عادي

قصص مسموعة

اشعار

مزيج الألم🖤

الجنة .. محمد وديمة بشار طيور الجنة 2

الليل ملاح
تايه سواح
لا يبوصل شط
ولا بيرتاح

الليل مشحون أسرار وشجون
وألم ونغم
وكاسات ونايات ودموع وآهات
وعبر وحكم
***
ومشيت في الليل
خجلان مكسوف
إكمن الليل عريان مكشوف
أفراح الناس
وجراح الناس
على صدر الليل عناقيد وصفوف
وعيون الليل والظلمة جبال
فاردين على وش السما غربال
ألماظ مبدور
في كاسات بنور
يفرش للنور ع الأرض خيال
***
ويشق سكون الكون
أرغول
ونغم فنان ثاير مخبول
وعليل على فرشه بيتقلب
ويحايل جرحه المداري
ويقول
يا طبيب قلبك طيب
إسمعني
ح أقولك أسراري
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب
أنا دقت الجرح وخدت عليه
يسقيني المر
وبرضه اسقيه
من بحر الصبر اللي ف قلبي
ح تقوللي بتشكي امال من إيه؟
ولا من أوجاع
ولا شوق لمتاع
ده انا عمري إن ضاع
مش ابكي عليه
أبدا يا طبيب
يا طبيب ده انا جرحي ملوعني
وساقيني الحنضل من كاسي
والنار في ضلوعي بتلسعني
وأنا لسه صغار
والعيا قاسي
ولا عمر الليل مرة سمعني
عليت الآه على أنفاسي
أبدا يا طبيب

لكن يا طبيب أنا بابكي صحيح
وباقول الآه
زي المجاريح
ودموعي في عيني بتتألم
وبتتكلم
على قلب جريح
مسكين
كان أمله يحب سنين
ويلم الحب ف عشه اتنين
واتهنى معاه
وإن قال الآه
أنا اقول له يا روح القلب
آهين
بس أنا لا بيدي
ولا بودي
دا قدر مقسوم
قدر لحبيبي يعيش بعدي
في الهوى محروم
أهودا اللي وجعني
وخلاني
حطيت الشكوى على لساني
إنما وحياة اللي قاسيته
وحياة الأمل اللي بنيته
وحياة القلب اللي جرحته
ولا فرحت معاه
ولا هنيته
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب
***
وينام الصوت
والكون حواليه
ساكن نعسان
وكأنه مات
رمي تقله عليه
سكت العيان
***
الكاس له ناس
والليل مجالات
والحان مليان والناس مزاجات
ومجال الكاس
أشكال أجناس
مليان حواديت
مليان روايات
***
ونزور في الليل دنيا الخمار
ونلاقي الكاس
ع الناس دوّار
ويموت الليل على باب الحال
حيخش ازاي والدنيا نهار
ونفوس وقلوب كده ع المكشوف
عريانه تمام
وتعالي نشوف
***
شوف دا اللي هناك
قدامه كاسين
مع إنه لوحده
ما هوش اتنين
والناس بيبصوا
ومش فاهمين الكاس دا لمين
والكاس دا لمين
أهودا اللي بنظرة عين
شبكوه
وفاتوله الكاس مليان
وفاتوه
وحكايته طويلة
وهمه تقيل
وح اقول لك إيه وأعيد لك إيه
رايح يملا عيونه بحلم جميل
بياع السهد ملا له عينه
***
وترن ف جوالحان
ألحان
نشوانه تخلي المولد هس
وغزاله بتتغزل ف حصان
بتقول له
احبك أنت وبس
ويفز هنا سيدنا المنظور
ويطب الكاس ف إديه
مكسور
ويقول غشاشه
حتلعب بيك
ويرد التاني عليه بفتور:
طب وانت مزعل نفسك ليه
حشري وسخيف
وح قولك إيه
ومانولي يقول
” موش أندك خق”
والسامر يضحك لما يطق
ويحط الحشري عنيه
في الأرض
وكأنه لحن في الدين
والفرض
ويقوم
يطوح مرة يمين
ويميل زي البخت شمال
وف جوف الليل
يغرق مسكين
لا يغير حال
ولا يشغل بال
***
الحظ حمار
من غير حمّار فقد التمييز
زي المجانين
هجر البساتين سكن الدهاليز
والحظ بطبع غباوته عنيد
ودماغه حديد
لو يعند حتى على الغزلان
ينسخطوا معيز
ونسيب دهليز
نخش في باب
ونعدي الباب ندخل سرداب
ونلاقي ضحايا الليل واقفين
والحظ بيلعب بالأعصاب
ترابيزة عليها نمر بنظام
من واحد يمكن لما لألف
والدنيا بزيّ ما هي تمام
على هيئة كورة
تدور وتلف
وشنب مفتول
يصرخ ويقول
اللقمة بتنده أكّالها
والرزق نصيب
والدنيا دايرة
ف احولها
زي المجاذيب
الصبح معاك
والظهر عليك
والحظ لو ادى
ما بينقيش
جربها
ويمكن لو تديك
من جودك برضه
ما تحرمنش
قرب قرب
جرب جرب
ودي لعبة حظ
ما فيش تبكيش
***
والكورة تدور
زي المقدور
تحرن على ناس
وتجامل ناس
والشيخ سلمون شعبان مندور
واقف على أعصابه ومحتاس
يعلب ع الستة
الخمسة تصيب
ينقل ع الخمسة
الخمسة
تخيب
وخلاص الحظ اداله قفاه
والحظ أن ولى
بيبقى عجيب
كلها ساعتين
وصريخ
سلمون لعلع مقامات
نهاوند  وسيكا  ورست وصبا
وحجاز وبيات
يا  خراب البيت
يا فلوس الناس
يا نهار مشوم
طب المسكين من طوله ورفص
يظهر مات
والناس ملهيه ف أحوالها
بيدوسوا عليه
وبتاع الكورة مشغلها
ح يبطل ليه
واللقمة بتنده أكلها
طب ودا كل إيه؟
***
الشارع نايم تحت جناح الليل همدان
وعيون النور
تعبانه بتنعس ع العمدان
والكون ملفوف
بعباية
نسجها الليل بالخوف
وف بحر الضلمة رأيت على بعد
شبح
حققت بعيني
لقتها يمامة وكاسرة الطوق
كرابيج الليل
ناقشينها جراح
من تحت لفوق
والأسى ف عينها
مصحي الشكوى تقول حواديت
حواديت
ما لهاش علاقات بالشوق
وليالي الشوق
مسيت
ورميت على الحلو سلام
قالت سلامين
أنا قلت لوحدك ليه يا حمام
ووليفك فين
مالك بالليل والويل و الرعب
خليك يا حمام
عيش للحب
شالت بجناح
حطت بجناح
ورتني جراح
تحت الجناحين
وقالت لي
زمان الحب ما راح
وبقي لنا سنين في الليل تايهين
خد مني الليل
واداني الليل
ورميت له الغالي بسعر زهيد
وسقاني الشهد ودقت الويل
وكساني حرير ولبست حديد
وعرفت الناس من الراس للديل
وآمنت بأن الكل عبيد
وقالتها وطارت في ثواني
وانا شارد وخيالي يصور
وغمزني الفجر وصحاني
ولقيت الكون بادي ينور
وصحيت من غفوة سرحاني
على صوت بيقول
الله أكبر

قصيدة الليل - أحمد فؤاد نجم

To Breaking bad, to you Mr. White

شعر/ أمل دنقل : من أوراق أبي نواس "الورقة السادسة" ، علي طالباب: الكمال
أفلام/ الإرهاب والكباب
مسلسلات/ باب الخلق
أغاني/ ريم بنا: المغني ، فرقة ابن عربي: سلبت ليلى ، أم كلثوم: أمل حياتي ، جوليا بطرس: يوما ما ، بلاك تيما: افلت زمام
موسيقى/ ياسر عبد الرحمن: حكايات الغريب ، Dave Porter: Breaking bad theme

مَزْجٌ ثَالِثٌ - اخْتِلالٌ

مصطفى إبراهيم ، تفرانيل 50&100 . 

تفرانيل 100

انا شعرى غامق
بس قلبى مطقطق ابيض من زمان
جايز عشان
الناس ساعات بتلاقى ناس
تعرف تشوفها بجد
و انا قلبى لسه عمره ما اتكشف ع حد
بقابل اد ما اقابل
و افارق اد ما افارق
و ما اتعلمش
بلخبط ف الاسامى عشان
بخاف انسى
بلخبط ف الدنيا عشان
بخاف لا ما اعيشش
بقالى كتير ما بتكلمش
بخاف يبقى الكلام متعاد
ما كملتش ف اى رحيل
ما كملتش ف اى قعاد
و بدى للحياة بالكاد
ما يكفيها
و يكفينى
شرور البهدلة فيها
مليش ف البنت طلبات غير
تنسينى اللى قبليها
و بدخل ف حاجات تخاطيف
و عينى ع اللى بعديها
رقصت كتير ع السلم
بخاف اطلع
و اخاف من الارض
- اكيد الخوف مش الفكرة
و حتى يا ستى يعنى بفرض
اكيد الخوف مهواش عيب
طبيعى الناس تخاف من الغيب
و من المقدور
برغم كدة
بحب الضلمة اكتر ما بحب النور
ساعات بتمنى شقة ف برج شايفة النيل
و اوقات انى اعيش مستور
و بزهد .. ف كل ما ف الرحلة من زخرف
و ما زهدهاش
ما دام فيها رمق يتعاش
اكيد ف الرحلة يوم متحاش
و مستنى اعدى عليه
- و تعرف عنه اصلا اية ؟
مفيش غير انه لسه مجاش
بنام ؟
طبعا .. كتير جدا
و بالايام
و طول الوقت بحلم ان انا بجرى
و بشبع من الحاجات بدرى
و رغم كدة لسه ما شبعتش
من الجرى و من الاحلام
بخاف من الموت
عشان خايف ساعتها اكون
عبيط .. كل اللى سيبته كلام
بشوف افلام
عن الدنيا
و عن حكايات
لناس عاشت حاجات تانية
و عن حكايات لناس ماعاشوش
و بتأثر
و بتحسر
ع كل اللى كان ممكن
اكونه
بس ما بقيتهوش
ما سبتش شئ مجربتوش
ولا جربته و ما سبتوش
بحب العود
و احب الناى
و اموت و اعرف حقيقى ازاى
حاجات من دى
ساعات بتدب فيها الروح
من اللمس و من الانفاس
فتبقى حية اكتر من البشر و الناس
مفيش احساس
لحسن الحظ و لسوئه
ما بيعديش
مفيش ولا طعم حاجة من اللى بتدوقه
مسيره يعيش
بحلوه و بمره كله بيتسخط لمفيش
يا سبحان اللى بيعودنا ع الحاجة
فننساها
و بيخفف كاسات الناس
بميه بدال ما يملاها
عشان طعم اللى فيها يروح
عشان طعم اللى فيها يخف
يقولوا مجازا المجروح
اذا خد ع الوجع .. بيخف
تلف عليه سواقى الكون
تدوب اللى فات
ف الجاى
ف سبحانه اما قال
منها جعلنا
( كل شئ حى )
زمان فيه حد علمنا
ف درس الدين
دعاء بيقول :
يا خالق كل شئ ناقص .. كمالته معاك
يا شايل من الحاجات حتة .. بنترجاك
بحق المشهد الكامل
و اسمك اللى انا عرفته
تسيب اللى يكفينا
و تكفينا بما سبته
ما تحوجناش
لجاى مجاش
و ترضينا بما جبته
و ندعى وراه بصوت عالى
يرج الفصل رج خفيف
و اكمل دعوتى ف سرى
( و ترحم قلبى ف شيبته )
كما تدعو الفروع الاصل
دعوتها
ف كل خريف”

تفرانيل 50

أنا بفضل دايما للآخر
 
 
ف جيمات الكونكان والشايب
 
 
و ف كشف الحاضر والغايب
 
 
وف حجز شقق مصيف بلطيم
 
 
أنا آخر تايب في اصحابي
 
 
وآخرهم ف الصلا ف التسليم
 
 
وف دور المدرسه في التطعيم
 
 
وفي وقت السين
 
 
أنا آخر جيم
 
 
أنا جرح قديم...كان متغطي
 
 
إكمني مشتي ولابس كم
 
 
سبتني الدنيا بستين أم
 
 
وسبتلها ميت مِلّه ودين
 
 
ولحد ماتميت ست سنين
 
 
أنا كنت بحب البني آدمين
 
 
وكرهت الناس من بعديها
 
 
علشان نسّوني أنا أصلاً مين
 
 
مش فاكر إمتى حقيقي بدأت
 
 
إنما فيه فتره فاكرها طشاش
 
 
كان فنجان قهوتي مابيفضاش
 
 
وبكلم ربنا طول الوقت
 
 
عمري ماصدقت بنات غير ريم
 
 
ويمكن دلوقتي ما اصدقهاش
 
 
آخر مره
 
 
شفتها فيها
 
 
 
كانت تقريبا بتعزل
 
 
و كان فيه سواق تاكسي منزل
 
 
ف شنط ناس حتحل مكانها
 
 
ووشوش بني آدمين معرفهاش
 
 
أنا ريم يمكن كانت قدي
 
 
أيامها... لكن دلوقتي أصغر
 
 
عارفه إن أنا يوميا بكبر ؟
 
 
وبعجز إكمني مابنساش
 
 
أنا فاكر أيام بالميللي
 
 
أنا فاكر أيام بالتفصيل
 
 
أنا فاكر يوم دفنة أختي
 
 
حتصدقي..؟ أكتر مافاكرها
 
 
وساعات بنسي ف ليله كبيرها
 
 
أنا فاكر شقة قصرالنيل
 
 
ومش فاكر حد من السكان
 
 
من صغري وعمري مابنسي مكان
 
 
أنا أصلاً فاكر بيت شادي
 
 
مع إني مازورتوش غير مره
 
 
بأمارة فيه برواز بره
 
 
كان جواه صورته ف إعدادي
 
 
كان لسه ساعتها طالعله شنب
 
 
ونا حاسس إني طلعلي أتب
 
 
من تقل الشيله و م التفكير
 
 
معلش أنا آسف برغي كتير
 
 
وبسف ف وقتك وف وقتي
 
 
أنا حاسس بدماغي بتتقل
 
 
أنا نفسي أنام
 
 
أنا عاوز أروّح دلوقتي
 
 
متشكر جداً ع الجلسه
 
 
حنكمل إمتى علاج طيب ؟
 
 
لازم حنشوف بعض قريب
 
 
أنا ماشي...
 
 
سلام

مصطفى إبراهيم ، تفرانيل 100 ، تفرانيل 50 .

Sandy - Ahla Min Elvanilla \ ساندي - أحلي من الفانيليا

العادات السبع للناس الأكثر فاعلية لستيفن كوفي

أنشودة الحروف (الف ارنب يجري يلعب)

الحب الكامل ولو لمدة دقيقة واحدة .. هو اللي بيحسسنا في لحظة النهاية إن قد إيه كانت الحياة حلوة..حلوة بجد

هيبتا|٧

ياليت قاضى الحب يحكم بيننا وداعى الهوى لما دعانى دعاكم.
Photo by: Beshoy Naeem.

Sound Tracks.
1- الموسيقى التصويرية لفيلم ابراهيم الأبيض
2- مقتطفات من حديث الشيخ الشعراوى عن الصوفية
3-تصاعد أنفاسى اليك عتاب
4-أسلمت وجهى
5-Gregorians _ L'Ensemble Al Kindi - دائرة النشوة
6-ليالي - الشيخ أحمد برين
7-دهشان - أصابك عشق
8-أول ما كتب القلم - العربى البلبيسى
9- ياسين التهامى - أكاد من فرط الجمال

.طوفى بى

الله يامولانا ديما بشار ديمة محمد طيور الجنة 2011

النص دة عني - أميرة البيلي من حفل ساقية الصاوي

.إجلس علي مقعدك واسترخٍ قليلآ
My account : https://www.facebook.com/khaled.eid.2014

مدينة الأشباح

عمرو حسن  خلينا صحاب

احنا ولاد الكلب الشعب - عبد الرحمن الأبنودى

باودّعكم 
وانا معكُم
وبطلب تسمعوا شوية
 انا طول عمري باسمعكم 
بقلب يجوز يزعّلكم 
لكن عمره ما يخدعكم 
بودّعكم 
واودّع كل ما بيننا 
وكافة ما رأت عيني 
فمن كان منّكم ضدي 
وعاش معاديني وآذيني 
فماتمناش يودعّني ولا ببكاه يصدّعكم
ومن كان له ف قلبي نصيب
فهذا حبيب 
وحاوطوا دعاه بأسماعكم 

وأما بعد 

فهذا ما رأيت اليوم
ف ساعة نوم 
صحيت منها بعين أوسع وبال مرتاح 
أنا هاخرج من المشهد بنفس دخولي وانا عريان 
وأكبر حلم حققته مروري ف الغابات انسان 
لا يدّي كسّرت شباك 
ولا قدمي ف يوم خطت على جثه 
دخلت المدرسة الدنيا وخدت نصيبي م الحصه 
وقد الفهم والتحصيل 
قد ماكنت وغد جميل 
وديب طيّب 
بحُط دماغي آخر اليوم 
وانا مظلوم ومش ظالم 
ولو فيه حد كدّبني فيعلم ربنا العالِم 
ف عن مالي ماخدتش شيء
وعن بالي ماسيبتش شيء
وعن وقتي 
فانا ولحد دلوقتي مخلص مُجمله ع الناس 
زهدت ف كل شيء فيها 
وعشت حياتي بلاغيها 
واصاحب كل بلاويها وأقول معلش 
مانابنيش من بياض القلب 
غير تجاعيد نَمِت ع الوش 
ودُقت ف دربها الضدين 
من الكافيار لحد المش 
وعدِت رجلي ف دروبها 
خفيفه وقابله مكتوبها 
ومرت روحي جواها متاهة تودي لمتاهة 
وأقول دنيا ومتكلمش 
نهاية الدنيا ابسط من وقوع الرمش 
وكل اللي اتحكى عني كلام باطل 
انا دلوقتي ف مساحة ملفش فيها ولا اماطل 
كلامي زي ماهو بدون تذويق
واي كلام ماقولتوش يعتبر تلفيق

ف أوصيكم 
تمر جنازتي من ناحية ما انا مرّيت 
وترمولي السلام ع البيت 
وماتخلوش صحابي يتعبوا ف المشي 
كفاية سيبتهم هما هناك ومشيت
وأما الدمع لو ليّن 
ف هيّن واتركوه ينساب 
واما لو بُكا عالي فحاسبوا وسطكم كدّاب 
وعلى قبري دقيقة صمت 
وتدعولي بأن يشفعلي ما أصلحت لما أجرمت 
تلاتة يمشوا ف وداعي بقلب سليم 
يزيدوا عن الاف يمشوا بكدب عظيم 
وراعوا وسطكم واحدة ف شالها ريحتي وغيابي 
وشاوروا لأمي على بابي وقولوا البار 
وحاوطوا القبر بالياسمين مش الصبّار 
ومروا في هدوء بيليق على المشهد 

وأوصيكم 
عيون كلبي ماتدمعشي
وعصافيري ماتسمعشي كلام عن موت 
وأوصيكم توطّوا الصوت ف وقت الحزن 
وتسقوا زرعة النعناع لحد الريحة ماتحاوط نواحي البيت
وحاجتي تتقسم بالعدل ع الأصحاب 
موبايلي يتكسر ف وجود تلاتة شهود 
ومش عاوز ف يوم حفلة بكا وتأبين 
هتلقوا فيه ناس ومش عارفين بينعوا ف مين
وهتلاقوا اللي قتلوني بيبكوني على الشاشة
ف شاوروا ع اللي كان منّي وقولوا ده حق
وشاوروا ع اللي جاي يكدب وقولوا ده لأ
أنا جيت الحياة لوحدي 
وماشي منها لوحدي 
وأصحابي اللي عاشروني يادوب كام فرد 
فمش هبلع كمان الكدب تحت الأرض
وف عزايا اذا حبيتوا تتقابلوا 
فياخد دمعتي صاحبي ف بدء الصف 
وهتحسّوه لوحديكم ف بسط الكف 
وهتبصوا ف عنيه تلاقوه بيسند نفسه م الوقعه 
وقلبه السخن هيخلي ايديه ساقعه
ف مروا عليه وبصوا ف عينه تلاقوني 

وأوصيكم 
ف ساعة ماتركتوني تقولوا سلام 
ما احبش ف الختام اترك دموع والآم
وتنقلوا اسفي للناس اللي طيبة قلبي جرحتهم 
وتعتذروا لادويتي اللي ايدي بعنف فتحتهم 
وتضحكوا وقت ما اجيلكم ف يوم ع البال 
انا فايت ورايا خيال يساع الأرض ويساعكم 
باودّعكم

سلام ياصحاب 
سلام يابيوت
ياخطاوي 
معدتش اضايق العالم بازعاجي 
ورايح يعني مش هاجي
ومش هاخلف معاد مع حد بمزاجي 
ومش هاقضي الحياه تبرير ف شيء ماحصلش 
ومش هدوش جيراني بصوت اغانيّا 
ومش هازعج مسايا بطول لياليّا
ومش هاهلك جزم تانيه ولا قمصان 
ومش هاخرج وانا مبسوط 
ومش هارجع وانا قرفان 
اديني رحمتكم مني 
ومن زّني
ياريت وانتوا بعيد عني تحسوا بفرق للأحسن 
وانا احسن 
ومرتاح ف الغياب وسعيد 
لكن يوجعني ان فيه ناس هتبقى بعيد 
واخر القول 
باوصيّكم 
بلاش تفترضوا سوء الظن مع غيري 
يجوز غيري بسيط زيي 
وحاصرينه ف دور شرير وهو بجد أجدعكم
بلاش نفس الغلط تاني 
أذاكم حلّى موتي عن الحياة معكم 

وخلاني وانا بينكم أودعكم 

بوّدعكم

#الوصية

قصيدة الوصيه عمرو حسن لاول مرة

جالسٌ هو على مقعدٍ خشبيّ بالمقهىٰ
مُتكِئًا على دُخَانِ سجائِرِهِ التي تهوِي به إلى اللا شيءِ
ينظرُ إلى المشاةِ العابرينَ متسائلًا ..
تُرىٰ هلْ يقومونَ بِعَدّ خطواتِهِم ، أو ينتبهونَ لِما تساقطَ منهم من ذكرياتٍ تناسوها ، لكنها أبكت حجارةَ الرصيفِ ؟!
يُشعِلُ سيجارةً ثم يقولُ إلى ذاتهِ المثكولةِ :
ليتني كعمودِ الإنارةِ ذاكَ ، لا يخيفُني الليلُ ولا تزعجني شمسُ الصباحِ ...

مُعتكِفةٌ هي في محرابِ حزنِها
تصلي صلاةَ الغيابِ
مارةٌ على دروبِ أيامِها الماضيةِ 
ناظرةٌ إلى إنعكاسِ صورتِها بالمرآةِ
فتبتسمُ و قد فرَّت دمعةٌ من عينيْها قائلةً :
كم تغيرتِ يا أنا ؟!
فتفتحُ شِباكَها ناظرةً على خيبتِها متسائلةً ...
تُرىٰ هل أكونُ قويةً يومًا كعمودِ الإنارةِ البعيدِ
لا يهمني بردُ الشتاءِ ، ولا تحرقني حرارةُ الصيفِ ؟! 

ينظرُ هو إلى شِباكِها خِلسةً و يقولُ :
ماذا لو كنتُ كالفتاةِ الجميلةِ تلكَ
ماذا سيشغَلُني سِوى جديلَتي التي تداعبُ جبينَ الليلِ فينامُ و أنامُ ؟!
تنظُرُ هي إلي دُخانِ سجائرِهِ خِلسةً و تقولُ :
لو كُنتُ كالشابِّ الوسيمِ هناكَ ماذا سيشغَلُني
سِوى مطاردةِ الليلِ و فتاةٍ تُنسيني التي قبلَها ؟!
يَلمحُها و تلمحُه فَيُبصرانِ عَبْرَةً تلألأتْ في عينِ كلٍ منهما
حينَ مرتْ نجمةٌ عابرةٌ في السماءِ
يبتسمانِ على خيبتِهما و يرددانِ :
" ليتنا كَـ عمودِ الإنارةِ الوحيدِ "

أما أنا ، كُنتُ غارقًا في اللاشيءِ كالشابِ
و تحيطُني هالةُ الخيبةِ كالفتاةِ،
مَحنِيَّ العُنقِ أراقبُ الذكرياتِ التي أبكتْ الأرصفةَ
حين سقطْتُ من المارينَ سهوًا
فأنطفئُ و أخِّرُ على الأرضِ هامدًا
لَربما يدركانِ أن الأشياءَ تموتُ كما البشرِ
و أنهما لم يحسداني على شيءٍ
سِوىٰ أنني :
" عمودُ الإنارةِ الوحيدِ

عمود الإنارة الوحيد لـ " احمد سالم " | سماء الأشقر

ستظهرُ أجنحةُ روحي يوماً ما.. 🦋"

عمود الإنارة الوحيد لـ " احمد سالم " | سماء الأشقر

Sama Alashkar