أشعار

خش محمد مرسي .. يخلص في الموضوع
خد سكينه في جمبه ، و كان عيان موجوع

أحمد فؤاد نجم - المدرس

.. لكن جوهرك الفردّ لا يتحول

أمل دنقل - صلاة

حلّو المراكب - نادر - الشيخ إمام يبكى بعد وفاة نجيب سرور

البنّ
			
القهوه تحبّ كنكه
والكنكه تحبّ كنبه
والكنبه تحبّ قعده
مبسوطه مربّعه
و كنّا أربعه
أنا و انتِ و انا و انتِ

و كنّا عيون كتير
و طبليّه و زير
ولا بنحبّ نبكى
ولا بنعرف نطير
أنا و انتِ و انا و انتِ

سبنا البوسطه ورانا
فى الترماى اللى داير
العتبه للإمام
كان ريقك جنبى ساكت
حبّيتك من زمان
أنا و انتِ و انا و انتِ

شمّيت لادن سعيد
شمّيته من بعيد
شمّيته من قريّب
خمس سنين حاغيّب
على الشمّاعه خايف
و باخاف على الدولاب
و بادوب على البلاط
و باحسّ الظلّه تقلت
و باسمع الوابور
و باحسّ الميّه تقلب
أنا و انتِ و انا و انتِ

الظُهر الشمس تلحس
الظلّه فى الليمان
والظُهر الشمس تعمل
سيبرتايه دهب
بصّينا لبعض فيها
و مشينا لبعض نبكى
و قعدنا من التعب
أنا و انتِ و انا و انتِ

باقول لك إيه باقول لك
حاجيب حاجات قديمه
قلبى كوره شراب
نلعب والاّ ما نلعب
فرحت لنا المدينه
و امبارح فى التراب
أنا و انتِ و انا و انتِ

و بنفرش ضيّنا 
على ظلّة بعضنا
و احنا بنبرد هناك
علشان ندفا هنا
والقهوه تقول لنا
على بال النار ما تلسع
بتبقى حنيّنه
أنا و انتِ و انا و انتِ

قصيدة البن بصوت فؤاد حدّاد

البتاع - أحمد فؤاد نجم

مات نجيب سرور في 24 أكتوبر 1978 في مستشفى للامراض العقلية اودعته فيه  المخابرات عن ستة واربعين عاماً

كسميات - نجيب سرور

الليل ملاح
تايه سواح
لا يبوصل شط
ولا بيرتاح

الليل مشحون أسرار وشجون
وألم ونغم
وكاسات ونايات ودموع وآهات
وعبر وحكم
***
ومشيت في الليل
خجلان مكسوف
إكمن الليل عريان مكشوف
أفراح الناس
وجراح الناس
على صدر الليل عناقيد وصفوف
وعيون الليل والظلمة جبال
فاردين على وش السما غربال
ألماظ مبدور
في كاسات بنور
يفرش للنور ع الأرض خيال
***
ويشق سكون الكون
أرغول
ونغم فنان ثاير مخبول
وعليل على فرشه بيتقلب
ويحايل جرحه المداري
ويقول
يا طبيب قلبك طيب
إسمعني
ح أقولك أسراري
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب
أنا دقت الجرح وخدت عليه
يسقيني المر
وبرضه اسقيه
من بحر الصبر اللي ف قلبي
ح تقوللي بتشكي امال من إيه؟
ولا من أوجاع
ولا شوق لمتاع
ده انا عمري إن ضاع
مش ابكي عليه
أبدا يا طبيب
يا طبيب ده انا جرحي ملوعني
وساقيني الحنضل من كاسي
والنار في ضلوعي بتلسعني
وأنا لسه صغار
والعيا قاسي
ولا عمر الليل مرة سمعني
عليت الآه على أنفاسي
أبدا يا طبيب

لكن يا طبيب أنا بابكي صحيح
وباقول الآه
زي المجاريح
ودموعي في عيني بتتألم
وبتتكلم
على قلب جريح
مسكين
كان أمله يحب سنين
ويلم الحب ف عشه اتنين
واتهنى معاه
وإن قال الآه
أنا اقول له يا روح القلب
آهين
بس أنا لا بيدي
ولا بودي
دا قدر مقسوم
قدر لحبيبي يعيش بعدي
في الهوى محروم
أهودا اللي وجعني
وخلاني
حطيت الشكوى على لساني
إنما وحياة اللي قاسيته
وحياة الأمل اللي بنيته
وحياة القلب اللي جرحته
ولا فرحت معاه
ولا هنيته
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب
***
وينام الصوت
والكون حواليه
ساكن نعسان
وكأنه مات
رمي تقله عليه
سكت العيان
***
الكاس له ناس
والليل مجالات
والحان مليان والناس مزاجات
ومجال الكاس
أشكال أجناس
مليان حواديت
مليان روايات
***
ونزور في الليل دنيا الخمار
ونلاقي الكاس
ع الناس دوّار
ويموت الليل على باب الحال
حيخش ازاي والدنيا نهار
ونفوس وقلوب كده ع المكشوف
عريانه تمام
وتعالي نشوف
***
شوف دا اللي هناك
قدامه كاسين
مع إنه لوحده
ما هوش اتنين
والناس بيبصوا
ومش فاهمين الكاس دا لمين
والكاس دا لمين
أهودا اللي بنظرة عين
شبكوه
وفاتوله الكاس مليان
وفاتوه
وحكايته طويلة
وهمه تقيل
وح اقول لك إيه وأعيد لك إيه
رايح يملا عيونه بحلم جميل
بياع السهد ملا له عينه
***
وترن ف جوالحان
ألحان
نشوانه تخلي المولد هس
وغزاله بتتغزل ف حصان
بتقول له
احبك أنت وبس
ويفز هنا سيدنا المنظور
ويطب الكاس ف إديه
مكسور
ويقول غشاشه
حتلعب بيك
ويرد التاني عليه بفتور:
طب وانت مزعل نفسك ليه
حشري وسخيف
وح قولك إيه
ومانولي يقول
” موش أندك خق”
والسامر يضحك لما يطق
ويحط الحشري عنيه
في الأرض
وكأنه لحن في الدين
والفرض
ويقوم
يطوح مرة يمين
ويميل زي البخت شمال
وف جوف الليل
يغرق مسكين
لا يغير حال
ولا يشغل بال
***
الحظ حمار
من غير حمّار فقد التمييز
زي المجانين
هجر البساتين سكن الدهاليز
والحظ بطبع غباوته عنيد
ودماغه حديد
لو يعند حتى على الغزلان
ينسخطوا معيز
ونسيب دهليز
نخش في باب
ونعدي الباب ندخل سرداب
ونلاقي ضحايا الليل واقفين
والحظ بيلعب بالأعصاب
ترابيزة عليها نمر بنظام
من واحد يمكن لما لألف
والدنيا بزيّ ما هي تمام
على هيئة كورة
تدور وتلف
وشنب مفتول
يصرخ ويقول
اللقمة بتنده أكّالها
والرزق نصيب
والدنيا دايرة
ف احولها
زي المجاذيب
الصبح معاك
والظهر عليك
والحظ لو ادى
ما بينقيش
جربها
ويمكن لو تديك
من جودك برضه
ما تحرمنش
قرب قرب
جرب جرب
ودي لعبة حظ
ما فيش تبكيش
***
والكورة تدور
زي المقدور
تحرن على ناس
وتجامل ناس
والشيخ سلمون شعبان مندور
واقف على أعصابه ومحتاس
يعلب ع الستة
الخمسة تصيب
ينقل ع الخمسة
الخمسة
تخيب
وخلاص الحظ اداله قفاه
والحظ أن ولى
بيبقى عجيب
كلها ساعتين
وصريخ
سلمون لعلع مقامات
نهاوند  وسيكا  ورست وصبا
وحجاز وبيات
يا  خراب البيت
يا فلوس الناس
يا نهار مشوم
طب المسكين من طوله ورفص
يظهر مات
والناس ملهيه ف أحوالها
بيدوسوا عليه
وبتاع الكورة مشغلها
ح يبطل ليه
واللقمة بتنده أكلها
طب ودا كل إيه؟
***
الشارع نايم تحت جناح الليل همدان
وعيون النور
تعبانه بتنعس ع العمدان
والكون ملفوف
بعباية
نسجها الليل بالخوف
وف بحر الضلمة رأيت على بعد
شبح
حققت بعيني
لقتها يمامة وكاسرة الطوق
كرابيج الليل
ناقشينها جراح
من تحت لفوق
والأسى ف عينها
مصحي الشكوى تقول حواديت
حواديت
ما لهاش علاقات بالشوق
وليالي الشوق
مسيت
ورميت على الحلو سلام
قالت سلامين
أنا قلت لوحدك ليه يا حمام
ووليفك فين
مالك بالليل والويل و الرعب
خليك يا حمام
عيش للحب
شالت بجناح
حطت بجناح
ورتني جراح
تحت الجناحين
وقالت لي
زمان الحب ما راح
وبقي لنا سنين في الليل تايهين
خد مني الليل
واداني الليل
ورميت له الغالي بسعر زهيد
وسقاني الشهد ودقت الويل
وكساني حرير ولبست حديد
وعرفت الناس من الراس للديل
وآمنت بأن الكل عبيد
وقالتها وطارت في ثواني
وانا شارد وخيالي يصور
وغمزني الفجر وصحاني
ولقيت الكون بادي ينور
وصحيت من غفوة سرحاني
على صوت بيقول
الله أكبر

قصيدة الليل - أحمد فؤاد نجم

خلي بالْك معايا ما تسوقش الهبل
بهلوانْ ؟ مش بهلوانْ ، فار ؟ أيوه فار
واللبن فار
وكان زمانْ الجماد له في الحبل
وتمخض الجبل
فولدني!
حد قال يا فار انت طالع منينْ ؟
يا فار أبوك الجبل ثابت وجبت منينْ الوسوسة
تكفر حبه أكفر حبتين
تاخذ خطوه قدام آخذ خطوه كسكسة
تشوح لي أشوَّح لك
سنّ بسنّ وعين بعين
وفْن بفن أصل الفنّ أوله نسنسة
توِّجني مَلِكْ
بارك للأرض وبارك لي
الحشرات سبع تاشرات تحت رجلي
انا من فصيلة أصيله
أخويا الوطواط أعجوبه : حيوانْ وطير
واخويا القنفد أعجوبة : حيوانْ ونباتْ شوكي
وانا اللي مش أعجوبه لكن انا اللي فيهم
انا المشتهرْ المنتشر وكل الدنيا جيراني
انا   فار فيراني
في قلبي كلاكيع لغم ونغم
والاَّ بلاشْ
خلينا في الوصف البراني
انا عيني اللي يمين يمين
وعيني اللي شمالْ شمالْ
والحول حواليَّا
حنختلف في دي ما نختلفش في رجليا
قول أربعه
انا الفار الفيراني اللي جلدي حرير
وفْروى قشعرير
وأسناني مسرسعه
بتشق من بوز
ما تقولش لما يبوسْ
إبرة الدبوسْ
وداني مطرطقة من غير حموريهّ
انا مش بسيط زى ما تظن
انا جحرى مش خن
انا لي ناب مملوك وناب انْكشاري
استني
الوصف لسه ما خلصشي
نسيت ديلي اللي طوله خمسة اعشاري
يعني نُصِّى
ويادنيا بصىّ
حارقص وارقـَّص
وخيالي متقصقص
على الحيطانْ
****
والليله دي بنت عرسه يا ابن آوى
شوفْ دلعها حضن صدّ وحضن آوى
رايحْــه جـايه لعب ميهّ في حوض نقاوة
بــسّ قــــولــــوا يــا دراوشــــــــــــــــهْ
رقصـــى إسمــــــــه دوشــــــــــة روشة
أو منــــاوشــــــــــــه أو شــ ..  أوشــ ..
أو شقاوهْ
اللــــــيه دي القــط بايـــــــت ع البلاطهْ
احْــــــنا كــــــنا أتىن وجـــا تالت تلاته
قــــال له ضد الموتْ ما تنفع الاستماتهْ
بــــــس قـــــولــــــوا يــــــــــــادراوشهْ
رقصـــــى إسمـــــه دوشــــــــــه روشهْ
أو مناوشهْ
 أو شــ ..  أوشــ ..
أو شماتهْ
ســاقطه قدامي ومن غير غشّ اراها
دنــــيا تفـــاحَه زباله مقشراها
مــــن شراها باعها من باعها شراها
بــسّ قـــــولـــــوا يـــــــــــــادراوشهْ
رقصــــى إســـــــمه دوشـــــه روشهْ
أو مناوشه
 أو شــ ..  أوشــ ..
أو شراههْ
تنـــكمش م البرد تغطس في العطارهْ
وأمــــا تدألــــج بتدألـــــــــــــج بَطارهْ
يـــا بـــني آدم ولــــك برضه الصدارهْ
بــــسّ قولــــــــــــــــوا يادراوشـــــــهْ
رقصـــــى إسمـــــــــه دوشــــه روشهْ
أو مناوشه
 أو شــ ..  أوشــ ..
أو شطاره
قلـــت إيــــــه الساعه واحدَه إلا ساعه
قلــــت صـــــاحب كرش بيحب اللكاعه
قلــــــت نـــص الليلْ لفرسانْ المجاعه
بـــــس قــولــــــــوا يــا دراوشــــــــة
رقصـــــى إسـمــــه دوشــــــــه روشه
أو مناوشه
 أو شــ ..  أوشــ ..
أو شجاعه
***
ولا حد يفهم في الشجاعة
زى الطاحْونة الجعجاعة
قال انت أول خلق بتسيب السفينْة
خاين؟ ..لأ
خايب؟.. لأ
خايف؟ .. آه
يا بنت يا نعناعة
أما مش طالع أبيع جرانينْ بالْليلْ
انا طالع آكل أقرض انتش انتشي
واضرب الأخماس في الأسداس
أضرب الحماس في الاحْداث
الحركه بركه
سكرانْ؟ يمكن سكرانْ، خايف؟ أيوه خايف
وسلام على الخوفْ مَلِكْ الاحْساس
سلام عليه متراس
وسلام عليه فرّاس
سلام على الفار اللي بيلْعب في عب الفار اللي
بيلْعب في عبّ الناسْ

رقصة الفار- بصوت فؤاد حداد

من ديوان - "نور الخيال و صنع الأجيال"

ياسامعين : أبناء بلد واحده

تحت السما الواحده وياما جرى

مرت سنين ع الدنيا متقدره

الغرب سماها العصور الوسيطه

ونظر وقال كان الزمن مظلم

أما الحقيقة البسيطة

بتقول فى دار الشرق

مهما جرى ومهما يجرا

من أول تاريخ الهجرة

كان عندى فجر أنشق

نوره فى عين الجبارين مؤلم

حتى اذا ما ألتقوا بالفارس المسلم

عرفوا الحقيقة وعظموا فارس

صلب القوام والدرع تحت العمامة

حتى اذا مانزل من السرج ونصب خيمة

سهل الدموع الا أبتسام الراضي

مايل بجسمه لأستماع الأراضي

وعلى العيدان الطرية

ايديه نديه كيف أيدين الفارس الغارس

هذا الذى رد الثغور البهيه

وبنى باسماء الأئمة المدارس

وحضر مع الخصم لمقام القاضي

وأعاد الى الأم الصليبيه ابنها

أما عن المنكر نهى

وأما فى ليلة شجن بالشام

حلف يمين أفضل له

يفقد ولاده ومؤنسته ولا يهدم

هذا صلاح الدين فتى مقدم

حامل لواء الفتيه والأجناد

فوق الخيول المسرجات الجياد

وهى ليله من ليالى ربيع

أو هى ليله من ليالى جماد

القاهرة أولى رايات الجميع

عند المقطم كبرت للجهاد

يارب تشفى الصدور

يارب توفى الأمهات الندور

يارب تمنع عن ولادنا الويل

زاحفين على السواحل سلاسل نور

والبحر من دمياط يحيي السيل

واترتبت ع الخطوة رجلين الشهور

والصبر أملك من عنان الخيل

حتما على قدام وحتما ندور

والحصن فى عكة عظيم الليل

يلقى الآذان بيشق فوق السور

الحق ياولاد العرب منصور

فى كل أرض اتكلمت عربى.

************

الأرض بتتكلم عربى وقول الله

ان الفجر لمن صلاه

ماتطولش معاك الآه

الأرض بتتكلم عربى

***

الأرض بتتكلم عربى ومن حطين

بترد على قدس فلسطين

أصللك ميه وأصلك طين

الأرض بتتكلم عربى

***

الأرض بتتكلم عربى سبل وكروم

تجرى اللقمه على المحروم

ما تثبتش حصون الروم

الأرض بتتكلم عربى

***

الأرض بتتكلم عربى ياخيال

بيعد سيفك أم عيال

ظهرك ياما من الأجيال

الأرض بتتكلم عربى

***

الأرض بتتكلم عربى حتى البور

بنت الساقيه والطنبور

حتى فى بطون الأرض قبور

الأرض بتتكلم عربى

***

الأرض بتتكلم عربى بوجد وشوق

الفرع اللى يهم لفوق

لأجل الجدر يشم الضوء

الأرض بتتكلم عربى

***

الأرض بتتكلم عربى جدورها جدود

مد اتوسع زى العود

انت الباكر والمولود

الأرض بتتكلم عربى

***

الأرض بتتكلم عربى ولا ترتاح

واصل كالسيل المجتاح

فتحك ياعبد الفتاح

الأرض بتتكلم عربى

لما العواطف تكتمل بالعقل
الأرض أطيب من مزاج الحليب
والأرض هى الحاكمة بالعدل
بين ابنها والمستبد الغريب
الجبارين اللى احتموا بالصليب
داسوا على عيسى وكتاب المحبة
عملوا الدمار والقتل والتخريب
والأرض صنعتها الأمل والبشاير
والشمس دوّاره عليها تشاور
تاخد وتدى فى خيال الشاعر
تلقاه عجب فى الدنيا هلل وراج
فى الشام ومصر تنادت الأبراج
الفتح تم فى ليلة المعراج
صلوا على طه الرسول الحبيب
أفتح أيدىَّ لفوق والاقى المجيب
يا قاهره نجومك ملاليه
فيها الهدايه لآخر المعمور
أما رياحك حامله ليه
صوت المرتل فى آيات النور:
” نصرٌ من الله وفتحٌ قريب “

الأرض بتتكلم عربي - بصوت فؤاد حداد

آدى أيّـــــــام العجـــــــب والمـــــــوت
جـــات بســـرعه زى غمضـــة عـــين
ليــــه ماقلــــتش زىّ لمْـــــح البَصَــــر
كنـــــت باتقلّـــــب علـــــى الجنبــــــين
والكــــابوس مـــن كـــل جنــب يجيبنى
زىّ أعمـــــى يحـــــسّ لمـــــّا يجــــسّ
ألقـــــى نفســــــى والاّ اشوف نفســـى
بالتفـــــــت مـــــــن آخـــــــر الــــــدنيا
الحميـــــــر بتجرجـــــــر العَربَـــــــات
الســـما اللــــى تحـــت منهـــا حابــات
عنــــد كـــوبرى أبـــو العـــلا بتشـــتى
أنكمــــش فــــى جتّتــــى مـــن البـــرد
لسّــــه حــارجع طفـــل تحـــت المطــر
وأنحنـــى ع الأرض وافضــل عجـــوز
اتوهمـــت الخـــوف دهســـنى الخطــر
كـــــل شـــــئ إلا الخيانــــــه يجـــــوز
ألـــبس التـــوب اللـــى مــــش تـــوبى
أعمـــل الممكـــــن مــــع المســــتحيل
أمشـــــى زى الخنفســـــه و البــــــــد
جنــب حيطــــه فـــى ركـــن ع الســـلّم
الحجـــــــــر الاصـــــــــفر بيتــــــــــألّم
فيـــه أثـــر للعشـــره مهمــــا تهــــون
أقبـــل الظلـــم اللـــى فــــى الأشــــياء
والليـــــــالى بخـــــــدّها المـــــــدهون
والحيــاه والنــاس وحتــى فى نفســى
واقـــرا فـــى الجرنـــال كـــلام تــــانى
وانتقـــل فـــى الماضــــى واســـتغرب
وابكــــــى ع المســــــتقبل الفـــــــانى
واحمــــل الضلمــــه علــــى عينـــــىَّ
وانتبـــه مــن نـــومى واســـمع نعــى
الزميـــــل جـــــوده ســــعيد الـــــديب
إســـمه بالكامـــل يـــا فجـــر الطيـــب
اللــــــى ضــــــاعت مَّنــــــى أيّامـــــه
وآدى أيّـــــــام العجــــــب والمــــــوت

أيام العجب و الموت (جودة سعيد الديب)- بصوت فؤاد حداد

طـلـعــت أدبّ نــزلـــت أدبّ
وطـالـع نــازل اقـزقـز لـب
أردبّ أرادِب
أرنب أرانْبّ
دا كـُله دا كله في بطن الدبّ
وكمـثل الـدبّ كمـثل الــدّبّ
يجُب في جُب يعّبي في عبّ
طلعـت أدب نـزلــــــت أدبّ
طلعت أدب…
طلعـــت أدبّ أدبّ دبـيـــب
ونـزلت أدب سبع سراديب
انا اخوك الدبّ ماانيش الديب
ومفنجلْ عيني تقول دا أديب
والاَّ دا عاشق داب في دباديب
الحلو اللي بيغطس ويقبّ
طلعت أدب …
طلعت أدبّ البط ما باضش
نزلت أدب أخوك ما قبضش
انا باستعبط وما باستعبطش
انا باتْلخبط  وما باتْلخبطـش
انا صاحب رقّّه وصاحب بطش
تزفّر بقي والاَّ أسبّ
طلعت أدبّ …
طلعت أدب برجل وإيد
ونزلت أدب وعيشْه بتقيد
ريَّحت رقبتي من التحويد
وعمـلـــت صغــّيـر قــلـت يــا ســيـــد
انْ كانـــّك مــش شـايف لـبـعـيــــــد
إعمـــل زيي على ظفـــرك شـــــــِبّ
طلعت أدب …
طلعــــت أدبّ الـســقـــف أتــــــــرجّ
نـــــزلـــت أدب الـبــــيـر اعــــــــْـرَجّ
الـعــالـــم ماله ؟ الــــــعــالـــم وَجّ
قــــال كـلــت حـبــيـبك ؟ كلته ياحْاج
ويــا حـبــيـبي كان طـعـمـك فـــَــجّ
انْ كـنـت حـبـيـب انا بـرضـــه مُحبّ
طلعت أدب …
طـــلــعـــــــــــت أدبّ ولا الأمــــــراء
ونــزلــت أدب يـــا وز عـــــــــــــراق
يـــا حياتي وموتْي ولـقا و فـراق
ويومـــأتى   بـتاكلْ  مني  في  راق
آخـرتي  شـمــاعه  في  قصــر فـراء
مــا حـاســــيبش غير الفرو المجربّ
طلعت أدب..

رقصة الدب - بصوت فؤاد حداد

الشـاعـــر الــلي شـحــَتْ
ع الــعـَظـْـم جـــلـــد وشـغَتْ
شــمــت الـــمَلِكْ فـــيـه
شَمَت
فيَّ انا جــزار على بــقــال
زاد في الـــمــقام عني وذل السؤال
ولـــطــم خـــدودْه وبــك دمــــه وقــال
” وكم ذا بمصر من المضحكاتْ
ولكنه ضحك “كالبكا”
كالبكا
كالبكا
انا كـــالــــبــكا كــــلــــبْ
أمــا قـــافيـــة الـــقــــلبْ
دمي انْـــحلـب حــلبْ
مـــن فـــرط حنــيــِّيــــتي
فــــرَّط في حـــريـتي
الــديـب عــوَى
وانا هَوْ هَوَه
تبكي الهوا
ولاَّ تـــــجيــــب ديـــتي
أبـــــُّــــوح يــا أبـــــــُّــوح
كلـــب العربْ مــــدبـوح
وأمَّه عليه بـــتــنوح
بنــت القـــبيلة عـنـــد رأس كــلــيـب
شــقــِّـت عليه الــجيب
مــات لـمْ يُصِـيــبُه الشــيب
يــا ابــو قــلــب لـسـّه قـُليب
القـــلب قــــــــول آه ربــِّنــا يــخلــــِّـيه
راحْ تــعــرضـــه آه والاَّ حَنـخـــبــــِّيه
نــرقــص عليه آه  و الاَّ نــرقـــص بــيـــه
خــلــيــهــا رقــصـه مـــُـحسنه
فـرحــانة لكن محزنه
في ابــن الــيــتمية جنسنا
يا جنسنا
يــا الــلي شـــتـيمه في جميع الالْسِنة
أدي رقصتي
أدي رقصنا
***
آه يــا حـــــَـــيـَـاهْ   لــــَطـــــــَّفي
هـــأتى الـــــدفــــــوفْ  سقــَّفي
و اتــمــايلْي   واتــعــطـــــَّــفي
يــا عـــالـــمـــه   بـــتــخـــرَّفي
يــا جـــاهــــلـــه  وبـــتـــعــــرَّفي
حـــاتــزقـــل    اتـــلقـــَّـفي
صـــــاحب   مــزاج فــلسِفي
فـــرحــى ضـــعيــف  لأ   عفِي
حــــــزني خــــفيـــف  لا    خفِي
مـــا ادري الأمـاننة  أمانْ
والاَّ المخـــبي     يــبانْ
والاَّ الشـــجــــاع  الجـبانْ
مـــا اشـجــعي وأخوفي
انا  خلّ    ظـــــــــــلّ    وفي
في الخير وفي
وفي
الشــــرّ بـــــرضــك وفي
***
ودي حـــــاجــــة تــــخجـِـل ؟ لأ
ودا كـــلـــب يـــحـجل؟ آه
قـــالــــت الــــهمـــوم ألقاه
في كــــل يــــوم قــــــال آه
ودي حـــاجه تــخـــجـــل ؟ لأ
ودا كــلـــب يـــحـــجل ؟ آه
آه اي نــــعــــم    اي نـــــعـمْ
آه يـــا نـــــدأمَّه     ونـدمْ
قــــالـــــوا التـكالــــب    نـــهمْ
أمــا مــــا فــــهــمـتـــش آه
غـــيـــر الآهـــــات والنــــــــــغمْ
عـــصعوصـــى فــــك ودْيــلي مــتـلــحــلــح
زى الفـــطـــيــرة قــلـــبي يــــتــــرحـح
والـــلي تعــــضــــك عــضـــــها وصــــحــصح
واصــــرخ على الأوضــــاع
يامين يصحح
وانْ عـــاد حــــبـــيب أو ..  ضاع
لازم توحوح
أو تبحبح …
صــوتي ينـــبح صوتي ينْبَحّ
ديــلي يــرقص رقصته دَحّ
آه يـــــــــــــا نشـــــــــوه وآه يانْـــــــــــشـــوه
الأمــــــــــــاننة والــــــــــوفْـــــا رشـــــــــوه
والا إيــــــه يـــــا عــظـــم يــــا عـــشـــــــــــوه
في سبيلْـــــها بــــانْــدبــــــح    دبــــــــــح
صـــوتي ينبح     صوتي ينبحّ
ديلي يرقص         رقصته دحّ
في ســـــــبيلْــــها شـــــــــربــة المــــيَّه
في ســـبيلْــــها لــــبســـــت في الخيَّه
والاَّ إيه ياأخي يـــا خــــــــــــيَّه
يــا لـــلي عـــارفينْ الغلــــــــط صحّ
صــوتي ينــبح     صـوتي ينبحّ
ديلي يرقــص     رقصــــته دحّ
يا اللي داوي    لــســاني    تسـريحتك
ريقي مـــا بيخلصــش مــــن ريحتك
يــا اللي دايمًا حـــرَّه بـــدرعتـــك
تطـــلقـــيني في البلدْ رمـــــــْــحْ
صـــــوتي ينبـح       صوتى ينبحّ
ديــلي يرقــــــــص    رقصته دحّ
ليــــــه دكــــر رايحْ على نتـايه
يـــا جمالْ يتّـــاووا في التـــــــايه
هيَّ فـــيــــــها ســـر وحكايه
والا ّوســــواس الشـــــــيطـــــــانْ لــَحّ
صــــوتي ينـــبـح   صـــوتي ينبحّ
ديــلي يـرقـــص     رقصـــــته دحّ
دي الــلي فيـــها الصـــعــب والـهينْ
واللي والـــلي .. لــيــنــهّ ولــــــيِّنْ
بالْنـــهار تــــغمـــقّ وتــبــيـــــــــــّن
في الــلـــيـــــالي لـــونــــــــها يفتحّ
صــوتي يـنبح        صوتي ينبحّ
ديــلي يرقــص     رقصــــته دحّ
انْســـــحــب مــن ديــلي أو    أجـــرى
واتــحــرم يــــادنـــيا مــــــــــن أجرى
الســــواقي بــتنعي مـــن بـــــدري
يا اللي بتقولوا  الأمل شح
صوتي ينبح     صوتي ينبح
ديلي يرقص     رقصته  دح
شمس يا اللي مشمسه وغايمه
عيني نايمه وعيني مش نايمه
طولي ساحْ في رقدتي الناعمه
زي لما يسبح البح
صوتي ينبح      صوتي  ينبح
ديلي يرقص       رقصته دح
****
فرحانه لكن مُحزنه
مطلوقه زي مزنزنه
هنا من هنا وهنا من هنا
وانا جيت هنا وانا كنت توي هناك
قال ابن آدم احْنا توِّهناك
انا قلت عمري ما أتوه وعمري ما أضل
انا قلت أصلي ظل
ظلّ هَنَاك
لاهث
ولاحْس
وارحمونْي يا بشر لاحسنْ
انا ما انتهيت من كفكم لحسًا
ولا خفت نفسي تموعْ
ورقصت للمجموعْ
ودْموعْى من غير دموعْ
والقلب
قافيه
وكافيه
كلب !

رقصة الكلب - بصوت فؤاد حداد

قصيدة جنسية نادرة للشاعر صلاح عبد الله +18

قصيدة همسة عتاب +18 | الشاعر صلاح عبد الله

قصيدة الحلزونة - فؤاد حداد 
صوت : رامي وفا 
حسابي على الفيسبوك
www.facebook.com/ramywafapoet/
حسابي على الانستجرام
www.instagram.com/ramywafapoet/
حسابي على التيكتوك
tiktok.com/@ramy.wafa

الحلزونة - فؤاد حداد

نجم في تقديمه للقصيده
 "دي قصيدة ليها نوعية خاصة، القصايد اللي بكتبها ليلة مبخش السجن"

أحمد فؤاد نجم - عزة

كسميات نجيب سرور مع موسيقى

أمل دنقل-في انتظار السيف

" فيا أيها الشعب كمل جميلك "
بيان هام أو هنا شقلبان
 قصيدة نادرة للشاعر أحمد فؤاد نجم . تهدف للسخرية من الرئيس الراحل أنور السادات ونقد سياساته  .

"بيان هام- أحمد فؤاد نجم

قصيد عين شمس - من ديوان أيام العجب والموت بصوت فؤاد حدّاد
Ain Shams (Heliopolis) - Fouad Haddad

عين شمس - بصوت فؤاد حدّاد

واحد يا موحد الواحد
اتنين يا جد الحسين
تلاته يا سوء الشماته
اربعة يا حبر المطبعة
خمسة يا عزمى يا حى
سته يا بكرة يا جاى
سبعة يا قلبى يا مايل
تمانية يا شوق الزمايل
تسعه يا دنيا يا واسعة
عشرة يا خاين يا حشرة
اعرفكم جميعاً ان السجن سور ..
اعرفكم جميعا ان الفكر نور
اعرفكم جميعا ان السجن شايخ
واعرفكم جميعا ان بابه خايخ
واعرفكم جميعا ان الثورة فكرة
واعرفكم جميعا انه هايبقى ذكرى
وابشركم جميعاً .. ان الوعدة بكرة
والنور عندنا وعندكوا .. يا حبايب :)

أشعار

Gendoo