekamatwa jana huko Paarl nchini Afrika Kusini kufuatia ushirikiano baina ya ofisi ya mwendesha mashtaka ya mfumo wa kimataifa wa kushughulikia mabaki ya kesi za mauaji ya kimbari, IRMCT na serikali ya Afrika Kusini.
4.	Katika kujifunza Kiswahili, mchambuzi wetu Dkt. Josephat Gitonga, kutoka Kenya ambaye ni mhadhiri katika Chuo Kikuu cha Nairobi kwenye kitivo cha tafsiri na ukalimani anatufafanulia methali isemayo “Aanguae huanguliwa.”

Mwenyeji wako ni Anold Kayanda, Karibu!

JARIDA LA HABARI ZA UM 25 MEI 2023 NA ANOLD KAYANDA

Idhaa ya Kiswahili ya Umoja wa Mataifa inatangaza habari kila siku kwa lugha ya Kiswahili, Kiarabu, Kichina, Kiingereza, Kifaransa, Kireno, Kirusi na Kihispania. Na mara moja kwa wiki inakuwa na vipindi vya lugha ya French Creole, Kibengal, Kihindi, Urdu na kiindonesia.
Radio ya UM inabadilisha taarifa zake kutokan na habari mpya zinavyokuja kila mara kwa siku. Pia inaandaa makala na kufanya uchambuzi wa mada mbalimbali za kijamii, kisiasa, kiuchumi, maendeleo na masuala yanayohusu tamaduni yanyohusisha Umoja wa Mataifa na kazi zake. Vipindi vya Idhaa ya Kiswahili ya Umoja wa Mataifa au UNNews  viko vingi na ni kuanzia habari,  makala, vipindi maalumu na taarifa za habari za kila siku na zile za kila wiki.
Na vipindi vyote hivyo vinaweza kutumiwa na vyombo vingine vya habari au watangazaji, na vinaweza kutumiwa kama chanzo cha habari kwa waandishi.  binafsi.Na kwa kuongezea tuu ni kwamba vipindi vyote hivyo na sauti zingine kwenye tovuti yetu vinatolewa bure bila malipo yoyote. Unaweza pia kujisajli kwenye ukurasa wetu ili upokee taarifa kila wakati zinapochapishwa.
Kwa uchaguzi zaidi wa ushirikiano usisite kuwasilina nasi.

JARIDA LA HABARI ZA UM 25 MEI 2023 NA ANOLD KAYANDA

UN News Kiswahili