لما بداء ينشغل بحجات مبتهموش .. 
ظهرت حجات اهتم بيها لكنها .. 
كانت الطرف اللي بايع في العلاقة .. 

ظهرت اجابة للسؤال .. 
اول ما خلص الامتحان .. 
ومعادش عنده اي فرصة ..
تجبرُه علي بذل طاقة ..

كان حب بنت مقالهاش ..
خوفاً عليها من كلام الناس .. 
بالوقت لما اتجوزت غيره .. 
المجتمع صدق وآمن بالصداقة .. 

علي قد زعيق ابوه والخلافات الطويلة ..
والحياة ما بينهم اللي كانت مستحيلة .. 
وتكاد تكون اشبة لحرب اتنين صنايعية .. 
علي مين يبوظ عدة التاني ويعطله .. 
اهو مات ابوه .. واتمني فجأه يحصله .. 

والناس بتتحايل عليه .. 
تسافر ليه ؟ .. ما بلدك اولي .. 
ولكنه مل من المحاولة .. والامل .. 
وكتر السؤال ايه العمل .. وما هيا الجدوي .. 
اليأس أصبح عندنا عدوي .. 
ولازم اهرب قبل بيه ما اتصاب .. 
سلم علي الاهل وعلي الاصحاب .. 
ويدوب بتبداء تطلع الطيارة .. 
توصل رسالة ، ومـ الغرابة اتخبل .. 
كانت وظيفة راحلها من سنة ..
ردو عليه وقالوله انه اتقبل .. 

دلوقتي بسأل ليه ..
وده اعتراض اكتر ما هوا سؤال ..
هيفيد بإيه في الدنيا طول البال .. 
وقولة اتقل ، تلقي خير قدام .. 
وانا كل ما اصبر بترمي علي ورا .. 
ليه كل حاجه بتيجي متأخرة .. ؟ 
طب دي مكافأة ولا إسمه عذاب .. 
ميصحش انافقك او اكون كداب .. 
انا مش راضي .. 
وبالنسبة لوثيقة الصالحين .. 
فـَ مش ماضي .. 
مش محبة في العناد .. 
قد رغبة في التراضي .. 
افهم ايه من كل ده .. !
الجري عـ الفاضي .. 
والوقفة عـ الفاضي ..
وانا كل ما بفتش قصادي .. 
بلقي حاجة مُجبر استحمل بعادها .. 
فَـ يادوب سؤال .. 
كل الحجات في الدنيا ايه ..
حكمة معادها .. ؟



يادوب سؤال - احمد ضيف

........