شعر : محمود عصام
عن ديوان : استراحة إبريل
توزيع : ميدو راشد


هي اختيارات 
وانتي اختارتي 
فـَ السكه تودّي يا بنت الناس 

السكه تودّي وماترجعش 

المظهر خادع احيانا
و الوش الطيّب مابينفعش

وان كانلك شئ جوه ضلوعي 
موضوعي وهوجدله حلوله 
بكتير الجرح شوية بن

ما هو الراجل .. راجل ليه 
مش برضو عشان مايقولش بحن 
ولا ينشر دمعه قصاد الناس 

فـَ ان كانلك رغبه انك تمشي 
السكه تودّي يا بنت الناس

وشك مكشوف .. عادي ياستي 
اسبابك فلصوا .. وايه يعني 
خليكي فريش

انا راضي بآسفه وكام معليش
ودموع لو فيه 
ولا بلاها

خبي التماسيح اللي معاها
الله يعفينا ويعفيكي 

من زيف الوهم اللي ماليكي
وينور ويقوي بصيرتك 

ويا ستي ان كان عالقيل والقال 
مش قيمتي اتدنى واجيب سيرتك

الناس بتمل ودي طبيعه 
في العالم اكمل مش فيكي 

فان كان احساسك متغير 
ارميلي الحمل اللي عليكي 

انا مدرك ومقدّر حالتك
مش هقولك اني اللي عملتك
ولا اني اللي بجبلك لبسك 

وبهنّي النطع عشان لبسك 
خليه يرتوّي من نفس الكاس

لو ودنك تعبانه اكتبلك 
" السكه تودّي يا بنت الناس "

بُن - محمود عصام

Mahmoud Esam (عصام)