الكلماااات تحفة فعلا فنان مبدع ,,, بس الاداء مش لايق خالص

لا عااش انا لاقته بالصدفه بس جامد 

واه يا عبد الودود 
يا رابص ع الحدود
و محافظ ع النظام
كيفك يا واد صحيح
عسى الله تكون مليح
و راقب للامام
امك ع تدعى ليك
و ع تسلم عليك
وتقول بعد السلام
خليك جدع لابوك
ليقولوا منين جابوك
و يمسخوا الكلام
واه يا عبد الودود
ع اقولك وانت خابر
كل القضيه عاد
ولسه دم خيك ما شرباش التراب
حسك عينك تزحزح يدك عن الزناد
خليك يا عبده راصد لساعة الحساب
آن الآوان يا ولدى ما عاد الا المعاد
تنفض الشركه واصل
وينزاحو الكلاب
ان كنت واد لابوك
تجيبلى تار اخوك
و الاهل يبلغوك جميعا السلام
واه يا عبد الودود
كيفك وكيف زمايلك عسى الله طيبين
خالك زناتى جاى لك ضمن المطوعين
واختك تطلع يوماتى ع المستشفى القديمه
حاكم ع يمرنوها فى العركه تكون حكيمه
و محمدين موافى يتعلم المطافى
و يقولك شد عزمك ويقول لك العوافى
من هنا القرايب والعيله والعيال
بيبلغوك سلامهم ولتمة الرجال
وآخر الكلام نقولك فى الختام
الله يصون بلدنا ويحرص السلام
والدك حسن محارب
غفير برج الحمام

واه يا عبد الودود _مريم صالح

3li_elshamy_مزيج الأرواح

مايكل عادل - فوبيا الأمل


أجزاء من العرض المسرحى ..... "1980 و انت طالع "

عمل مسرحى شبابى ..... عن جيل التمانينات و انت طالع .... أحلامهم ... آمالهم ...ضحكهم ...واقعهم ... ... عرض يمثلنى و يمثلك إذا كنت موجود الآن فى بلد عربى .... خاصة مصر 


تأليف وحوار : محمود جمال
إخراج : محمد جبر

 تابع أخبار العرض  ......

https://www.facebook.com/1980wtale3

https://www.youtube.com/channel/UC8HQjOsdv5nwxjfJmbMBppw/feed

أنا كمان حاسس إنى كبرت

كلمات : نبيل عبد الحميد 
أداء صوتى :كريم قاسم سرور 
--------------------------
ساب المُنشار
دق المسمار
بَص على زبُونُه
متردد
ينطق أو يسكُت
محتار ..
- أؤمُر
- شُكراً
- ترابيزه / دولاب ؟
- لا أبداً .. أنا عايز باب ..
جربت كتير أبواب لكن
ولا واحد كان نافع بيننا ..
و إن جِه مظبوط لازم برضُه
في الآخر يطلع فيه سِنّه ..
لو كنا واربنا الباب يمكن
كان يفضل م الهوا سرسوب ..
كان ممكن أتوب ..
كان ممكن يبقى المكتوب
إن إحنا نحافظ على بابنا ..
كان ممكن نتعب
و نكمّل
و هنوصل
على أد تعبنا ..
سرسوب الهوا قَفَلُه و سابنا
إتنين و مابينهم
باب مقفول ..
أنا يعني بقول
لو ينفع أجرّب باب تاني
يفتح على كل اللي ما بيننا
لو حتى هيطلع فيه سِنّه
وانا هقفل و افتح بحساب ..
- كان نفسي أساعدك صدقني
أنا آسف
كان آخر باب ...

آخر باب

سنتين كده | شادي محمد

قصيدة  " الدنـ.. " 
من ديوان #الزمن للشاعر مصطفي ابراهيم..
أداء صوتي :- احمد الدرواني

الكلمات :-
____________

يمكن عينيه زاغوا
أو رجع خطوة
أو بلع ريقه
قبل ما ينط في طريقه
من فوق سطوح مبناهم العالي
للشارع الخالي
طاير وقلبه بيدق ف ودانه
ويرد ف وداني
كأني سامع كل شيء
بيقوله ف دماغه
في رحلة الأربع ثواني
في مشوار السقوط الحر
جايز تكون الذاكرة
فجأة هتتفرد قدامه
ويقدر يشوف
كل اللي كان مش شايفه أيامه
من بين جفونه في لحظة واحدة يمر
مختل؟
يمكن يكون مختل
كئيب؟
مش شرط يبقى كئيب
جايز يكون زهقان
م الليالي اللي تشبه بعضها
ومن كل شيء متعاد
م الكلام والناس والعقل والمعقول
قرر ف لحظة يقلب العدَّاد
وينط في المجهول
جايز يكون بيقول
يا عم يا متأكد.. سيبني براحتي أظن
خليني أغيب
خليني أشوف الدنيا بعيون الغريب
خليني أغيب
خليني أشوف الدُّنـ...

قصيدة الدنـ.. من ديوان الزمن مصطفي ابراهيم

الابنودي ملعون ابوها الحمامه ام غصن زتون

لو كنتي مكاني الساعة اتنين..
كان شغفِك دفعِك تقريني
كنتي هتتحايلي علىٰ الفُرقة
تقوليلها بلاش كسُّم هزار
الفُرقة هتضحك بإستغراب
مش شايفة إزاي والدنيا نهار؟
دا غباء بيِّن
الجو اتڤيرس وسطيكم
ودا مش هيِّن
فيه حكمة كمان تمنع شخصين
يتجانسوا فـ مِجرة بعض سواء
رَبِك من كرمُه بيبسطنا
وبيبعدنا..
وبحكمة بيكسر مُشتاق
كنتي هتتمني اتمناكي
وأبص فـ عينِك بإستحياء
إزاي إزاي..
اوصفلِك
وضعِك
وثباتِك
وانا رايح جاي؟
عجلة اتوبيس
مندوب توصيل
ملَّاكي وأجرة ونقل تقيل
كيلة وكيَّال مابيتهزش
لكن بيلين.. يُدرك بهدوء
إزاي -الفوق- يطلع فوقُه
مش عدل يا روء
إزاي اتخطيتي غرامي
مش برضه حرام
إزاي اتخطيتي جرامي
بتلاتة جرام
أبهرتك حتى فـ إجرامي
شوفتي الإجرام؟

عدِّلتي البوصلة وخدتي قرار
والسعي لفكرة الإستقرار
وبقيتي اهو..
شغالة في شركة اتناشر ساعة بكام ملطوش
بتنامي بسرعة من الإرهاق والإلتزامات
جمعية فـ جمعية وناقصِك حبة كراتين
مع واحد خَد حرفين مِنك ولحمها بـ تين
والتين بيشوِّك يا عينيا والشوق غربال
حُبك مش ذنب ولو كاهن هارفع كرابين
و -رو تين- الكلمة اما بيطلع بيساوي كتير
والكلمة اللي بتطلع مني بتاخدك وتطير
عجِّزتي وشيلتي حمول أتقل من نبح منير
من غير تبرير مقري عليكي الفاتحة ولسا
محتاج الحضن إللي فـ حضنُه
مش قادر أشدك تبقيلي ومش عارف أغير
سبحان الله..
راحت بنوتة بتوكة شَعر
وبقيتي رجولة وسدادة
مع شخص مُناسب بالأوراق
مش واحد دايخ على روحه فـ قسم الورَّاق
خلصت عليكي ديوان كامل
خلصتي عليا كيسين مناديل
خربشتِّك قَصد وسيبت دليل
خلصتي عليا بشكل جميل
وفضلت أشرب من عيني يا ليل
أشرب من أشرف، نفس الشيء
وفضلت أصرُخ، إزاي إزاي
خلصت العمر وسعيي بطيء
علشان أوقات مباحبش حد
وساعات باحسم وباسن الحد
(الحد، إتحد، في يوم الحد)
احا يا جدعان..
دا مجاز باين ولا شغل جنان
فرط النشوة لما كنت
أبوسها فـ غفلة وهي بتبتسم
تقفل عينيها
فرض الغفلة المُفزعة
أمد إيدي بنية المواساة
يخبط صُباعي فـ حد تاني معاه
واحضن دبلة فـ إيديها.

شخص مناسب بالأوراق

- م -
 
ماسبيرو أخطر م الرصاص والقصر
 ملّى عنيك بالدم.. قبل الطلوع قدام
 ما تسيبش جيشك تِقسمه الأعلام
 مش كل مين جنبك.. جواه بيهتف مصر
 
- ا -
 
الوقفة جنب النار.. بتقلل الدخان
 إهتف هتاف إبن المكان والظرف
 إضرب بعزمك.. أو ما تضربشي
 إرجع بضهرك.. أو ما تهربشي
 إمسك عصاية ثورتك م الطرف
 التاريخ ضمن الغنايم.. وبيكتبه الكسبان
 
ـ ن ـ
 
نقى دايماً طوب صغير حدفتك توصل بعيد
 نفترق ساعة المطاردات.. أربعات
 نشّن الباراشوت ناحية الصف العريض
 نجرى فجأة.. نردّ فجأة.. نص قوتنا المفاجأة
 ندّم اللى يعورك.. وإقطعله إيد
 
ـ ي ـ
 
يؤتَى الحِذر من مكمنُه
 يأتي الغبي باللص ثم يحلّفه
 يؤتَى الهتاف.. رَّجاً بمن يَهتِفه
 يؤتَى الجدع.. قلبا بما إتجَدعنُه
 
ـ ف ـ
 
فّرق ما بين الجرأة والقلب الحديد... والرمي جوا التهلكة
 فتش بإيد ع المستفيد.. وبإيد عن الصاحب الجدع
 فتّح إذا الناس غمضت.. غمّض إذا نظرك خدع
 فرّغ عياطك ع الصحاب.. دم وخميرة.. مش بكا
 
ـ س ـ
 
سمّي الحاجات دى باسمها.. الكدب.. والخوف... والخيانة
 سجادة المسامير.. تتحط ع الناصية.. غطّيها بالدخان.. ولّع قصادها كاوتش
 سدّ الطريق لورا علشان ما تترددش
 سيب باب لجيشهم يهربوا منه
 سلّم رايات الحلم لحد من سِنُّه
 سلّم قراركو لأكتر كفّ عرقانة
 
ـ ت ـ
 
تبّت يدا من ساب رفاق المعركة بطولهم
 تمن القضية اللي اندفع مبقاش يجوز يرجع
 تتعب تبص ف عين.. اصحابك الطايرة.. شوف مين من الآخر دفع.. لو زيهم.. إدفع
 تلت الرصاص نحو العدو.. تلتينه للخاين.. الطعنة جاية من هنا مش من هناك
 تعب النهار دة غير تعب بكرة.. الوقت مش دايما معاك
 تحتك فيه ناس عاوزة الأمل.. مش عاوزه؟.. سيبهولهم
 
ـ و ـ
 
وسّع الجبهة لو انتوا كتير.. وضّيقها لو إنتوا أقل
 ولع شماريخ وسطكوا أول ما تلقى الرتم قل
 وقّع لمض كل العواميد اللي كاشفة ناحيتك
 وّدي الإعاشة قبل ما تدوق لقمتك
 وجّب مع السكان وأهل المنطقة..
 حتى لو فاهمين غلط.. فيه ناس كتير متلخبطة..
 إكسب عدد.. وإكسب غطا
 وزع عيونك فوق وتحت.. وخاف من اللي يصوّرك
 وطّى وعينك باصّة فوق ع الطوب وإلا يعوّرك
 وقّف إذا سحبوك على شارع طويل
 وفّر بديل
 وافق على الهدنة إذا سحبوا الكلاب
 لو سابوا خليك انتا آخر حد ساب
 واحد بيفرق ف العدد جدا
 وعشان كده..
 أول ما تلقى إن الصفوف ناقصاك..
 وسّع مكانك... للي جاى وراك
 


المانيفستو - مصطفى ابراهيم

رممت شرخي..
وبمنتهى الفخر اللي نابع من إيمان شاعر بقضية الإنسان
بكيت.
أنا ما انتهاش حزني..
رممت شرخي بابتسامة وحزني مدفون تحت منه
وبقيت باقول وشفايفي مرسومة: حزني انتهي
مع إني مدرك إن أنا لوحدي يا حزني إللي انتهيت

تعرفني؟
مريت بشيء عدّى في خيالي وجعلي قلبي؟
جربت تهرب من مكان فوصلتله؟
وكرهت شيء أهلك مشاعرك كلها واستنزفك..
ومرّ بيك العمر وبقيت تعمله؟

(أهملت قلبي..
وأنا قلبي أجمل من قلوبهم كلهم..
ما كانش -أبدًا- يستحق إني اهمله)

الدنيا غير الدنيا دلوقتي
حواليا ناس غير اللي انا اختارتهم
كل اللي أنا اختارتهم ناسيين ملامحهم في قلبي
بيعيشوا دلوقتي بملامح غير
وحقيقي كتّر خير الدنيا على شرّها
علّمني شر الدنيا فعل الخير

بين إللي كنته وإللي لسه هاكونه
بيبص عقلي لقلبي في عيونه
ويقول له: شوفت!

(نظرة واحدة في عيني تفضح حجم خوفي)

وأنا قلبي شاف..
أكتر كتير م إللي أنت هتشوفه في عينيا

صعبان عليك؟
أقولّك الأقسى..
أنا كل يوم باصعب عليّا



#أحمد_الراوي





آخر باب

Kareem Qasem

Recent comments

mostafa sharaf

Nano Badie

Yahia Ibrahim

Sara Messallam

Related tracks