و بتحسر على كل اللي كان ممكن أكونه و مكنتوش

مكملتش في اي رحيل مكملتش في اي قعاد

م الموت عشان خايف ساعتها عبيط كل اللى سبته كلام بخاف بخاف

و بتأثر و بتحسر على كل اللى كان ممكن اكونه بس ما بقيتهوش

و طول الوقت بحلم ان انا بجرى

اكيد في الرحلة يوم متحاش

أكيد في الرحلة يوم متحاش و مستنى أعدى عليه

صلاة خوف
قصيدة لمحمود عزت

نجّينا م الشرّير
ارحمنا م التجربة.
المعركة _المرّادي_
مش هيّنة..
المعركة غايمة..
غربال ورا غربال
وف صفنّا الجنرال.. 
المعركة مرعبة.

ووقفنا زيّ الجثث..
باصين على المدبحة.
الدم على صدرنا..
بننتصر؟ ولّا..
فـ طابور الدبح؟
هل دا سؤال العار
ولا السكوت أقبح؟
ننزل نلمّ الغنايم..
ولا نعدّ الجثث؟
خلاص..
فتحنا الطريق؟
ولا الطريق اتهدم؟
الشهدا أخدوا القصاص؟
ولا بكوا م الألم؟
المجد للقنّاص؟
ولا اللي مخّه اتقسم؟
نبني جدار للفخر؟
ولا نافورة الدمّ؟
فيه ظلم..
آخره الجناين؟
فيه عدل..
بابه الظلم؟

خرّجنا م المحنة
لما الغيلان صرخت
غارزين في بعض الناب.
فجأة اكتشفنا ف صوتنا
ريحة الدم..
وف وشنا أنياب.
وان الغيلان احنا 

نجّينا م المحنة..
وم الهذيان..
وم النشيد العظيم
ع المارش..بالتعظيم..
بتردده الجماهير
بصريخ جماعي عنيف
يكبت صريخ الخوف..
واللي بيرفض يهتف
يبقى شق الصفّ..
خاين..فـ صف الوحدة
مش مصفوف..
نجينا م الوحدة
والصف ماتوحّدش..
لكن بيتوحّش
نجينا من رؤية
واضحة وضوح الجبل..
بين العمى والشوف
لكنها الأوهام..
خرّجنا منها سُلام..
أكتاف على أقدام..
خرّجنا منها نضاف
الدم مش ع الكفّ..
خرّجنا منها ألف..
أو ميّة..
أو واحد
ف المقتلة القايمة
ينسي سؤال الحرب
يسأل سؤال الضعيف
ويقول:
أنا خايف..
مش م الهزيمة
إنما م النصر
مفروش طريقه بالجثث
للقصر.
لا ندخله..
لا نحمي أصحابه..
نفضل نحاصره
وإسمنا مطموس
نكتب أسامي الشهدا
على بابه..
خرّجنا منها عرايا
زي ما دخلنا..
لا وزرا ولا حاشية
لا نلبس النياشين..
خرجنا منها جُداد
زي ما نزلنا
عيال كتير ماشية
من حدّ مش خايفين..

خرّجنا منها الآن..
نجّينا م التجربة..
المعركة مرعبة
نجينا م التجربة..
المعركة مرعبة. 

صلاة خوف | Prayer of Fear

مصطفى ابراهيم المولويه

Poet : Mostafa Ibrahim
Music : Marek Iwaszkiewicz - A Miserable Heart 

هيحزّموك زي الجنيه ف الأستك
هيسيبولك الفُتات
و يبيعولك الأمل ف الإعلانات
و الهجرة لبلاد البلاستيك
و ف خطبة الجمعة عن الجنة
و قُولِة استنى.. فات الكتير هانت خلاص
لحد ما خيل الحكومة..
يدوسه عَجَل الميكروباص
النظام العالمي بيقتل
أوقات كتير ..
من غير رصاص
الهوا ..
هيحَصّل المَيّة اللي بقت ماركات
تعددية تعني.. تعدد الشركات
حرية تعني حق فتح القفص ..
على الناس اللي ملهاش باب
الأخطبوط الرأسمالي اتساب
على الناس اللي ملهاش حظ
على الناس اللي ملهاش فرص
حياتك 
مهمة لبياعين الحلم 
وفاتك
مهمة لبياعين القُرَص
حسابك حتى في قبرك مهم
رخصة الجنة مهمة لبياعين الرُخَص
و لبياعين الدين 
و لبياعين الآخرة اللي هتنصف المساكين
"العالم بيتطوّر"
يمشي إسم مسرحية..
أما الحقيقة المضحكة المُبكيّة..
العصاية اللي بتوقّف و بتدوّر..
بتمشي..
من إيد صحاب الجنة..
لصباع صحاب البندقية..
لجيوب صحاب البنك...
دم الغلابة بيتحرق ف التانك...
شامم ريحتهم و انتا بتفوّل...
الغرب هيموّل..
إعمار ِبيار النفط..
لضمان زيادة منسوبات الشفط...
و ضمان بقائك عبد متسوّل...
يا زميل الكوكب المنكوب..
رَكب الحضارة ماشي بالمقلوب...
يا زميل المنطقة المنكوبة...
رَكب الحضارة كان لازم له ركوبة...
العالم بيتطوّر...
و انتا شمعة بتتحرق علشان ..
برج التجارة ينوّر..
..العصاية هي هي و شكلها بيتحول
العالم بيتغوّل
و انتا واقف ف وش الطيارات بالطوبة.. هتعيش حمار و تموت حمار...
أخرك تحس بإنتصار لما...
بتولّع الأعلام..
و تدوس على صورة إصحاب الدولار و القرار بالجزمة..
القناة ..في نشرة الأخبار.. 
هيقولوا عنك فوضوي و قاتل..
نفس القناة وقت اللزوم ..
هتطلّعك مقتول و بتناضل..
فيه ناس كتيرة أكل عيشها الأزمة..
و ده عيبه..
إن هذا العالم صوته من جيبه.
و مفيش حقيقة صعب تتأوّل..
و دي ناس تعرف تبيع الآه
زي ما بتعرف تبيع اللأ 
الميديا بائع حق...
متجول..
بشرى لابناء العالم التالت م العالم الأول
بشري لابناء العالم الهمجي
م العالم الإنسان
العالم الحر اللي ما بيضربش ف المليان
بس بيجوّع بلاد لحد الموت
القاتل الشيك المحترف
أبو طلق من غير صوت
فيه الجيوش ما بقوش
لابسين هدوم ميري
و الطيارات ما بقتش بتوزع منشورات اليأس
و البنوك مش هيسيبوك تتحبس ...بالعكس
النهارده حاطط إعلانات ع التاكس
علشان عليه أقساط
بكره تتعلق على هدومك 
زي اللعيبة ف الماتشات
عالم جديد 
هتخشه بمزاجك قبل ما نزُقّك
الكهنة فيه لابسين بدل و كرافتات
هيأكِّلوك الحقيقة بمعلقة ف بقك 
و كسر حُقّك ياللي مش عايز
عالم ديمقراطي رأسمالي سعيد
الشركة فيه اقوى من الاوطان
غضبان ؟...أكيد غضبان
مربوط ف ساقية و بتجري في مكانك
مسجون و مش عارف وش سجّانك
عايز تخبّط كوبايات الحبس ع القضبان لكن هتعمل إيه ...معذور
أمريكا عملت سجن من غير سور
أمريكا رابطة الناس ف بعضيهم
أمريكا رابطة الناس و مربطّاك بيهم
تدّن في مالطا قد ما هتدّن
أمريكا هتفضل بتحب البشر جدا...
و بتعمل جِميل فيهم..
فيها الخير يا هل ترى
ولّا فيها فلوس؟
أمريكا فيها الحلم
و بلادنا فيها كابوس
الناس تخاف
امريكا تحميهم
الناس تجوع
امريكا تديهم
تِكسي بالإيد اليمين اللاجئين 
بعد ما إيديها الشمال تعرّيهم
شركة بتهِدّ البلاد
و شركة تبنيهم
شركة بتبيع السلاح
و شركة بتطبطب على اللي يموت
العالم بيتقسّم دول
العالم بيتقسّم بيوت
العالم بيتقسم لبني آدم
و لبنكنوت
مكتوب على شهود البلاد الممسوحين بأستيكة
أنتَ حر
ما لم تضر
أمريكا

www.facebook.com/Mostfa.Ibrahim

هندسة صوتية : رفيق عدلى
One Take Studio

[Headphones version] قصيدة البنكنوت - مصطفى ابراهيم

من اجمل ما غنوا اسكندريلا: 

عينى فى عينك

يعنى انتى مصدقة

بينى و بينك

أوطان متفرقة

كوابيس متحققة

و ذنوب متلفقة

إيه الحكاية بقى

مش ناوية نتصالح

يا شمس داخلة عروتى و كمى

تشبه أبويا فى ضحكته لأمى

ليه كل حاجة مغيرة حسنك

لا دى ابتسامتك ولا ده حزنك

خدى فى حضنك فقرنا و ضمى

و خدى بإيد الحلو و المالح

و تعالى نتصالح

ذاعوا لنا كام غنوة و ما سمعناش

و خدنا كام خطوة و ما لحقناش

مين اللى كان بالخطوة دى بادئ

و ليه فى مكان البيت باكون لاجئ

الفجر صادق ليه ما صدقناش

و ليه نسينا ضحكة امبارح

و رفضنا نتصالح

اسمك ممشى الريشة على عودى

جنبى و مسافرة امتى ح تعودى

عودى ندهلك لما عودك طل

ما تخلينيش فى الحب ده أتذل

على الأقل اعترفى بوجودى

ده انا اللى باعبد فلك الطارح

و انا اللى راضع عيشك الصابح

ما تيجى نتصالح


اسكندريلا -  عينى فى عينيك (Eini Fi Einek)

جميع مقاطع الشعر من كتابة وإلقاء : رامي وفا 
حسابي على الفيسبوك
www.facebook.com/ramywafapoet/
حسابي على الانستجرام
www.instagram.com/ramywafapoet/
حسابي على التيكتوك
tiktok.com/@ramy.wafa

لقراءة وتحميل الديوان PDF
https://drive.google.com/file/d/1Xd8eZ8xulusuiR3GTdLXH1BSUnoCY2Ci/view

بلايليست الديوان صوت
https://soundcloud.com/ramywafa/sets/mimeplaylist

رامي وفا | برومو ديوان (مايم): كل الطُرُق تؤدي إلى 5 مارس

أداء: مريم، أحمد مصطفي، دودو، وعود كريم سامي، كلمات ولحن أيمن حلمي، عن تيمة فولكلورية ولحن لسيد درويش
الأغنية من تتر فيلم عين شمس، فيلم مصري روائي طويل، إخراج /  إبراهيم البطوط

http://www.ibrahimelbatout.com/

Ya Aziz Einy يا عزيز عيني

يا اما عيون الناس زنازين 
و انا قلبى حزين 
من كتر كعوبهم مداستنى 

القمرة متشبهش سماها 
يوم ما لجئتلها .. خبتنى 
و انا شوفت الضل و لا لقيتنى 
ف جريت .. من الخوف 
و عدمت الشوف 
علشان كدبت الضحكة .. فى وش المساكين .. 

يا اما .. عيون الناس زنازين 
و انا قلبى حزين 
انا قلبى حزين 
من كتر كعوبهم .. ما داستنى

أسمحلي يا فندم اني اقعد..
رجليا خلاص دبلت م المشي عشان خاطر الكام ملطوش..
صدقني يا فندم مقتلتوش..
طول عمره صحيح فقران لكن..
كان وشه بشوش.. 
بيوزع ضحك على اللي يشوفه ف كل مكان..
بنحس ف عينه بكل أمان..
رغم الخلقات كت مترقعة اشكال و ألوان..
عمري ماحسيته ف يوم بردان..
انا كنت اتدفى ب نظراته..
اعرف احوال الكون كله من حكياته..
نتلم جميعاً اهل الكار.. بعد المشوار.. اللي بيقطع انفاسنا يوماتي على السكة..
بنرخي همومنا على القهوة .. 
ونلملم كل المتبقي من لحم عشان الحمل تقيل
نتقاسم انفاس الشيشة وكباية الشاي..
الشيشة يا بيه تحب اللمة
الحجر اللي بيحرق نفسه بيفرح لما..
بترفرف حواليه الضحكات..
القهوة يافندم عرفانا احياء اموا
فمابتلومناش.. على ريحة العطنة وريحة الفقر..
دلوقتي خلاص بقى له قيمة..!؟ بعد اما اتدب ف صدره رصاص..
والله يا بيه لو كان باديه
كان حب على ايدين القناص..
انتوا يافندي اللي قتلتونا
يوم محتجناكوا تعالجونا..
ووقفنا طابور ملهوش اخر
ولا جاش الدور إلا عليكم..
احنا اللي يا بيه جينا الدنيا
علشان تدسونا برجليكم..
اسجني يا بيه لو ده هيرضيك..
هتزيد نجمة على كتاف معاليك
ويزيد الكره ف قلبي الكفران من كاسكم..
من يوم ماكعوبي اتحنت بتراب الشارع..
وانا تايه في كفوف حراسكم..
ملعونة العيشة ف اراضيكم طبعكوا كفار..
شوف كام خزنة طلق هتكفي صدور الأحرار..
......
يا اما .. عيون الناس زنازين 
و انا قلبى حزين 
انا قلبى حزين 
من كتر كعوبهم .. ما داستنى

-------------------

Vocal & Composition - Mohamed Abd El- Latif (Tifa) || غنــاء و الحان – محمد عبد اللطيف 
Fb Profile - https://bit.ly/3sJeF4E 

Lyrics - Ahmed El-Gaml || كلمــات - أحمد الجمل
Fb Profile - goo.gl/slGJB2 

Piano - Jason Eshaq || بيانو - جيسون اسحق
Fb Profile - goo.gl/Fql3ax

Drums - Nadim Nakhla || درامز - نديم نخلة
Fb Profile - http://goo.gl/OJBdGt

Percussion – Ahmed Henksh || ايقاعات – أحمد حنكش 
Fb Profile - goo.gl/xk7rlx 

Live mixing by Dream Studio - Mafdy Thabet 
Fb Profile -  http://goo.gl/3qcOri

Mastering - Jason Eshaq 
Fb Profile - goo.gl/Fql3ax

Photo Cover Captured & Edited - Memonto
Fb Profile - https://goo.gl/OKhpsC

-------------------
facebook page : https://www.facebook.com/gawy.band/

-ِ All Copyrights reserved to Gawy band . please don't use this track for any purpose without notifying us and getting an explicit permission.

Ayoun El Nas Zanzin - عيون الناس زنازين (LIVE)

كلمات وألحان وغناء : العبدلله
https://www.facebook.com/NaGGaAaR

عود : أحمد فهمي
https://www.facebook.com/ahmed.fahmy123

توزيع : أحمد أنور
https://www.facebook.com/Ahmed.Anwar.officially.1

هندسة صوتية ومكساج : محمود حفني
https://www.facebook.com/mahefni10

Ahmed El Naggar - Ana Tayeh 3la bab Allah | أنا تايه على باب الله - أحمد النجار

زي العيال - صباحية العيد الصغير
متبعترين زي الندى
ومعلقين الفرحة في البلالين
وميقصدوش رش الغنا في الجو 
ولا دبروش للضحكة
كل اللي واخدهم.. حنين للضي

زي العيال دي
 انا كنت عيل مبتدي بالنور
كاشف ضباب الزحمة.. والمرايات 
ومظبّط العالم على قدي 
ومبحبحه حبة
.. علشان يساعيهم

ريحة تراب الفرن مالية لي نخاشيشي 
فملكت حقي في لحظة التخليق 
ومابنكسرش.. لأني مش ممسوك 
ومابتمسكش.. لأني مش محدود
واسع يا حوش المدرسة.. يا وسط دارنا
مطلوقه مُهر الخُضرة قدامي 
ملها لجام.. غير النسيم.. والعين 

ماسك مدار الشمس بصباعي الصغير
لافف خيوط البدر ع التاني
طبّقتش ايدي؟.. لسه مفرودة
لسه الغنا عارف يناغشني
قادر ألمّ الليل في سيالتي
 وأقزقزه حبة ورا حبة

وولاد حارتنا مسهرين الليل
 ومفتحين جفني على الآخر
نقدرش نصبر ع القمر مخنوق
صوت الصفايح تاخر العتمة
وصراخنا جاب بنت النبي.. فاطمة 
لعبت معانا لحد ما شبعنا

وأمي ابتدت تتهجّى في عيوني
 إن البكا مش ضعف.. ده استغفار
وإن المسافة ما بيني وبينهم.. الدهشة
وإنّي ابتديت بالحلم م البيضة 
مابقولشي عارفه.. بس حاسة بشئ
يمكن متفهمهوشي دلوقتي

والشمس حامية.. بس مبتقتلش
والنخل عالي.. بس طوبة تجيب

محفظتش الخطبة.. عشان وحشة
درس الحساب بايخ.. علشان بيحسب حسبته بالظبط
والشيخ مخوّفني من الآخرة
ما بقيتش أروح الجامع إلا عشان: 
أقدر أشوف الغيط من المادنة
وأضحك على اللي بغلته سفّة

بنت أختي قارعة.. والمطر بيرخّ
والسقف يِنْقَع.. عفشنا يِكمَش
والبرد حاسس بينا.. ومقدّر
مش زي برد القاهرة الماسخ.. حسسني إنّي غريب

وقعدت أدور ع الونيس.. ولقيت
لكن أخدني البنك من نفسي
ما أقبلش أكِل.. وقلت: ح القاني
ولقيتني تايه في النيون
مركون لحد الناس ما تتوضى 
ويرتلوني في لحظة ويعدوا
ما بيلحقوش ولا حتتين سكر
ولا داقوا ملمس ضحقتين بُكَّر

قلبي اللي كان قلبي صبح خُردة
صعبة الملامح ع اللي ما بيشوفش
مقدرش أجِيلك كل يوم مهدود
 شايل جفون الخلق وذنوبهم..

يا لون حبيبتي اللي ملوهش مثيل
اوعي النيُون يبهَت عليك
كسر براويزك وطلعني
دور المسيح.. ما عادش ينفعني
رجعني عيل
 او منيش لاعب.. 


كلمات الفنان والمؤلف والمخرج المسرحي: صبري فواز
وموسيقى فيلم الكبار لخالد حماد.

صبري فواز - حنين للضي / Sabry Fawwaz - Hanin L Elday

——————-(م)——————— 

    ماسبيرو أخطر م الرصاص و القصر
    ملّى عنيك بالدم…قبل الطلوع قدام
    ما تسيبش جيشك تِقسمه الأعلام
    مش كل مين جنبك….جواه بيهتف مصر

———————(ا)———————-

    الوقفة جنب النار ..بتقلل الدخان
    - إهتف هتاف إبن المكان و الظرف
    - إضرب بعزمك … أو ما تضربشى
    إرجع بضهرك … أو ما تهربشى
    إمسك عصاية ثورتك م الطرف
    التاريخ ضمن الغنايم ..و بيكتبه الكسبان

———————(ن)———————

    نقى دايما طوب صغير حدفتك توصل بعيد
    نفترق ساعة المطاردات ..أربعات
    نشّن الباراشوت ناحية الصف العريض
    نجرى فجأة.. نردّ فجأة.. نص قوتنا المفاجأة
    ندّم اللى يعورك……..و إقطعله إيد

———————(ي)———————

    يؤتَى الحِذر من مكمنُه

    يأتِى الغبى باللص ثم يحلّفه

    يؤتَى الهتاف… رَّجاً بممن يَهتِفه

    - يؤتَى الجدع… قلبا بمما إتجَدعنُه

———————(ف)———————

    فّرق ما بين….الجرأة و القلب الحديد… و الرمى جوا التهلكة

    فتش بإيد ع المستفيد ..و بإيد عن الصاحب الجدع

    فتح اذا الناس غمضت….غمض إذا نظرك خدع

    فرّغ عياطك ع الصحاب… دم و خميرة… مش بكا

    ———————(س)———————

    سمى الحاجات دى بإسمها…الكدب… و الخوف… و الخيانة

    سجادة المسامير… تتحط ع الناصية …غطّيها بالدخان ..ولّع قصادها كاوتش

    سد الطريق لورا علشان ما تترددش

    سيب باب لجيشهم يهربوا منه

    سلّم رايات الحلم لحد من سِنُّه

    سلّم قراركوا لأكتر كفّ عرقانة

———————(ت)———————

    تبّت يدا من ساب رفاق المعركة بطولهم

    تمن القضية اللى اندفع مبقاش يجوز يرجع

    تتعب تبص ف عين.. إصحابك الطايرة….شوف مين من الآخر دفع….لو زيهم… إدفع

    تلت الرصاص نحو العدو… .تلتينه للخاين..الطعنة جاية من هنا مش من هناك

    تعب النهاردة غير تعب بكرة….الوقت مش دايما معاك.

    تحتك فيه ناس عاوزة الأمل…مش عاوزه؟… سيبهولهم

———————( و )———————

    وسّع الجبهة لو إنتوا كتير… و .ضّيقها لو إنتوا أقل

    ولع شماريخ وسطكوا اول ما تلقى الرتم قل

    وقّع لمض كل العواميد اللى كاشفة ناحيتك

    وّدى الإعاشة قبل ما تدوق لقمتك

    وجّب مع السكان و أهل المنطقة…حتى لو فاهمين غلط…فيه ناس كتير متلخبطة …إكسب عدد ….و إكسب غطا

    وزع عيونك فوق و تحت….و خاف من اللى يصورك

    وطّى و عينك باصّة فوق ع الطوب و إلا يعوّرك

    وقّف إذا سحبوك على شارع طويل

    وفّر بديل

    وافق على الهدنة إذا سحبوا الكلاب

    لو سابوا خليك انتا آخر حد ساب

    واحد بيفرق ف العدد جدا

و عشان كده….

 أول ما تلقى إن الصفوف ناقصاك …

     وسع مكانك… للى جاى وراك


Manifesto - Mustafa Ibrahim | مانيفستو - مصطفى إبراهيم

الشاعر العبقري مصطفي ابراهيم 
تفرانيل 100

انا شعرى غامق
بس قلبى مطقطق ابيض من زمان
جايز عشان
الناس ساعات بتلاقى ناس
تعرف تشوفها بجد
و انا قلبى لسه عمرهما اتكشف ع حد
بقابل اد ما اقابل
و افارق اد ما افارق
و ما اتعلمش
بلخبط ف الاسامى عشان
بخاف انسى
بلخبط ف الدنيا عشان
بخاف لا ما اعيشش
بقالى كتير ما بتكلمش
بخاف يبقى الكلام متعاد
ما كملتش ف اى رحيل
ما كملتش ف اى قعاد
و بدى للحياة بالكاد
ما يكفيها
و يكفينى
شرور البهدلة فيها
مليش ف البنت طلبات غير
تنسينى اللى قبليها
و بدخل ف حاجات تخاطيف
و عينى ع اللى بعديها
رقصت كتير ع السلم
بخاف اطلع
و اخاف من الارض
- اكيد الخوف مش الفكرة
و حتى يا ستى يعنى بفرض
اكيد الخوف مهواش عيب
طبيعى الناس تخاف من الغيب
و من المقدور
برغم كدة
بحب الضلمة اكتر ما بحب النور
ساعات بتمنى شقة ف برج شايفة النيل
و اوقات انى اعيش مستور
و بزهد .. ف كل ما ف الرحلة من زخرف
و ما زهدهاش
ما دام فيها رمق يتعاش
اكيد ف الرحلة يوم متحاش
و مستنى اعدى عليه
- و تعرف عنه اصلا اية ؟
مفيش غير انه لسه مجاش
بنام ؟
طبعا .. كتير جدا
و بالايام
و طول الوقت بحلم ان انا بجرى
و بشبع من الحاجات بدرى
و رغم كدة لسه ما شبعتش
من الجرى و من الاحلام
بخاف من الموت
عشان خايف ساعتها اكون
عبيط .. كل اللى سيبته كلام
بشوف افلام
عن الدنيا
و عن حكايات
لناس عاشت حاجات تانية
و عن حكايات لناس ماعاشوش
و بتأثر
و بتحسر
ع كل اللى كان ممكن
اكونه
بس ما بقيتهوش
ما سبتش شئ مجربتوش
ولا جربته و ما سبتوش
بحب العود
و احب الناى
و اموت و اعرف حقيقى ازاى
حاجات من دى
ساعات بتدب فيها الروح
من اللمس و من الانفاس
فتبقى حية اكتر من البشر و الناس
مفيش احساس
لحسن الحظ و لسوئه
ما بيعديش
مفيش ولا طعم حاجة من اللى بتدوقه
مسيره يعيش
بحلوه و بمره كله بيتسخط لمفيش
يا سبحان اللى بيعودنا ع الحاجة
فننساها
و بيخفف كاسات الناس
بميه بدال ما يملاها
عشان طعم اللى فيها يروح
عشان طعم اللى فيها يخف
يقولوا مجازا المجروح
اذا خد ع الوجع .. بيخف
تلف عليه سواقى الكون
تدوب اللى فات
ف الجاى
ف سبحانه اما قال
منها جعلنا
( كل شئ حى )
زمان فيه حد علمنا
ف درس الدين
دعاء بيقول :
يا خالق كل شئ ناقص .. كمالته معاك
يا شايل من الحاجات حتة .. بنترجاك
بحق المشهد الكامل
و اسمك اللى انا عرفته
تسيب اللى يكفينا
و تكفينا بما سبته
ما تحوجناش
لجاى مجاش
و ترضينا بما جبته
و ندعى وراه بصوت عالى
يرج الفصل رج خفيف
و اكمل دعوتى ف سرى
( و ترحم قلبى ف شيبته )
كما تدعو الفروع الاصل
دعوتها
ف كل خريف”

تفرانيل 100+موسيقي _مصطفي ابراهيم

♪♪ وما الموسيقى إلا أزيز أبواب الجنة ♪♪

تفرانيل 100+موسيقي _مصطفي ابراهيم

Usama Elgendi

Recent comments

shayma

Ayat. B

Ereny Alkes

passerby

Related tracks