بعد التقسيمة
وبعد الدم المصرى ما سال
طالعين بيتاجروا بينا على كل الشاشات
ولسه الصليب حضنه الهلال ف الاعلانات
يلا كمان افرزوا.. مين ده اللى مات ؟؟؟
شوف كام قتيل من عندكوا
وكام قتيل من الحسرة مات
وكام حرامى متخفى ف لبس البنات
طب ايه اللى وداهم هنا ؟؟ 
وايه اللى وداهم هناك ؟؟
يلا قوام .. مزاد ومفتوح للتصنيفات
متسمعوش كلام داعر يقول
قتلاهم فى النار وقتلانا ف حضن الحور
تكونش هتحارب صهاينة يا خى 
ما تقول ياسيدنا كلام معقول 
ومن هنا
ومن هنا اقتل وروع باسم الدين
ولع كنايس
وحاجج رسولك يوم الدين
وقوله دم اللى ماتوا ف رقابنا
ومش هانقدر نوفى الدين
ياسادة ياكرام 
الدم لونه واحد  
عمرك شفت عسكرى لون دمه أصفر
طب اخوانى او سلفى لون دمه اخضر
او حد ع غير المله
يكون لون دمه اشقر
يبقى ليه بنقسمه ونفرقه
اللى رأيه رأينا ده شهيد ونكرمه
واللى رأيه غيرنا ولو صح دايما
بنجرسه
وبنفضحه
ونجرمه
وبتسألوا ايه اللى وصلنا لكدة
اسكتوا....................
ده الحالة اسوأ من كدة
ياسادة ياكرام
استقيموا يرحمكم الله
*****
Xenga - 14/8/2013

Xenga - ياسادة ياكرام

نأتى هنا للهروب من الواقع العفن :(

Xenga - ياسادة ياكرام

Yassin Xenga