لو تسألي ..
أنا مش ولي 
صاحب بالين
و حَنبَلّي 
شهم وشقي 
مُسلم تَقي 
بَصَلّي الجمعة
للجمعة 
عفيف وسيء السُمعة 
صعلوك أوي
مُلتوي
بشرب سجاير فرط
بخسر و ادوس ستارت
معاييش تذاكر للنعيم 
قلبي الغشيم ..
غفلني/ و عدى عتب الباب
مليش أحباب ..
حقيقي أنا لسه مش ولابد
لا عايز أعرف حد
ولا حد يعرفني 
 لو شوفتني ماشي/ بلاش توقفني
منطوي .. لأن الباقة خلصانة 
الدمع على قدي / لو كنتي عطشانة
المَلّح سَوانّي
الغنوة فـ وداني
" وأقولك ع اللي سهرني 
وأقولك ع اللي بكاني "
الحُفر ياما 
الطريق واعر
نفسي لوامة 
مهنتي شاعر
خُلقي مش ضيق 
صدري بيزيق
شكلي شب عجوز
من عنيا الجوز
الهالات طارحة 
بالنسبة للفرحة
فـ أنا على لحم بطني 
الحزن هَبْطنّي 
لو دوخِت .. ضُميني 
الحالة بتجيني ..
كل أما أحس بشوق
يومين تلاتة وأفوق 
ونكمل الأسئلة ..
دا لو مفيش مشكلة 
وحابة نتعرف ..
والله ما بخرف ..
أنا كنت ناوي مقولكيش
لو عايزة القصة دي تكمل
فـ نصيحة مني متسأليش !!

كلمات و إلقاء : أحمد سعد 
موسيقى : أرماند آمر

C.V - Ahmed Saad III سي ڤي - أحمد سعد

اصعد فوق السلالم الموسيقيه و ألقى بروحك

أحمد سعد : شاعر عامية مستقل

C.V - Ahmed Saad III سي ڤي - أحمد سعد

Ahmed saad zezo