في ليلة غير كل الليالي
 هتعيش فاكرها مهما قلت نسيت
 هتخبط الايد الغريبة بچنتلة ع الباب 
وهيدخل الضيف الودود ...
 شایل ما بينكوا الكلفة و العيب والحدود .. 
يقعد معاك ع الأكل ..
 زي اللي طول عمرهم أحباب 
وحبة حبة هيبقى عنده مکان 
في كل اوضة وعنده ريحة وشكل
 هتسيب ايديه علامات .. 
فوق الستائر والحيطان والعفش
 مرة في علامة مكان دماغه على المخدة
 مرة تانية في ريحة جوا الفرش 
حتى مكتبتك حبيبتك
 اللي انت دخت تلم فيها سنين
 هتبقى شبهه
 وذوقها من ذوقه
 حتى الصور .. 
كل حيط في البيت هيغير البراويز .. 
المتعلقين فوقه 
وهتراقبك عيون تانيين
 هتراقب عاداتك
 و قلبات موداتك
 وشكلك في المتاهة وانت هایم 
بين حيطان الدنيا وأحضانها 
كل ريحة هتختلف
 حتي صوت الدوشة جوه البيت 
في ليلة غير كل الليالي 
هتعيش فاكرها مهما قلت نسيت 
اللي شقلبلك حياتك .. 
وقاسمك الأيام .. 
وقاسمك الأحلام .. 
وقاسمك العالم بأفراحه وأحزانه 
هيمشي فجأة بدون کلام 
من غير ما حتى يقول سلام 
و كأن كله كان خيال
 لا عمره كان 
ولا الليالي عمرهم كانوا
 في الوقت ده .. 
لازم ترتب البيت من جديد 
وكل شيء يرجع مكانه
 تنضف الحيطة
 تغير الاقفال
 تكسر البراويز 
وتكسر وياها الاماني
 وتكنس كل حاجة
 وتمشي زي الحياة لقدام 
وتبدأ حياتك من هنا .. 
من جديد تاني

نشيد للحب - ماريا ميرسيدس كاررانسا

للأيام اللي بنصحى فيها شايفين الشمس بعد وقت كبير في الضلمة و بنمد ايدينا للنور اللي في اخر النفق ومنطولهوش..
للأيام اللي بتترفع فيها كل الستاير اللي حاجبة الضوء، وتتفتح كل الشبابيك اللي مانعه الهوا ويدخل ويطير شعرنا ويحسسنا اننا لسه بنتنفس..

ونبقي ممتنين لكل حاجة..
لشعاع الشمس، لريحه الجو، حتى التراب على السور  للزرع، للطيور، للون المايه، ولصوت العصافير ..

لصوت موسيقى من الافلام اللي بنحبها، لكل الاغاني اللي بنحبها اللي بتشتغل فجأة من الراديو او من اي مكان مش معروف مصدره وتخلي كل حاجه اجمل

لعصير الليمون المفضل..
ولكوباية الشاي بالنعناع بالليل وانا ببص على قمر على امل انه زي ما بتمني من وانا صغيره يكون لسه بيوصل كل الرسايل..
لشكل السحاب والنجوم في السما..
ولضحكة ماما ولحضنها..
لكل حاجة حبيناها كأننا بنخلص حبنا ليها كأنه اخر يوم في العالم.

للايام اللي بتأكدلي اني لسه مش عايزه اموت 
وإن في حاجات اكتر في العالم محتاجه ابقا ممتنالها هي كمان مفيش سبب معين للايام دي غير انها بتيجي علشان تقولنا منموتش

وبيباركها أصوات حبايبنا  واحضانهم، اصواتهم طول الوقت وفي كل مكان
وأحضانهم علي  قد ما بنطولها..

موسيقي فيلم أحلى الأوقات

للأيام - سارة طارق

على الهامش
نزود فى الكتابة حروف 
بنسبه كل شئ ملهوف 
فيرجع كل يوم مخطوف 
وتاني نطوف 
طواف عابر سبيل للدنيا بين قلبين 
على الهامش 
بنمسح حرف فبينزف عليه سطرين
ونقسي على الحياة يمكن 
تشوف قسوتنا هي تلين 
على الهامش 
نحب بقلب مش مغشوش 
نِبِّل الروح بدون ما تبوش 
نرجع كل شئ سيبناه 
لناس مشيوا وماهتموش 
ببايع قلبي ليكو امام 
فبسرق م السطور أقلام 
نصيبي من الكتابة حروف 
بتبكي الليل بدون ما تنام 
نصيب الثورة ع الهامش 
حدود بكرة 
نصيب الصحبة ع الهامش 
بيبان ذكرى 
نصيبك انتى علي فكرة 
يضيق لو يبقي ع الهامش
على الهامش 
قوارب صيد 
وبحار يرمي كام شبكة يصيد الناس 
فى ناس الجوع بيسرقها 
فتملكهم بطُعم رخيص وشَربة كاس 
تقيدهم بأفكارك / وتجعل منها افكارهم 
تطفي بجلدهم نارك / وتنفخ جاز فى مواقدهم 
على الهامش فى ناس غيرهم 
تعيش الدنيا بالنية 
ومين لو راح ماهوش راجع 
وكل الجاي ملوش دية 
دي ناس لو ذكروا كل الكون 
هتفضل بردو منسية 
على الهامش رجال فرعون 
علي الهامش كنوز لقارون 
على الهامش بواقي سنون 
قلم مقصوف فى اخر سطر ف كتابته 
يجوز لو كان ولد ساكت 
بيسجد (ذل ) فى عبادته 
يجوز لو كان طبيب فاشل 
بيقتل أهله فى عيادته 
مكانش نفوه فى مملكته 
وكسره سنونه لكن سن 
سابوه يشهد على نهايته
على الهامش 
بواقي النيل في قلب العاشق السهران 
بنات بتميل قصاد عابد بيقرأ ورد م القران 
ومزيكة أغاني الست واخر ربع ف الفرقان 
على الهامش 
شتا وامطار 
واخر فرد جوا الزار 
واول مرة اكون درويش 
وكفري بكل شئ بقشيش 
عشان الشئ بدون مجهود 
يموت تأثيره لو هيعيش 
نصيبي من الصحاب فرقة 
نعيش العمر يوم سرقة 
ونسرق م الكلام ورقة
نسيب الكل ف المينا
نحب حاجات نعيش ليها 
لكن ماتكونش يوم لينا 
نروح لقلوب 
بتحفظ صم أسامينا 
نشيل الدمعه للفرحة 
وناس ميجرحوش فينا 
نشيل الفاس لارض عمار 
نجيب دراويش لباب الزار 
تعيش الثورة بالثوار 
وننحت بكرة بأدينا 
على الهامش حاجات اكتر
عن الاحزان هتلهينا
على الهامش مفيش هامش
على الهامش حياة انسان
بتكمل بس بالهامش 
بيحلم لو يشوف الكون 
يدور لكن على الهامش

على الهامش

بجري في جوف الحياة 
زي طفل
بياع غزل البنات ناداه
بجري على كفوف الطريق
وبتمايل كأني موج
كأني بحيرة مسحورة
في قصة بتعجب الأسماك
كأني هنا، لكني هناك
كأني الورد والشباك
كأني لعبة بعد الشغل
شاريني موظف الهيئة 
من البنت اللي تشبه حور
ولكن في الجحيم واقفة
لإبن لأول المرات
جري واستقبله بلهفة
وبجري كأني ولا مرة
مشيت لو حتى كام مللي
ولا شايف  لكدب الزمن
ولا سامع أنين ضلّي
حنينِك كُل ما فضلّي
وباشعر بالحياة علشان
تقولي عليا يوم شاعر
صحيح قلب الطريق واعر
لكنّي أعمى مش مهتم
أنا بجري كجري الصوت
كجري الخوف
كجري الموت
كجري القطر لما يفوت
ويهرب من حمولة كمان
كجري العمر والأزمان
أنا بجري كأني صحيت
كأني لقيت
كأني بقيت
كأني عمري يوم ما بكيت
كأن الآتي والماضي
كلام فاضي
بدون معنى
كأني لقيت طريق صدفة
وكان قادر يجمّعنا
مفيش قوة ف زوايا الزمن
تقرر يوم ترجّعنا
ورغم الغرقانين في الوهم
بنجري 
نجري 
زي السهم
نكسّر كل شئ ثابت
دي أفكار الحياة والموت
خلاص من بؤسها 
شابت
وأصبح كل شئ فاضح
هنجري 
طول ما فيه أنفاس
وجوانا الطريق واضح

" كأنّي عُمري يوم ما بكيت" - عصام شوقي

رسايل الموت الأخيرة، (مزج) 🖤

رمضان جانا. اهلا رمضان 🌙🥰

Ramadan. 🌙

كل سنه وكل امهات الدنيا بخير و صحة ديما 
- Subscribe to Ko7etee Channel | اشترك في قناه كوحيتي
https://bit.ly/3ii7wpm

- Follow me at Instagram | تابعوني علي الانستجرام
https://www.instagram.com/ko7etee

- Lyrics : Mohamed Salah | محمد صلاح
- Music Arrangement : Ko7etee | كوحيتي 
- {Special Thanks for My wife }


من يوم ما وعيت ع الدنيا ..
 وانا اول كلمة نطقها لسانى "هىَّ"
و دى سابت كل الدنيا ..
مرضتش تعيشها عشانها وعاشت ليَّا

وانا مهما احكى
مقدرش اعبر ع اللى فيا
انا كنت بحبى
و هى شايله المسؤوليه

لو مهما اغيب برجعلها
و ان غبت ثانيه اشتاقلها 
على قلبى شايل كل همى
و بلاقى راحتى فى حضنها
 
لو مهما اغيب برجعلها
و ان غبت ثانيه اشتاقلها 
على قلبى شايل كل همى
و بلاقى راحتى فى حضنها

Heya 2

Ko7etee - Hya 2 | "كوحيتي - هي "الجزء التانى

A new cover to a song named law kan li Qalban sang by Mustafa salah and guitar by Muhamed A.abdelaziz(zizo) keyboard by Ahmed ghazy --cajon by Islam Abd Ilsataar .
recorded mixed and mastered at zizo's home studio.

Ko7etee - Hya 2 | "كوحيتي - هي "الجزء التانى

Ko7etee - كوحّيتي