في القايلة خرجت بالسرقة على امي نلعب بالزربوط و انقز في الكاري و الغميضة و  السبعة حجرات و كانت اخر المرات                                           
تفيق بيا و تنحيلي والديا و تعطيني طريحة نباشة لقبور 
و في عشيتها ننساو في الي مروح في البابور 
و تعرضو ميما بالهلالو و هو بطبيعتو لمشومة على حالو  و اخر مرا نشوفوه و اخر المرات 
                                                      
قبيح و زبرات و ياقف في راس النهج في عشية صيف و الشهيلي يعرقها و حل الكعبة و يطرشقها و يشربها و يخلط عيها ثلاثة كعبات و كانت اخر المرات 
يكش عليا بابا و يقلي ايجا قيل لا نحكلك الفلفل ، نقرص خويا الصغير و يبكي و يشنعها و لاعاد فما قايلة و لا نوم و نبردها بكعبة فريقولو و مماتي تخرفلنا حكايات و كانت اخر المرات 
 
رمضان رمضن و لساني بياض
و امي اطمع فيا بالمالح و البريكات و الزلابية و المخارق و الحلويات و كانت اخر المرات 
و لحمي زراق بالناموس و ريحة السبخة تفوح و تعرف الي الصيف في حومتنا شرف و تعرف الي سخانتو تخوف 
كيف تطلع في الكار و المترو و تهبط تتنفس بالقصبة و تنصح الي تحب بالشب و البرفنات و كانت اخر المرات
و للبحر مشينا و بالرمل عملنا لخويا دفينة و قام و نفظو علينا لين عمالنا عينينا و شللنا بالما و قرصتنا الحريقة و فطرنا الطاجين و السلاطة و بردنا بقازوزة و بطيخة و في الليل شعلنا العافية و غنينا غنايات و كانت اخر المرات 
صيف تعدا و صيف قعد و في حجري تمد و فك مني ميما و فك الي روح من فرنسا و صغري و الي تعدا من عمري ، صيف لعرق و عروسات فوق السطوحات و  بيوع الشراب بالسرقة و ولاد الحومة يكمبسو في حرقة و حومتنا بالعرك خلات و كانت اخر المرات
نسمة حلق الواد و بوسعيد و في قهاوي لمدينة كل ليلة عيد و المشموم المركوز لمزين بالياسمينات و كانت اخر المرات ..

آخر المرات


يا معصية.. يا ذنوب.. 
وقتاش منك نتوب ؟
يا خطيئة.. يا غلطة.. ما تتمحاش ..
يا زهر ما فماش.. 
يا جرح ڨلبي لي ما براش ..
يا بخت مفڨود.. يا عشقه سعدها مكبوب .. الحجرة تذوب و الروح لي عشقة مرّة محال إتوب .. يا مكتوب .. ما منوش هروب .. 
من الوحش جرحي متحير معطوب ..
نتڨّي .. و نخبّي .. 
نصبر .. و نكذّب ..
و نڨول وحشها لا ما يعذّب ..
و سرها في جواجيا ذايب ..
حبيتها و نحبها و هي عز الحبايب ..
و كل ما نفكرها دمع العين يحدر سكايب .. يا ضلام .. موحش من بعدها .. 
لا شرڨت الشمس .. 
و لا هب نسيم يروح عالنفس .. 
و الكدر و الزمم فوڨ صدري تكدس ..
نكتب نص .. بدمايت جرح ينزف .. 
على ڨلب تردف .. 
و حبها لين زعف ...
.............
يا زمان قداشك خوان طحان 
تعطيني لمان وتخطفها وتودني بلمحان
وجاه ربي وربها في عالي سماه 
وغلاوة مبسمها والزين الي غطاه 
لا ننساها ولا نحيها من افادي 
لا نجم نخطاها ونعيش كي اندادي 
لا تسوى رشفة الميّة وهي مش من كفوفكها
ولا تحلى غزرة من غير ما عيني تشوفها
ندعيلها وندعي عليها
نجريلها وعيني فيها
نحكيلها ونبكي عليها
نشكيلها ملي مني سرقها 
نكفر بروايح زنودها وننقض فرضي بعرقها

يا غصة في الجاش مكوية 
يا نار شاعلة في عبي مرمية 
يا رعشة تلبني تزيلفني مشتهية
يا غصة متروكة مش منسية
يا للاتهم 
يا تسلطينة في مواويل غناياتهم 
يا تسلهيبة من لياليهم وفروحاتهم 
يا حضن دافي ماجبتا اماتهم

يلعنها ويهديها 
ندفنها بش نعاود نحييها
نضربها بش نرجع نرضيها
ننفسها وبدم جروحي نداويها 

يلعن كل دقة في قلبي دقت على بابها 
يلعن كل دمعة سالت سقات الياسمين على ترابها

يلعن حبها
يلعن غدرتها
يلعن عمري قبل عمرها
يلعن ربي وربها ... علاش مزلت نحبها
وعمري عندها تخطف
والجرح عمالو ينز ماجف
ولكنين بهواها وسماها زاد حلف
تي خليها ... بالك نزيد نهواها ونخف ...
__________
نص مشترك مع Amine Gallah

يا - معصية


حبك بروال ملية معرية على خلخال ، دلال في لساني موال بعد صيامي شوال و في فرحي تعرى و توضى و في حجري صلى و ما قعد فيا ما خلى و تجلى في باب سقيفتي تعلى و تململ و تملى و درجحني بينك و بين قضايا نعن دين سمايا غنايا غناها مهبول نسايا و نسا شطرها و قبرها و حاجبها مال على شفرها و نكرها و البسمة ذبلها و هبلها و نظمها و في مخو خبلها و نشرها في شريطة و كركها و مدها على كرشها و باس خدها و خلاها و بلاها بريحو ذكاها و زهاها و شرب دموعو و عرقها و فرقها من بين السبلة و السبلة دبلة عسل و شهد تمتع لين تهد و شد ظهرها و رقد و نفسو حار محتار صحة ليه مزهار جنبو في جنبها تعبها طيحها و قام على ضحكتها لي بناها بخزرة حلاها و بكلمتين فطر عقلها و رزنها و برولها و خرج و قلها في عشقي فرج و بدنك لبدني حج و بعدك مر حدج لا تخليني و لا تخلاها بيا و تهرب و ما نلقاكش و لا تغطيلي عينيا لا نشوفك لا نحسك يا عنبر يا عطر امسك يا انت يا انا يا احنا ...
هملت في بدني حبك و سمك و همك نعمبوك ما سمك ما حنك و كمل فيا على يدايا صورني و علقني و اقلبني و تشوفني بقلبك دا يلمك علاش تملا فيا الوان ما تحياش و تخلقها و ما تربيهاش ما تسواش ما توحشتكش ملول ما هملتكش و ما عذبتكش و في جاشي شمعة حرقتني و ما طفيتكش و ما نشدش على الحا و نرخفها و نحبك نزرفها و من يدك عسل يقطر نغرفها و تمرار في لساني و نزعفها نكرهك و نحبك و منك هجيت و تحت جناحك فرشت و تمديت و سبيتك يا مشومة يالي حليت و بابي حليت و شرعتو على فردة و دخلت شاردة مورده مقلده الطاوس في المشية نعمو سرك نحبك ..

ياسمين الماجري feat Nassaya TAH RAH

سِرِّكْ

... إيجَا

krahet rou7i- كرهت روحي

تخليني نعشقك

بجاه اللي خلقك و خلقني

مُوش وَحش ، 
وراس امي موش وحش.. 
أمّا نحب نعرف
نعرف شتعمل ،
 نعرف اش ولِّيت ..
نحب تُعرُضني صُدفة ، 
مِن غزراني لتصاورك فدّيت ..
نحب نُغلط في نُومرو ،
وتطلع إنتِ لهزِّيت ..
نحب ترجَع ليّام بالتوالي..
يرجع قلبي خالي ..
وليك ما حبِّيت ..
نحب نسمَع خبارك ..
ونعرف أسامي صغارك ..
نحب الستيلو إشِيح
 ، تي حبارو كلّو هبالك ..
 نحب نعرف آش حالك ..
نحب نعرف وين وصُلت  بحلامك ..
ل في وذني وشوشتهم 
 وعندي خبِّيت ...
نحب نعرف إنتِ هي هي كما خليت ..
ولا تبدّلت مع حُب جديد ..
نحب نعرف خبارك ...
في أنا حومة تسكن
 ولشكون ولّيت تحكي أسرارك .. ..
نحب نسافر ، لبلاد بعيدة ٠٠
ونقوم الصباح  نحل الشباك نلقى رُوحي جارك 
نحب نِشري فلوكة،
 ونضيع في بحر !!
لا بُوصلة لا طريق سالك 
ويهبط اللِّيل، 
وُسط نجوم السماء نشوف خيالك 
نًنسى المُوج ونطلع ..
 نطلع لَخدُودك ..
تي ماهو فمَّا بوسة نسالهالك ..
 [ texte : Med.Salah ]

نحب نعرف

أنا و انت

تي شنية ؟

مني و منك ثنين متراضين متباغضين 
مني و منك بحر ماه صافي و غريقو مر 
بيني و بينك سفر ، 
ما يهزنا لبعضنا كان الساقين 
في خاطري ممدودة ، 
نقرالك في الكف ، ظهرك ترخف و حملك خف 
لابستني كي رداك نحس في دفاك محلاك 
عاد قتلك نقرالك في الكف ،
كف يديك الحمرا المكنوزه ، و الشفة عليها الروح مركوزه 
نطلع نطلع نطلع 
لحمك قام شوك ، تخاف لا يشوفوك ، مسوك ؟ 
والا قرايتي ليك خرجتك قلمْ ،
لفيتني بكف و قتلي يزي عف تلمْ
انا كتيبه تبدا و ما توفاش ، ما تقراهاش ، 
قلي علاش ما نمسكش ؟
علاش العين تشوف و القلب ميت بالخوف ،
أبيض صافي حليب ، أنا لقلبك حبيب 
قلي علاش ما نحبكش ؟
شفت في عينيك خزرة و سمعت من صوتك نبرة 
ما نعرفهاش 
جديدة عليا أول مرة نمسها أول مرة نحسها 
كي حطيت يدي و مسيت لحمك و ثبتْ في عروقك السايل فيها الدم 
مانيش باش نتلم 
باش نزيد نبوسك و باش نزيد نحبك باش نزيد نهبل بيك و معاك 
هات كفك لاخر نقراه 
هات خلي نكشف المستور 
و الا تخاف لا بدنك عليا يثور

Musique : Eternity And A Day - Eleni Karaindrou

آخر المرات

Yasmeen Mejri